Luuk 15 - WƖA TENIŊ

Yesu magɛ namaga a tɩgɛ piesu-la sɩ lɛlɛ lɛ

¹ Tapʋlɩɩ kʋbala lampoo laaraa arɩ wʋbɔŋ ŋaaraa yʋgɛ a kɔ Yesu teeŋ dɩ ba jegile nɩɩ ʋ wɩaa.

² Ŋɩɩ nɛ Farisii tɩŋŋaa arɩ Wɩa teniŋ kerichiba suomo gʋgʋrɩmɛ wɩaa a bʋl, “Baala deeŋ leŋe wʋbɔŋ ŋaaraa kʋkɔ ʋ teeŋ nɛ aŋ pɛ leŋ ʋ dɩ ba kala didii kɩaa.”

³ Yesu sɩ nɩɩ ŋɩɩ, ʋ magɛ namaga pɩba,

⁴ “Baal kʋbala nɛ hɛ nɩmɛ a kɛŋ piesee zɔlɔ. Ŋɩɩ nɛ ba tʋɔŋ dɔŋɔ lɛl. Ʋ leŋ piesee mahɩŋ banɛsɛ arɩ fii arɩ nibi-la ta gɩrɩŋ tʋɔŋ aŋ gɔllɔ chɩchɛ pie-lɛlɩɩ-la a bʋl dɩ see dɩ ʋ chɛ naʋ.

⁵ Ʋ sɩ naʋ, ʋ joŋo baasɛ a jʋjʋɔsɛ

⁶ a kaa mʋ dɩa, a yɩrɛ ʋ nandɔnsʋŋ arɩ ʋ pɛ-jʋʋraa a bʋla pɩba, ‘Má leŋ dɩ la kala tʋɔŋ tɔrɛ. Mɩ na mɩ piesu-la sɩ lɛlɛ nɛ.’ ”

⁷ Yesu dagɛ namaga-la bʋbʋɔŋ a bʋl, “Dɩ wʋbɔŋ ŋaaraa kʋbala ma nɛ bɩrɩma lɩɩ ʋ wʋbɔŋŋɔɔ lɛ, nɩalɩŋ sɩ hɛ Wɩa-jaŋ lɛ, ba tʋɔŋ jaŋ tɔrɛ. Ba tʋɔŋ jaŋ tɔrɛ nɩa deeŋ nyuŋ a kɩɩ nɩaa mahɩŋ banɛsɛ arɩ fii arɩ nibi-la sɩ kɛŋ tʋɔpʋla a bɩra bɩ maga dɩ ba bɩrɩma lɩɩ ba wʋbɔŋŋɔɔ lɛ.

Haal-la moribiee sɩ lɛlɛ

⁸ La joŋ arɩ haal nɛ hɛ nɩmɛ a kɛŋ sɛlɩmɛ moribii-biiŋ fii, dɩ dɔŋɔ lɛl. Ɛɛ nɛ ʋ jaŋ ŋaa? Ʋ jaŋ nyɩgɛ nyiniŋ a tii ʋ dɩa kala a beŋ woruŋ see dɩ ʋ naʋ.

⁹ Ʋ sɩ naʋ, ʋ yɩrɛ ʋ tanlɔsʋŋ arɩ ʋ pɛ-jʋʋraa kala a hɛ dɔŋɔ a bʋla pɩba, ‘Má leŋ dɩ la kala tʋɔŋ tɔrɛ. Mɩ moribii-la sɩ lɛlɛ, mɩ naʋ nɛ.’ ”

¹⁰ Ŋɩɩ nɛ Yesu bʋl, “Mɩ jaŋ bʋla pɩma arɩ ŋɩɩ tɩtɩa nɛ, dɩ wʋbɔŋ ŋaaraa kʋbala nɛ bɩrɩma lɩɩ ʋ wʋbɔŋŋɔɔ lɛ, Wɩa tɩndaaraa yie jʋjʋɔsɛ nɛ.”

Yesu magɛ namaga a tɩgɛ bile sɩ lɛlɛ lɛ

¹¹ Yesu bɩra magɛ namaga dɔŋɔ a bʋl, “Baal kʋbala nɛ hɛ nɩmɛ a kɛŋ ʋ hambolibiisiŋ balɩa.

¹² Ŋɩɩ nɛ ba tʋɔŋ kʋbie sii mʋ bʋla pɩ ʋ nyɩmma, ‘Mɩ nyɩmma, kɩalɩŋ ŋ sɩ jaŋ sʋʋ aŋ ka pɩla, joŋ mɩ toruŋ pɩmɛ.’ Ŋɩɩ nɛ ʋ kɛŋ kɩalɩŋ kaa kpaa.

¹³ Ʋ bɩ diene, ka ba tʋɔŋ kʋbie-la sii paa ʋ toruŋ kala ʋ sɩ laa a hɛ dɔŋɔ lɛ, a sii mʋ ta-bolii kʋbala. Nɩmɛ nɛ ʋ kɛŋ kɩalɩŋ kala kaa mʋ ŋaa wʋtɔɔnʋŋ, ba kala dɛrɛ.

¹⁴ Ʋ sɩ dii kɩalɩŋ kala dɛrɛ ŋɩɩ, dɩ losuŋ jʋʋ taŋ-la woruŋ. Ʋ chɛ kʋdiilee ka.

¹⁵ Ŋɩɩ nɛ ʋ chɩchɛ tɩntɩŋŋaa. Taŋ-la nʋʋ joŋu dɩ ʋ bibeŋ ʋ toonuŋ.

¹⁶ Ʋ sɩɩ daa toonu-la, nʋʋkala bɩ ʋ kʋdiilee ka pa. Ʋ fa chɩchɛ dɩ ʋ dii toonu-la kʋdiilee.

¹⁷ Ŋɩɩ nɛ ʋ bɩɩnɛ ʋ tʋɔŋ lɛ a mʋ yi ʋ nyɩmma lɛ a bʋl, ‘Mɩ nyɩmma ma kɛŋ tɩntɩnnaa yʋgɛ nɛ. Ba kala nɩna kʋdiilee didii aŋ kɩka, aŋ ka mɩ-na hɛ daha a sʋsʋʋ losuŋ.

¹⁸ Mɩ jaŋ sii a mɩɩra mʋ mɩ nyɩmma teeŋ. Dɩ mɩ nɛ mʋa, mɩ jaŋ bʋla pʋ: Mɩ nyɩmma, mɩ ŋaa wʋbɔŋ nɛ arɩ Wɩa arɩŋ kala.

¹⁹ Ʋ bɩra bɩ maga dɩ mɩ ŋaa ŋ bii. Jommi dɩ mɩ pɛ ŋ tɩntɩnnaa lɛ dɩ la tɩtɩŋ.’ Ŋɩɩ nɛ ʋ sii a kʋkɔ ʋ nyɩmma teeŋ.

²⁰ Ʋ sɩ kɔ ʋ nyɩmma teeŋ, ʋ fa ha hɛ dɩ-bolii nɛ, ka ʋ nyɩmma naʋ. Nenige kɛnʋ woruŋ. Ʋ fá mʋ a guoru.

²¹ Ŋɩɩ nɛ bile bʋla pɩ ʋ nyɩmma a bʋl, ‘Mɩ ŋaa wʋbɔŋ nɛ arɩ Wɩa arɩŋ kala. Ʋ bɩra bɩ maga dɩ mɩ ŋaa ŋ bii.’

²² Ama ʋ nyɩmma ha bʋla pɩ ʋ tɩntɩnnaa a bʋl, ‘Má mʋ lɩma a joŋ gɛrɩ-zɔmʋŋ a kaa kʋ laalʋ. Má joŋ nenii-pɩrɩŋ ma a hɛ ʋ nɩsɩŋ aŋ joŋ nɛntɛŋŋɛɛ ma a hɛʋ.

²³ Má mʋ kɛŋ nɛŋ-la ma sɩ nɛrɛ a kaa kʋ kpʋ dɩ la kala dii, dɩ la tʋɔŋ tɔrɛ.

²⁴ Ʋ naga mɩ bie deeŋ fa sʋba nɛ aŋ lɛɛlɛ sii. Ʋ fa lɛlɛ nɛ, ka la lɛɛlɛ naʋ.’ Ŋɩɩ nɛ ba dii kɩaa arɩ tʋɔtɔrʋŋ.

²⁵ Bʋa-la lɛ dɩ bile malɩma hɛ baga lɛ. Ŋɩɩ nɛ ʋ kɔ dɩa. Ʋ sɩ kʋ kpagɛ ʋ dɩa, ʋ nɩa dɩ baa du kɩaa a gʋgʋa.

²⁶ Ŋɩɩ nɛ ʋ yɩrɛ ʋ nyɩmma tɩntɩnna-la dɔŋɔ a pɩɛsʋ, ‘Bɛɛ nɛ baa ŋaa ŋɩɩ?’

²⁷ Ʋ bʋla pʋ, ‘Ŋ ŋaana nɛ mɩɩra kɔ. Ŋɩɩ nɛ ŋ nyɩmma kɛŋ nɛ-fere a kpʋ a pʋ, bɛɛ wɩaa ʋ mɩɩra kɔ dɩa arɩ yarɩfɩɛlaa nɛ.’

²⁸ Ŋɩɩ nɛ bile malɩma-la na baanɩŋ kɩŋkɛŋ. Ʋ bɩ dɩa jʋa. Ʋ nyɩmma kʋ lɩɩ a sʋlʋ dɩ ʋ kʋ jʋʋ dɩa.

²⁹ Bile bʋla pɩ ʋ nyɩmma, ‘Jɩsɩŋ deemba kala lɛ mɩ faasa tɩŋ tɩntɩŋŋaa woruŋ a pɩŋ. Mɩ ha bɩ ŋ niiŋ wɩaa vɩa chɛ-bala maa. Bɛɛ kʋŋ nɛ ŋ saa pɩmɛ? Ŋ ha bɩ bʋ-bie ma kaa pɩmɛ dɩ mɩ kpʋ la dɩ ma nandɔnsʋŋ gbieli gbiele aŋ chaŋ.

³⁰ Ka ŋ bie deeŋ-na kɛŋ ŋ kɩaa kala chei hachɔrʋmʋŋ lɛ. Ka ʋ sɩ mɩɩra kɔ dɩa ŋɩɩ, ŋ kpʋ nɛ-fere a pʋ.’

³¹ Ŋɩɩ nɛ bile nyɩmma bʋla pʋ, ‘Mɩ bii, ŋ yie hɛ dɩa lɛ bʋa na-kala lɛ nɛ. Kʋŋkala mɩ sɩ kɛnɛ, ŋ ma nɛ tɩɩʋ.

³² Ama ʋ maga dɩ la gbieli gbiele a leŋ dɩ la tʋɔŋ tɔrɛ nɛ, bɛɛ wɩaa ʋ nagɛ ŋ ŋaana deeŋ fa sʋba nɛ aŋ sii. Ʋ fa lɛlɛ nɛ, ka la lɛɛlɛ naʋ.’ ”