Juud 1 - WƖA TENIŊ

¹ Mɩ-na Juud nɛ ŋmʋnsɛ teniŋ deeŋ. Mɩ ŋaa Yesu Kirisito tɩntɩnnʋ nɛ a ŋaa Jeems naambii ma. Mɩ ŋmʋnsɛ teniŋ deeŋ a pɩpɩ nɩalɩŋ Wɩa sɩ yɩra, nɩalɩŋ la Nyɩmma Wɩa sɩ cho, nɩalɩŋ Yesu Kirisito sɩɩ pɔ.

² Wɩa jaŋ fá ma nenige a leŋ dɩ ma kɛŋ yarɩfɩɛlaa kɩŋkɛŋ, a na ŋɩɩ ʋ sɩ choma kɩŋkɛŋ kɩŋkɛŋ.

Juud bʋl wɩaa a tɩgɛ wʋnyɩɛrɩ kerichiba lɛ

³ Mɩ nandɔŋ-chooloo, mɩ fa cho dɩ mɩ ŋmʋnsɛ teniŋ pɩma nɛ, a bʋl wɩaa a tɩgɛ ŋɩɩ Wɩa sɩ laa la dɩ ma kala ta lɛ. Ama mɩ na dɩ ʋ maga dɩ mɩ ŋmʋnsɛ teniŋ deeŋ a sʋlma dɩ ma kala luloo woruŋ a tɩŋ wɩalɩŋ la sɩ laa dii wɩaa. Wɩa joŋ wɩalɩŋ hɛ ʋ nɩaa nɩsɩŋ lɛ bala nɛ.

⁴ Mɩ bʋl wɩɩŋ deeŋ pɩpɩma, bɛɛ wɩaa nɩaa dɔnsʋŋ sɩ bɩ Wɩa ka fá lʋara jʋʋ ma tʋɔŋ nɛ. Ba bɩ Wɩa wombiiŋ ka to, ŋɩɩ wɩaa Wɩa jaŋ dɔgɩsɛba a leŋ dɩ ba sʋʋ. Wɩa teniŋ tʋɔŋ ba bʋl faafaa kala nɛ dɩ Wɩa jaŋ ŋaa ŋɩɩ nɩbɔŋŋɔɔ lɛ. Wɩa sɩ fá la nenige a laala ta, ba to ŋɩɩ a kɛŋ Wɩa wʋzɔmɔ-la kaa bɩrɩmɛ a ŋɩŋaa wʋlɩɩlɩŋ. Ba yie bʋl arɩ ba bɩ Yesu Kirisito jɩŋ, Nɩɩ-la sɩ ŋaa la kala Tɩɩna.

⁵ Ma jɩŋ wɩaa deemba kala mɩ sɩ bʋla pɩpɩma nɛ, ama mɩɩ chɛ dɩ mɩ liisima nɛ arɩ La Tɩɩna fa kɛŋ ʋ nɩaa kaa kʋ lɩɩ Ijipiti tinteeŋ lɛ nɛ, ama ŋɩɩ harɩŋ, ʋ chei nɩalɩŋ sɩ bɩ ʋ wɩaa laa dii nɛ.

⁶ Má sɩ́ yʋ arɩ Wɩa dɔgɩsɛ ʋ tɩndaaraa ma nɛ. Ba fa kɛŋ doluŋ nɛ a bibeŋ leree, ama ba vɩa lere-la ba sɩ hɛ nɛ. Ŋɩɩ nɛ Wɩa kɛmba hɛ chɔrʋmɔɔ a bil birimiŋ tʋɔŋ lim. Ba jaŋ hɛ nɩmɛ a kaa mʋ wuu, see dɩ tapʋlɩɩ-la Wɩa sɩ jaŋ dii nɩaa sarɩya kʋ yi.

⁷ Ŋɩɩ tɩtɩa nɛ, Wɩa dɔgɩsɛ tasɩ-la ba sɩɩ yɩrɛ Sodom arɩ Gomora arɩ tabala-la kala sɩ golli lee-la. Nɩalɩŋ fa sɩ hɛ tasɩ-la tʋɔŋ faa ŋaa wʋlɩɩlɩŋ arɩ disinni-la nuhuobiinee paala sɩ bɩ maga dɩ ba ŋaa nɛ. Wɩa jomba hɛ nyiŋ-la sɩɩ dii deeŋ deeŋ, a bɩ dɩsɛ lɛ nɛ, aa chagɩlɛ nɩalɩŋ kala sɩɩ ŋaa wʋbɔŋŋɔɔ.

⁸ Nɩalɩŋ sɩ lʋara kʋ hɛ ma tʋɔŋ, ba wʋŋaalaa nagɛ bumbuŋ nɩalɩŋ Wɩa sɩ dɔgɩsɔ nɛ. Ba yie bʋl arɩ ba na wɩaa duosoo tʋɔŋ, a to ŋɩɩ lɛ a ŋaa wɩaa chei ba tɩtɩa. Ba vɩa Wɩa doluŋ nɛ, aŋ tʋtʋʋsɛ ʋ tɩndaaraa ma sɩ kɛŋ tʋla.

⁹ Ama bʋa-la lɛ Wɩa tɩndaaraa kʋhɩaŋ ba sɩɩ yɩrɛ Maakɩl, arɩ Sɩtaanɩ fa sɩ kɛŋ Mosis kʋsʋʋŋ wɩaa yuyuo dɔŋɔ, Maakɩl bɩ wɩɩkala bʋla chei Sɩtaanɩ tʋɔŋ, ama ʋ ta bʋl nɛ arɩ La Tɩɩna Wɩa jaŋ dɔgɩsʋ.

¹⁰ Ama wɩɩ na-kala nɩaa deemba sɩ bɩ jɩŋ, ba yie bʋl ʋ ŋaa wʋtɔɔ nɛ. Ba wʋŋaalaa nagɛ pʋsʋŋ sɩ bɩ wʋjɩmɩŋ kɛnɛ nɛ. Wɩalɩŋ ba sɩɩ ŋaa tɩtɩa nɛ jaŋ gʋra cheiba.

¹¹ Wɩɩŋ puuba. Ba to Keeŋ naabʋɔsʋŋ nɛ. Ba tɩŋ moribiee wɩaa nɛ a ŋaa wʋbɔŋŋɔɔ a nagɛ baal kʋbala ba fa sɩɩ yɩrɛ Balam fa sɩ ŋaa ŋɩɩ. Ba lɩɩ Wɩa harɩŋ nɛ a nagɛ baal kʋbala ba sɩɩ yɩrɛ Kora ma fa sɩ lɩɩ Wɩa harɩŋ ŋɩɩ. Ŋɩɩ nɛ Wɩa kpʋ ba kala.

¹² Dɩ ma nɩalɩŋ sɩ cho dɔŋɔ nɛ hilime dɩ ma dii kɩaa, nɩaa deemba yie guoli ma tʋɔŋ nɛ. Ba nagɛ nanchʋɔsʋŋ nɛ aa chei ma kʋdiile-la. Ba dʋndʋŋa wɩaa nɛ ba yie chɩl. Ba nagɛ duonuŋ sɩ yie tɩŋ nɛ, ka peliŋ ŋaa kiri ʋ bɩ nɩa. Ba bɩra nagɛ tɩɩsɩŋ sɩ maga dɩ ba nɛŋ nɛ aŋ bɩ nɛŋ. Ba jaŋ huro churiba dɩ ba sʋʋ.

¹³ Nɩaa deemba nagɛ lɩɩ-peliŋ sɩ dolie nɛ. Ba hɩɩsɩ wɩalɩŋ ma nagɛ disiniŋ lɩɩ-peliŋ sɩ kaa kʋ lɩɩ ta lɩɩŋ niiŋ. Ba nagɛ chɛnwʋlaa sɩ churo nɛ a mʋ jʋʋ sɛmɛ dɔŋɔ birimiŋ tʋɔŋ lim. Ba jaŋ hɛ nɩmɛ a kaa mʋ wuu.

¹⁴ Baal kʋbala ba sɩɩ yɩrɛ Ɛnɔk fa bʋl wɩaa Wɩa doluŋ lɛ faafaa kala nɛ a tɩgɛ nɩaa deemba lɛ. Ʋ fa ŋaa Adam nihi-lɩɛrɩ-pɛmɩŋ nɛ. Ʋ sɩ, “Má bee na, La Tɩɩna Wɩa ka kɔ nɛ arɩ ʋ tɩndaaraa bʋɩ fii fiiba sɩ bɩ disiniŋ kɛnɛ,

¹⁵ dɩ ʋ dii nʋʋkala sarɩya, a joŋ cheeriŋ pɩ nɩbɔmɔ-la kala a tɩŋ wʋbɔmɔ-la ba sɩ ŋaa, arɩ wʋbɔmɔ-la kala nɩbɔŋŋɔɔ deemba sɩ bʋla a tɩgɛ Wɩa lɛ.”

¹⁶ Nɩaa deemba yie gʋgʋrɩmɛ wɩaa, a dʋdɔŋ nɩaa, baa to ba tʋɔbɩɩŋ bɔŋŋɔɔ harɩŋ nɛ, a bibigisi ba tɩtɩa lɛ, a kɛŋ nii-sɩma a nyɩsa lɩlaa nɩaa kɩaa.

Juud sɩ chagɩlɛ nɩaa ŋɩɩ

¹⁷ Ama mɩ nandɔŋ-chooloo, má liliisi wɩalɩŋ La Tɩɩna Yesu Kirisito nanzɔɔba sɩ bʋla pɩma arɩ ba jaŋ kʋ ŋaa.

¹⁸ Ba bʋla pɩma arɩ dʋnɩa dɩdɛrɩŋ, nɩaa jaŋ kɔ a sisieri Wɩa lɛ. Ba jaŋ tuto ba tʋɔbɩɩŋ bɔŋŋɔɔ harɩŋ.

¹⁹ Nɩdosunuŋ deemba jaŋ kɛmma pɔrɛ dɔŋɔ lɛ a ŋɩŋaa wɩaa arɩ dʋnɩa nɩaa sɩɩ ŋaa ŋɩɩ. Wɩa Dɩŋ-zɔmʋŋ tuo ba lɛ.

²⁰ Ama ma-na, mɩ nandɔŋ-chooloo, wɩalɩŋ ma sɩ laa dii lɩɩ Wɩa teeŋ nɛ. Ŋɩɩ wɩaa, má kɛmba woruŋ a waa ba lɛ, a to Wɩa Dɩŋ-zɔŋ-la lɛ a chʋchʋɔlɛ Wɩa.

²¹ Wɩa sɩ choma ŋɩɩ, má chɩŋ ŋɩɩ lɛ kpaŋ kpaŋ, a gbɛrɛ La Tɩɩna Yesu Kirisito dɩ ʋ kɔ, Nɩɩ-la sɩ jaŋ fá ma nenige a pɩma mɩɩsɩ-la sɩ bɩ dɛrɛ.

²² Nɩalɩŋ tʋɔbɩɩnaa sɩ bɩ Wɩa wɩaa lɛ woruŋ chɩna, má fá ba nenige aŋ bʋl Wɩa wɩaa pɩba.

²³ Nɩalɩŋ sɩɩ jʋʋ Wɩa nyiniŋ, má lorigo laaba ta. Nɩaa dɔnsʋŋ ma hɛ nɩmɛ sɩ maga dɩ ma fá Wɩa aŋ fá ba nenige, ama má kɛŋ ma tɩtɩa dɩ ba wʋbɔmɔ-la sɩ́ ma chol.

²⁴ Má leŋ la zizil Wɩa. Ʋ nɛ kɛŋ doluŋ, ʋ jaŋ wuo pɛ ma lɛ dɩ ma sɩ́ wʋbɔŋŋɔɔ ŋaa, a pɛ ma lɛ dɩ ma sɩ́ wʋcheeli kala kɛŋ ʋ sɩpaaŋ, a kɛŋ tʋɔtɔrʋŋ woruŋ.

²⁵ Ʋ dʋndʋŋa nɛ ŋaa Wɩa, ʋ nɛ to La Tɩɩna Yesu Kirisito lɛ a laala ta. Má dɛnnʋ a leŋ dɩ ʋ yɩrɩŋ yɩrɛ, ʋ nɛ kɛŋ doluŋ a tɩɩ kʋŋkala aa bemba ma, a lɩɩ dɩ-suomuŋ kʋkɔ lɛɛlɛ a kaa mʋ deeŋ deeŋ. Amɩɩ.