LEVI DOHO NƖAA 10 - WƖA TENIŊ

Nadab arɩ Abihu sʋba

¹ Nadab arɩ Abihu sɩ ŋaa Arɔŋ hambolibiisiŋ paa kɩalɩŋ lɛ ba sɩ yie hɛ nyiniŋ, a chaanɛ nyiniŋ hɛ a nyɩgɛ kʋsʋɔrʋsʋŋ pɩ La TƖƖNA, ʋ sɩ bɩ ba daga.

² Ŋɩɩ nɛ La TƖƖNA leŋ nyiniŋ kʋ jomba dii ba sʋʋ ʋ sɩpaaŋ.

³ Ŋɩɩ nɛ Mosis bʋla pɩ Arɔŋ, “Wɩɩŋ deeŋ wɩaa nɛ La TƖƖNA fa bʋl ŋɩɩ, ʋ sɩ: ‘Nɩalɩŋ sɩ kʋ kpagɛmɛ, mɩ jaŋ dagɛba arɩ mɩ bɩ disiniŋ kɛnɛ. Nʋʋkala jaŋ zilmi.’ ” Ŋɩɩ nɛ Arɔŋ ŋaa chɩm.

⁴ Ŋɩɩ nɛ Mosis yɩrɛ Arɔŋ nyɩŋ-bie Ʋzɩɛl hambolibiisiŋ Mɩsɩɛl arɩ Ɛlɩzafaŋ, a bʋla pɩba, “Má mʋ paa ma naambiiri-la kʋsʋʋnʋŋ lɩɩ Wɩa dɩa-la lɛ a kaa lɩɩ ma dɩ-hɔnɩɩ-la kala lɛ.”

⁵ Ŋɩɩ nɛ ba kʋ paaba lɩɩ ba dɩ-hɔnɩɩ-la arɩ Mosis sɩ dagɛ ŋɩɩ, dɩ ba ha laalɛ ba gɛnnɩŋ.

⁶ Ŋɩɩ nɛ Mosis bʋla pɩ Arɔŋ arɩ ʋ hambolibiisiŋ Elieza arɩ Itama “Má pɔ má sɩ́ ma nyusuŋ vɩa ta, a sɩ́ ma gɛnnɩŋ ma kaa kɩɛsɛ arɩ ma tʋɔŋ cheye nɛ, dɩ ŋɩɩ dee ma jaŋ sʋʋ, ka dɩ La TƖƖNA na baanɩŋ Iziral tɩŋŋaa kala nyuŋ. Ama ma dɩa nɩaa arɩ Iziral tɩŋŋaa kala jaŋ wuo yel nɩalɩŋ yoho La TƖƖNA sɩ leŋe nyiniŋ dii kpʋ.

⁷ Má pɔ má sɩ́ lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ sii, dɩ ŋɩɩ dee ma jaŋ sʋʋ, bɛɛ wɩaa mɩ joŋ La TƖƖNA Wɩɩsʋllɩ nʋʋŋ tɩsɛma nɛ.” Ŋɩɩ nɛ ba hɔŋ nɩmɛ arɩ Mosis sɩ bʋl ŋɩɩ.

⁸ Ŋɩɩ nɛ La TƖƖNA bʋla pɩ Arɔŋ,

⁹ “Ŋ dɩ ŋ hambolibiisiŋ kʋŋkala pʋpɔ má sɩ́ sɩ-yele koo sɩ-duo kala nyʋa dɩ ma nɩɩ jʋʋ lɛbɩ-la lɛ mɩ sɩ yie kɔ Iziral tɩŋŋaa teeŋ. Dɩ ma nɛ vɩa, ma jaŋ sʋʋ. Wɩɩŋ deeŋ ŋaa nii nɛ a pɩ ma doho kala dɩ ma tuto.

¹⁰ Ʋ maga dɩ ma jɩŋ kɩalɩŋ sɩ ŋaa Wɩa kɩaa arɩ kɩalɩŋ sɩ ŋaa nuhuobiinee kɩaa, a jɩŋ kɩalɩŋ sɩ kɛŋ disiniŋ arɩ kɩalɩŋ sɩ bɩ disiniŋ kɛnɛ,

¹¹ aŋ dagɛ Iziral tɩŋŋaa wombie-la kala La TƖƖNA sɩ to Mosis lɛ a dagɛma.”

¹² Ŋɩɩ nɛ Mosis bʋla pɩ Arɔŋ arɩ ʋ hambolibiisi-la balɩa sɩ hɛ ba mɩɩsɩŋ lɛ, Elieza arɩ Itama, “Má joŋ mɩaa Wɩɩsʋlɩɩ-la ma sɩ nyɩga pɩ La TƖƖNA kʋkaanaa a kaa wasɛ boroboro a sɩ́ sɩbʋrʋŋ hɛ, a diiba Wɩɩsʋlʋŋ koru-la sɛmɛ, bɛɛ wɩaa ba ŋaa kɩa zɔmʋŋ sɩ bɩ magɩa kɛnɛ nɛ.

¹³ Má diiba Wɩa dɩ-zɔŋ, bɛɛ wɩaa ŋ dɩ ŋ hambolibiisiŋ toruŋ nɛ ŋɩɩ Wɩɩsʋlɩɩ-la ba sɩ nyɩga pɩ La TƖƖNA tʋɔŋ, ŋ-la nɛ La TƖƖNA dagɛmɛ.

¹⁴ Ama ŋ dɩ ŋ hambolibiisiŋ arɩ ŋ toloo jaŋ wuo dii vaa-la ba sɩ kaa je a zaarɛ ŋaa Wɩɩsʋlʋŋ arɩ hui-la ba sɩ joŋo pɩ La TƖƖNA. Má diiba Wɩa dɩ-zɔŋ. Ŋ dɩ ŋ hambolibiisiŋ kpaalɩŋ nɛ ŋɩɩ Iziral tɩŋŋaa nii-magɛ dɔŋɔ Wɩɩsʋlʋŋ kɩaa tʋɔŋ.

¹⁵ Dɩ ma nɛ nyɩgɛ Wɩɩsʋlʋŋ nʋʋ-la kala, má kɛŋ hui-la arɩ vaa-la a kaa kɔ La TƖƖNA sɩpaaŋ. Ama kʋkaanaa jaŋ ŋaa ŋ dɩ ŋ hambolibiisiŋ kpaalɩŋ bʋa na-kala lɛ arɩ La TƖƖNA sɩ dagɛ ŋɩɩ.”

¹⁶ Mosis pɩɛsɛ a mʋ na dɩ wʋbɔŋŋɔɔ Wɩɩsʋlʋŋ bʋʋŋ-la kala nɛ ba joŋo nyɩgɛ, ŋɩɩ nɛ ʋ na baanɩŋ Arɔŋ hambolibiisi-la balɩa sɩ weye nyuŋ, Elieza arɩ Itama aŋ pɩɛsɛ,

¹⁷ “Bɛɛ nɛ tɩɩ ma bɩ wʋbɔŋŋɔɔ joŋo chɛnɩŋ Wɩɩsʋlʋŋ nammɩa-la chaŋa Wɩa dɩ-zɔŋ-la lɛ? Ʋ ŋaa kʋzɔŋ sɩ bɩ magɩa kɛnɛ nɛ La TƖƖNA joŋo pɩma dɩ ʋ tɩɩgɛ wɩalɩŋ ma Iziral tɩŋŋaa kala sɩ ŋaa chei ta aŋ pɩɩsɛ ma disiniŋ ta.

¹⁸ Ma sɩ bɩ pʋna-la chalɩŋ kaa kʋ jʋʋ Wɩa dɩ-zɔŋ-la ŋɩɩ, ʋ fa maga dɩ ma chaŋ nammɩa-la-na nɩmɛ nɛ arɩ mɩ sɩ dagɛ ŋɩɩ.”

¹⁹ Ŋɩɩ nɛ Arɔŋ bʋla pɩ Mosis, “Jɩnɩŋ nɛ ba ŋaa ba wʋbɔŋŋɔɔ Wɩɩsʋlʋŋ arɩ ba kʋnyɩgaa Wɩɩsʋlʋŋ, saa na wɩalɩŋ sɩ ŋaa mɩ lɛ dɩ mɩ nɛ fa chaŋ wʋbɔŋŋɔɔ Wɩɩsʋlʋŋ nammɩa-la, La TƖƖNA tʋɔŋ fa jaŋ tɔrɛɛ?”

²⁰ Mosis sɩ nɩɩ ŋɩɩ, ʋ tʋɔŋ pɩŋ dɩ-bala.