JOSUA 5 - WƖA TENIŊ

Iziral tɩŋŋaa keri ba penee Gɩlɩgal lɛ

¹ Amɔrɩ tɩŋŋaa kuorie-la sɩ hɛ Jɔdaŋ fuo-la wɩɩjʋʋlʋŋ arɩ Kɛnaŋ tɩŋŋaa kuorie-la sɩ hɛ Mediterenia mʋgʋ-balɩŋ niiŋ fa sɩ nɩa dɩ La TƖƖNA ŋaa Jɔdaŋ fuoŋ hʋ nɛ ka Iziral tɩŋŋaa chol, fawʋllʋŋ chaasa jʋʋba woruŋ. A tɩŋ Iziral tɩmma-la wɩaa ba nandaasɩŋ yʋɔrɛ arɩ ba sɩ jaŋ cheme yuoba.

² Ŋɩɩ nɛ La TƖƖNA bʋla pɩ Josua, “Yɛrɛ naŋkpachɩllɩŋ dɩ ba nagɛ sɩɩsɩŋ a kɛŋ niiŋ a keri Iziral tɩŋŋaa penee.”

³ Ŋɩɩ nɛ Josua fa yɛrɛ naŋkpachɩllɩ-la a kaa keri Iziral tɩŋŋaa penee Gɩbɩaf Haralɔf lɛ [ʋ bʋbʋɔŋ nɛ ‘peel-la lɛ ba sɩ keri penee’].

⁴ Wɩɩ-la sɩ tɩɩ Josua fa keri ba penee nɛ ŋ-la: Nɩalɩŋ kala fa sɩ lɩɩ Ijipiti tinteeŋ lɛ a kʋ lɩɩ, baala-la kala sɩ magɛ laalɩŋ mʋnʋŋ sʋʋ wombiiŋ lɛ nɛ, tintee-hɩlɩŋ lɛ, ba sɩ lɩɩ Ijipiti tinteeŋ kʋkɔ.

⁵ Nɩalɩŋ kala sɩ lɩɩ Ijipiti tinteeŋ fa keri ba penee nɛ, ama nɩalɩŋ kala ba sɩ lʋla tintee-hɩlɩɩ-la lɛ bʋa-la lɛ ba sɩɩ vɛŋ wombiiŋ, ba-na fa bɩ ba penee kere.

⁶ Iziral tɩŋŋaa fa baarɛ tintee-hɩlɩŋ tʋɔŋ jɩsɩŋ mahɩŋ balɩa nɛ deeŋ deeŋ, baala-la kala sɩ magɛ laalɩŋ yuonuŋ a lɩɩ Ijipiti tinteeŋ sʋʋ dɛrɛ, bɛɛ wɩaa ba fa vɩa La TƖƖNA niiŋ nɛ. La TƖƖNA fa chaasa ŋmɩɛsɛ nɛ arɩ ba bɩ jaŋ na tintee-la ʋ sɩ hɛ niiŋ a pɩ ba naabalɩmaba arɩ ʋ jaŋ joŋo pɩba, tintee-la sɩ chaasa sɩŋ a kɛŋ kɩaa woruŋ.

⁷ Nɩalɩŋ fa sɩ sʋʋ tintee-hɩlɩŋ lɛ biiriŋ penee nɛ Josua keri ŋɩɩ. Ba fa bɩ ba penee kere wombiiŋ lɛ.

⁸ Ba sɩ keri ba tintee-la nɩaa kala penee, ba fa hɔŋ ba dɩhɔnʋŋ ŋɩɩ nɛ deeŋ deeŋ pene-la fɩɛlɛ.

⁹ Ŋɩɩ nɛ La TƖƖNA fa bʋla pɩ Josua, “Jɩnɩŋ mɩ leŋe hɩɩsɩ-la kala ma sɩ die Ijipiti tinteeŋ lɛ dɛrɛ nɛ.” Ŋɩɩ nɛ ba hɛ lee-la yɩrɩŋ Gɩlɩgal. Arɩ jɩnɩŋ kala lee-la yɩrɩŋ nɛ ha ŋɩɩ.

¹⁰ Iziral tɩŋŋaa fa sɩ hɔŋ Gɩlɩgal lɛ, Jeriko tintee-taalɩsɩ-la lɛ, chɛnɛ tapʋlaa fɩɩ arɩ banɛsɛ chɛɛŋ dɩdaanɩŋ, ba gbieli dɩɩsɩŋ kiele bal gbiele-la.

¹¹ Ba fa sɩ gbieli gbiele-la taŋ sii pʋl nɛ, ba suomo dii Kɛnaŋ tintee-la kʋdiilee, boroboro sɩ bɩ sɩbʋrʋŋ kɛnɛ arɩ mɩɩ-halaa.

¹² Iziral tɩŋŋaa sɩ dii tintee-la kʋdiilee taŋ sii pʋl, ‘mana-la’ fa sɩ yie tel ba didii bɩra bɩ tele. Jɩna-la Kɛnaŋ tinteeŋ kʋdiilee nɛ ba dii.

Josua arɩ baala sɩ kori tokobiiŋ

¹³ Bʋa-la lɛ Josua sɩ mʋ a kpagɛ Jeriko, ʋ na baal kʋbala dɩ ʋ chɩŋ ʋ sɩpaaŋ a kori tokobiiŋ. Ŋɩɩ nɛ ʋ mʋ a pɩɛsʋ, “Ŋ pɛ la lɛ nɛ koo ŋ ŋaa la dʋndɔŋ nɛ?”

¹⁴ Ŋɩɩ nɛ baal-la bʋl, “Aɩ, mɩ nɛ ŋaa La TƖƖNA laalɩyuoroo kʋhɩaŋ.” Ŋɩɩ nɛ Josua tuu tele chu tinteeŋ a zilu aŋ pɩɛsʋ, “Mɩ nɩhɩaŋ, wʋbɛɛ nɛ ŋ chɩchɛ dɩ ŋ tɩntɩnna ŋaa?”

¹⁵ Ŋɩɩ nɛ La TƖƖNA laalɩyuoroo kʋhɩaŋ-la bʋla pɩ Josua, “Chaarɛ ŋ nɛntɛŋŋɛɛ, bɛɛ wɩaa lee-la ŋ sɩ chɩna ŋaa Wɩa lee nɛ.” Ŋɩɩ nɛ Josua ŋaa ŋɩɩ ʋ sɩ bʋla.