LEVI DOHO NƖAA 7 - WƖA TENIŊ

Cheeriŋ Wɩɩsʋlʋŋ

¹ Wombiee deemba nɛ ma jaŋ to aa sʋl cheeriŋ Wɩɩsʋlʋŋ, ʋ ŋaa kʋŋ zɔmʋŋ sɩ bɩ magɩa kɛnɛ nɛ mɩ teeŋ:

² Cheeriŋ Wɩɩsʋlʋŋ pʋna maga dɩ ba kpʋʋ Wɩɩsʋlʋŋ koru-la wɩɩpɔsʋŋ nadiiŋ, lee-la ba sɩ yie kpʋ kʋnyɩgaa Wɩɩsʋlʋŋ pʋna, a joŋ ʋ chalɩŋ a mɩsɛ Wɩɩsʋlʋŋ koru-la sɛsɩŋ kala.

³ Ʋ maga dɩ ba kʋɔrɛ nʋʋ-la sɩ tɔ pʋna-la tʋɔŋ kɩaa nɛ, a lɩɩsɛ dokeliŋ,

⁴ a chaarɛ chʋchɔ-biee arɩ nʋʋ-la sɩ tɔba arɩ chʋɩŋ.

⁵ Wɩɩsʋllɩ sɩpaalaara jaŋ jomba a nyɩgɛ Wɩɩsʋlʋŋ koru-la nyuŋ a sʋl Wɩɩsʋlʋŋ pɩ mɩ-na ma TƖƖNA, ʋ ŋaa cheeriŋ Wɩɩsʋlʋŋ nɛ.

⁶ Wɩɩsʋllɩ sɩpaalaara doho nʋʋ na-kala sɩ ŋaa baal jaŋ wuo diiba. Ʋ maga dɩ ba diiba lee sɩ bɩ disiniŋ kɛnɛ, ba ŋaa kɩa zɔmʋŋ sɩ bɩ magɩa kɛnɛ nɛ.

⁷ Cheeriŋ Wɩɩsʋlʋŋ arɩ wʋbɔŋŋɔɔ joŋo chɛnɩŋ Wɩɩsʋlʋŋ wombiiŋ ŋaa kʋbala nɛ. Wɩɩsʋllɩ sɩpaalaara nɛ tɩɩ pʋna-la ʋ sɩ kaa pɩɩsɛ nɩaa disiniŋ ta nammɩɩ-kaanɩŋ.

⁸ Dɩ Wɩɩsʋllɩ sɩpaalaara nɛ kɛŋ nʋʋkala kʋnyɩgaa Wɩɩsʋlʋŋ kɔ mɩ teeŋ, Wɩɩsʋllɩ sɩpaalaara nɛ maga dɩ ʋ tɩɩ kʋnyɩgaa Wɩɩsʋlʋŋ pʋna-la teniŋ.

⁹ Mɩaa Wɩɩsʋlɩɩ na-kala lɛ, dɩ ba joŋo wasɛ nɛ koo dɩ ba joŋo chɔ pupoiŋ lɛ koo dɩ ba joŋo hal nʋʋ-hala lɛ nɛ, Wɩɩsʋllɩ sɩpaalaara nɛ jaŋ tɩɩba.

¹⁰ Mɩaa Wɩɩsʋlɩɩ na-kala lɛ, dɩ ba joŋ nʋʋŋ nɛ hɛ koo dɩ kʋnyʋʋnʋ nɛ, Arɔŋ arɩ ʋ hambolibiisiŋ nɛ jaŋ tɩɩba dɩ ba kaa kpaa a magɛ dɔŋɔ.

Nii-magɛ dɔŋɔ Wɩɩsʋlʋŋ

¹¹ Wombiee deemba nɛ ba jaŋ to aa sʋl nii-magɛ dɔŋɔ Wɩɩsʋlʋŋ aa pɩ mɩ-na ma TƖƖNA.

¹² Dɩ nʋʋ nɩɩ chɛ ʋ sʋl nii-magɛ dɔŋɔ Wɩɩsʋlʋŋ a lɔllɛ La TƖƖNA, ʋ jaŋ kɛŋ pʋna-la ʋ sɩ jaŋ kaa sʋl nii-magɛ dɔŋɔ Wɩɩsʋlʋŋ arɩ boroboro sɩ bɩ sɩbʋrʋŋ kɛnɛ a hɛ nʋʋŋ a wasɛ arɩ munuŋ sɩ bɩɩ nʋgʋgʋ ba sɩ bɩ sɩbʋrʋŋ hɛ, a wasɛ boroboro pɛrɛ pɛrɛ biisiŋ a ŋaa nʋʋŋ taa, arɩ munuŋ sɩ bɩɩ nʋgʋgʋ ba sɩ hɛ nʋʋŋ a hal.

¹³ Nii-magɛ dɔŋɔ Wɩɩsʋlɩɩ-la ʋ sɩ kaa kɔ dɩ ʋ lɔllɛmɛ, ʋ jaŋ pɛ kɛŋ boroboro sɩ kɛŋ sɩbʋrʋŋ kɔ.

¹⁴ Ʋ jaŋ lɩɩsɛ boroboroba-la kala kʋŋkʋŋ a hɛ dɔŋɔ a ŋaa Wɩɩsʋlʋŋ pɩ mɩ-na ma TƖƖNA. Wɩɩsʋllɩ sɩpaalaarʋ-la sɩ joŋ nii-magɛ dɔŋɔ Wɩɩsʋlʋŋ pʋna-la chalɩŋ mɩsɛ Wɩɩsʋlʋŋ koru-la nɛ tɩɩ kɩalɩŋ.

¹⁵ Nii-magɛ dɔŋɔ Wɩɩsʋlʋŋ pʋna-la nammɩa maga dɩ ʋ chaŋʋ tapʋlɩɩ-la tɩtɩa ʋ sɩ sʋl Wɩɩsʋlɩɩ-la nɛ, ʋ bɩ maga dɩ ʋ chɩna chʋa.

¹⁶ Dɩ ʋ Wɩɩsʋlʋŋ ŋaa niiŋ nɛ ʋ kʋ lɩɩsɛ, koo dɩ tʋɔtɔrɛ Wɩɩsʋlɩɩ nɛ, Wɩɩsʋlʋŋ kʋ-la nammɩa maga dɩ ʋ chaŋʋ tapʋlɩɩ-la ʋ sɩ sʋl Wɩɩsʋlɩɩ-la nɛ. Ama dɩ kʋŋ nɛ ka dɩ taŋ pʋl, ʋ ha jaŋ wuo chaŋ.

¹⁷ Dɩ ʋ Wɩɩsʋlʋŋ kʋ-la nammɩa nɛ chʋa yi tapʋlaa batori, ʋ maga ʋ joŋo nyɩga ta.

¹⁸ Dɩ ʋ nɛ chaŋ nii-magɛ dɔŋɔ Wɩɩsʋlʋŋ pʋna-la nammɩa tapʋl-tori chɛɛŋ, Wɩa bɩ sɛɩ, ʋ bɩ nɩɩ-la Wɩɩsʋlɩɩ-la ka laa, ʋ bɩ Wɩɩ-sʋl-zɔŋ ŋaa, ʋ kɛŋ disiniŋ nɛ. Nɩɩ-la sɩ chaŋ nammɩa-la jaŋ na hɛɛŋ ŋɩɩ bʋbʋɔŋ lɛ.

¹⁹ Dɩ nammɩa-la nɛ digi kʋŋ na-kala sɩ kɛŋ disiniŋ, ʋ bɩ maga dɩ ma chaŋʋ, má joŋo nyɩga ta. Ama nammɩɩsɩŋ dɔnsʋŋ-na, nɩalɩŋ sɩ bɩ disiniŋ kɛnɛ jaŋ wuo chaŋ.

²⁰ Dɩ nɩɩ-la sɩ kɛŋ disiniŋ nɛ chaŋ nii-magɛ dɔŋɔ Wɩɩsʋlʋŋ nammɩa-la sɩ ŋaa mɩ-na ma TƖƖNA kʋa, ʋ maga dɩ má lɩɩsʋ ta ʋ nɩaa tʋɔŋ.

²¹ Dɩ nʋʋ nɛ digi kʋŋ sɩ lɩɩ nuhuobiine lɛ a kɛŋ disiniŋ, koo dɩ ʋ digi pʋna koo baga kʋŋ sɩ kɛŋ disiniŋ koo kʋŋ na-kala sɩ kɛŋ disiniŋ, aŋ chaŋ nii-magɛ dɔŋɔ Wɩɩsʋlʋŋ pʋna nammɩa sɩ ŋaa mɩ-na ma TƖƖNA kʋa, ʋ maga dɩ ba lɩɩsʋ ta ʋ nɩaa tʋɔŋ.’ ”

Pʋsʋŋ nʋʋŋ arɩ chalɩŋ diiniŋ ka kɩsɛ nɛ

²² Ŋɩɩ nɛ La TƖƖNA bʋla pɩ Mosis,

²³ “Bʋla pɩ Iziral-tɩŋŋaa: ‘Má sɩ́ nɛŋ koo piese koo bʋʋna nʋʋŋ dii.

²⁴ Dɩ pʋna nɛ sʋba koo dɩ baga kʋŋ nɛ kɛŋ pʋna pʋɔsa ta dɩ ma naʋ, ma jaŋ wuo lɩɩsɛ ʋ nʋʋŋ a kaa ŋaa wɩaa dɔnsʋŋ, ama ʋ bɩ maga dɩ ma diiu.

²⁵ Dɩ nʋʋkala nɛ dii pʋna-la ba sɩ nyɩga pɩ mɩ-na ma TƖƖNA nʋʋŋ, ʋ maga dɩ má lɩɩsʋ ta nɛ ʋ nɩaa tʋɔŋ.

²⁶ Lee na-kala ma sɩ hɛ, má pʋpɔ ma sɩ́ pʋna koo kɩŋkɛnsɩŋ tɩŋŋaa chalɩŋ dii.

²⁷ Dɩ nʋʋkala nɛ dii chalɩŋ, ʋ maga dɩ má lɩɩsʋ ta ʋ nɩaa tʋɔŋ.’ ”

Wɩɩsʋllɩ sɩpaalaaraa kpaalɩŋ

²⁸ La TƖƖNA bɩra bʋla pɩ Mosis,

²⁹ “Bʋla pɩ Iziral tɩŋŋaa: ‘Dɩ nʋʋ nɛ kɛŋ nii-magɛ dɔŋɔ Wɩɩsʋlʋŋ kʋkɔ dɩ ʋ pɩ mɩ-na ma TƖƖNA, ʋ maga dɩ ʋ lɩɩsɛ lere-la sɩ ŋaa mɩ-na ma TƖƖNA kɩaa nɛ kʋ pʋ.

³⁰ Ʋ tɩtɩa nɛ maga dɩ ʋ kori kɩalɩŋ ba sɩ jaŋ nyɩga pɩ mɩ-na ma TƖƖNA, ʋ jaŋ kɛŋ pʋna-la nʋʋŋ arɩ pʋna-la vaaŋ, a kɛŋ vaa-la je aa zaarɛ mɩ sɩpaaŋ. Ŋɩɩ ŋaa ʋ tɩtɩa Wɩɩsʋlɩɩ nɛ ʋ kaa je mɩ-na ma TƖƖNA sɩpaaŋ.

³¹ Wɩɩsʋllɩ sɩpaalaara jaŋ joŋ nʋʋ-la a nyɩgɛ Wɩɩsʋlʋŋ koru-la nyuŋ, ka dɩ Arɔŋ arɩ ʋ hambolibiisiŋ joŋ vaa-la.

³² Ma nii-magɛ dɔŋɔ Wɩɩsʋlʋŋ pʋna na-kala, má joŋ nadiiŋ huiŋ a pɩ Wɩɩsʋllɩ sɩpaalaara, ʋ toruŋ nɛ ŋɩɩ.

³³ Arɔŋ hambolibiisiŋ tʋɔŋ, nɩɩ-la sɩ joŋ nii-magɛ dɔŋɔ Wɩɩsʋlʋŋ pʋna-la chalɩŋ arɩ ʋ nʋʋŋ sʋl Wɩa nɛ jaŋ joŋ pʋna-la nadiiŋ huiŋ, ʋ toruŋ nɛ ŋɩɩ.

³⁴ Iziral tɩŋŋaa nii-magɛ dɔŋɔ Wɩɩsʋlʋŋ lɛ, mɩ joŋ vaa-la ba sɩ kaa je a zaarɛ La TƖƖNA sɩpaaŋ arɩ hui-la ba sɩ kaa kɔ mɩ sɩpaaŋ a pɩ Arɔŋ, Wɩɩsʋllɩ sɩpaalaara arɩ ʋ hambolibiisiŋ dɩ ba nɛ ŋaa ba toruŋ Iziral tɩŋŋaa tʋɔŋ a kaa mʋ wuu.’ ”

³⁵ A chɩŋ tapʋlɩɩ-la lɛ ba sɩ joŋ Wɩɩsʋllɩ nʋʋŋ tɩsɛ Arɔŋ arɩ ʋ hambolibiisiŋ dɩ ba ŋaa Wɩɩsʋllɩ sɩpaalaaraa, kʋnyɩgaa Wɩɩsʋlʋŋ kala lɛ ba toruŋ nɛ ŋɩɩ.

³⁶ Tapʋlɩɩ-la nɛ La TƖƖNA bʋla pɩ Iziral tɩŋŋaa arɩ ba toruŋ nɛ ŋɩɩ ba sɩ jaŋ didii a kaa mʋ wuu.

³⁷ Wombiee deemba nɛ ba jaŋ to a ŋɩŋaa kʋnyɩgaa Wɩɩsʋlʋŋ, mɩaa Wɩɩsʋlʋŋ, wʋbɔŋŋɔɔ joŋo chɛnɩŋ Wɩɩsʋlʋŋ, cheeriŋ Wɩɩsʋlʋŋ arɩ Wɩɩsʋlɩɩ-la ba sɩ yie ŋaa a lɩɩsɛ Wɩɩsʋllɩ sɩpaalaaraa arɩ nii-magɛ dɔŋɔ Wɩɩsʋlʋŋ.

³⁸ Ba nɛ La TƖƖNA dagɛ Mosis ŋɩɩ peel-la ba sɩɩ yɩrɛ Sɩnaɩ nyuŋ tintee-hɩlɩɩ-la lɛ, tapʋlɩɩ-la ʋ sɩ bʋla pɩ Iziral tɩŋŋaa dɩ ba kɛŋ Wɩɩsʋlʋŋ kɩaa kʋ pʋ.