LEVI DOHO NƖAA 6 - WƖA TENIŊ

¹ La TƖƖNA bɩra bʋla pɩ Mosis,

² “Dɩ nʋʋ nɛ ŋaa wʋbɔŋ a bɩ wʋtɩtɩɩ kɛnɛ mɩ-na ma TƖƖNA teeŋ, a nyɩɛ wɩaa lɩlaa nɩaa kɩaa ba sɩ joŋo pʋ dɩ ʋ bibeŋ, aa gaa nɩaa kɩaa, aa gʋrɛ nɩaa,

³ koo dɩ nʋʋ kʋŋ ma nɛ lɛlɛ dɩ ʋ naʋ a joŋ a nyɩɛ wɩaa arɩ ʋ bɩ ʋ na koo a ŋmɩɛsɛ arɩ ʋ bɩ ʋ wɩaa jɩŋ,

⁴ dɩ nʋʋ nɩɩ ŋaa wɩaa deemba aŋ kʋ jɩŋ arɩ ba ŋaa wʋbɔmɔ nɛ, ʋ maga dɩ ʋ mɩɩra tiŋ kɩalɩŋ ʋ sɩ gaa koo kɩalɩŋ ʋ sɩ nyɩɛ wɩaa laa koo kɩalɩŋ ʋ sɩ gɩrɩma laa koo kɩalɩŋ sɩ lɛlɛ ʋ joŋ aŋ vɔŋ,

⁵ koo wɩalɩŋ kala lɛ ʋ sɩ nyɩɛ wɩaa, aŋ ha time daŋ a magɛ ŋɩɩ tʋŋ bʋnɔŋ. Ʋ jaŋ joŋ kɩalɩŋ pɩ ba tɩŋŋaa tapʋlɩɩ-la ʋ sɩ kɛŋ ʋ cheeriŋ Wɩɩsʋlʋŋ kɩaa kʋkɔ mɩ-na ma TƖƖNA sɩpaaŋ.

⁶ Ʋ jaŋ lɩɩsɛ pie-bele sɩ bɩ nyɔɔ kala kɛnɛ, dɩ ʋ yalɩŋ magɛ ŋɩɩ ba sɩ daga Wɩa dɩa lɛ a tiŋ cheeriŋ Wɩɩsʋlʋŋ chɩmɩŋ a kaa kʋ pɩ Wɩɩsʋllɩ sɩpaalaara dɩ ʋ laa sʋl cheeriŋ Wɩɩsʋlʋŋ.

⁷ Wɩɩsʋllɩ sɩpaalaara jaŋ pɩɩsɛ ʋ disiniŋ ta mɩ-na ma TƖƖNA sɩpaaŋ dɩ mɩ joŋ wɩɩ-la ʋ sɩ cheye chɛʋ.”

Kʋnyɩgaa Wɩɩsʋlʋŋ

⁸ Ŋɩɩ nɛ La TƖƖNA bɩra bʋla pɩ Mosis:

⁹ “Bʋl wɩaa deemba pɩ Arɔŋ arɩ ʋ hambolibiisiŋ: ‘Wombiee deemba nɛ ba jaŋ to a ŋɩŋaa kʋnyɩgaa Wɩɩsʋlʋŋ. Kɩalɩŋ ba sɩ jaŋ nyɩga sʋl Wɩa jaŋ daŋ Wɩɩsʋlʋŋ koru-la nyuŋ tɩtaŋɩŋ a kaa mʋ chʋchʋɔŋ. Nyiŋ-la sɩ hɛ Wɩɩsʋlʋŋ koru-la nyuŋ maga dɩ ʋ didii tɩtaŋɩŋ kala dɩ taŋ pʋl.

¹⁰ Wɩɩsʋllɩ sɩpaalaara maga dɩ ʋ joŋ gɛrɩpɛ fʋfʋlʋŋ kpuŋkpel-kuuŋ a vɔɔ a joŋ gɛrɩpɛ fʋfʋlʋŋ gɛrɩ-duduoŋ a laala daŋ, aŋ paa kʋnyɩgɩa-la tʋɔrʋŋ a bil Wɩɩsʋlʋŋ koru-la sɛmɛ.

¹¹ Ʋ jaŋ wuri gɛrɩ-zɔmɔ-la bil aŋ paa gɛnnɩŋ dɔnsʋŋ laalɛ a paa tʋɔrʋ-la a kaa lɩɩ ba dɩhɔnʋŋ lɛ lee-la sɩ bɩ disiniŋ kɛnɛ.

¹² Nyiŋ-la sɩ hɛ Wɩɩsʋlʋŋ koru-la nyuŋ maga dɩ ʋ didii a sɩ́ dɩsʋ. Chʋchʋɔ na-kala Wɩɩsʋllɩ sɩpaalaara maga dɩ ʋ hɛ daasɩŋ nɛ nyiŋ-la lɛ, a paa Wɩɩsʋlʋŋ kʋnyɩgaa arɩ nii-magɛ dɔŋɔ Wɩɩsʋlʋŋ pʋna nʋʋŋ daŋ a nyɩga pɩmɛ.

¹³ Nyiŋ-la sɩ hɛ Wɩɩsʋlʋŋ koru-la nyuŋ maga dɩ ʋ didii bʋa na-kala, ʋ bɩ maga dɩ ʋ dɩsɛ.

Mɩaa Wɩɩsʋlʋŋ

¹⁴ Wombiee deemba nɛ ma jaŋ to a ŋɩŋaa mɩaa Wɩɩsʋlʋŋ. Arɔŋ hambolibiisi-la sɩ ŋaa Wɩɩsʋllɩ sɩpaalaaraa nɛ jaŋ kɛŋ mɩaa Wɩɩsʋlʋŋ kʋkɔ mɩ-na ma TƖƖNA sɩpaaŋ Wɩɩsʋlʋŋ koru-la teeŋ.

¹⁵ Wɩɩsʋllɩ sɩpaalaara jaŋ ŋaa muŋ-zɔŋ-la arɩ nʋʋ-la arɩ kʋsʋɔrʋsʋ-la kala nɩsɩŋ sɩɩŋ mɩ-na ma TƖƖNA dɩ-diiliŋ a nyɩgɛ Wɩɩsʋlʋŋ koru-la nyuŋ. Ba sʋɔra sɩma nɛ a pɩ mɩ-na ma TƖƖNA.

¹⁶ Kɩalɩŋ sɩ ka, Arɔŋ arɩ ʋ hambolibiisiŋ nɛ maga dɩ ba diiba mɩ dɩ zɔŋ-la kaala tʋɔŋ lɛbɩ-la lɛ mɩ sɩ yie kɔ Iziral tɩŋŋaa teeŋ, ʋ bɩ maga dɩ ba hɛ sɩbʋrʋŋ aŋ diiba.

¹⁷ Dɩ ba nɛ joŋo wasɛ, ʋ bɩ maga dɩ ba hɛ sɩbʋrʋŋ, ba toruŋ nɛ ŋɩɩ mɩ sɩ joŋo pɩba a lɩɩ Wɩɩsʋllɩ kɩalɩŋ ba sɩ nyɩga pɩmɛ tʋɔŋ. Ba ŋaa kɩa sɩ chaasa zɔŋ nɛ, arɩ wʋbɔŋŋɔɔ joŋo chɛnɩŋ Wɩɩsʋlʋŋ arɩ cheeriŋ Wɩɩsʋlʋŋ kɩaa sɩ ŋaa kʋzɔmɔ ŋɩɩ.

¹⁸ Arɔŋ doho nʋʋ na-kala sɩ ŋaa baal jaŋ wuo dii kɩaa deemba, ba kpaalɩŋ nɛ ŋɩɩ ba sɩ jaŋ vɛnɛɛ dii. Dɩ ba nɛ kɛŋ mɩaa kɔ dɩ ba ŋaa Wɩɩsʋlʋŋ a nyɩga pɩ mɩ-na ma TƖƖNA, kʋŋ na-kala sɩ digi kɩaa deemba bɩra bɩ jaŋ kɛŋ disiniŋ.’ ”

¹⁹ Ŋɩɩ nɛ La TƖƖNA bɩra bʋla pɩ Mosis,

²⁰ “Wɩɩsʋllɩ kɩaa deemba nɛ Arɔŋ arɩ ʋ hambolibiisiŋ jaŋ kaa kʋ pɩ mɩ-na ma TƖƖNA tapʋlɩɩ-la ba sɩ jaŋ joŋ Wɩɩsʋllɩ nʋʋŋ tɩsɛba dɩ ba ŋaa Wɩɩsʋllɩ sɩpaalaaraa. Muŋ-zɔmʋŋ gbaŋa kpaa magɛ dɔŋɔ nɛ ba jaŋ vɛnɛ kaa sʋl mɩ-na ma TƖƖNA bʋa na-kala. Ba jaŋ kɛŋ kpaa magɛ dɔŋɔ kpaa bʋlɩa, a joŋ dɔŋɔ sʋl chʋchʋɔŋ a joŋ dɔŋɔ ma sʋl dɩdaanɩŋ.

²¹ Ba jaŋ buu muŋ-la arɩ nʋʋŋ a hal nʋʋ-hala lɛ a kaa yɔrɩsɛ a kaa kʋ ŋaa mɩaa Wɩɩsʋlʋŋ a nyɩga pɩmɛ. Ba sʋɔra sɩma nɛ a pɩ mɩ-na ma TƖƖNA.

²² Arɔŋ hambolibiisi-la tʋɔŋ, nɩɩ-la sɩ jaŋ laa ʋ nyuŋ a ŋaa Wɩɩsʋllɩ sɩpaalaarɩ-hɩaŋ nɛ maga dɩ ʋ kɛŋ kɩalɩŋ kɔ mɩ-na ma TƖƖNA sɩpaaŋ a sʋl Wɩɩsʋlɩɩ-la. Wɩɩŋ deeŋ maga dɩ ʋ chɩŋ nɛ bʋa na-kala. Wɩɩsʋlʋŋ kɩaa deemba kala maga dɩ ba nyɩgɛ nɛ a pɩmɛ.

²³ Dɩ Wɩɩsʋllɩ sɩpaalaara tɩtɩa nɛ ŋaa mɩaa Wɩɩsʋlɩɩ na-kala, ʋ maga dɩ ba nyɩgɛ ba kala nɛ, nʋʋkala bɩ maga dɩ ʋ diiba.”

Wʋbɔŋŋɔɔ joŋo chɛnɩŋ Wɩɩsʋlʋŋ

²⁴ Ŋɩɩ nɛ La TƖƖNA bɩra bʋla pɩ Mosis,

²⁵ “Bʋla pɩ Arɔŋ arɩ ʋ hambolibiisiŋ: ‘Wombiee deemba nɛ ba jaŋ to a ŋɩŋaa wʋbɔŋŋɔɔ joŋo chɛnɩŋ Wɩɩsʋlʋŋ. Wʋbɔŋŋɔɔ joŋo chɛnɩŋ Wɩɩsʋlʋŋ pʋna maga dɩ ba kpʋ mɩ-na ma TƖƖNA sɩpaaŋ wɩɩpɔsʋŋ nagʋa lee-la ba sɩ kpʋ kʋnyɩgaa Wɩɩsʋlʋŋ pʋna, ʋ ŋaa kʋzɔŋ nɛ woruŋ a pɩ mɩ-na ma TƖƖNA.

²⁶ Wɩɩsʋllɩ sɩpaalaara sɩ ŋaa wʋbɔŋŋɔɔ Wɩɩsʋlʋŋ deeŋ maga dɩ ʋ dii ʋ toruŋ nɛ dɩ-zɔŋ, lɛbɩ-la lɛ mɩ sɩ yie kɔ Iziral tɩŋŋaa teeŋ kaala tʋɔŋ.

²⁷ Dɩ kʋŋ na-kala nɛ digi nammɩa-la ʋ bɩra bɩ jaŋ kɛŋ disiniŋ. Dɩ ʋ chalɩŋ nɛ taa gɛrɩŋ, ʋ maga dɩ ba chɛsʋ lee-la sɩ bɩ disiniŋ kɛnɛ.

²⁸ Dɩ chʋrʋŋ nɛ ba kaa mɛ pupoi-la lɛ ba sɩ chɔ nammɩa-la, ʋ maga dɩ ba ŋmoo yɛrɛ. Dɩ ʋ nɛ ŋaa kɔlɩɩŋ pupoiŋ, ʋ maga dɩ ba wʋrʋgʋ arɩ tintiisiŋ aŋ kɛŋ lɩɩŋ yegili.

²⁹ Baal na-kala sɩ hɛ Wɩɩsʋllɩ sɩpaalaaraa doho nɩaa tʋɔŋ jaŋ wuo chaŋ nammɩa-la, bɛɛ wɩaa ʋ ŋaa kʋŋ sɩ chaasa zɔŋ nɛ.

³⁰ Ama wʋbɔŋŋɔɔ joŋo chɛnɩŋ Wɩɩsʋlʋŋ pʋna na-kala chalɩŋ ba sɩ jaŋ kaa kʋ jʋʋ lɛbɩ-la lɛ mɩ sɩ yie kɔ Iziral tɩŋŋaa teeŋ dɩ ba pɩɩsɛ nʋʋ wʋbɔmʋŋ ta, nammɩa bɩ maga dɩ ba chaŋ. Ʋ maga dɩ ba nyɩgɛ ʋ kala.