LEVI DOHO NƖAA 9 - WƖA TENIŊ

Wɩɩsʋllɩ sɩpaalaaraa suomi ba tɩntɩŋŋaa

¹ Ba sɩ sʋl Wɩɩsʋlɩɩ-la ba sɩ yie sʋl a joŋ Wɩɩsʋllɩ sɩpaalaaraa a hɛ Wɩa nɩsɩŋ lɛ dɛrɛ taŋ pʋl, Mosis yɩrɛ Arɔŋ arɩ ʋ hambolibiisiŋ arɩ Iziral tɩŋŋaa nɩhɩasɩŋ kʋ hɛ dɔŋɔ,

² a bʋla pɩ Arɔŋ, kɛŋ nɛ-bel-pɔrʋŋ ŋ sɩ jaŋ kaa sʋl wʋbɔŋŋɔɔ joŋo chɛnɩŋ Wɩɩsʋlʋŋ, a kɛŋ pie-bele ma ŋ sɩ jaŋ kaa sʋl kʋnyɩgaa Wɩɩsʋlʋŋ a kɔ La TƖƖNA sɩpaaŋ, kɩaa deemba kʋŋkala bɩ maga dɩ ʋ kɛŋ nyɔɔ.

³ Bʋla pɩ Iziral tɩŋŋaa dɩ ba kɛŋ gbuŋgbogo ba sɩ jaŋ kaa sʋl wʋbɔŋŋɔɔ joŋo chɛnɩŋ Wɩɩsʋlʋŋ, a kɛŋ nɛ-bie arɩ pie-bel-pɔrʋŋ sɩ yi jɩna a bɩ nyɔɔ kala kɛnɛ a kʋ ŋaa kʋnyɩgaa Wɩɩsʋlʋŋ,

⁴ a kɛŋ nɛ-bele arɩ pie-bele ba sɩ jaŋ kaa ŋaa nii-magɛ dɔŋɔ Wɩɩsʋlʋŋ, a kpʋba La TƖƖNA sɩpaaŋ, a pɛ mɩaa Wɩɩsʋlʋŋ ba sɩ joŋ nʋʋŋ hɛ. Má ŋaa wɩaa deemba, bɛɛ wɩaa jɩnɩŋ La TƖƖNA jaŋ kɛŋ ʋ tɩtɩa kʋ dagɛma.

⁵ Ŋɩɩ nɛ ba kɛŋ kɩalɩŋ kala Mosis sɩ daga kɔ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ. Nɩalɩŋ kala kʋ chɩna kpagɛ lee-la, La TƖƖNA sɩpaaŋ.

⁶ Ŋɩɩ nɛ Mosis bʋl, “Wɩɩŋ deeŋ nɛ La TƖƖNA dagɛ dɩ ma ŋaa, aŋ wuo na ʋ tʋla.”

⁷ Mosis bɩra bʋla pɩ Arɔŋ, “Mʋ Wɩɩsʋlʋŋ koru-la teeŋ a kpʋ ŋ wʋbɔŋŋɔɔ joŋo chɛnɩŋ Wɩɩsʋlʋŋ arɩ ŋ kʋnyɩgaa Wɩɩsʋlʋŋ pʋsʋŋ a pɩɩsɛ ŋ disiniŋ ta aŋ kpʋ nɩalɩŋ ma Wɩɩsʋlʋŋ pʋsʋŋ a pɩɩsɛ ba disiniŋ ta, arɩ La TƖƖNA sɩ dagɛ ŋɩɩ.”

⁸ Ŋɩɩ nɛ Arɔŋ mʋ Wɩɩsʋlʋŋ koru-la teeŋ a kpʋ ʋ tɩtɩa wʋbɔŋŋɔɔ joŋo chɛnɩŋ Wɩɩsʋlʋŋ nɛ-bie.

⁹ Ŋɩɩ nɛ ʋ hambolibiisiŋ chaga laa nɛŋ-la chalɩŋ pʋ ʋ kɛŋ ʋ neniiŋ tagɛ a hɛ Wɩɩsʋlʋŋ koru-la nyilliŋ lɛ aŋ joŋ kʋkaanɩŋ bɩsa ta Wɩɩsʋlʋŋ koru-la bʋbʋɔŋ.

¹⁰ Ʋ joŋ wʋbɔŋŋɔɔ joŋo chɛnɩŋ Wɩɩsʋlʋŋ nɛŋ-la nʋʋŋ arɩ ʋ chʋchɔ-biee arɩ kɩalɩŋ sɩ tɔ chʋɩŋ a nyɩgɛ Wɩɩsʋlʋŋ koru-la nyuŋ arɩ La TƖƖNA sɩ dagɛ Mosis ŋɩɩ,

¹¹ aŋ kɛŋ nɛŋ-la nammɩa arɩ teniŋ kaa lɩɩ ba dɩhɔnʋŋ lɛ a nyɩgɛ.

¹² Ŋɩɩ nɛ Arɔŋ kpʋ kʋnyɩgaa Wɩɩsʋlʋŋ pie-bele-la ma ʋ hambolibiisiŋ chaga laa chalɩŋ pʋ, ʋ joŋo mɩsɛ Wɩɩsʋlʋŋ koru-la sɛsɩŋ kala.

¹³ Ŋɩɩ nɛ ʋ hambolibiisiŋ kɛŋ nammɩa-la keri keri a paa pʋ a pɛ nyuŋ lɛ ʋ joŋo nyɩgɛ Wɩɩsʋlʋŋ koru-la nyuŋ,

¹⁴ aŋ chɛsɛ tʋɔŋ kɩaa arɩ naasɩŋ a joŋo daŋa pɛ kʋnyɩgɩa-la sɩ hɛ Wɩɩsʋlʋŋ koru-la nyuŋ a nyɩgɛ ba ma.

¹⁵ Ŋɩɩ nɛ Arɔŋ kɛŋ nɩalɩŋ Wɩɩsʋlʋŋ kɩaa kʋ lɩɩ, a kpʋ ba wʋbɔŋŋɔɔ joŋo chɛnɩŋ Wɩɩsʋlʋŋ bʋʋna a sʋl wʋbɔŋŋɔɔ joŋo chɛnɩŋ Wɩɩsʋlʋŋ arɩ ʋ sɩ laa sɩpaaŋ ŋaa ŋɩɩ bumbuŋ kʋ-la lɛ.

¹⁶ Ŋɩɩ nɛ ʋ kɛŋ kʋnyɩgaa Wɩɩsʋlʋŋ kɩaa ma kɔ a nyɩgɛba arɩ ŋɩɩ sɩ maga.

¹⁷ Ŋɩɩ nɛ ʋ kɛŋ mɩaa Wɩɩsʋlʋŋ kɩaa kɔ a ŋaa nɩsɩŋ sɩɩŋ, a pɛ chʋchʋɔŋ Wɩɩsʋlʋŋ kʋnyɩgaa lɛ a nyɩgɛ ba kala Wɩɩsʋlʋŋ koru-la nyuŋ.

¹⁸ Ŋɩɩ nɛ Arɔŋ kpʋ nɩalɩŋ nii-magɛ dɔŋɔ Wɩɩsʋlʋŋ nɛŋ arɩ nɛ-bele, ʋ hambolibiisiŋ chaga laa chalɩŋ pʋ ʋ joŋo mɩsɛ koru-la sɛsɩŋ kala.

¹⁹ Ŋɩɩ nɛ ba lɩɩsɛ nɛ-bele-la arɩ pie-bele-la nʋʋraa leree: dokeliŋ, chʋchɔ-biee arɩ kɩalɩŋ kala sɩ tɔ chʋɩŋ,

²⁰ a joŋ kɩaa deemba daŋ pʋna-la vaaŋ lɛ, Arɔŋ kaa mʋ Wɩɩsʋlʋŋ koru-la nyuŋ a dʋɔrɛ nʋʋ-la nyɩgɛ

²¹ aŋ joŋ vaa-la arɩ nadiiŋ huiŋ a kaa je aa zaarɛ La TƖƖNA sɩpaaŋ, ŋɩɩ ŋaa Wɩɩsʋlɩɩ arɩ Mosis sɩ dagɛ ŋɩɩ.

²² Ŋɩɩ nɛ Arɔŋ kɛŋ ʋ nɩsaa je a chaasɛ nɩalɩŋ aŋ sʋl Wɩa pɩba. Ʋ sɩ sʋl wʋbɔŋŋɔɔ Wɩɩsʋlʋŋ, kʋnyɩgaa Wɩɩsʋlʋŋ arɩ nii-magɛ dɔŋɔ Wɩɩsʋlʋŋ dɛrɛ, ʋ sʋʋsɛ Wɩɩsʋlʋŋ koru-la bʋbʋɔŋ.

²³ Mosis arɩ Arɔŋ jʋʋ lɛbɩ-la La TƖƖNA sɩ yie kɔ Iziral tɩŋŋaa teeŋ, aŋ kʋ lɩɩ a sʋl Wɩa pɩ nɩalɩŋ, La TƖƖNA tʋla guu chaanɛ ba kala na.

²⁴ La TƖƖNA leŋ nyiniŋ kɔ a dii kʋnyɩgaa Wɩɩsʋlʋŋ kɩalɩŋ kala sɩ daŋ Wɩɩsʋlʋŋ koru-la nyuŋ. Nɩalɩŋ kala sɩ na wɩalɩŋ, ba chiesi arɩ tʋɔtɔrʋŋ aŋ tuu tel a kɛŋ ba sɩaa chu tinteeŋ.