Luuk 13 - WƖA TENIŊ

Yesu bʋla pɩ nɩaa dɩ ba bɩrɩma lɩɩ ba wʋbɔŋŋɔɔ lɛ

¹ Bʋa-la lɛ Yesu fa sɩ bʋl wɩaa pɩpɩ nɩaa, nɩalɩŋ dɔnsʋŋ fa sɩ hɛ nɩmɛ bʋl wɩaa pʋ a mʋ tɩgɛ Paalɩt lɛ. Ʋ fa kpʋ Galilii tɩŋŋaa dɔnsʋŋ nɛ bʋa-la lɛ ba sɩ kpʋ pʋsʋŋ pɩpɩ Wɩa.

² Ŋɩɩ nɛ Yesu pɩɛsɛba, “Ma bɩɩna arɩ Galilii tɩŋŋaa deemba Paalɩt sɩ kpʋa nɛ ŋaa wʋbɔŋ a kɩɩ Galilii tɩŋŋaa dɔnsʋŋ kalaa?

³ Aɩ, ŋɩɩ dee. Dɩ ma nɛ bɩ bɩrɩma lɩɩ ma wʋbɔŋŋɔɔ lɛ, ma kala jaŋ sʋʋ arɩ nɩaa deemba sɩ sʋʋ ŋɩɩ.

⁴ Nɩalɩŋ fii arɩ chori ma fa sɩ hɛ nɩmɛ, dɩɩ-leŋiŋ tele ŋmooba kpʋ Sɩlʋam lɛ. Ma bɩɩna arɩ ba nɛ ŋaa wʋbɔŋŋɔɔ a kɩɩ nɩalɩŋ dɔnsʋŋ kala fa sɩ hɛ Jerusalɛm lɛ koo?

⁵ Aɩ, ŋɩɩ dee. Mɩ bʋlaa pɩma, dɩ ma kala bɩ bɩrɩma lɩɩ ma wʋbɔŋŋɔɔ lɛ, ma kala jaŋ sʋʋ a nagɛ nɩaa deemba fa sɩ sʋʋ ŋɩɩ.”

Yesu magɛ namaga a tɩgɛ tɩa sɩ bɩ nɛŋ lɛ

⁶ Ŋɩɩ nɛ Yesu magɛ namaga deeŋ, “Baal kʋbala nɛ fa hɛ nɩmɛ. Ʋ fa kɛŋ tutogo nɛ ʋ baga lɛ. Tutogo-la nɛnɩŋ yi, ʋ mʋ a chɩchɛ nɛnɛɛ tutogo-la lɛ. Ʋ bɩ nɛŋ kala na.

⁷ Ŋɩɩ nɛ ʋ bʋla pɩ ʋ bagɩ-paara, ‘Jɩsɩŋ batori nɛ ŋ-la tɩa-la sɩ bɩ nɛnɛ, ʋ maga dɩ ŋ kere ta nɛ. Ʋ chɩna tɔ leriŋ nɛ.’

⁸ Ŋɩɩ nɛ bagɩ-paarʋ-la bʋla pʋ, ‘Mɩ kʋhɩaŋ, leŋ dɩ ʋ chɩŋ jɩna deeŋ ma lɛ dɩ la na. Mɩ jaŋ huro golli ʋ bʋbʋɔŋ a hɛ na-bɩnɩŋ.

⁹ Dɩ ʋ nɛ nɛnɛ harɩŋ jɩna-la lɛ, ʋ zɔmɔ. Dɩ ʋ nɛ bɩ nɛnɛ, kere ta.’ ”

Yesu vaarɛ gʋma tɩɩna

¹⁰ Chɛ-wiesii-la chɛɛ kʋbala Yesu jʋʋ Wɩɩchʋɔlɛ dɩa a dɩdagɛ nɩaa Wɩa wɩaa.

¹¹ Dɩ haal kʋbala hɛ nɩmɛ, jɩŋ-bɔmʋŋ kɛnʋ ʋ wɩɩlɛ ŋɩɩ jɩsɩŋ fii arɩ chori. Ʋ fa kɛnʋ bori nɛ, ʋ bɩ wuo tɩɛnaa chɩŋ.

¹² Yesu sɩ na haal-la, ʋ yɩrʋ ʋ kɔ ʋ teeŋ, ʋ bʋl, “Haal, ŋ duoro nɛ. Ŋ nyanyalɩɩ-la lɩɩ ŋ lɛ nɛ.”

¹³ Ŋɩɩ nɛ ʋ joŋ ʋ nɩsaa a daŋ haal-la lɛ. Haal-la guu tɩɛnɛ a dɛnnɛ Wɩa.

¹⁴ Ŋɩɩ nɛ Wɩɩchʋɔlɛ dɩa-la kʋhɩaŋ na baanɩŋ arɩ Yesu sɩ vaarɛ nɩaa chɛ-wiesii-la chɛɛŋ. Ʋ bʋla pɩ nɩalɩŋ a bʋl, “Tapʋlaa balɩdʋ nɛ maga la tɩŋ tɩntɩŋŋaa. Ŋɩɩ wɩaa ma kɔ tapʋlɩa-la dɩ ba vaarɛma, ama chɛ-wiesii-la chɛɛŋ dee.”

¹⁵ Ŋɩɩ nɛ La Tɩɩna bʋla pʋ, “Ma kanfugi tɩŋŋaa deemba, ma tʋɔŋ kʋbɛɛ nɛ bɩ ʋ nɛŋ koo ʋ kakumo puro kaa lɩɩ ʋ nyʋnyʋa lɩɩŋ chɛ-wiesii-la chɛɛŋ?

¹⁶ Haala deeŋ ŋaa Abɩraham doho nʋʋ nɛ. Sɩtaanɩ kɛnʋ vɔɔ bil jɩsɩŋ fii arɩ chori. Ʋ saa bɩ maga dɩ la laaʋ ta chɛ-wiesii-la chɛɛŋ koo?”

¹⁷ Ʋ sɩ bʋl ŋɩɩ, hɩɩsɩŋ kɛŋ ʋ dʋndɔmɔ-la kala, aŋ ka nɩalɩŋ kʋkaanaa tʋɔŋ tɔrɛ wʋkpuŋkperisi-la Yesu fa sɩɩ ŋaa lɛ.

Yesu magɛ namaga a mʋ tɩgɛ kʋdoho kʋbala lɛ baa yɩrɛ masɩtad

¹⁸ Ŋɩɩ nɛ Yesu pɩɛsɛ nɩalɩŋ a bʋl, “Bɛɛ kʋŋ nɛ mɩ jaŋ kɛŋ Wɩa kuorii-la kaa magɩsɛ? Ɛɛ nɛ Wɩa kuorii-la nagɛ?

¹⁹ Ʋ nagɛ kʋdoho kʋbala ba kaa yɩrɛ masɩtad nɛ. Baal kʋbala joŋo duu ʋ baga lɛ. Ʋ nyʋ a waa a bɩrɩmɛ tɩa. Ŋɩɩ nɛ diibiisiŋ kʋ sʋa ba dɛllɩŋ ʋ naakelee lɛ.”

Yesu magɛ namaga a mʋ tɩgɛ sɩbʋrʋŋ lɛ

²⁰ Ŋɩɩ nɛ Yesu bɩra pɩɛsɛba, “Bɛɛ kʋŋ nɛ mɩ bɩra jaŋ kɛŋ Wɩa kuorii-la a kaa magɩsɛ?

²¹ Wɩa kuorii-la nagɛ sɩbʋrʋŋ nɛ haala joŋo hɛ munuŋ sɩ yʋga lɛ a kaa kuosi, ʋ sii pʋɔra laa muŋ-la kala.”

Yesu bʋla pɩ nɩaa dɩ ba to boi-la sɩ bɩ jal

²² Ŋɩɩ nɛ Yesu mʋmʋ Jerusalɛm dɩɩrɩŋ, a gɔllɛ tabalaa arɩ tabiisiŋ a dɩdagɛ nɩaa.

²³ Ŋɩɩ nɛ nʋʋ kʋbala pɩɛsʋ, “La Tɩɩna, nɩaa baŋmɛnɛ dʋndʋŋ nɛ Wɩa jaŋ laa taa?”

²⁴ Ŋɩɩ nɛ Yesu bʋla pɩba, “Dɩ ma nɩɩ chɛ dɩ ma jʋʋ Wɩa kuorii-la tʋɔŋ, ʋ maga arɩ ma to boi-la sɩ bɩ jal nɛ. Má hɛ doluŋ a to boi-la a jʋʋ. Mɩ jaŋ bʋla pɩma, nɩaa jaŋ yʋgɛ a wʋwalɩmɛ dɩ ba to lee-la jʋʋ aŋ walɩma lɔl.

²⁵ Tapʋlɩɩ kʋbala dɩa-la tɩɩna jaŋ sii a kɛŋ ʋ boiŋ tɔ. Ka ŋ-na jaŋ hɛ jeeŋ harɩŋ a du boro a sʋsʋl, ‘La Tɩɩna, kɛŋ boro suro pɩla.’ Ŋɩɩ nɛ ʋ jaŋ bʋla pɩma, ‘Mɩ bɩ lee-la ma sɩ lɩa jɩŋ.’

²⁶ Ma ma jaŋ bʋla pʋ, ‘La dɩ ma kala nɛ fa hɔŋ dɩ-bala a dii kɩaa. Ŋ dagɛla ŋ wɩaa la jaŋ ma lɛ.’

²⁷ Ŋɩɩ nɛ ʋ jaŋ bɩra bʋla pɩma, ‘Mɩ bɩ lee-la ma sɩ lɩa jɩŋ. Má sʋʋsa lɩɩ mɩ teeŋ. Ma kala ŋaa nɩbɔmɔ nɛ.’

²⁸ Tapʋlɩɩ kʋbala ma jaŋ na Abɩraham arɩ Aɩzɩk arɩ Jekɔb, arɩ Wɩa wʋlaabʋllaa kala dɩ ba hɔŋ Wɩa kuorii-la tʋɔŋ, ka ma-na jaŋ hɛ jeeŋ harɩŋ a na baanɩŋ a yiyel aŋ dɩdɩŋ ma nyɩlaa, aŋ bɩ wuo jʋʋ.

²⁹ Nɩaa jaŋ lɩɩ dʋnɩa sɛmɛ-na kala a hɔŋ Wɩa kuorii-la tʋɔŋ aa gbieli.

³⁰ Ŋɩɩ nɛ sɩpaalaaraa jaŋ bɩrɩmɛ harɩ-tooroo, dɩ harɩ-tooroo ma bɩrɩmɛ sɩpaalaaraa.”

Yesu cho Jerusalɛm nɩaa

³¹ Bʋa-la tɩtɩa lɛ nɛ Farisii tɩŋŋaa dɔnsʋŋ kɔ Yesu teeŋ a bʋla pʋ, “Lɩɩ daha a mʋ lee dɔŋ, bɛɛ wɩaa Hɛrɔd ka chɛ dɩ ʋ kpʋŋ nɛ.”

³² Ŋɩɩ nɛ Yesu bʋla pɩba, “Má mʋ bʋla pɩ nyɩnyɩsɛrʋ-la, mɩ jaŋ kiri jɩŋ-bɔŋŋɔɔ aŋ vaarɛ nɩaa jɩnɩŋ arɩ chie. Chietuo mɩ jaŋ tɩŋ mɩ tɩntɩŋŋaa dɛrɛ.

³³ Arɩ ŋɩɩ kala, ʋ maga dɩ mɩ ha hɛ mɩ wombiiŋ lɛ jɩnɩŋ arɩ chie arɩ chietuo kala. Ʋ bɩ wombii kɛnɛ dɩ ba kpʋ Wɩa wʋlaabʋllaa lee-kala see Jerusalɛm lɛ.

³⁴ Ma Jerusalɛm nɩaa, ma yie kpʋ Wɩa wʋlaabʋllaa, a joŋ tabɩaa a yagɛ tɩndaara-la Wɩa sɩ tɩma dɩ ba kɔ ma teeŋ. Naansɩɩŋ yʋga nɛ mɩ fa cho dɩ mɩ chu tɔ ma nɩaa kala, arɩ jimiŋ sɩ yie chu tɔ ʋ biiriŋ ŋɩɩ, ka ma bɩ sɛyɛ.

³⁵ Bee na, Wɩa jaŋ leŋ ma jáŋ pɩma. Ma bɩra bɩ jaŋ namɛ, see bʋa-la lɛ ma sɩ jaŋ chʋɔlɛmɛ a bʋl, ‘Wɩa jaŋ pɛ nɩɩ-la sɩɩ kɔ La Tɩɩna Wɩa yɩrɩŋ lɛ.’ ”