LEVI DOHO NƖAA 2 - WƖA TENIŊ

Mɩaa Wɩɩsʋlʋŋ

¹ Dɩ nʋʋkala nɩɩ chɛ dɩ ʋ ŋaa mɩaa Wɩɩsʋlʋŋ a pɩ mɩ-na ma TƖƖNA, ʋ maga dɩ ʋ ŋaa munuŋ sɩ bɩɩ nʋgʋgʋ a wɛnsɛ nʋʋŋ hɛ a joŋ kʋsʋɔrʋsʋŋ daŋ,

² a kaa mʋ pɩ Arɔŋ hambolibiisi-la sɩ ŋaa Wɩɩsʋllɩ sɩpaalaaraa dɩ dɔŋɔ ŋaa muŋ-zɔŋ-la arɩ nʋʋ-la arɩ kʋsʋɔrʋsʋ-la kala nɩsɩŋ sɩɩ, mɩ-na ma TƖƖNA dɩ-diiliŋ a nyɩgɛ Wɩɩsʋlʋŋ koru-la nyuŋ. Ba sʋɔra sɩma nɛ a pɩmɛ.

³ Wɩɩsʋllɩ sɩpaalaaraa nɛ tɩɩ kʋkaana-la. Ba ŋaa kʋzɔmɔ nɛ kɩŋkɛŋ ba joŋo ŋaa Wɩɩsʋlʋŋ a nyɩga pɩ mɩ-na ma TƖƖNA.

⁴ Dɩ ma nɩɩ chɛ dɩ ma kɛŋ mɩaa wasɛ boroboro a kaa sʋl mɩaa Wɩɩsʋlʋŋ, ʋ maga dɩ ma ŋaa munuŋ sɩ bɩɩ nʋgʋgʋ a kɛŋ nʋʋŋ buu aŋ sɩ́ sɩbʋrʋŋ hɛ, koo dɩ ʋ nɛ ŋaa boroboro pɛrɛ pɛrɛ biisiŋ ma, má sɩ́ sɩbʋrʋŋ hɛ aŋ wasɛ a ŋaa nʋʋŋ taa.

⁵ Dɩ ma nɩɩ chɛ dɩ ma hal munuŋ nʋʋ-hala lɛ a kaa sʋl mɩaa Wɩɩsʋlʋŋ, má ŋaa munuŋ sɩ bɩɩ nʋgʋgʋ a buu arɩ nʋʋŋ a sɩ́ sɩbʋrʋŋ hɛ,

⁶ a kaa yɔrɩsɛ a wɛnsɛ nʋʋŋ daŋ, ʋ ŋaa mɩaa Wɩɩsʋlɩɩ nɛ.

⁷ Dɩ ma nɩɩ chɛ dɩ ma chɔ munuŋ ma a kaa sʋl mɩaa Wɩɩsʋlʋŋ, ʋ maga dɩ ma ŋaa munuŋ sɩ bɩɩ nʋgʋgʋ nɛ a hɛ nʋʋŋ.

⁸ Dɩ kɩaa deemba kʋŋkala nɛ ma kaa kɔ dɩ ma sʋl mɩaa Wɩɩsʋlʋŋ pɩ mɩ-na ma TƖƖNA, ʋ maga dɩ ma joŋo pɩ Wɩɩsʋllɩ sɩpaalaara dɩ ʋ laa a kaa mʋ Wɩɩsʋlʋŋ koru-la teeŋ.

⁹ Ʋ jaŋ joŋ La TƖƖNA dɩ-diiliŋ mɩaa Wɩɩsʋlɩɩ-la tʋɔŋ a nyɩgɛ Wɩɩsʋlʋŋ koru-la nyuŋ. Ʋ sʋɔra sɩma nɛ a pɩ mɩ-na ma TƖƖNA.

¹⁰ Kɩalɩŋ sɩ ka ŋaa Arɔŋ arɩ ʋ hambolibiisiŋ kɩaa nɛ. Ba ŋaa kʋzɔmɔ nɛ kɩŋkɛŋ bɛɛ wɩaa ba nɛ ba joŋo ŋaa Wɩɩsʋlʋŋ a nyɩga pɩ mɩ-na ma TƖƖNA.

¹¹ Mɩaa Wɩɩsʋlɩɩ na-kala ma sɩ jaŋ kaa kɔ mɩ-na ma TƖƖNA teeŋ bɩ maga dɩ ʋ kɛŋ sɩbʋrʋŋ. Wɩɩsʋlɩɩ na-kala ma sɩ jaŋ nyɩga pɩ mɩ-na ma TƖƖNA bɩ maga dɩ ʋ kɛŋ tʋʋŋ koo sɩbʋrʋŋ.

¹² Kɩalɩŋ sɩ kɛŋ sɩbʋrʋŋ koo tʋʋŋ, ma jaŋ wuo kɛmba a sʋl kʋdii falaa Wɩɩsʋlʋŋ, ama ʋ bɩ maga dɩ ma nyɩgɛba Wɩɩsʋlʋŋ koru-la nyuŋ a pɩ mɩ-na ma TƖƖNA. Ba sʋɔra bɩ sɩŋ a pɩ mɩ-na ma TƖƖNA.

¹³ Mɩaa Wɩɩsʋlɩɩ na-kala maga dɩ má hɛ yɩsɩŋ, bɛɛ wɩaa yɩsɩŋ nɛ ŋaa nii-la sɩ hɛ ma dɩ Wɩa pɛgɛ magɩlɩŋ. Má hɛ yɩsɩŋ ma Wɩɩsʋlʋŋ kʋŋ na-kala lɛ.

¹⁴ Dɩ ma nɩɩ chɛ dɩ ma kɛŋ ma mɩɩ-falaa sʋl mɩaa Wɩɩsʋlʋŋ a pɩ mɩ-na ma TƖƖNA, má keri mɩɩ-nyusu-la kʋlaarɩŋ a wasɛ a gɛrɩgɛ,

¹⁵ a hɛ nʋʋŋ arɩ kʋsʋɔrʋsʋŋ mɩɩ-gɛrɩgɩa-la lɛ, ʋ ŋaa mɩaa Wɩɩsʋlʋŋ nɛ.

¹⁶ Wɩɩsʋllɩ sɩpaalaara jaŋ ŋaa mɩɩ gɛrɩgɩa-la arɩ nʋʋ-la a pɛ kʋsʋɔrʋsʋ-la lɛ, mɩ-na ma TƖƖNA dɩ-diiliŋ, a nyɩgɛ ba kala a ŋaa Wɩɩsʋlʋŋ pɩmɛ.