LEVI DOHO NƖAA 1 - WƖA TENIŊ

Kʋnyɩgaa Wɩɩsʋlʋŋ

¹ La TƖƖNA hɛ lɛbɩ-la lɛ ʋ sɩ yie kɔ Iziral tɩŋŋaa teeŋ nɛ aŋ yɩrɛ Mosis a bʋla pʋ,

² “Bʋla pɩ Iziral tɩŋŋaa: ‘Dɩ ma kʋŋkala nɩɩ chɛ dɩ ʋ kɛŋ pʋna kʋ ŋaa Wɩɩsʋlʋŋ pɩmɛ, ʋ jaŋ wuo lɩɩsɛ nɛŋ koo piese koo bʋʋŋ.

³ Dɩ nɛŋ nɛ ʋ lɩɩsɛ dɩ ʋ kpʋ a nyɩga ŋaa Wɩɩsʋlʋŋ pɩmɛ, ʋ maga dɩ ʋ lɩɩsɛ nɛ-bele sɩ bɩ nyɔɔ kala kɛnɛ a kaa mʋ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ, ŋɩɩ nɛ mɩ-na ma TƖƖNA jaŋ laa tɩɩna sʋla.

⁴ Tɩɩna maga dɩ ʋ joŋ ʋ nɩsɩŋ a daŋ nɛŋ-la nyuŋ lɛ ʋ sɩɩ chɛ ʋ kpʋ a ŋaa Wɩɩsʋlʋŋ dɩ mɩ-na ma TƖƖNA to pʋna-la lɛ a laa ʋ sʋla, a pɩɩsɛ ʋ disiniŋ ta.

⁵ Ʋ maga dɩ ʋ kpʋ nɛ-bele-la mɩ-na ma TƖƖNA sɩpaaŋ dɩ Arɔŋ hambolibiisi-la sɩ ŋaa Wɩɩsʋllɩ sɩpaalaaraa laa ʋ chalɩŋ mɩsɛ Wɩɩsʋlʋŋ koru-la sɩ chɩŋ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ sɛsɩŋ kala,

⁶ aŋ puri nɛŋ-la ʋ sɩɩ chɛ dɩ ʋ nyɩgɛ a ŋaa Wɩɩsʋlʋŋ a kaa keri keri.

⁷ Arɔŋ hambolibiisi-la sɩ ŋaa Wɩɩsʋllɩ sɩpaalaaraa jaŋ til daasɩŋ Wɩɩsʋlʋŋ koru-la lɛ a hɛ nyiniŋ ʋ nyuŋ,

⁸ a paa nammɩa-la tɩɩna sɩ kere a pɛ nyuŋ arɩ nʋʋŋ lɛ a daŋ daasɩ-la sɩ til nyiŋ-la lɛ Wɩɩsʋlʋŋ koru-la nyuŋ.

⁹ Ʋ jaŋ kɛŋ lɩɩŋ chɛsɛ tʋɔŋ kɩaa arɩ naasɩŋ, dɩ Wɩɩsʋllɩ sɩpaalaara laa ba kala a nyɩgɛ Wɩɩsʋlʋŋ koru-la nyuŋ. Ʋ ŋaa kʋnyɩga Wɩɩsʋlɩɩ nɛ. Ba sʋɔra sɩma nɛ a pɩ mɩ-na ma TƖƖNA.

¹⁰ Dɩ pʋna-la ʋ sɩɩ chɛ ʋ kpʋ a nyɩga ŋaa Wɩɩsʋlʋŋ nɛ ŋaa piesu koo bʋʋŋ, ʋ maga dɩ ʋ ŋaa pie-bele koo gbuŋgbogo sɩ bɩ nyɔɔ kala kɛnɛ nɛ.

¹¹ Ʋ maga dɩ ʋ kpʋ pʋna-la Wɩɩsʋlʋŋ koru-la wɩɩpɔsʋŋ nagʋa mɩ-na ma TƖƖNA sɩpaaŋ, dɩ Arɔŋ hambolibiisiŋ sɩ ŋaa Wɩɩsʋllɩ sɩpaalaaraa laa ʋ chalɩŋ a mɩsɛ Wɩɩsʋlʋŋ koru-la sɛsɩŋ kala.

¹² Tɩɩna maga dɩ ʋ kɛŋ pʋna-la keri keri a joŋ nammɩa-la nyuŋ arɩ pʋna-la nʋʋŋ a pɩ Wɩɩsʋllɩ sɩpaalaara dɩ ʋ joŋo daŋ daasɩ-la sɩ til nyiniŋ lɛ Wɩɩsʋlʋŋ koru-la nyuŋ.

¹³ Ʋ maga dɩ ʋ kɛŋ lɩɩŋ chɛsɛ ʋ tʋɔŋ kɩaa arɩ naasɩŋ a joŋo pɩ Wɩɩsʋllɩ sɩpaalaara dɩ ʋ nyɩgɛ ba kala Wɩɩsʋlʋŋ koru-la nyuŋ. Ʋ ŋaa kʋnyɩgaa Wɩɩsʋlɩɩ nɛ. Ba sʋɔra sɩma nɛ a pɩ mɩ-na ma TƖƖNA.

¹⁴ Dɩ kʋ-la ʋ sɩ jaŋ kpʋ nyɩga ŋaa Wɩɩsʋlʋŋ a pɩmɛ nɛ ŋaa kɩŋkɛnsɩŋ balɩa tɩɩna, ʋ maga dɩ ʋ ŋaa kokomo nɛ.

¹⁵ Wɩɩsʋllɩ sɩpaalaara jaŋ kaa mʋ Wɩɩsʋlʋŋ koru-la teeŋ a mɩlɩmɛ nyuŋ keri a joŋ nyuŋ-la nyɩgɛ Wɩɩsʋlʋŋ koru-la nyuŋ, aŋ leŋ dɩ kokomo-la chalɩŋ chuuro hɛ Wɩɩsʋlʋŋ koru-la sɛmɛ.

¹⁶ Ʋ maga dɩ ʋ lɩɩsɛ kʋɔlʋŋ a pɛ ʋ pʋnaa lɛ a kaa mʋ ta Wɩɩsʋlʋŋ koru-la sɛmɛ wɩɩpɔsʋŋ lee-la tʋɔrʋŋ sɩ pɩna.

¹⁷ Aŋ kɛ kokomo-la a kaa gʋrɛ dɩ Wɩɩsʋllɩ sɩpaalaara joŋo nyɩgɛ daasɩ-la sɩ til nyiŋ-la lɛ Wɩɩsʋlʋŋ koru-la nyuŋ. Ʋ ŋaa kʋnyɩgaa Wɩɩsʋlɩɩ nɛ. Ʋ sʋɔra sɩma nɛ a pɩ mɩ-na ma TƖƖNA.