LEVI DOHO NƖAA 18 - WƖA TENIŊ

Haalaa arɩ baalaa dɔŋɔba pɩnɩŋ wɩaa

¹ La TƖƖNA bʋla pɩ Mosis,

² “Bʋla pɩ Iziral tɩŋŋaa kala: ‘Mɩ nɛ ŋaa ma TƖƖNA Wɩa.

³ Má pɔ má sɩ́ wɩalɩŋ Ijipiti tɩŋŋaa sɩɩ ŋaa to, lee-la ma fa sɩ hɛ, arɩ wɩalɩŋ Kɛnaŋ tɩŋŋaa sɩɩ ŋaa lee-la mɩ sɩ jaŋ kɛmma mʋ.

⁴ Má to mɩ wombiee a ŋaa wɩalɩŋ mɩ sɩ dagɛma, mɩ nɛ ŋaa ma TƖƖNA Wɩa.

⁵ Má to mɩ wombiee arɩ wɩalɩŋ mɩ sɩ dagɛma, nɩɩ-la kala sɩ toba, ŋ jaŋ kɛŋ mɩɩsɩŋ. Mɩ nɛ ŋaa ma TƖƖNA Wɩa.

⁶ Nʋʋkala bɩ maga dɩ ʋ kɛŋ ʋ naambie pɩŋ. Mɩ nɛ ŋaa ma TƖƖNA Wɩa.

⁷ Pʋpɔ ŋ sɩ́ ŋ nyɩmma hɩɩsʋ a kɛŋ ŋ naaŋ pɩŋ. Ŋ naaŋ nɛ, sɩ́ ʋ kaa pɩŋ.

⁸ Sɩ́ ŋ nyɩmma hɩɩsʋ a kɛŋ ŋ naaŋ hadɔŋɔ pɩŋ.

⁹ Pʋpɔ ŋ sɩ́ ŋ dɩhaala kaa pɩŋ, ŋ nyɩmma tolo koo ŋ naaŋ tolo, dɩ ba lʋl ma kala dɩ-bala nɛ koo dɩ ba lʋlʋ lee dɔŋ nɛ.

¹⁰ Pʋpɔ ŋ sɩ́ ŋ nihiŋ kaa pɩŋ, dɩ ŋ nɛ ŋaa ŋɩɩ, ŋ hɛ ŋ tɩtɩa hɩɩsɩŋ nɛ.

¹¹ Pʋpɔ ŋ sɩ́ ŋ naaŋ hadɔŋɔ tolo ŋ nyɩmma sɩ lʋla kaa pɩŋ, ʋ ŋaa ŋ dɩhaala nɛ.

¹² Pʋpɔ ŋ sɩ ŋ nyɩmma dɩhaala kaa pɩŋ, ʋ ŋaa ŋ nyɩlɩma nɛ.

¹³ Pʋpɔ ŋ sɩ́ ŋ naaŋ ŋaana kaa pɩŋ, ŋ naaŋ kʋbie nɛ.

¹⁴ Pʋpɔ ŋ sɩ́ ŋ nyɩmma kʋbie hɩɩsɩŋ hɛ a kɛŋ ʋ haala pɩŋ, ŋ naaŋ nɛ.

¹⁵ Pʋpɔ ŋ sɩ́ ŋ nanʋala haala kaa pɩŋ, ŋ bii-haala nɛ.

¹⁶ Pʋpɔ ŋ sɩ́ ŋ naambie haala kaa pɩŋ a hɛ ŋ naambie hɩɩsɩŋ.

¹⁷ Pʋpɔ ŋ sɩ́ haala arɩ ʋ tolo kala kaa pɩŋ koo haal-la nihee. Ma pɛ chalɩŋ nɛ, ŋɩɩ ŋaa wʋbɔŋ nɛ.

¹⁸ Dɩ ŋ haala nɛ hɛ ʋ mɩɩsɩŋ lɛ, ʋ bɩ maga dɩ ŋ jaa ʋ ŋaana dɩ ba ŋaa hadɔsɛ.

¹⁹ Dɩ haala nɛ hɛ tɩŋa, pʋpɔ ŋ sɩ́ ʋ kaa pɩŋ, ʋ kɛŋ disiniŋ nɛ.

²⁰ Pʋpɔ ŋ sɩ́ nʋʋ haal kaa pɩŋ a ŋaa disiniŋ hɛ ŋ tɩtɩa lɛ.

²¹ Má pʋpɔ ma sɩ́ ma bii kaa pa dɩ ba kaa kpaarɛ vene-la ba sɩɩ yɩrɛ Mɔlɛk, a hɛ ma Wɩa hɩɩsɩŋ. Mɩ nɛ ŋaa ma TƖƖNA.

²² Pʋpɔ ŋ sɩ́ ŋ ba-dɔŋɔ kaa pɩŋ, arɩ nɩa sɩ yie kɛŋ haala pɩŋ ŋɩɩ, ʋʋ kɩsɛ nɛ.

²³ Baal kala bɩ maga dɩ ʋ kɛŋ pʋna pɩŋ. Haal ma bɩ maga dɩ ʋ leŋ dɩ pʋna kɛnʋ pɩŋ. Ŋɩɩ ŋaa wʋberige nɛ.

²⁴ Má pʋpɔ ma sɩ́ wɩaa deemba kʋŋ ŋaa a kɛŋ disiniŋ. Lee-la ma sɩɩ mʋ wɩaa deemba nɛ baa ŋaa, mɩɩ chɛ mɩ kiriba ta tintee-la lɛ.

²⁵ Wɩalɩŋ nɛ ba ŋaa tintee-la kala kɛŋ disiniŋ, mɩ dɔgɩsɛba a kiriba ta tintee-la lɛ.

²⁶ Ma Iziral tɩŋŋaa arɩ nʋhʋɔra-la sɩ hɛ ma tʋɔŋ maga dɩ má to mɩ wombie-la arɩ wɩalɩŋ mɩ sɩ dagɛ nɛ. Má sɩ́ disiŋ wɩaa deemba kʋŋkala ŋaa.

²⁷ Nɩalɩŋ sɩ laa sɩpaaŋ hɔŋ tintee-la lɛ ŋaa disiŋ wɩaa deemba nɛ a chei tintee-la kala.

²⁸ Dɩ ma nɩɩ ŋaa disiŋ wɩaa deemba tintee-la lɛ, mɩ jaŋ kirima ta arɩ mɩ sɩ kiri nɩalɩŋ sɩ laa sɩpaaŋ hɔŋ tintee-la lɛ ta ŋɩɩ.

²⁹ Dɩ nʋʋkala nɛ ŋaa wʋkɩsaa deemba, ʋ maga dɩ má keru ta ʋ nɩaa tʋɔŋ nɛ.

³⁰ Má ŋɩŋaa wɩalɩŋ mɩ sɩ dagɛma, aŋ sɩ́ disiŋ wɩalɩŋ nɩalɩŋ fa sɩ hɔŋ tintee-la lɛ a ŋɩŋaa to a ŋaa disiniŋ hɛ ma tɩtɩa lɛ. Mɩ nɛ ŋaa ma TƖƖNA Wɩa.’ ”