JOSUA 9 - WƖA TENIŊ

Gibioŋ tɩŋŋaa nyɩsɛ Josua

¹ Bʋa-la lɛ kuorie-la kala sɩ hɛ Jɔdaŋ fuo-la wɩɩjʋʋlʋŋ dɩɩrɩŋ, kɩalɩŋ sɩ hɛ dundolluŋ arɩ fuonaasɩŋ arɩ mʋgʋ-bal-la niiŋ a kɛŋ ŋɩɩ mʋ yi Lɛbanɔŋ, ba nɩa arɩ Iziral tɩŋŋaa yuo dii Jeriko arɩ Aɩ. Kuorie-la ŋaa Hiti tɩŋŋaa, Amɔrɩ tɩŋŋaa, Kɛnaŋ tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa kuoroo nɛ.

² Ŋɩɩ nɛ ba kala sii kʋ pɛ dɔŋɔ dɩ ba yuo Josua arɩ Iziral tɩŋŋaa.

³ Gibioŋ tɩŋŋaa sɩ nɩɩ wɩɩ-la Josua sɩ ŋaa Jeriko arɩ Aɩ lɛ,

⁴ ba chɛ wombii dɔŋ ba sɩ jaŋ to a mʋ nyɩsʋ. Ba sii kɛsɛ kakusuŋ a chʋŋ kʋdiilee arɩ bɔtɔ kɔsʋmɔɔ arɩ sɩnɩŋ puroo sɩ kɔsɔ ba sɩ yɛrɛ yɛrɛ, a mʋ ʋ teeŋ.

⁵ Nɩalɩŋ fa laalɛ gɛrɩ-kɔsʋmɔɔ nɛ a hɛ nɛntɛŋ-kpaarɩŋ ba sɩ yɛrɛ yɛrɛ. Boroboroba-la ma ba sɩ paa kala nɛ hɩla aŋ nyʋ.

⁶ Ŋɩɩ nɛ ba mʋ Josua teeŋ Gɩlɩgal lɛ ba dɩhɔnʋŋ, a bʋla pɩ ʋ dɩ Iziral tɩŋŋaa, “La lɩɩ dɩ-bolii nɛ a kɔ, aa chɛla dɩ ma hɛ niiŋ pɩ dɔŋɔ.”

⁷ Ŋɩɩ nɛ Iziral tɩŋŋaa bʋla pɩba, “Ŋ bɩ pɔ ma jʋʋ kpɩkpagɛla nɛ. Ɛɛ nɛ saa la dɩ ma jaŋ wuo hɛ niiŋ pɩ dɔŋɔ?”

⁸ Ŋɩɩ nɛ nɩalɩŋ bʋla pɩ Josua, “La ŋaa ŋ tɩntɩnnaa nɛ.” Ŋɩɩ nɛ Josua bɩra pɩɛsɛba, “Kʋbɛɛ ba nɛ ma ŋaa, nɩɩ nɛ ma lɩɩ?”

⁹ Ba bʋla pʋ, “Ŋ tɩntɩnnaa lɩɩ dɩ-bolii nɛ, la nɩɩ ma TƖƖNA Wɩa wɩaa nɛ a kɔ. La nɩɩ wɩalɩŋ kala ʋ fa sɩ ŋaa Ijipiti tinteeŋ lɛ nɛ,

¹⁰ arɩ wɩalɩŋ kala ʋ sɩ ŋaa Amɔrɩ tɩŋŋaa kuorie-la balɩa sɩ hɛ Jɔdaŋ fuo-la wɩɩpɔsʋŋ dɩɩrɩŋ, Hɛsɩbɔŋ kuoro Sɩhɔŋ arɩ Basaŋ tinteeŋ kuoro Ɔgɩ, sɩ hɔŋ taŋ-la ba sɩɩ yɩrɛ Asɩtarɔf lɛ.

¹¹ La nɩhɩasɩŋ arɩ nɩalɩŋ kala sɩ hɛ la tinteeŋ lɛ nɛ bʋla pɩla dɩ la joŋ kʋdiilee a kaa vɛŋ wombiiŋ a kɔ ma teeŋ a bʋla pɩma, la ŋaa ma tɩntɩnnaa nɛ, má leŋ dɩ la dɩ ma hɛ niiŋ pɩ dɔŋɔ.

¹² Tapʋlɩɩ-la la sɩ sii paa la kɩaa dɩ la kɔ ma teeŋ, la boroboro deeŋ fa zɔmɔ nɛ, ama ma bee na lɛɛlɛ ʋ kala nɛ hɩla a nyʋ.

¹³ Bʋa-la lɛ la sɩ hɛ sɩnɩŋ puroo deemba lɛ, ba kala fa falɩa nɛ, ama ma bee na lɛɛlɛ ba kala nɛ kɩɛsa. La gɛnnɩŋ arɩ la nɛntɛŋŋɛɛ ma kala nɛ kɔsɔ, a tɩŋ wombii-duduoŋ-la la sɩ vɛnɛ wɩaa.”

¹⁴ Ŋɩɩ nɛ Iziral tɩŋŋaa bɩ La TƖƖNA pɩɛsa, aŋ laa nɩalɩŋ kʋdiilee mʋa mʋa a dii.

¹⁵ Ʋ ŋɩɩ harɩŋ Josua kɛŋ Gibioŋ tɩmma-la a dii nandɔnsʋŋ a lemba, ʋ bɩ ba wɩɩkala ŋaa. Iziral tɩŋŋaa nɩhɩasɩŋ ma hɛ niiŋ pɩ nɩalɩŋ arɩ ba bɩ jaŋ ŋaaba wʋbɔŋ kala.

¹⁶ Ba dɩ Gibioŋ tɩmma-la fa sɩ hɛ niiŋ pɩ dɔŋɔ ŋɩɩ, ʋ tapʋlaa batori chɛɛŋ nɛ Iziral tɩŋŋaa nɩɩ arɩ nɩalɩŋ jʋʋ a kpɩkpagɛba nɛ.

¹⁷ Ŋɩɩ nɛ Iziral tɩŋŋaa ma sii vɛŋ tapʋlaa batori a mʋ na tasɩ-la nɩalɩŋ sɩ lɩa. Tasɩ-la nɛ ŋ-la: Gibioŋ, Kɛfɩra, Bɛɛrɔf arɩ Kɩrɩaf Jɩarɩm.

¹⁸ Ba kɛŋ La TƖƖNA Iziral tɩŋŋaa Wɩa yɩrɩŋ nɛ a kaa hɛ niiŋ a pɩ nɩalɩŋ arɩ ba bɩ jaŋ ŋaa ba wʋbɔŋ kala, ŋɩɩ wɩaa ba bɩ ba wɩɩkala ŋaa. Ŋɩɩ nɛ Iziral tɩmma-la kala gʋrɩmɛ wɩaa ba sɩpaalaaraa teeŋ.

¹⁹ Ŋɩɩ nɛ sɩpaalaara-la bʋla pɩ nɩalɩŋ, “La kɛŋ La TƖƖNA Iziral tɩŋŋaa Wɩa yɩrɩŋ nɛ a hɛ niiŋ pɩba, ŋɩɩ wɩaa la bɩ ba wɩɩkala wuo ŋaa.

²⁰ La maga dɩ la leŋ dɩ ba kɛŋ mɩɩsɩŋ nɛ. Dɩ la nɛ chei nii-la sɩ hɛ la dɩ ba pɛgɛ, La TƖƖNA jaŋ na baanɩŋ la nyuŋ a dɔgɩsɛla.

²¹ La bɩ jaŋ kpʋba, ama ba nɛ jaŋ ŋaa nɩalɩŋ sɩ jaŋ kikeri la daasɩŋ, aŋ ŋaa lɩɩŋ ma a pɩpɩla.” Wɩɩ-la sɩpaalaara-la fa sɩ vʋʋra nɛ ŋɩɩ.

²² Ŋɩɩ nɛ Josua yɩrɛ Gibioŋ tɩmma-la a pɩɛsɛba, “Bɛɛ nɛ tɩɩ ma nyɩsɛla arɩ ma lɩɩ dɩ-bolii nɛ, a see ma jʋʋ a kpɩkpagɛla nɛ?

²³ Lɛɛlɛ La TƖƖNA ŋmɩaŋ diima nɛ. Ma nɛ jaŋ ŋaa nɩalɩŋ sɩ jaŋ keri daasɩŋ a chʋŋ lɩɩŋ a kaa mʋmʋ mɩ Wɩa dɩa a kaa mʋ wuu.”

²⁴ Ŋɩɩ nɛ ba bʋla pɩ Josua, “La ŋaa ŋɩɩ, bɛɛ wɩaa la nɩɩ ŋɩɩ ma TƖƖNA Wɩa sɩ bʋla pɩ ʋ tɩntɩnna Mosis arɩ ʋ jaŋ joŋ tintee-la kala a pɩma, aŋ kpʋ nɩalɩŋ kala sɩ hɛ tintee-la lɛ nɛ. Fawʋllʋŋ fa kɛnla nɛ, ŋɩɩ nɛ tɩɩ la tɩŋ la mɩɩsɩŋ wɩaa a ŋaa ŋɩɩ.

²⁵ La hɛ ŋ nɩsɩŋ lɛ nɛ lɛɛlɛ. Ŋaala wɩɩ-la-kala ŋ sɩ cho.”

²⁶ Ŋɩɩ nɛ Josua laaba ta Iziral tɩŋŋaa nɩsɩŋ lɛ, ba bɩ ba kpʋa.

²⁷ Tapʋlɩɩ-la nɛ Josua leŋ Gibioŋ tɩmma-la ŋaa nɩalɩŋ sɩ jaŋ kikeri daasɩŋ aŋ ŋaa lɩɩŋ pɩpɩ Iziral tɩŋŋaa aŋ pɛ ŋaa jʋjʋʋ La TƖƖNA Wɩɩsʋlʋŋ koru-la sɩ hɛ, lee-la La TƖƖNA sɩ jaŋ lɩɩsɛ lɛ. Ba tɩntɩmɩŋ nɛ ŋɩɩ arɩ jɩnɩŋ kala.