LEVI DOHO NƖAA 11 - WƖA TENIŊ

Kʋdiile-la sɩ kɛŋ disiniŋ arɩ kʋdiile-la sɩ bɩ disiniŋ kɛnɛ

¹ La TƖƖNA bʋla pɩ Mosis arɩ Arɔŋ,

² “Má bʋla pɩ Iziral-tɩŋŋaa: ‘Pʋsʋŋ arɩ bagɩla-la kala sɩ hɛ tinteeŋ lɛ, kɩalɩŋ ba sɩ jaŋ wuo chɩchaŋ nɛ ŋ-la:

³ Ba jaŋ wuo chaŋ pʋna koo bagɩl na-kala sɩ kɛŋ naachɛŋŋɛɛ aŋ gbu kɩaa chɩchaŋ.

⁴ Pʋsʋŋ arɩ bagɩlaa dɔnsʋŋ hɛ nɩmɛ a gbu kɩaa chɩchaŋ aŋ bɩ naachɛŋŋɛɛ kɛnɛ, dɔnsʋŋ ma kɛŋ naachɛŋŋɛɛ aŋ bɩ kɩaa gbu chɩchaŋ, má sɩ́ ba kʋŋkala chaŋ. Bʋntaŋŋa gbu kɩaa a chɩchaŋ nɛ aŋ bɩ naachɛŋŋɛɛ kɛnɛ, ʋ ŋaa disiŋ-kʋŋ nɛ ma teeŋ.

⁵ Bʋŋ-nyuŋ gbuŋgbogo ma gbu kɩaa a chɩchaŋ nɛ aŋ bɩ naachɛŋŋɛɛ kɛnɛ, ʋ ma kɛŋ disiniŋ nɛ ma teeŋ.

⁶ Chuomo ma gbu kɩaa a chɩchaŋ nɛ aŋ bɩ naachɛŋŋɛɛ kɛnɛ, ʋ ma kɛŋ disiniŋ nɛ ma teeŋ.

⁷ Ma teeŋ, tooŋ ŋaa disiŋ kʋŋ nɛ ʋ kɛŋ naachɛŋŋɛɛ nɛ aŋ bɩ kɩaa gbu chɩchaŋ, má sɩ́ ʋ chaŋ.

⁸ Má sɩ́ ba nammɩa chaŋ a sɩ́ ba kʋsʋʋnʋŋ ma digu, ba ŋaa disiŋ kɩaa nɛ.

⁹ Kɩalɩŋ kala sɩɩ jʋʋ lɩɩŋ a kɛŋ horuŋ arɩ kerikee, ma jaŋ wuo chaŋ.

¹⁰ Ama kʋŋ na-kala sɩɩ jʋʋ lɩɩŋ aŋ bɩ kerikee arɩ horuŋ kɛnɛ maga dɩ maa kɩsɛba nɛ.

¹¹ Ma sɩ folo kɩkɩsɛ kɩaa deemba, má sɩ́ ba chaŋ a sɩ́ ba kʋsʋʋnʋŋ ma digu.

¹² Má sɩ́ kʋŋ na-kala sɩɩ jʋʋ lɩɩŋ aŋ bɩ kerikee arɩ horuŋ kɛnɛ chaŋ.

¹³ Má sɩ́ diibiisiŋ deemba chaŋ: kachuuŋ, duuŋ arɩ duuŋ-bine,

¹⁴ habal-joŋ doho na-kala,

¹⁵ gɩlɩŋgaaŋ doho na-kala,

¹⁶ gʋra-nyilimi, hajaaŋkuŋkuŋ-la sɩ kɛŋ dɩgɩlaa, naliiribommie arɩ kɩl doho na-kala,

¹⁷ hajaaŋkuŋkuŋ-bine, hajaaŋkuŋkuŋ-bie arɩ kamege,

¹⁸ hajaaŋkuŋkuŋ-pʋla arɩ hajaaŋkuŋkuŋ-la sɩ hɛ tintee-hɩlɩŋ lɛ arɩ fuoŋ-jimiŋ.

¹⁹ Diibii-kaŋ-tɔmʋŋ, jɩŋ arɩ kʋlʋŋkʋɔl doho na-kala.

²⁰ Fille-la kala sɩ kɛŋ naasɩŋ banɛsɛ bɩ maga dɩ ma chaŋ, maa kɩsɛba nɛ.

²¹ Ma jaŋ wuo chaŋ fille-la dɔnsʋŋ sɩ kɛŋ naasɩŋ banɛsɛ a fɩfɩl tinteeŋ.

²² Ma jaŋ wuo chaŋ hɔbɩ doho na-kala, poŋ doho na-kala arɩ nyaŋgɩrɩgɛ doho na-kala.

²³ Ama má sɩ́ fille-la dɔnsʋŋ kala sɩ kɛŋ naasɩŋ banɛsɛ chaŋ, ba kɛŋ disiniŋ nɛ.

²⁴ Fillee deemba kala kɛŋ disiniŋ nɛ. Dɩ nʋʋkala nɛ digi ba kʋsʋʋŋ, ʋ tɩɩna jaŋ kɛŋ disiniŋ tapʋlɩɩ-la kala dɩ wɩa tuu jʋʋ.

²⁵ Dɩ ma kʋŋkala nɛ joŋ ba kʋsʋʋŋ, ʋ maga ʋ chɛsɛ ʋ gɛnnɩŋ nɛ. Ama ʋ ha jaŋ kɛŋ disiniŋ tapʋlɩɩ-la kala dɩ wɩa tuu jʋʋ.

²⁶ Pʋsʋŋ arɩ bagɩla-la kala sɩ bɩ naachɛŋŋɛɛ kɛnɛ koo a bɩ kɩaa gbu chɩchaŋ kɛŋ disiniŋ nɛ. Dɩ ma kʋŋkala nɛ digi ba kʋsʋʋŋ, ŋ jaŋ kɛŋ disiniŋ.

²⁷ Pʋsʋŋ arɩ bagɩla-la kala sɩ kɛŋ naasɩŋ banɛsɛ arɩ naanii-fɩlaa ŋaa disiŋ kɩaa nɛ ma teeŋ. Dɩ ma kʋŋ nɛ digi ba kʋsʋʋŋ ŋ jaŋ kɛŋ disiniŋ tapʋlɩɩ-la kala dɩ wɩa tuu jʋʋ.

²⁸ Dɩ ma kʋŋkala nɛ joŋ ba kʋsʋʋŋ, ʋ maga ʋ chɛsɛ ʋ gɛnnɩŋ nɛ, ama ʋ ha jaŋ kɛŋ disiniŋ tapʋlɩɩ-la kala dɩ wɩa tuu jʋʋ. Ba ŋaa disiŋ kɩaa nɛ ma teeŋ.

²⁹ Kʋnyiere-la kala sɩɩ vɛŋ tinteeŋ tʋɔŋ kɩaa deemba ma kɛŋ disiniŋ nɛ ma teeŋ: mʋtʋrʋŋ, oluŋ, taatɩɩŋ, arɩ habalaa,

³⁰ dɩdaaŋ-sʋʋŋ, baaŋ, kʋlʋŋgbɛnɛ arɩ kuŋkoluŋ-bawɩɩ. Ba kala kɛŋ disiniŋ nɛ ma teeŋ.

³¹ Kʋnyiere-la kala sɩɩ vɛŋ tinteeŋ, ba tʋɔŋ kɩalɩŋ sɩ kɛŋ disiniŋ ma teeŋ nɛ la dagɛ ŋɩɩ. Dɩ nʋʋkala nɛ digi ba kʋsʋʋŋ, tapʋlɩɩ-la kala ʋ jaŋ kɛŋ disiniŋ dɩ wɩa tuu jʋʋ.

³² Kʋŋ na-kala lɛ kɩaa deemba kʋsʋʋŋ sɩ tele hɛ, dɩ gɛrɩŋ nɛ koo dɩ daaŋ nɛ ba kaa ŋaa kʋ-la, koo dɩ teniŋ nɛ koo bɔtɔ nɛ, kʋ-la kɛŋ disiniŋ nɛ. Ʋ maga dɩ má joŋo sɩŋ lɩɩŋ lɛ a kaa mʋ dɩdaanɩŋ, ŋɩɩ harɩŋ lɛ ʋ bɩra bɩ jaŋ kɛŋ disiniŋ.

³³ Dɩ kɩaa deemba kʋŋkala nɛ tel pupoiŋ tʋɔŋ, pupoi-la arɩ ʋ tʋɔŋ kɩaa kala kɛŋ disiniŋ nɛ, ʋ maga dɩ má ŋmoo yɛrɛ.

³⁴ Dɩ ŋɩɩ dee ka dɩ pupoi-la tʋɔŋ lɩɩŋ digi kʋdiilii na-kala ma sɩ jaŋ wuo dii koo kʋnyʋalɩɩ na-kala ma sɩ jaŋ nyʋa, ba jaŋ kɛŋ disiniŋ.

³⁵ Dɩ kɩaa deemba nɛ sʋʋ hɛ pupoiŋ lɛ koo tabʋʋŋ lɛ, má ŋmoo yɛrɛ, ba kɛŋ disiniŋ nɛ.

³⁶ Lɩɩ-bulo arɩ vilee lɩɩŋ bɩ disiniŋ kɛnɛ bʋa na-kala, dɩ kɩalɩŋ la sɩ daga kʋŋ nɛ sʋʋ hɛ ba lɛ ma. Ama dɩ nʋʋ nɛ digi kʋsʋʋ-la sɩ tele hɛ, ŋ-na jaŋ kɛŋ disiniŋ.

³⁷ Dɩ kɩalɩŋ sɩ kɛŋ disiniŋ kʋŋ nɛ sʋʋ hɛ ma kʋdoho lɛ ma, ba bɩ jaŋ kɛŋ disiniŋ.

³⁸ Ama dɩ ba nɛ joŋ kʋdoho hɛ lɩɩŋ lɛ, ka dɩ kɩalɩŋ kʋŋ sʋʋ hɛ, ba kɛŋ disiniŋ nɛ.

³⁹ Pʋna koo bagɩl na-kala ma sɩ jaŋ wuo chaŋ, dɩ ʋ nɛ sʋba dɩ ma kʋŋkala digu, ŋ jaŋ kɛŋ disiniŋ tapʋlɩɩ-la kala dɩ wɩa tuu jʋʋ.

⁴⁰ Nɩɩ-la kala sɩ chaŋ nammɩa-la maga ʋ chɛsɛ ʋ gɛnnɩŋ nɛ, ama ʋ ha jaŋ kɛŋ disiniŋ dɩ wɩa tuu jʋʋ. Nɩɩ-la ma kala sɩ joŋ kʋsʋʋ-la maga ʋ chɛsɛ ʋ gɛnnɩŋ, ama ʋ ha jaŋ kɛŋ disiniŋ dɩ wɩa tuu jʋʋ.

⁴¹ Kʋmuno-la kala sɩɩ vɛŋ tinteeŋ kɛŋ disiniŋ nɛ ma teeŋ, ʋ bɩ maga dɩ má chamba.

⁴² Ma bɩ maga dɩ má chaŋ kɩalɩŋ kala sɩ vaamɛ tinteeŋ, dɩ baa vɛŋ ba luoruŋ nyuŋ nɛ koo dɩ baa vɛŋ naasɩŋ banɛsɛ nyuŋ nɛ koo dɩ baa vɛŋ naa-daŋ nyuŋ nɛ, maa kɩsɛba nɛ.

⁴³ Má sɩ́ leŋe dɩ kɩaa deemba kʋŋkala ŋaa dɩ ma kɛŋ disiniŋ. Má sɩ́ ba chaŋ a sɩ́ ba digu.

⁴⁴ Mɩ nɛ ma TƖƖNA Wɩa, má joŋ ma tɩtɩa hɛ mɩ nɩsɩŋ lɛ a sɩ́ disiniŋ kɛŋ, bɛɛ wɩaa mɩ bɩ disiniŋ kɛnɛ. Má sɩ́ leŋe dɩ kɩalɩŋ la sɩ daga ŋaa dɩ ma kɛŋ disiniŋ.

⁴⁵ Mɩ nɛ ŋaa ma TƖƖNA sɩ kɛmma lɩɩ Ijipiti tinteeŋ lɛ dɩ mɩ ŋaa ma Wɩa, ŋɩɩ wɩaa má sɩ disiniŋ kɛŋ, bɛɛ wɩaa mɩ bɩ disiniŋ kɛnɛ.

⁴⁶ Wombie-la sɩ hɛ nɩmɛ a mʋ tɩgɛ pʋsʋŋ arɩ bagɩlaa, zaaraa, fillee, kɩalɩŋ sɩ hɛ lɩɩŋ tʋɔŋ arɩ kɩalɩŋ sɩɩ vaamɛ tinteeŋ nɛ ŋɩɩ.

⁴⁷ Ʋ maga dɩ ma jɩŋ kɩalɩŋ sɩ kɛŋ disiniŋ arɩ kɩalɩŋ sɩ bɩ disiniŋ kɛnɛ, a jɩŋ kɩalɩŋ sɩ maga dɩ ma chaŋ arɩ kɩalɩŋ sɩ bɩ maga dɩ ma chaŋ.’ ”