LEVI DOHO NƖAA 23 - WƖA TENIŊ

Wɩɩchʋɔlɛ gbielee

¹ La TƖƖNA bʋla pɩ Mosis,

² “Bʋla pɩ Iziral tɩŋŋaa: ‘Gbielee deemba nɛ maga dɩ ma kʋ hɛ dɔŋɔ aa gbieli mɩ-na ma TƖƖNA yɩrɩŋ lɛ.

³ Tapʋlaa balɩdʋ nɛ ma jaŋ tɩŋ ma tɩntɩŋŋaa, ama chɛ-pɛɩ chɛɛŋ nɛ ŋaa chɛ-wiesii-la. Ʋ maga má kʋ hilimi mɩ-na ma TƖƖNA yɩrɩŋ lɛ nɛ aŋ sɩ́ tɩntɩmɩɩ kala tɩŋ. Lee na-kala ma sɩ hɛ, tapʋlɩɩ-la ŋaa chɛ-wiesii nɛ a pɩ mɩ-na ma TƖƖNA.

Dɩɩsɩŋ kiele bal gbiele arɩ boroboro-la sɩ bɩ sɩbʋrʋŋ kɛnɛ

⁴ Gbielee deemba nɛ mɩ-na ma TƖƖNA dagɛ dɩ ma hilimee gbieli, dɩ bʋa-la nɛ kʋ yi na-kala.

⁵ Mɩ-na ma TƖƖNA dɩɩsɩŋ kiele bal gbiele jaŋ suomi jɩna tʋɔŋ chɛŋ-bumbuŋ tapʋlaa fii arɩ banɛsɛ chɛɛŋ dɩdaanɩŋ.

⁶ Chɛnɛ-la tɩtɩa tʋɔŋ tapʋlaa fii arɩ banɔŋ chɛɛŋ nɛ ba sɩ yie dii boroboro-la sɩ bɩ sɩbʋrʋŋ kɛnɛ gbiele ma jaŋ suomi. Ma jaŋ dii boroboro-la sɩ bɩ sɩbʋrʋŋ kɛnɛ tapʋlaa balɩpɛ.

⁷ Tapʋlaa balɩpɛ-la tʋɔŋ tapʋl bumbuŋ nɛ maga dɩ má hilimi mɩ yɩrɩŋ lɛ aŋ sɩ́ tɩntɩmɩɩ kala tɩŋ.

⁸ Tapʋlɩa-la tʋɔŋ nɛ maga dɩ má joŋ kʋdiilee ŋaa Wɩɩsʋlʋŋ a nyɩga pɩ mɩ-na ma TƖƖNA. Tapʋl-pɛɩ má hilimi mɩ yɩrɩŋ lɛ aŋ sɩ́ tɩntɩmɩɩ kala tɩŋ.’ ”

Kʋdii-falaa

⁹ La TƖƖNA bɩra bʋla pɩ Mosis,

¹⁰ “Bʋla pɩ Iziral tɩŋŋaa: ‘Dɩ ma nɛ jʋʋ Kɛnaŋ tintee-la mɩ sɩɩ chɛ dɩ mɩ joŋo pɩma, jɩna na-kala dɩ ma nɛ ŋaa ma kʋdii falaa, má sʋa mɩɩ-jagɩsɩŋ a kaa mʋ pɩ Wɩɩsʋllɩ sɩpaalaara.

¹¹ Chɛ-wiesii-la taŋ sɩ pʋla nɛ Wɩɩsʋllɩ sɩpaalaara jaŋ joŋ mɩɩ-jagɩsɩ-la ba sɩ kaa kʋ pʋ je, a zaara ŋaa Wɩɩsʋlʋŋ mɩ-na ma TƖƖNA sɩpaaŋ dɩ mɩ laa ma sʋla.

¹² Tapʋlɩɩ-la ma sɩ kɛŋ mɩɩ-jagɩsɩ-la je a sʋl Wɩɩsʋlʋŋ tɩtɩa nɛ maga dɩ má kpʋ pie-bie sɩ yi jɩna a bɩ nyɔɔ kala kɛnɛ a sʋl kʋnyɩgaa Wɩɩsʋlʋŋ a pɩ mɩ-na ma TƖƖNA,

¹³ a pɛ munuŋ sɩ bɩɩ nʋgʋgʋ gbaŋa lɛ a kɛŋ nʋʋŋ buu a nyɩga pɩ mɩ-na ma TƖƖNA. Ba sʋɔra sɩma nɛ a pɩmɛ, a pɛ kʋnyʋalaa Wɩɩsʋlʋŋ tɩɩnɛnɛɛ sɩnɩŋ loŋ arɩ kpaa magɛ dɔŋɔ.

¹⁴ Dɩ ma nɛ bɩ Wɩɩsʋlɩɩ-la ŋaa, ʋ bɩ maga dɩ ma dii ma kʋdii falɩɩ kala, dɩ ba kaa wasɛ boroboro nɛ koo dɩ ba joŋo wasɛ nɛ koo dɩ ʋ ŋaa kʋhuoŋ nɛ. Wɩɩŋ deeŋ ŋaa nii nɛ a magɛ dɩ ma doho kala tuto, lee na-kala ma sɩ hɛ.

Baga kɩaa ŋaanɩŋ gbiele

¹⁵ Má chɩŋ chɛ-wiesii-la taŋ sɩ pʋla lɛ, tapʋlɩɩ-la ma sɩ kɛŋ mɩɩ-jagɩsɩŋ je, a zaara ŋaa Wɩɩsʋlʋŋ, a dɩɩsɛ yɔɔsʋŋ balɩpɛ.

¹⁶ Yɔɔ-pɛɩ-la taŋ sɩ pʋla, má ŋaa kʋdii falaa Wɩɩsʋlʋŋ a pɩ mɩ-na ma TƖƖNA.

¹⁷ Kaala kala nɩaa maga dɩ má kɛŋ munuŋ sɩ bɩɩ nʋgʋgʋ gbaŋa a hɛ sɩbʋrʋŋ a wasɛ boroboro balɩa a kaa kʋ je a zaara sʋl kʋdii falaa Wɩɩsʋlʋŋ a pɩ mɩ-na ma TƖƖNA.

¹⁸ Má pɛ kɛŋ pie-pɔrɔɔ balɩpɛ sɩ yi jɩna a bɩ nyɔɔ kala kɛnɛ a pɛ boroboroba-la lɛ, arɩ nɛ-bel-pɔrʋŋ a pɛ pie-belliŋ balɩa lɛ. Kɩaa deemba nɛ ma jaŋ joŋo sʋl kʋnyɩgaa Wɩɩsʋlʋŋ a pɩ mɩ-na ma TƖƖNA a pɛ mɩaa Wɩɩsʋlʋŋ arɩ kʋnyʋalaa Wɩɩsʋlʋŋ lɛ. Ba ŋaa kʋnyɩgaa wɩɩ-sʋlʋŋ nɛ. Ba sʋɔra sɩma nɛ a pɩ mɩ-na ma TƖƖNA.

¹⁹ Má kpʋ gbuŋgbogo ma sʋl wʋbɔŋŋɔɔ joŋo chɛnɩŋ Wɩɩsʋlʋŋ, aŋ kpʋ pie-bel-pɔrɔɔ balɩa sɩ yi jɩna a sʋl nii-magɛ dɔŋɔ Wɩɩsʋlʋŋ.

²⁰ Wɩɩsʋllɩ sɩpaalaara jaŋ joŋ pie-belli-la balɩa arɩ ba sɩ kɛŋ kʋdii falaa wasɛ boroboroba-la a je aa zaarɛ mɩ-na ma TƖƖNA sɩpaaŋ. Ŋɩɩ ŋaa Wɩɩsʋlɩɩ nɛ. Ba ŋaa Wɩɩsʋllɩ kɩa sɩ bɩ disiniŋ kɛnɛ nɛ mɩ teeŋ, a ŋaa Wɩɩsʋllɩ sɩpaalaaraa kʋdiilee.

²¹ Tapʋlɩɩ-la tɩtɩa ʋ maga dɩ má hilimi mɩ yɩrɩŋ lɛ aŋ sɩ́ tɩntɩmɩɩ kala tɩŋ. Wɩɩŋ deeŋ ŋaa nii nɛ a magɛ dɩ ma doho kala tuto lee na-kala ma sɩ hɛ.

²² Dɩ ma nɩɩ ŋaa ma baga kɩaa Kɛnaŋ tintee-la lɛ, má sɩ́ sɛŋ-keree kɩaa ŋaa, má bɩra sɩ́ mɩɩra mʋ kuuni ma. Má lemba pɩ summoo arɩ nʋhʋɔraa. Mɩ nɛ ma TƖƖNA Wɩa.’ ”

²³ La TƖƖNA bʋla pɩ Mosis,

²⁴ “Bʋla pɩ Iziral tɩŋŋaa: ‘Chɛŋ-pɛɩ tʋɔŋ tapʋl bumbuŋ, ʋ maga dɩ má wiesi aŋ hilimi mɩ yɩrɩŋ lɛ a ŋmʋʋ banyile a gbieli.

²⁵ Má sɩ́ tɩntɩmɩɩ kala tɩŋ, má joŋ kɩaa ŋaa Wɩɩsʋlʋŋ a nyɩga pɩ mɩ-na ma TƖƖNA.’ ”

Disiniŋ pɩɩsɩŋ tapʋlʋŋ

²⁶ La TƖƖNA bɩra bʋla pɩ Mosis,

²⁷ “Chɛŋ-pɛɩ-la tʋɔŋ tapʋlaa fii chɛɛŋ nɛ ma jaŋ pɩɩsɛ ma disiniŋ ta. Má hilimi mɩ yɩrɩŋ lɛ a vɔɔ niiŋ a joŋ kɩaa ŋaa Wɩɩsʋlʋŋ a nyɩga pɩ mɩ-na ma TƖƖNA.

²⁸ Má sɩ́ tɩntɩmɩɩ kala tiŋ tapʋlɩɩ-la, bɛɛ wɩaa tapʋlɩɩ-la nɛ maga ma pɩɩsɛ ma disiniŋ ta mɩ-na ma TƖƖNA Wɩa sɩpaaŋ.

²⁹ Dɩ nʋʋkala nɛ vɩa dɩ ʋ vɔɔ niiŋ tapʋlɩɩ-la, ʋ maga dɩ ma keru ta ʋ nɩaa tʋɔŋ.

³⁰ Mɩ jaŋ kpʋ nʋʋ na-kala sɩ jaŋ tɩŋ tɩntɩŋŋaa tapʋlɩɩ-la.

³¹ Má paala sɩ́ tɩntɩmɩɩ kala tɩŋ. Wɩɩŋ deeŋ ŋaa nii nɛ a magɛ dɩ ma doho kala tuto lee na-kala ma sɩ hɛ.

³² Má vɔɔ niiŋ chɛnɛ-la tʋɔŋ tapʋl-nibi dɩdaanɩŋ a kaa mʋ ʋ chɛ-lɩa dɩdaanɩŋ. Ʋ maga dɩ ma to chɛ wiesii-la woruŋ.”

Lɛŋŋɛɛ gbielee

³³ La TƖƖNA bʋla pɩ Mosis,

³⁴ “Bʋla pɩ Iziral tɩŋŋaa: ‘Chɛŋ-pɛɩ tʋɔŋ tapʋlaa fii arɩ banɔŋ chɛɛŋ nɛ mɩ-na ma TƖƖNA lɛŋŋɛɛ gbiele jaŋ suomi. Ʋ jaŋ dieni a magɛ tapʋlaa balɩpɛ.

³⁵ Tapʋl-bumbuŋ ma jaŋ hilimi mɩ yɩrɩŋ lɛ aŋ sɩ́ tɩntɩmɩɩ kala tɩŋ.

³⁶ Tapʋlɩa-la balɩpɛ, má joŋ kɩaa ŋaa Wɩɩsʋlʋŋ a nyɩgaa pɩ mɩ-na ma TƖƖNA. Tapʋl-chori chɛɛŋ má hilimi mɩ yɩrɩŋ lɛ a joŋ kɩaa ŋaa Wɩɩsʋlʋŋ a nyɩga pɩ mɩ-na ma TƖƖNA. Gbiele-la dɩdɛrɩŋ nɛ ŋɩɩ. Má sɩ́ tɩntɩmɩɩ kala tɩŋ.

³⁷ Gbielee deemba nɛ mɩ-na ma TƖƖNA dagɛ dɩ ma hihilimi mɩ yɩrɩŋ lɛ a ŋaa kʋnyɩgaa Wɩɩsʋlʋŋ arɩ mɩaa Wɩɩsʋlʋŋ a nyɩga pɩpɩ mɩ-na ma TƖƖNA. Tapʋlɩɩ na-kala Wɩɩsʋlʋŋ maga dɩ ma kpʋ pʋsʋŋ a pɛ kʋnyʋalaa Wɩɩsʋlʋŋ lɛ.

³⁸ Wɩɩsʋllʋŋ deemba kala pɛ chɛ-wiesii-la Wɩɩsʋlʋŋ lɛ nɛ, arɩ zile kɩalɩŋ kala ma sɩ yie joŋo pɩ mɩ-na ma TƖƖNA arɩ ma tʋɔtɔrɛ Wɩɩsʋlʋŋ kɩaa, a pɛ Wɩɩsʋlɩɩ-la ma sɩ yie kaa lɩɩsɛ niiri-la ma sɩ hɛ pɩ mɩ-na ma TƖƖNA.

³⁹ Dɩ ma nɛ ŋaa ma baga kɩaa, má gbieli gbiele deeŋ tapʋlaa balɩpɛ a pɩ mɩ-na ma TƖƖNA. Má suomi chɛŋ-pɛɩ-la tapʋlaa fii arɩ banɔŋ chɛɛŋ. Tapʋl-bumbuŋ ŋaa chɛ-wiesii nɛ, tapʋl chori ma ŋaa chɛ-wiesii.

⁴⁰ Tapʋl-bumbuŋ-la má tɔrɛ ma tɩɩ-nɛŋ-zɔŋŋɔɔ, a chɔl abɛ pɩpaarɩŋ, a chɔl tɩɩ-naakelee sɩ kɛŋ pɩpaarɩŋ a jʋɔsɛ mɩ-na ma TƖƖNA Wɩa sɩpaaŋ tapʋlaa balɩpɛ.

⁴¹ Jɩna na-kala chɛŋ pɛɩ lɛ, má gbieli gbiele deeŋ tapʋlaa balɩpɛ a pɩ mɩ-na ma TƖƖNA. Gbiele deeŋ maga dɩ ma doho nɩaa kala gbigbielu nɛ a kaa mʋ wuu.

⁴² Tapʋlɩa-la balɩpɛ kala lɛ ma sɩɩ gbieli gbiele-la, nʋʋ na-kala sɩ ŋaa Iziral tɩɩna maga dɩ ʋ jʋjʋʋ lɛbɩŋ nɛ.

⁴³ Dɩ ma nɛ ŋaa ŋɩɩ, ma doho nɩaa kala jaŋ liliisi arɩ mɩ leŋe Iziral tɩŋŋaa jʋʋ lɛŋŋɛɛ nɛ bʋa-la lɛ mɩ sɩ kɛmba lɩɩ Ijipiti tinteeŋ lɛ. Mɩ nɛ ma TƖƖNA Wɩa.’ ”

⁴⁴ Ŋɩɩ nɛ Mosis leŋ Iziral tɩŋŋaa kala jɩŋ tapʋlɩa-la sɩ maga dɩ baa gbieli gbielee deemba, a zizil La TƖƖNA.