LEVI DOHO NƖAA 16 - WƖA TENIŊ

Disiniŋ pɩɩsɩŋ tapʋlʋŋ

¹ Arɔŋ hambolibiisi-la balɩa sɩ mʋ La TƖƖNA sɩpaaŋ a nyɩgɛ nyiŋ-la ʋ sɩ bɩ ba daga a sʋʋ, ŋɩɩ harɩŋ nɛ La TƖƖNA bʋla pɩ Mosis,

² “Bʋla pɩ ŋ naambie Arɔŋ, dɩ ʋ sɩ́ Wɩa dɩ-zɔŋ-la sɩpaaŋ lee-la zɔmʋŋ sɩ bɩ magɩa kɛnɛ a hɛ patɩɩsaŋ-la harɩŋ jʋʋ, lee-la Wɩa niiriŋ daga-la sɩ chɩna, bʋa na-kala lɛ ʋ sɩɩ chɛ. Dɩ ʋ nɛ vɩa aŋ jʋʋ, ʋ jaŋ sʋʋ, bɛɛ wɩaa nɩmɛ nɛ mɩ yie to duoŋ-bɩlɩmbaanɩŋ lɛ a kʋ tuu daga-la nii-tɔlɔ nyuŋ.

³ Dɩ Arɔŋ nɩɩ chɛ ʋ jʋʋ Wɩa dɩ-zɔŋ-la sɩpaaŋ, lee-la zɔmʋŋ sɩ bɩ magɩa kɛnɛ a hɛ patɩɩsaŋ-la harɩŋ, bʋa-la sɩ maga, see dɩ ʋ kɛŋ wʋbɔŋŋɔɔ Wɩɩsʋlʋŋ nɛ-bel-pɔrʋŋ arɩ kʋnyɩgaa Wɩɩsʋlʋŋ pie-bele a kʋ ŋaa Wɩɩsʋlʋŋ.

⁴ Ʋ jaŋ joŋ ʋ gɛrɩpɛ fʋfʋlʋŋ gɛrɩ-duduoŋ-la a laalɛ, a joŋ ʋ gɛrɩpɛ fʋfʋlʋŋ kpʋŋ-kpeli kuuŋ a vɔɔ, a joŋ gɛrɩ-la gɛrɩpɛlɩɛɛ-bie a vɔɔ, a joŋ nyu-bɛlɛ bɛ. Gɛnnɩŋ deemba ŋaa Wɩa kɩaa nɛ. Ŋɩɩ wɩaa ʋ maga dɩ ʋ fo lɩɩŋ aŋ-na laalɛba.

⁵ Ʋ jaŋ laa wʋbɔŋŋɔɔ Wɩɩsʋlʋŋ gbuŋgbogusuŋ balɩa arɩ kʋnyɩgaa Wɩɩsʋlʋŋ pie-bele Iziral tɩŋŋaa teeŋ.

⁶ Arɔŋ jaŋ kɛŋ nɛ-bele a sʋl ʋ tɩtɩa arɩ ʋ dɩa nɩaa wʋbɔŋŋɔɔ Wɩɩsʋlʋŋ.

⁷ Ʋ jaŋ kɛsɛ gbuŋgbogusu-la balɩa a kaa kɔ mɩ-na ma TƖƖNA sɩpaaŋ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ.

⁸ Ʋ maga dɩ ʋ tɔnsɔ lɩɩsɛ gbuŋgbogusu-la tʋɔŋ kʋ-la ʋ sɩ jaŋ joŋo pɩ mɩ-na ma TƖƖNA arɩ kʋ-la ʋ sɩ jaŋ joŋo ta.

⁹ Dɩ Arɔŋ nɛ kʋ jɩŋ gbuŋgbogo-la sɩ ŋaa mɩ-na ma TƖƖNA kʋa, ʋ jaŋ joŋo ŋaa wʋbɔŋŋɔɔ joŋo chɛnɩŋ Wɩɩsʋlʋŋ.

¹⁰ Bʋʋŋ-la sɩ maga dɩ ʋ joŋo ta, ʋ jaŋ kɛnʋ mʋ mɩ-na ma TƖƖNA sɩpaaŋ a sʋl Wɩɩsʋlʋŋ aŋ joŋo ta dɩ ʋ kɛŋ ba wʋbɔŋŋɔɔ mʋ.

¹¹ Arɔŋ jaŋ kɛŋ nɛ-bele a sʋl ʋ tɩtɩa arɩ ʋ dɩa nɩaa wʋbɔŋŋɔɔ Wɩɩsʋlʋŋ, aŋ kpʋ.

¹² Ʋ jaŋ mʋ Wɩɩsʋlʋŋ koru-la nyuŋ La TƖƖNA sɩpaaŋ a joŋ kʋ-la lɛ ba sɩɩ hɛ nyiniŋ a chaanɛ nyiŋ-halaa su a ŋaa kʋsʋɔrʋsʋŋ sʋɔra sɩ sɩma ba sɩ nɔmɔ ba bii, nɩsɩŋ sɩɩŋ bʋlɩa, a kaa jʋʋ Wɩa dɩ-zɔŋ-la sɩpaaŋ, lee-la zɔmʋŋ sɩ bɩ magɩa kɛnɛ a hɛ patɩɩsaŋ-la harɩŋ.

¹³ Nɩmɛ nɛ ʋ jaŋ joŋ kʋsʋɔrʋsʋ-la sʋɔra sɩ sɩma hɛ nyiŋ-la lɛ mɩ-na ma TƖƖNA sɩpaaŋ dɩ ba nyʋɔsʋŋ sii tɔ Wɩa niiriŋ daga-la arɩ ʋ nii-tɔlɔ, dɩ ʋ sɩ́ Wɩa niiriŋ daga-la nii-tɔlɔ na a sʋʋ.

¹⁴ Ʋ jaŋ ŋaa nɛ-bele-la chalɩŋ a kɛŋ ʋ neniiŋ tagɛ a mɩsɛ Wɩa niiriŋ daga-la nii-tɔlɔ aŋ bɩra tagɛ a mɩsɛ ʋ sɩpaaŋ naansɩɩŋ bʋlɩpɛ.

¹⁵ Ʋ ŋɩɩ harɩŋ ʋ jaŋ kpʋ nɩalɩŋ wʋbɔŋŋɔɔ Wɩɩsʋlʋŋ bʋʋna a ŋaa ʋ chalɩŋ kaa jʋʋ Wɩa dɩ-zɔŋ-la sɩpaaŋ, lee-la zɔmʋŋ sɩ bɩ magɩa kɛnɛ a hɛ patɩɩsaŋ-la harɩŋ a ŋaa mɩsɛ Wɩa niiriŋ daga-la nii-tɔlɔ nyuŋ aŋ ŋaa mɩsɛ daga-la sɩpaaŋ ma arɩ ʋ sɩ laa sɩpaaŋ kɛŋ nɛ-bele-la chalɩŋ ŋaa ŋɩɩ.

¹⁶ Dɩ ʋ nɛ ŋaa ŋɩɩ, ʋ pɩɩsɛ Wɩa dɩ-zɔŋ-la sɩpaaŋ, lee-la zɔmʋŋ sɩ bɩ magɩa kɛnɛ disiniŋ ta nɛ, disiŋ-la arɩ wʋbɔmɔ-la Iziral tɩŋŋaa sɩ ŋaa hɛ lee-la. Ŋɩɩ tɩtɩa nɛ ʋ jaŋ ŋaa lɛbɩ-la lɛ mɩ-na ma Tɩɩna sɩ yie kɔ Iziral tɩŋŋaa teeŋ ma lɛ, bɛɛ wɩaa ʋ ma kɛŋ disiniŋ nɛ.

¹⁷ Nʋʋkala bɩ maga dɩ ʋ hɛ lɛbɩ-la mɩ sɩ yie kɔ Iziral tɩŋŋaa teeŋ tʋɔŋ bʋa-la lɛ Arɔŋ sɩ jʋʋ Wɩa dɩ-zɔŋ-la sɩpaaŋ, lee-la zɔmʋŋ sɩ bɩ magɩa kɛnɛ dɩ ʋ pɩɩsɛ ʋ disiniŋ ta, see dɩ ʋ pɩɩsɛ ʋ tɩtɩa arɩ ʋ dɩa nɩaa arɩ Iziral tɩŋŋaa kala disiniŋ ta a dɛrɛ.

¹⁸ Ʋ jaŋ kʋ lɩɩ kʋnyɩgaa Wɩɩsʋlʋŋ koru-la teeŋ mɩ-na ma TƖƖNA sɩpaaŋ a pɩɩsɛ Wɩɩsʋlʋŋ koru-la ma disiniŋ ta. Ʋ jaŋ ŋaa nɛ-bele-la arɩ bʋʋŋ-la chalɩŋ dɔnsʋŋ a taa Wɩɩsʋlʋŋ koru-la nyilliŋ.

¹⁹ Ʋ jaŋ kɛŋ neniiŋ a tagɛ chal-la a mɩsɛ Wɩɩsʋlʋŋ koru-la lɛ naansɩɩŋ bʋlɩpɛ a pɩɩsɛ disiŋ-la Iziral tɩŋŋaa sɩ ŋaa hɛ ʋ lɛ ta, aŋ joŋo hɛ Wɩa nɩsɩŋ lɛ dɩ ʋ bɩra ŋaa Wɩa kʋzɔŋ.

Bʋʋŋ-la lɛ ba sɩ jaŋ bʋl ba wʋbɔŋŋɔɔ hɛ aŋ joŋo ta dɩ ʋ mʋ

²⁰ Dɩ Arɔŋ nɛ pɩɩsɛ Wɩa dɩ-zɔŋ-la sɩpaaŋ disiniŋ ta dɛrɛ, lee-la zɔmʋŋ sɩ bɩ magɩa kɛnɛ a hɛ patɩɩsaŋ-la harɩŋ arɩ lɛbɩ-la lɛ mɩ sɩ yie kɔ Iziral tɩŋŋaa teeŋ arɩ kʋnyɩgaa Wɩɩsʋlʋŋ koru-la, ʋ jaŋ kɛŋ bʋ-wei-la kaa kɔ lɛbɩ-la sɩpaaŋ,

²¹ a joŋ ʋ nɩsaa daŋ bʋ-wei-la nyuŋ lɛ, aŋ bʋl wʋbɔmɔ-la, arɩ Iziral tɩŋŋaa sɩ vɩa Wɩa niiŋ aŋ ŋaa wʋbɔmɔ-la kala a hɛ bʋʋŋ-la lɛ, aŋ lɩɩsɛ nʋʋ dɩ ʋ kiri bʋʋŋ-la kaa mʋ ta tintee-hɩlɩŋ lɛ.

²² Nɩalɩŋ wʋbɔmɔ-la kala jaŋ hɛ bʋʋŋ-la lɛ dɩ nɩɩ-la kire mʋ ta lee nʋʋkala sɩ tuo.

²³ Arɔŋ jaŋ bɩra jʋʋ lɛbɩ-la lɛ mɩ sɩ yie kɔ Iziral tɩŋŋaa teeŋ tʋɔŋ a wuri gɛnnɩ-la ʋ sɩ laala jʋʋ Wɩa dɩ-zɔŋ-la sɩpaaŋ, lee-la zɔmʋŋ sɩ bɩ magɩa kɛnɛ a bil.

²⁴ Ʋ jaŋ fo lɩɩŋ lee sɩ bɩ disiniŋ kɛnɛ, aŋ paa ʋ gɛnnɩŋ dɔnsʋŋ laalɛ, aŋ kʋ lɩɩ a sʋl kʋnyɩgaa Wɩɩsʋlʋŋ a pɩɩsɛ ʋ tɩtɩa arɩ nɩalɩŋ disiniŋ ta.

²⁵ Ʋ jaŋ joŋ wʋbɔŋŋɔɔ joŋo chɛnɩŋ Wɩɩsʋlʋŋ pʋna-la nʋʋŋ a nyɩgɛ Wɩɩsʋlʋŋ koru-la nyuŋ.

²⁶ Nɩɩ-la sɩ kiri bʋʋŋ-la kaa lɩɩ ta maga ʋ ma fo lɩɩŋ nɛ a chɛsɛ ʋ gɛnnɩŋ aŋ-na kʋ jʋʋ ba dɩhɔnʋŋ.

²⁷ Nɛ-bele-la arɩ bʋʋŋ-la ba sɩ kaa sʋl wʋbɔŋŋɔɔ joŋo chɛnɩŋ Wɩɩsʋlʋŋ a kɛŋ chalɩŋ kaa jʋʋ Wɩa dɩ-zɔŋ-la lee-la zɔmʋŋ sɩ bɩ magɩa kɛnɛ a hɛ patɩɩsaŋ-la harɩŋ a pɩɩsɛ ba disiniŋ ta, maga dɩ ba kaa lɩɩ ba dɩhɔnʋŋ lɛ a nyɩgɛ ba tenniŋ, ba nammɩa arɩ ba tʋɔŋ kɩaa kala.

²⁸ Nɩɩ-la sɩ nyɩgɛ kɩaa deemba maga dɩ ʋ chɛsɛ ʋ gɛnnɩŋ a fo lɩɩŋ aŋ-na mɩɩra jʋʋ ba dɩhɔnʋŋ.

²⁹ Wɩɩŋ deeŋ ŋaa nii nɛ ma sɩ jaŋ tuto a kaa mʋ wuu: Jɩna na-kala chɛŋ pɛɩ lɛ tapʋlaa fii chɛɛŋ, Iziral tɩɩna koo nʋhʋɔrʋ kala sɩ hɛ ma tʋɔŋ maga dɩ ʋ vɔɔ niiŋ a sɩ́ tɩntɩmɩɩ kala tɩŋ,

³⁰ bɛɛ wɩaa tapʋlʋŋ deeŋ nɛ Wɩɩsʋllɩ sɩpaalaaraa jaŋ ŋaa Wɩɩsʋlʋŋ a pɩɩsɛ ma wʋbɔŋŋɔɔ ta dɩ ma sɩ́ disiniŋ kɛŋ mɩ-na ma TƖƖNA sɩpaaŋ.

³¹ Tapʋlɩɩ-la maga dɩ ʋ ŋaa chɛ-wiesii nɛ dɩ ma vɔɔ niiŋ a sɩ́ tɩntɩmɩɩ kala tɩŋ. Wɩɩŋ deeŋ ŋaa nii nɛ ma sɩ jaŋ tuto a kaa mʋ wuu.

³² Bʋa na-kala lɛ Wɩɩsʋllɩ sɩpaalaaraa kʋhɩaŋ nɛ maga dɩ ʋ ŋaa wɩalɩŋ a pɩɩsɛ ba disiniŋ ta. Ʋ maga dɩ ʋ laalɛ gɛnnɩ-la Wɩɩsʋllɩ sɩpaalaaraa sɩɩ laalʋ nɛ,

³³ a ŋaa wɩaa deemba kala a pɩɩsɛ Wɩa dɩ-zɔŋ-la sɩpaaŋ disiniŋ ta, lee-la zɔmʋŋ sɩ bɩ magɩa kɛnɛ a hɛ patɩɩsaŋ-la harɩŋ arɩ lɛbɩ-la lɛ mɩ sɩ yie kɔ Iziral tɩŋŋaa teeŋ arɩ Wɩɩsʋlʋŋ koru-la, a pɛ Wɩɩsʋllɩ sɩpaalaaraa, arɩ nɩalɩŋ kala sɩ hɛ taŋ-la lɛ.

³⁴ Wɩɩŋ deeŋ ŋaa nii nɛ ma sɩ jaŋ tuto a kaa mʋ wuu: Jɩna tʋɔŋ ʋ maga dɩ ba pɩɩsɛ Iziral tɩŋŋaa wʋbɔŋŋɔɔ ta bala.” Ŋɩɩ nɛ ba ŋaa wɩalɩŋ kala La TƖƖNA sɩ dagɛ Mosis.