Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

LEVI DOHO NƖAA 8 - WƖA TENIŊ


Ba joŋ Arɔŋ arɩ ʋ hambolibiisiŋ hɛ Wɩa nɩsɩŋ lɛ

1 La TƖƖNA bʋla pɩ Mosis,

2 “Kɛŋ Arɔŋ arɩ ʋ hambolibiisiŋ, a pɛ paa Wɩɩsʋllɩ sɩpaalaaraa gɛnnɩ-la ba sɩɩ laalʋ, a joŋ Wɩɩsʋllɩ nʋʋŋ, a kɛŋ wʋbɔŋŋɔɔ joŋo chɛnɩŋ Wɩɩsʋlʋŋ nɛ-bel-pɔrʋŋ, a kɛsɛ pie-belliŋ balɩa arɩ boroboro-la sɩ bɩ sɩbʋrʋŋ kɛnɛ sime sɩɩŋ,

3 a yɩrɛ nɩalɩŋ kala dɩ ba kɔ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ.”

4 Mosis ŋaa wɩalɩŋ kala La TƖƖNA sɩ daga, a yɩrɛ nɩalɩŋ kala kʋ hilimi lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ.

5 Ŋɩɩ nɛ Mosis bʋla pɩba, “Wɩalɩŋ La TƖƖNA sɩ daga nɛ mɩɩ chɛ dɩ mɩ ŋaa.”

6 Ŋɩɩ nɛ ʋ kɛŋ Arɔŋ arɩ ʋ hambolibiisiŋ kʋ lɩɩ a ŋaa lɩɩŋ sɔmba.

7 Ʋ joŋ gɛrɩ-pʋl-duduoŋ-la a laalɛ Arɔŋ a joŋ tɩŋgɛnnɛ a vɔɔ ʋ tɩŋa a joŋ gɛrɩ-duduoŋ-la sɩ nagɛ diibelimbine a tuu magɛ naasolluŋ a laala daŋ, a joŋ gɛrɩ-laala-daŋɩŋ laala pɛ, a kɛŋ gɛrɩ-laala-daŋɩɩ-la gɛrɩpɛlɩɛɛ-bie ba sɩ sʋa woruŋ a vɔɔ mɛrɛ.

8 Mosis bɩra joŋ bɔɩ-tɔɔrɩ gɛrɩŋ a laalɛ Arɔŋ a joŋ Urim arɩ Tumim a hɛ bɔɩ-tɔɔrɩ gɛrɩ-la tʋɔŋ. (Urim arɩ Tumim nɛ yie dagɛ Arɔŋ wɩalɩŋ Wɩa sɩɩ chɛ).

9 Ŋɩɩ nɛ ʋ joŋ nyu-bɛlɛ a bɛ Arɔŋ nyuŋ, a joŋ ba sɩ kɛŋ sɛlɩmɛ libi Wɩa kʋmagɩla-la a mɛrɛ ʋ tile lɛ nyu-bɛlɛ-la lɛ, ŋɩɩ dagɛ arɩ Arɔŋ hɛ Wɩa nɩsɩŋ lɛ nɛ. Mosis ŋaa wɩaa deemba arɩ ŋɩɩ La TƖƖNA sɩ dagʋ nɛ.

10 Ŋɩɩ nɛ Mosis joŋ Wɩɩsʋllɩ nʋʋŋ a taa lɛbɩ-la lɛ La TƖƖNA sɩ yie kɔ Iziral tɩŋŋaa teeŋ arɩ ʋ tʋɔŋ kɩaa kala a joŋo hɛ Wɩa nɩsɩŋ lɛ.

11 Ʋ joŋ nʋʋ-la dɔnsʋŋ a mɩsa hɛ Wɩɩsʋlʋŋ koru-la arɩ ʋ nyuŋ kɩaa lɛ arɩ taasɩ-gbaŋ-bal-la arɩ kʋ-la nyuŋ ʋ sɩ chɩna naansɩɩŋ bʋlɩpɛ, a wasɛ ba kala a joŋo hɛ Wɩa nɩsɩŋ lɛ,

12 aŋ wansɛ nʋʋ-la dɔnsʋŋ ma a hɛ Arɔŋ nyuŋ lɛ a sʋl Wɩa hɛ ʋ lɛ a joŋu hɛ Wɩa nɩsɩŋ lɛ.

13 Ŋɩɩ nɛ Mosis kɛŋ Arɔŋ hambolibiisiŋ ma kʋ jʋʋ a paa gɛrɩ-pʋl duduosuŋ a laalɛba a joŋ gɛrɩpɛlɩɛɛ biisiŋ a vɔɔ ba tɩnsɩŋ, a paa nyunchuuluŋ ma a chu ba nyusuŋ, arɩ La TƖƖNA sɩ dagʋ ŋɩɩ.

14 Ŋɩɩ nɛ ʋ kɛŋ wʋbɔŋŋɔɔ joŋo chɛnɩŋ Wɩɩsʋlʋŋ nɛ-bele kʋ lɩɩ Arɔŋ arɩ ʋ hambolibiisiŋ joŋ ba nɩsaa daŋ nɛŋ-la nyuŋ lɛ.

15 Ŋɩɩ nɛ Mosis kpʋ nɛ-bele-la a ŋaa ʋ chalɩŋ dɔnsʋŋ a kɛŋ na-niiŋ tagɛ a hɛ nyilli-la sɩ hɛ Wɩɩsʋlʋŋ koru-la gʋnaa lɛ a pɩɩsɛ Wɩɩsʋlʋŋ koru-la disiniŋ ta, aŋ bɩsɛ chal-la kʋkaanɩŋ a ta Wɩɩsʋlʋŋ koru-la bʋbʋɔŋ, a joŋo hɛ Wɩa nɩsɩŋ lɛ dɩ ʋ ŋaa kʋzɔŋ Wɩa teeŋ.

16 Ʋ kʋɔrɛ nʋʋ-la kala sɩ tɔ tʋɔŋ kɩaa arɩ kɩalɩŋ sɩ tɔ chʋɩŋ a pɛ chʋchɔ-biee arɩ nʋʋ-la sɩ tɔba a nyɩgɛ Wɩɩsʋlʋŋ koru-la nyuŋ,

17 aŋ kɛŋ nɛ-bele-la teniŋ, ʋ nammɩa arɩ ʋ tʋɔŋ kɩaa a lɩɩ ba dɩhɔnʋŋ lɛ a nyɩgɛ arɩ La TƖƖNA sɩ dagʋ ŋɩɩ.

18 Mosis bɩra kɛŋ kʋnyɩgaa Wɩɩsʋlʋŋ pie-bele kʋ lɩɩ. Arɔŋ arɩ ʋ hambolibiisiŋ joŋ ba nɩsaa daŋ ʋ nyuŋ lɛ.

19 Ŋɩɩ nɛ Mosis kpʋ piesu-la a joŋ ʋ chalɩŋ a mɩsɛ Wɩɩsʋlʋŋ koru-la sɛsɩŋ kala,

20 aŋ kɛŋ piesu-la nammɩa kaa keri a pɛ nyuŋ arɩ nʋʋŋ lɛ a nyɩgɛ.

21 Ʋ chɛsɛ tʋɔŋ kɩaa arɩ naasɩŋ a sʋl kʋnyɩgaa Wɩɩsʋlʋŋ a joŋ nammɩa-la kala a nyɩga pɩ La TƖƖNA. Ba sʋɔra sɩma nɛ a pɩ La TƖƖNA, arɩ La TƖƖNA sɩ dagʋ ŋɩɩ.

22 Ŋɩɩ nɛ Mosis bɩra kɛŋ pie-bele dɔŋɔ kʋ lɩɩ, ba sɩ jaŋ kaa wasɛ wɩaa, a joŋ Arɔŋ arɩ ʋ hambolibiisiŋ a hɛ Wɩa nɩsɩŋ lɛ dɩ ba ŋaa Wɩɩsʋllɩ sɩpaalaaraa. Ba joŋ ba nɩsaa daŋ piesu-la nyuŋ lɛ.

23 Ŋɩɩ nɛ Mosis kpʋ pie-bele-la a tagɛ ʋ chalɩŋ dɔnsʋŋ a lagɛ Arɔŋ nadiiŋ dɩgɩlɩŋ-pɩpaaŋ lɛ, a ŋaa dɔnsʋŋ lagɛ ʋ nadiiŋ nenii-baalɩŋ arɩ ʋ nadiiŋ naanii-baalɩŋ.

24 Ŋɩɩ nɛ Mosis bɩra kɛŋ Arɔŋ hambolibiisiŋ ma kɔ a ŋaa chal-la a lagɛ ba nadiiŋ dɩgɩlɩŋ pɩpaarɩŋ lɛ, a ŋaa lagɛ ba nadiiŋ nenii-baalaa arɩ ba nadiiŋ naanii-baalaa, aŋ ŋaa chal-la mɩsɛ Wɩɩsʋlʋŋ koru-la sɛsɩŋ kala.

25 Mosis kʋɔrɛ piesu-la nʋʋŋ arɩ nʋʋ-la sɩ tɔ tʋɔŋ kɩaa arɩ kɩalɩŋ sɩ tɔ chʋɩŋ a lɩɩsɛ chʋchɔ-biee arɩ nʋʋ-la sɩ tɔba a pɛ dokeliŋ arɩ nadiiŋ huiŋ lɛ.

26 Sime-la arɩ kʋdiilee sɩ chɩŋ La TƖƖNA sɩpaaŋ sɩ bɩ sɩbʋrʋŋ kɛnɛ tʋɔŋ, ʋ lɩɩsɛ boroboro arɩ boroboro pɛrɛ pɛrɛ-bie arɩ boroboro ba sɩ kɛŋ nʋʋŋ a wasɛ, a joŋ kɩaa deemba pɛ nʋʋrʋ-la arɩ nadiiŋ hui-la lɛ.

27 Ʋ joŋ kɩaa deemba a hɛ Arɔŋ arɩ ʋ hambolibiisiŋ nɩsaa lɛ ba kaa je aa zaarɛ La TƖƖNA sɩpaaŋ, ŋɩɩ ŋaa Wɩɩsʋlɩɩ.

28 Ŋɩɩ nɛ Mosis laa kɩalɩŋ ba nɩsaa lɛ a kaa mʋ Wɩɩsʋlʋŋ koru-la nyuŋ a joŋo daŋ a pɛ kʋnyɩgɩa-la sɩ daŋ Wɩɩsʋlʋŋ koru-la nyuŋ a nyɩgɛ ba kala pɩ La TƖƖNA. Ba sʋɔra sɩma nɛ a pʋ.

29 Ŋɩɩ nɛ Mosis joŋ pʋna-la vaaŋ, ʋ toruŋ, a kaa je aa zaarɛ La TƖƖNA sɩpaaŋ, ŋɩɩ ŋaa Wɩɩsʋlɩɩ arɩ La TƖƖNA sɩ dagʋ ŋɩɩ.

30 Ŋɩɩ nɛ Mosis joŋ Wɩɩsʋllɩ nʋʋŋ arɩ chal-la dɔnsʋŋ sɩ hɛ Wɩɩsʋlʋŋ koru-la lɛ a mɩsa hɛ Arɔŋ arɩ ʋ hambolibiisiŋ arɩ ba gɛnnɩŋ kala lɛ. Ʋ ŋaa ŋɩɩ nɛ a joŋ Arɔŋ arɩ ʋ hambolibiisiŋ arɩ ba gɛnnɩŋ kala a hɛ Wɩa nɩsɩŋ lɛ.

31 Ŋɩɩ nɛ Mosis bʋla pɩ Arɔŋ arɩ ʋ hambolibiisiŋ, “Má chɔ nammɩa-la lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ a chaŋ arɩ boroboro-la sɩ bɩ sɩbʋrʋŋ kɛnɛ a hɛ sime-la tʋɔŋ arɩ La TƖƖNA sɩ dagʋ ŋɩɩ. Arɔŋ arɩ ʋ hambolibiisiŋ nɛ maga dɩ ba diiba.

32 Nammɩa-la arɩ boroboro sɩ ka, má joŋo nyɩgɛ.

33 Má sɩ́ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ sii, má hɔŋ nɩmɛ tapʋlaa balɩpɛ, see tapʋlɩa-la ba sɩ kaa wasɛ ma wɩaa dɩ ma ŋaa Wɩɩsʋllɩ sɩpaalaaraa dɛrɛ.

34 La TƖƖNA sɩ dagɛ wɩɩ-la dɩ la ŋaa a pɩɩsɛ ma disiniŋ ta nɛ, la ŋaa ŋɩɩ jɩnɩŋ.

35 Ʋ maga dɩ ma hɔŋ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ wɩɩhɛyɛ arɩ tɩtaŋɩŋ kala tapʋlaa balɩpɛ, a ŋɩŋaa wɩalɩŋ La TƖƖNA sɩ daga. Má pɔ má sɩ́ nɩmɛ sii, dɩ ŋɩɩ dee ma jaŋ sʋʋ. Wɩɩ-la La TƖƖNA sɩ dagɛmɛ nɛ ŋɩɩ.”

36 Ŋɩɩ nɛ Arɔŋ arɩ ʋ hambolibiisiŋ ŋaa wɩalɩŋ kala La TƖƖNA sɩ to Mosis lɛ a bʋla pɩba.

©Ghana Institute of Linguistics Literacy and Bible Translation 1984, 2014

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ