LEVI DOHO NƖAA 3 - WƖA TENIŊ

Nii-magɛ dɔŋɔ Wɩɩsʋlʋŋ

¹ Dɩ nʋʋ nɩɩ chɛ ʋ kɛŋ nɛŋ ŋaa nii-magɛ dɔŋɔ Wɩɩsʋlʋŋ a pɩ mɩ-na ma TƖƖNA, ʋ jaŋ wuo kɛŋ bele koo nɩɩŋ sɩ bɩ nyɔɔ kala kɛnɛ a ŋaa.

² Tɩɩna maga dɩ ʋ joŋ ʋ nɩsɩŋ daŋ pʋna-la nyuŋ lɛ aŋ kpʋ pʋna-la lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ. Arɔŋ hambolibiisi-la sɩ ŋaa Wɩɩsʋllɩ sɩpaalaaraa jaŋ laa ʋ chalɩŋ a mɩsɛ Wɩɩsʋlʋŋ koru-la sɛsɩŋ kala.

³ Nii-magɛ dɔŋɔ Wɩɩsʋlɩɩ-la lɛ, ʋ maga dɩ ʋ nyɩgɛ nʋʋ-la kala sɩ tɔ pʋna-la tʋɔŋ kɩaa,

⁴ a pɛ chʋchɔ-biee arɩ nʋʋ-la sɩ tɔba arɩ chʋɩŋ lɛ.

⁵ Arɔŋ hambolibiisiŋ jaŋ joŋ kɩaa deemba a daŋa pɛ kʋnyɩgɩa-la dɔnsʋŋ sɩ laa sɩpaaŋ daŋ Wɩɩsʋlʋŋ koru-la nyuŋ nyiŋ-la lɛ, a nyɩgɛ ba kala. Ba sʋɔra sɩma nɛ a pɩ mɩ-na ma TƖƖNA.

⁶ Dɩ nʋʋ nɩɩ chɛ ʋ kɛŋ piese koo bʋʋna a ŋaa nii-magɛ dɔŋɔ Wɩɩsʋlʋŋ pɩ mɩ-na ma TƖƖNA, ʋ jaŋ wuo kɛŋ bele koo nɩɩŋ sɩ bɩ nyɔɔ kala kɛnɛ a ŋaa.

⁷ Dɩ ʋ nɩɩ chɛ ʋ kɛŋ piese ŋaa Wɩɩsʋlɩɩ-la, ʋ maga dɩ ʋ kaa kɔ mɩ-na ma TƖƖNA sɩpaaŋ nɛ,

⁸ a joŋ nɩsɩŋ daŋ piesu-la nyuŋ lɛ aŋ kpʋʋ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ. Arɔŋ hambolibiisiŋ jaŋ laa ʋ chalɩŋ a mɩsɛ Wɩɩsʋlʋŋ koru-la sɛsɩŋ kala.

⁹ Nii-magɛ dɔŋɔ Wɩɩsʋlʋŋ pʋna-la ʋ sɩ kaa kɔ dɩ ʋ nyɩga pɩ mɩ-na ma TƖƖNA, ʋ maga dɩ ʋ kʋɔrɛ nʋʋ-la kala sɩ tɔ tʋɔŋ kɩaa arɩ nʋʋ-la kala sɩ hɛ ʋ tʋɔŋ, a kʋɔrɛ nʋʋ-la ma sɩ tɔ dokeliŋ,

¹⁰ a pɛ chʋchɔ-biee arɩ nʋʋ-la sɩ tɔba arɩ chʋɩŋ lɛ.

¹¹ Wɩɩsʋllɩ sɩpaalaara jaŋ laaba a nyɩgɛ Wɩɩsʋlʋŋ koru-la nyuŋ, ba ŋaa kʋdiilee wɩɩ-sʋla nɛ a pɩ mɩ-na ma TƖƖNA.

¹² Dɩ bʋʋna nɛ ʋʋ chɛ dɩ ʋ kaa ŋaa Wɩɩsʋlɩɩ-la, ʋ maga dɩ ʋ kɛnʋ kɔ mɩ-na ma TƖƖNA sɩpaaŋ nɛ,

¹³ a joŋ ʋ nɩsɩŋ daŋ bʋʋŋ-la nyuŋ lɛ aŋ kpʋʋ lee-la mɩ sɩ yie kɔ Iziral tɩŋŋaa teeŋ boiŋ niiŋ. Arɔŋ hambolibiisiŋ jaŋ laa ʋ chalɩŋ a mɩsɛ Wɩɩsʋlʋŋ koru-la sɛsɩŋ kala.

¹⁴ Pʋna-la tʋɔŋ kɩaa deemba nɛ maga dɩ ʋ joŋo nyɩgɛ a pɩ mɩ-na ma TƖƖNA: nʋʋ-la kala sɩ tɔ tʋɔŋ kɩaa,

¹⁵ a pɛ chʋchɔ-biee arɩ nʋʋ-la kala sɩ tɔba arɩ chʋɩŋ lɛ.

¹⁶ Wɩɩsʋllɩ sɩpaalaara jaŋ laaba a nyɩgɛ Wɩɩsʋlʋŋ koru-la nyuŋ a pɩ mɩ-na ma TƖƖNA. Ba sʋɔra sɩma nɛ a pɩmɛ. Mɩ-na ma TƖƖNA nɛ tɩɩ pʋna-la ba sɩ kpʋ ŋaa Wɩɩsʋlʋŋ nʋʋŋ kala.

¹⁷ Iziral tɩŋŋaa doho kala maga dɩ ba kɩkɩsɛ pʋna chalɩŋ koo nʋʋŋ nɛ ba mɩɩsɩŋ kala lɛ lee na-kala ba sɩ hɛ.’ ”