JOSUA 3 - WƖA TENIŊ

Iziral tɩŋŋaa chol Jɔdaŋ fuoŋ

¹ Taŋ sɩ pʋla chʋchʋɔ-fɩɛla, Josua arɩ Iziral tɩŋŋaa doho doho-la kala sii lee-la ba sɩɩ yɩrɛ Sɩtɩm a mʋ Jɔdaŋ fuoŋ, a hɔŋ a gbɩgbɛrɛ dɩ ba chol fuo-la.

² Tapʋlaa batori chɛɛŋ, ba nɩhɩasɩŋ sii a gɔllɛ ba dɩhɔnʋŋ kala,

³ a bʋla pɩ nɩalɩŋ, “Dɩ ma nɛ na dɩ Levi doho Wɩɩsʋllɩ sɩpaalaaraa joŋ ma TƖƖNA Wɩa niiriŋ daga-la, ʋ maga dɩ ma sii ma dɩhɔnʋŋ a to ba harɩŋ nɛ.

⁴ Ŋɩɩ nɛ ma jaŋ jɩŋ wombii-la ma sɩ jaŋ to a mʋ, bɛɛ wɩaa ma ha bɩ wombiiŋ deeŋ vɛnɛ aŋ ka. Má hɛ dɩ-bolii aŋ leŋ dɩ ma dɩ Wɩa niiriŋ daga-la pɛgɛ wuoluŋ yi naakieliŋ bʋɩ. Má pʋpɔ ma sɩ mʋ kpagʋ.”

⁵ Ŋɩɩ nɛ Josua bʋla pɩ nɩalɩŋ, “Má pɩɩsɛ ma disiniŋ ta, bɛɛ wɩaa chie La TƖƖNA jaŋ ŋaa wʋkpuŋkperisiŋ ma tʋɔŋ.”

⁶ Ŋɩɩ nɛ ʋ bɩra bʋla pɩ Wɩɩsʋllɩ sɩpaalaaraa ma, “Ma joŋ Wɩa niiriŋ daga-la a laa nɩalɩŋ sɩpaaŋ.” Ŋɩɩ nɛ ba joŋ a laa ba sɩpaaŋ.

⁷ Ŋɩɩ nɛ La TƖƖNA bʋla pɩ Josua, “Jɩnɩŋ mɩ jaŋ suomo to ŋ lɛ a ŋaa wɩaa Iziral tɩŋŋaa sɩɩŋ lɛ a leŋ dɩ ŋ ŋaa nɩyuŋi ba teeŋ, dɩ ba jɩŋ arɩ mɩ hɛ ŋ teeŋ nɛ arɩ mɩ fa sɩ hɛ Mosis teeŋ ŋɩɩ.

⁸ Bʋla pɩ Wɩɩsʋllɩ sɩpaalaaraa sɩ chʋŋ mɩ niiriŋ daga-la, dɩ ba nɛ mʋ yi Jɔdaŋ fuo-la, ba jʋʋ chɩŋ lɩɩ-la niiŋ.”

⁹ Ŋɩɩ nɛ Josua fa bʋla pɩ Iziral tɩŋŋaa ma, “Má kɔ daha a nɩɩ wɩalɩŋ ma TƖƖNA Wɩa sɩ bʋla.

¹⁰ Dɩ ma nɩɩ mʋ, ma TƖƖNA jaŋ sɛnɛ kiri Kɛnaŋ tɩŋŋaa, Hiti tɩŋŋaa, Hivi tɩŋŋaa, Pɛrɛs tɩŋŋaa, Gɩgasɩ tɩŋŋaa, Amɔrɩ tɩŋŋaa arɩ Jebus tɩmma-la kala sɩ hɛ tintee-la lɛ dɩ ba lɩɩ. Ma jaŋ jɩŋ arɩ ma TƖƖNA Wɩa sɩ weye hɛ ma tʋɔŋ nɛ,

¹¹ dɩ La TƖƖNA sɩ tɩɩ tinteeŋ kala niiriŋ daga-la nɛ laa ma sɩpaaŋ a chol Jɔdaŋ fuo-la.

¹² Má lɩɩsɛ baalaa fɩɩ arɩ balɩa Iziral doho doho-la tʋɔŋ, doho kala tʋɔŋ nɩbala.

¹³ Dɩ Wɩɩsʋllɩ sɩpaalaaraa sɩ chʋŋ La TƖƖNA sɩ tɩɩ tinteeŋ kala niiriŋ daga nɛ joŋ ba naasɩŋ a nʋɔsɛ Jɔdaŋ fuo-la tʋɔŋ, lɩɩ-la sɩɩ pɛllʋ jaŋ kɛrɛ, a chɩŋ dɩ-bala aŋ sii chʋɔrɛ.”

¹⁴ Bʋa-la lɛ Iziral tɩmma-la sɩ sii ba dɩhɔnʋŋ dɩ ba chol Jɔdaŋ fuoŋ, Wɩɩsʋllɩ sɩpaalaaraa sɩ chʋŋ Wɩa niiriŋ daga-la nɛ laa ba sɩpaaŋ.

¹⁵ Baga kɩaa ŋaanɩŋ bʋa lɛ nɛ, dɩ fuo-la kala suo a pɛllɛ lɩlɩɩ. Arɩ ŋɩɩ kala Wɩɩsʋllɩ sɩpaalaaraa sɩ chʋŋ daga-la sɩ mʋ yi Jɔdaŋ fuo-la, ba naasɩŋ digi lɩɩ-la niiŋ,

¹⁶ lɩɩ-la sɩ pɛllɛɛ lɩɩ fuo-la nyuŋ a kʋ kɔ kɛrɛ nɛ, aŋ kala sii chʋɔrɛ a mʋ hɛ dɩ-bolii, taŋ-la lɛ ba sɩɩ yɩrɛ Adam lɛ a kpagɛ taŋ-la ba sɩɩ yɩrɛ Zarɛtaŋ. Lɩɩ-la sɩ pɛllɛ a tutuu Araba Mʋga kala kɛrɛ. (Araba Mʋga-la nɛ ba haa yɩyɩrɛ Mʋgʋ-sʋʋŋ.) Ŋɩɩ nɛ nɩalɩŋ wuo chol Jɔdaŋ fuo-la Jeriko dɩɩrɩŋ.

¹⁷ Wɩɩsʋllɩ sɩpaalaaraa fa sɩ chʋŋ La TƖƖNA niiriŋ daga-la chɩŋ tintee-hɩlɩŋ lɛ Jɔdaŋ fuo-la tʋtʋɔbaanɩŋ, ka Iziral tɩŋŋaa kala vɛŋ tintee-hɩlɩɩ-la nyuŋ ŋɩɩ a kala cholo dɛrɛ.