JOSUA 4 - WƖA TENIŊ

¹ Bʋa-la lɛ Iziral tɩŋŋaa kala fa sɩ chol Jɔdaŋ fuo-la a dɛrɛ, ŋɩɩ nɛ La TƖƖNA bʋla pɩ Josua,

² “Lɩɩsɛ baalaa fɩɩ arɩ balɩa nɩalɩŋ tʋɔŋ, doho na-kala tʋɔŋ nɩbala.

³ Bʋla pɩba, dɩ ba kʋŋkala joŋ tabɩɩŋ Jɔdaŋ fuo-la tʋtʋɔbaanɩŋ, lee-la Wɩɩsʋllɩ sɩpaalaaraa sɩ chɩna, a kaa mʋ bil lee-la ma sɩ jaŋ chʋa jɩnɩŋ tɩtaŋɩŋ.”

⁴ Ŋɩɩ nɛ Josua yɩrɛ nɩalɩŋ fɩɩ arɩ balɩa-la ʋ sɩ lɩɩsa Iziral doho doho-la kala tʋɔŋ,

⁵ a bʋla pɩba, “Má mʋ ma TƖƖNA Wɩa niiriŋ daga-la sɩpaaŋ Jɔdaŋ fuo-la tʋtʋɔbaanɩŋ, má kʋŋkala joŋ tabɩɩŋ ŋ doho nɩaa nyuŋ lɛ a baasɛ

⁶ dɩ ʋ ŋaa magɩl ma tʋɔŋ. Maachie dɩ ma biiriŋ nɛ pɩɛsɛma, ‘Tabɩaa deemba bʋbʋɔŋ nɛ bɛɛ?’

⁷ Má bʋla pɩba arɩ bʋa-la lɛ La TƖƖNA Wɩa niiriŋ daga-la fa sɩɩ chol Jɔdaŋ fuo-la, lɩɩ-la fa sɩɩ pɛllʋ kɛrɛ nɛ a chɩŋ dɩ-bala. Tabɩaa deemba nɛ jaŋ leŋ dɩ Iziral tɩŋŋaa liliisi wɩɩ-la a kaa mʋ wuu.”

⁸ Ŋɩɩ nɛ baala-la fii arɩ balɩa ŋaa ŋɩɩ Josua sɩ dagɛba. Ba paa tabɩaa fɩɩ arɩ balɩa nɛ Jɔdaŋ fuo-la tʋtʋɔbaanɩŋ, tabɩɩ-kala chɩŋ doho doho-la nyuŋ, arɩ La TƖƖNA sɩ dagɛ Josua ŋɩɩ. Ŋɩɩ nɛ ba chʋŋ tabɩa-la ŋɩɩ a kaa mʋ ba dɩhɔnʋŋ a joŋo bil.

⁹ Ŋɩɩ nɛ Josua paa tabɩaa fɩɩ arɩ balɩa-la ba sɩ paa Jɔdaŋ fuo-la tʋtʋɔbaanɩŋ, lee-la Wɩɩsʋllɩ sɩpaalaaraa sɩ chʋŋ Wɩa niiriŋ daga-la fa sɩ chɩna a pɛ, arɩ jɩnɩŋ kala tabɩa-la ha hɛ nɩmɛ.

¹⁰ Wɩɩsʋllɩ sɩpaalaara-la fa sɩ chʋŋ La TƖƖNA niiriŋ daga-la chɩŋ Jɔdaŋ fuo-la tʋtʋɔbaanɩŋ ŋɩɩ nɛ deeŋ deeŋ nɩalɩŋ ŋaa wɩalɩŋ kala La TƖƖNA sɩ to Mosis lɛ a dagɛ Josua dɛrɛ. Ka nɩalɩŋ kala ŋaa lɩma lɩma a chol fuo-la.

¹¹ Ba kala sɩ cholo dɛrɛ, Wɩɩsʋllɩ sɩpaalaaraa sɩ chʋŋ La TƖƖNA niiriŋ daga-la ma to harɩŋ kʋ lɩɩ, a laa ba sɩpaaŋ.

¹² Rubiŋ doho nɩaa baalaa arɩ Gad doho nɩaa baalaa arɩ Manasɛ doho nɩaa kpaa magɛ dɔŋɔ-la baalaa fa nyɩgɩla nɛ a chol fuo-la dɩ ba mʋ laalɩŋ a laa Iziral tɩŋŋaa nɩkaana-la sɩpaaŋ arɩ Mosis fa sɩ dagɛ ba ŋɩɩ.

¹³ Ba fa yi nɩaa bʋɩ mahɩŋ balɩa nɛ a nyɩgɩlɛ a chol Jɔdaŋ fuo-la La TƖƖNA sɩpaaŋ dɩ ba mʋ Jeriko tintee-taalɩsɩ-la a yuo laalɩŋ.

¹⁴ La TƖƖNA sɩ ŋaa wɩɩ-la tapʋlɩɩ-la Iziral tɩŋŋaa na, ŋɩɩ leŋe ba joŋ Josua ʋ ŋaa nɩyuŋi nɛ ba teeŋ. Ba zilu woruŋ ʋ mɩɩsɩŋ kala lɛ arɩ ba fa sɩɩ zil Mosis ŋɩɩ.

¹⁵ Ŋɩɩ nɛ La TƖƖNA bʋla pɩ Josua,

¹⁶ “Leŋ dɩ Wɩɩsʋllɩ sɩpaalaaraa sɩ chʋŋ mɩ niiriŋ daga-la, kʋ lɩɩ Jɔdaŋ fuo-la lɛ.”

¹⁷ Ŋɩɩ nɛ Josua bʋla pɩ Wɩɩsʋllɩ sɩpaalaaraa, “Má kʋ lɩɩ Jɔdaŋ fuo-la lɛ.”

¹⁸ Wɩɩsʋllɩ sɩpaalaaraa fa sɩ chʋŋ La TƖƖNA niiriŋ daga-la sɩ kʋ lɩɩ fuo-la lɛ dɩdɛrɛ, dɩ fuo-la bɩra mɩɩra kʋ su, a nagɛ ŋɩɩ ʋ fa sɩ naga.

¹⁹ Chɛŋ bumbuŋ tapʋl-fii chɛɛŋ nɛ, Iziral tɩmma-la fa chol Jɔdaŋ fuo-la a mʋ hɔŋ taŋ-la ba sɩɩ yɩrɛ Gɩlɩgal lɛ. Ʋ hɛ Jeriko tinteeŋ wɩɩpɔsʋŋ dɩɩrɩŋ bʋa lɛ nɛ.

²⁰ Ŋɩɩ nɛ Josua joŋ tabɩa-la fɩɩ arɩ balɩa ba fa sɩ paa Jɔdaŋ fuo-la tʋɔŋ, a hɛ dɔŋɔ lɛ a bil Gɩlɩgal lɛ,

²¹ aŋ bʋla pɩ Iziral tɩŋŋaa, “Dɩ ma doho nɩaa nɛ maachie pɩɛsɛma arɩ tabɩaa deemba bʋbʋɔŋ nɛ bɛɛ,

²² má bʋla pɩba arɩ Iziral tɩŋŋaa fa vɛŋ tintee-hɩlɩŋ lɛ nɛ a to Jɔdaŋ fuo-la tʋɔŋ a lɩɩ.

²³ Ma Tɩɩna Wɩa nɛ leŋe Jɔdaŋ fuo-la hʋ ma sɩpaaŋ ka ma chol, arɩ ʋ fa sɩ leŋe Mʋgʋ-fɩaŋ-la lɩɩŋ hʋ ka la bal ŋɩɩ.

²⁴ La TƖƖNA ŋaa wɩaa deemba kala dɩ dʋnɩa nɩaa kala jɩŋ arɩ ʋ nɛ kɛŋ doluŋ, dɩ ŋɩɩ leŋ dɩ ma fɩfá ma TƖƖNA Wɩa, a kaa mʋ wuu.”