Luuk 17 - WƖA TENIŊ

Yesu bʋl wɩaa a tɩgɛ wʋbɔmʋŋ lɛ

¹ Yesu bʋla pɩ ʋ harɩ-tooroo, “Wɩalɩŋ sɩ jaŋ leŋ dɩ nɩaa ŋaa wʋbɔmʋŋ jaŋ hɛ nɩmɛ. Ama wɩɩŋ puu nɩɩ-la lɛ wɩalɩŋ sɩ to kɔ.

² Dɩ ba nɛ joŋ nɔmʋŋ a vɔɔ laalɛ ʋ baŋŋaa lɛ a joŋu yuo hɛ mʋgʋ-balɩŋ tʋɔŋ dɩ ʋ nyʋa lɩɩŋ a sʋʋ, ŋɩɩ nɛ kpɩa ʋ sɩ jaŋ ŋaa dɩ hambiisiŋ deemba tʋɔŋ kʋbala ŋaa wʋbɔmʋŋ.

³ Má pɔ ma tɩtɩa lɛ. Dɩ ŋ naambie nɛ ŋaa wʋbɔŋ, ŋaa goŋ ʋ nyuŋ. Dɩ ʋ nɛ sɩ ʋ cheye nɛ, joŋo chɛʋ.

⁴ Dɩ ʋ nɛ ŋaa wɩɩ cheyiŋ aŋ kʋ bʋla pɩŋ arɩ ʋ cheye nɛ, a ŋaa ŋɩɩ a yi naansɩɩŋ bʋlɩpɛ chɛ-bala, joŋo chɛʋ.”

Yesu bʋl wɩaa a tɩgɛ Wɩa laa diiniŋ lɛ

⁵ Ŋɩɩ nɛ Yesu nanzɔɔba-la bʋla pʋ, “La Tɩɩna, ŋaa dɩ la Wɩa laa diiniŋ yʋgɛ kɩŋkɛŋ.”

⁶ Ŋɩɩ nɛ La Tɩɩna Yesu bʋla pɩba, “Dɩ ma laa diiniŋ nɛ fa magɛ kʋŋ biiŋ ba sɩɩ yɩrɛ masɩtad, ma fa jaŋ wuo bʋla pɩ tɩa dɩ ʋ churi ʋ tɩtɩa lɛ a mʋ chɔnsɛ mʋgʋ-balɩŋ tʋɔŋ. Ʋ fa jaŋ to ma niiŋ lɛ a ŋaa ŋɩɩ.”

Yesu bʋl tɩntɩnnaa tɩntɩmɩŋ wɩaa

⁷ Ŋɩɩ nɛ Yesu bɩra bʋl, “Dɩ ma kʋŋ nɛ kɛŋ tɩntɩnnʋ ʋ pɩpɛrɛ ŋ baga lɛ koo ʋ dɩdaa ŋ piesee, dɩ ʋ nɛ lɩɩ baga koo pie-daalɩŋ kɔ, ŋ jaŋ bʋla pʋ dɩ ʋ ŋaa lɩma a kʋ dii kʋdiilee?

⁸ Aɩ, ma jaŋ bʋla pʋ dɩ ʋ ŋaa siri a laalɛ ʋ gɛnnɩŋ a ŋaa kʋdiilee pɩŋ dɩ ŋ dii. Dɩ ŋ nɛ dii dɛrɛ, ʋ ma jaŋ wuo dii ʋ kʋdiilee.

⁹ Ŋ jaŋ lɔllɛ ŋ tɩntɩnnʋ-la a tɩŋ ʋ sɩ ŋaa wɩalɩŋ ŋ sɩ dagʋ wɩaa?

¹⁰ Ma saa nagɛ ŋɩɩ nɛ. Dɩ ma nɛ ŋaa wɩalɩŋ kala ba sɩ sɩ dɩ ma ŋaa, ʋ maga dɩ ma bʋl, ‘La ŋaa tɩntɩnnaa nɛ, ʋ bɩ maga dɩ ba lɔllɛla. Tɩntɩmɩɩ-la sɩ maga dɩ la tɩŋ nɛ la tɩŋ.’ ”

Yesu vaarɛ gbegisiŋ fii

¹¹ Ŋɩɩ nɛ Yesu bɩra sii mʋ Jerusalɛm dɩɩrɩŋ. Ʋ to Samarɩa tinteeŋ arɩ Galilii tinteeŋ bʋa nɛ a mʋ.

¹² Ŋɩɩ nɛ ʋ mʋ jʋʋ taŋ kʋbala, dɩ gbegisiŋ fii kʋ chemu. Ba fa chɩŋ dɩ-bolii nɛ

¹³ aŋ faasa yɩrɛ a bʋl, “Yesu, la Kʋhɩaŋ, fá la nenige.”

¹⁴ Ŋɩɩ nɛ Yesu naba a bʋl, “Má kɛŋ ma tɩtɩa mʋ a dagɛ Wɩɩsʋllɩ sɩpaalaaraa.” Ŋɩɩ nɛ ba mʋ. Ba sɩɩ mʋ ŋɩɩ, ba duori.

¹⁵ Ba tʋɔŋ dɔŋɔ sɩ na dɩ ʋ duoro, ʋ mɩɩrɛ a faasa dɩdɛnnɛ Wɩa.

¹⁶ Ʋ mʋ Yesu teeŋ a tuu tele chu Yesu sɩpaaŋ a lɔllʋ. Baal-la fa ŋaa Samarɩa tɩɩna nɛ.

¹⁷ Ŋɩɩ nɛ Yesu pɩɛsʋ, “Nɩaa fii dee mɩ vaarɛɛ? Nɩɩ nɛ nibi-la hɛ?

¹⁸ Bɛɛ nɛ tɩɩ nʋhʋɔra deeŋ dʋndʋŋa nɛ mɩɩra kɔ dɩ ʋ lɔllɛ Wɩa?”

¹⁹ Ŋɩɩ nɛ Yesu bʋla pɩ baal-la, “Sii a viiri, ŋ sɩ laa Wɩa dii nɛ ŋaa ŋ duori.”

Yesu bʋl wɩaa a tɩgɛ bʋa-la lɛ Wɩa kuorii-la sɩ jaŋ kɔ

²⁰ Ŋɩɩ nɛ Farisii tɩŋŋaa pɩɛsɛ Yesu dɩ bʋa bɛɛ lɛ nɛ Wɩa kuorii-la jaŋ kɔ? Ŋɩɩ nɛ ʋ bʋla pɩba, “Dɩ Wɩa kuorii-la nɛ jaŋ kɔ, wʋmagɩl dee bɩ jaŋ ŋaa dɩ nɩaa jɩŋ.

²¹ Nʋʋkala ma bɩ jaŋ wuo bʋl, ‘Bee na, ʋ hɛ daha koo ʋ hɛ nɩmɛ.’ Má bee na, Wɩa kuorii-la hɛ ma tʋɔŋ nɛ.”

²² Ŋɩɩ nɛ ʋ bʋla pɩ ʋ harɩ-tooro-la, “Tapʋlɩɩ jaŋ yi dɩ ma cho dɩ ma na mɩ-na Nuhuobiine Bie tapʋlaa tʋɔŋ chɛ-bala dʋndʋŋa maa. Ama ma bɩ jaŋ wuo namɛ.

²³ Nɩaa dɔnsʋŋ jaŋ bʋla pɩma, ‘Naʋ, ʋ nɛ ŋ-la, koo, na ʋ nɛ hɛ daha.’ Dɩ ba nɛ bʋl ŋɩɩ, má sɩ́ lɩɩ gɔllɔ chɩchɛʋ.

²⁴ Mɩ-na Nuhuobiine Bie sɩ jaŋ mɩɩra kɔ tapʋlɩɩ-la, ʋ jaŋ nagɛ duonuŋ sɩ lɩgɩsa a lɩɩ wɩa-nyuŋ sɛmɛ dɔŋɔ a kʋ tuu sɛmɛ dɔŋɔ.

²⁵ Ama mɩ jaŋ laa sɩpaaŋ na hɛɛŋ. Ma lɛɛlɛ nɩaa, ma jaŋ vɩamɛ.

²⁶ Bʋa-la lɛ mɩ-na Nuhuobiine Bie sɩ jaŋ mɩɩra kɔ, ʋ jaŋ nagɛ bʋa-la lɛ Nowa fa sɩ hɛ ʋ mɩɩsɩŋ lɛ.

²⁷ Bʋa-la lɛ nɩaa faa dii kʋdiilee nɛ a nyʋnyʋa kɩaa, haalaa arɩ baalaa ma jɩjaa dɔŋɔ a mʋ yi tapʋlɩɩ-la Nowa fa sɩ jʋʋ lɩɩŋ daboro-la tʋɔŋ. Ka lɩɩŋ kʋ pɛllɛ paa nɩalɩŋ dɔnsʋŋ kala, ba sʋʋ.

²⁸ Ʋ jaŋ bɩra nagɛ bʋa-la lɛ Lɔt fa sɩ hɛ ʋ mɩɩsɩŋ lɛ. Nɩaa fa hɛ nɩmɛ nɛ a didii kʋdiilee, a nyʋnyʋa kɩaa, a yɩyallɛ kɩaa, a yʋyɔɔ kɩaa, a duduu kɩaa a sɩsaa dɩɩsɩŋ ma.

²⁹ Ama tapʋlɩɩ-la Lɔt sɩ lɩɩ taŋ kʋbala ba sɩɩ yɩrɛ Sodom lɛ, nyiniŋ arɩ jiribiiŋ lɩɩ wɩa-nyuŋ nɛ a kʋ tuu kpʋ nɩalɩŋ kala.

³⁰ Ŋɩɩ nɛ ʋ jaŋ nagɛ tapʋlɩɩ-la mɩ-na Nuhuobiine Bie ma sɩ jaŋ mɩɩra kɔ.

³¹ Dɩ nʋʋ nɛ hɛ ʋ lusuŋ nyuŋ tapʋlɩɩ-la lɛ aŋ kɛŋ kɩaa ʋ dɩa tʋɔŋ, ʋ bɩ maga dɩ ʋ kʋ tuu a chɩchɛ ʋ jʋʋ paa ʋ kɩalɩŋ. Dɩ nʋʋ ma nɛ hɛ baga lɛ, ʋ sɩ́ chɩchɛ dɩ ʋ mɩɩra mʋ dɩa a joŋ kʋŋ.

³² Má liise yi wɩɩ-la sɩ ŋaa Lɔt haala lɛ.

³³ Nɩɩ-la kala sɩɩ walɩmɛ dɩ ʋ laa ʋ mɩɩsɩŋ, ʋ jaŋ joŋo ta. Nɩɩ-la kala ma sɩ joŋ ʋ mɩɩsɩŋ ta, ʋ jaŋ laa ʋ mɩɩsɩŋ.

³⁴ Mɩ jaŋ bʋla pɩma, tapʋlɩɩ-la nɩaa balɩa jaŋ pɩŋ doŋ godo bala nyuŋ tɩtaŋɩŋ, Wɩa jaŋ joŋ dɔŋɔ aŋ leŋ dɔŋɔ ta.

³⁵ Haalaa balɩa ma jaŋ nʋnɔŋ munuŋ. Wɩa jaŋ joŋ dɔŋɔ aŋ leŋ dɔŋɔ ta.

³⁶ Baalaa balɩa ma jaŋ hɛ baga lɛ a pɩpɛrɛ, Wɩa jaŋ joŋ dɔŋɔ aŋ leŋ dɔŋɔ ta.”

³⁷ Ŋɩɩ nɛ Yesu harɩ-tooro-la pɩɛsʋ, “Nɩɩ lɛ nɛ ŋɩɩ, La Tɩɩna?” Ŋɩɩ nɛ Yesu bʋla pɩba, “Lee-la kʋpʋɔŋ sɩ pɩna, nɩmɛ nɛ duunuŋ hihilimi.”