JOSUA 6 - WƖA TENIŊ

Jeriko tele

¹ Bʋa-la lɛ ba fa tɔ boi-baala-la kala ba sɩ to jʋjʋʋ Jeriko nɛ kpaŋ kpaŋ, a tɩŋ Iziral tɩŋŋaa wɩaa. Nʋʋ bɩ taŋ-la lɛ wuo lɩɩ, nʋʋ ma bɩ wuo jʋʋ.

² Ŋɩɩ nɛ La TƖƖNA bʋla pɩ Josua, “Bee na, mɩ joŋ Jeriko arɩ ʋ kuoro arɩ ʋ laalɩyuoroo kala a hɛ ŋ nɩsɩŋ lɛ nɛ.

³ Tapʋlɩɩ na-kala, ŋ dɩ ŋ laalɩyuoro-la sɩ vɔɔ tʋɔnʋŋ, má sii a kɩɛlɛ a vɛnɛ golli taŋ-la bala. Má ŋaa ŋɩɩ tapʋlaa balɩdʋ.

⁴ Leŋ dɩ Wɩɩsʋllɩ sɩpaalaaraa nɩaa balɩpɛ paa pie-bel nyilliŋ a laa Wɩa niiriŋ daga-la sɩpaaŋ. Tapʋl-pɛɩ chɛɛŋ, má kɩɛlɛ a vɛnɛ golli taŋ-la naansɩɩŋ bʋlɩpɛ, ka dɩ Wɩɩsʋllɩ sɩpaalaaraa ŋmʋŋmʋʋ nyilli-la.

⁵ Dɩ ma nɛ nɩa dɩ ba faasa ŋmʋʋ nyilli-la, ma nɩalɩŋ kala maga dɩ ma faasa ŋaa goŋ nɛ. Dɩ ma nɛ ŋaa ŋɩɩ, jebii-la sɩ golli Jeriko jaŋ tel, ka dɩ ma laalɩyuoroo kala wuo jʋʋ taŋ-la tʋɔŋ.”

⁶ Ŋɩɩ nɛ Nuŋ nanʋala Josua yɩrɛ Wɩɩsʋllɩ sɩpaalaaraa a bʋla pɩba, “Má joŋ La TƖƖNA niiriŋ daga-la aŋ leŋ dɩ ma nɩaa balɩpɛ ma paa nyilliŋ a laa daga-la sɩpaaŋ.”

⁷ Ŋɩɩ nɛ ʋ bɩra bʋla pɩ nɩalɩŋ ma, “Má mʋ, má kɩɛlɛ a vɛnɛ golli tabal-la, ka nɩalɩŋ dɔnsʋŋ sɩ vɔɔ tʋɔnʋŋ laa La TƖƖNA niiriŋ daga sɩpaaŋ.”

⁸ Josua sɩ bʋl wɩalɩŋ pɩba, Wɩɩsʋllɩ sɩpaalaaraa balɩpɛ-la sɩ kori nyilliŋ laa la TƖƖNA niiriŋ daga-la sɩpaaŋ a ŋmʋŋmʋʋ nyilli-la. Ka daga-la tuto ba harɩŋ.

⁹ Nɩalɩŋ sɩ vɔɔ tʋɔnʋŋ laa Wɩɩsʋllɩ sɩpaalaaraa sɩɩ ŋmʋʋ nyilli-la sɩpaaŋ nɛ, ka nɩkaanaa ma tuto Wɩa niiriŋ daga-la harɩŋ. Bʋa-la kala lɛ ba ŋmʋŋmʋʋ nyilli-la.

¹⁰ Josua fa bʋla pɩ nɩalɩŋ, “Má pɔ ma sɩ́ chiesu a sɩ́ goŋ ma ŋaa, a sɩ́ wɩaa ma bʋl, see tapʋlɩɩ-la mɩ sɩ jaŋ pɩma wombiiŋ, ŋɩɩ nɛ ma jaŋ ŋaa goŋ.”

¹¹ Ŋɩɩ nɛ ba kɛŋ La TƖƖNA niiriŋ daga-la a lɩɩ golli taŋ-la bala, aŋ mɩɩra mʋ chʋa ba dɩhɔnʋŋ.

¹² Taŋ sɩ pʋla chʋchʋɔ-fɩɛla Josua sii, Wɩɩsʋllɩ sɩpaalaaraa joŋ La TƖƖNA niiriŋ daga-la.

¹³ Wɩɩsʋllɩ sɩpaalaaraa balɩpɛ-la sɩ kori nyilli-la laa daga-la sɩpaaŋ a ŋmʋŋmʋʋ nyilli-la. Nɩalɩŋ dɔnsʋŋ sɩ vɔɔ tʋɔnʋŋ laa ba sɩpaaŋ, ka nɩkaana-la dɔnsʋŋ ma sɩ vɔɔ tʋɔnʋŋ kala tuto La TƖƖNA niiriŋ daga-la harɩŋ, ka ba ŋmʋŋmʋʋ nyilliŋ.

¹⁴ Chɛ-lɩa chɛɛŋ ba bɩra golli taŋ-la bala nɛ, aŋ mɩɩra kɔ ba dɩhɔnʋŋ. Ba ŋaa ŋɩɩ nɛ tapʋlaa balɩdʋ.

¹⁵ Tapʋl-pɛɩ chɛɛŋ, ba sii chʋchʋɔ-fɩɛla a golli taŋ-la ŋɩɩ tɩtɩa naansɩɩŋ bʋlɩpɛ. Chɛ-pɛɩ-la dʋndʋŋa nɛ ba golli taŋ-la naansɩɩŋ bʋlɩpɛ.

¹⁶ Ba fa sɩɩ golli ŋɩɩ pɛɛmɩŋ lɛ, Wɩɩsʋllɩ sɩpaalaaraa faasa ŋmʋʋ nyilli-la, ŋɩɩ nɛ Josua bʋla pɩ nɩalɩŋ, “Má faasa ŋaa goŋ, bɛɛ wɩaa La TƖƖNA joŋ taŋ-la a hɛ ma nɩsɩŋ lɛ nɛ.

¹⁷ Ʋ maga dɩ ma chei taŋ-la arɩ kɩalɩŋ kala sɩ hɛ ʋ lɛ, ba ŋaa La TƖƖNA kɩaa nɛ. Rahab, hachɔrʋŋ-la arɩ ʋ dɩa nɩaa dʋndʋŋa nɛ jaŋ ka, bɛɛ wɩaa ʋ nɛ kɛŋ baala-la la sɩ tɩma ba mʋ lʋara beŋ tintee-la a faa.

¹⁸ Má pɔ ma tɩtɩa lɛ woruŋ, a lɩɩsɛ ma nɩsɩŋ La TƖƖNA kɩalɩŋ sɩ maga dɩ ma chei lɛ, dɩ ŋɩɩ dee ma jaŋ lɔgɛ wɩaa a wurisi ma tɩtɩa a chei Iziral tɩŋŋaa.

¹⁹ Sɛlɩmɛ, hɔpʋla arɩ kɩalɩŋ kala ba sɩ kɛŋ kɔlɩɩŋ koo hɔɔŋ ŋaa, ba ŋaa La TƖƖNA kɩaa nɛ. Ba maga dɩ ba jʋʋ ʋ dʋa dɩ-biliŋ nɛ.”

²⁰ Ba sɩ faasa ŋmʋʋ nyilli-la, nɩalɩŋ ma faasa ŋaa goŋ. Ŋɩɩ nɛ Jeriko jebii-la tel. Laalɩyuoro-la guu jʋʋ taŋ-la a yuo diiu.

²¹ Ba chei taŋ-la kala nɛ, a kpʋ kʋŋ na-kala sɩ weye: baalaa, haalaa, hambiisiŋ arɩ nɩhɩasɩŋ, nɛsɩŋ, piesee arɩ kakusuŋ kala.

²² Josua fa bʋla pɩ baala-la balɩa sɩ mʋ lʋara beŋ tintee-la, “Má jʋʋ Rahab, hachɔrʋŋ-la dɩa a kɛŋ ʋ dɩ ʋ dɩa nɩaa kala kaa kʋ lɩɩ arɩ ma sɩ hɛ niiŋ ŋɩɩ a pʋ.”

²³ Ŋɩɩ nɛ bapʋɔsɩa-la sɩ mʋ lʋara beŋ tintee-la jʋʋ, a kɛŋ Rahab arɩ ʋ nyɩmma arɩ ʋ naaŋ, ʋ naambiiriŋ arɩ nʋʋ na-kala sɩ ŋaa ʋ nʋʋ kʋ lɩɩ. Ba kɛŋ ʋ dɩ ʋ nɩaa kala kʋ lɩɩ a leŋ ba hɔnɔ kpagɛ Iziral tɩŋŋaa dɩhɔnʋŋ.

²⁴ Ŋɩɩ nɛ ba jʋʋ paa hɔpʋla, sɛlɩmɛ arɩ kɔlɩɩŋ kɩaa arɩ hɔɔŋ a kaa jʋʋ bil La TƖƖNA dʋa dɩ-biliŋ, aŋ nyɩgɛ taŋ-la kala arɩ kʋŋ na-kala sɩ hɛ nɩmɛ.

²⁵ Josua fa bɩ Rahab arɩ ʋ dɩa nɩaa arɩ nʋʋ na-kala sɩ ŋaa ʋ nʋʋ-na kpʋa, bɛɛ wɩaa Rahab nɛ fa kɛŋ baala-la balɩa Josua sɩ tɩma ba mʋ lʋara beŋ Jeriko tintee-la a faa. Ʋ doho nɩaa ha hɛ Iziral tɩŋŋaa tʋɔŋ arɩ jɩnɩŋ kala.

²⁶ Bʋa-la lɛ nɛ Josua chaasa ŋmɩɛsɛ a bʋl, “Dɩ nʋʋkala nɩɩ chɛ dɩ ʋ bɩra paa Jeriko a saa, La TƖƖNA ŋmɩaŋ jaŋ diiu. Ʋ bii-hɩaŋ nɛ ʋ jaŋ kaa bil taŋ-la gentine. Dɩ ʋ nɛ saa dɛrɛ, ʋ bii-katɩɩ nɛ ʋ jaŋ kaa hɛ taŋ-la boi-baalaa.”

²⁷ La TƖƖNA fa chɩŋ Josua harɩŋ nɛ woruŋ, ʋ yɩrɩŋ teeli tintee-la kala.