JOSUA 24 - WƖA TENIŊBa wulli Wɩa nii-la Sɛkɛm lɛ 1 Tapʋlɩɩ kʋbala Josua yɩrɛ Iziral tɩŋŋaa doho doho-la kala kʋ hilimi Sɛkɛm lɛ, a leŋ ba nɩhɩasɩŋ, ba sɩpaalaaraa arɩ ba sarɩya diiree arɩ ba tɩntɩnnɩ-hɩasɩŋ kɔ Wɩa sɩpaaŋ. 2 Ŋɩɩ nɛ Josua bʋla pɩ nɩalɩŋ kala, “Wɩɩ-la La TƖƖNA Iziral tɩŋŋaa Wɩa sɩ bʋla nɛ ŋ-la: ‘Bumbuŋ-la ma naabalɩmaba fa hɛ Yufireti fuo-la cholo nɛ a tuto vesiŋ. Tɛra ma fa pɛ nɛ, Abɩraham arɩ Nahɔ nyɩmma nɛ ŋɩɩ. 3 Ŋɩɩ nɛ mɩ kɛŋ Abɩraham sɩ ŋaa ma naabalɩma, a lɩɩ Yufireti fuo-la cholo tintee-la lɛ, a kɛnʋ to Kɛnaŋ tinteeŋ a leŋ ʋ doho nɩaa pʋŋ woruŋ. Mɩ fa leŋe ʋ lʋl Aɩzɩk nɛ, 4 a bɩra leŋ Aɩzɩk ma lʋl Jekɔb arɩ Ɛsɔ. Mɩ nɛ joŋ Sɛɛ tintee-la peelee sɩ yʋga a pɩ Ɛsɔ, ama Jekɔb arɩ ʋ biiriŋ-na mʋ Ijipiti tinteeŋ nɛ. 5 Ŋɩɩ harɩŋ nɛ mɩ tɩŋ Mosis arɩ Arɔŋ Ijipiti lɛ a joŋ wʋlɔrʋnʋŋ a ŋaa Ijipiti tɩŋŋaa lɛ, aŋ-na kɛmma kaa lɩɩ nɩmɛ. 6 Bʋa-la lɛ mɩ sɩ kɛŋ ma naabalɩmaba kʋʋ lɩɩ Ijipiti tinteeŋ lɛ, Ijipiti tɩŋŋaa fa lɩɩ kire to ba harɩŋ nɛ arɩ ba janɩŋ torukoba arɩ ba ja-jɩllaa a kʋ yi Mʋgʋ-fɩaŋ niiŋ. 7 Ba sɩ yele pɩmɛ dɩ mɩ pɛ ba lɛ, mɩ fa joŋ birimiŋ hɛ ba dɩ Ijipiti tɩŋŋaa pɛgɛ nɛ a leŋ lɩɩŋ kʋ tɔ Ijipiti tɩŋŋaa. Ma tɩtɩa na wɩalɩŋ mɩ sɩ ŋaa Ijipiti tɩŋŋaa lɛ nɛ. Ʋ ŋɩɩ harɩŋ, ma hɛ tintee-hɩlɩŋ tʋɔŋ a dieni nɛ. 8 Mɩ kɛmma kaa kɔ Amɔrɩ tɩmma-la sɩ hɛ Jɔdaŋ fuoŋ wɩɩpɔsʋŋ dɩɩrɩŋ tinteeŋ. Ba fa sɩ sii yuyuoma, mɩ jomba hɛ ma nɩsɩŋ lɛ nɛ. Mɩ kpʋba nɛ ma sɩpaaŋ, ka ma laa ba tinteeŋ ʋ ŋaa ma kʋŋ. 9 Bʋa-la lɛ Zipo nanʋala Balak sɩ ŋaa Mʋab tɩŋŋaa kuoro fa sɩ kɛŋ ba tɩtɩa hɛ dɔŋɔ dɩ ʋ yuo ma Iziral tɩŋŋaa, ʋ tɩma yɩrɛ Bioo nanʋala Balam nɛ dɩ ʋ kɔ a kalɩba hɛ ma lɛ. 10 Ama mɩ bɩ jegile nɩɩ Balam teeŋ, mɩ fa leŋe ʋ mɩɩra sʋl Wɩa pɩma nɛ. Mɩ bɩra laama ta Balak ma nɩsɩŋ lɛ nɛ. 11 Ŋɩɩ nɛ ma chol Jɔdaŋ fuo-la a kɔ Jeriko. Jeriko tɩmma-la ma bɩra sii a yuyuoma, ŋɩɩ tɩtɩa nɛ Amɔrɩ tɩŋŋaa, Pɛrɛs tɩŋŋaa, Kɛnaŋ tɩŋŋaa, Hiti tɩŋŋaa, Gɩgasɩ tɩŋŋaa, Hivi tɩŋŋaa, arɩ Jebus tɩŋŋaa ma fa ŋaa, ama mɩ jomba a hɛ ma nɩsɩŋ lɛ nɛ. 12 Ma fa sɩɩ mʋ, mɩ joŋ fawʋllʋŋ kɩŋkɛŋ hɛ ba lɛ nɛ a kiriba ta ma sɩpaaŋ a pɛ Amɔrɩ tɩŋŋaa kuorie-la balɩa lɛ. Ma tokobiee arɩ ma tosuŋ dee ma kaa ŋaa ŋɩɩ. 13 Mɩ pɩma tintee-la ma sɩ bɩ hɛɛŋ na ʋ lɛ nɛ, arɩ tasɩ-la ma sɩ dee bɩ saa, ma hɔŋ ba lɛ a didii girep nɛnɛɛ arɩ olif nʋʋŋ ma dee sɩ bɩ chɔnsɔ.’ 14 Maa fá La TƖƖNA a tutou arɩ ma wʋtɩtɩɩ. Má paa vesi-la ma naabalɩmaba fa sɩɩ kpaarʋ Yufireti fuo-la cholo arɩ Ijipiti lɛ a yuo ta, aŋ tɩma pɩpɩ La TƖƖNA. 15 Dɩ ma tʋɔŋ nɛ bɩ tɔrɔ ma sɩ́ jaŋ to La TƖƖNA, ŋɩɩ-na jɩnɩŋ má bagɩsa lɩɩsɛ kʋ-la ma sɩ jaŋ to: Dɩ ma naabalɩmaba fa sɩɩ kpaarɛ vesi-la Yufireti fuo-la cholo nɛɛ, koo dɩ vesi-la Amɔrɩ tɩmma-la tinteeŋ lɛ ma sɩ hɔnɔ sɩɩ kpaarʋ nɛ. Ama mɩ-na arɩ mɩ dɩa nɩaa kala jaŋ to La TƖƖNA.” 16 Ŋɩɩ nɛ nɩalɩŋ bʋl, “La bɩ jaŋ kɔ dɩ la leŋ La TƖƖNA aŋ to vesiŋ da. 17 La TƖƖNA Wɩa tɩtɩa nɛ kɛŋ la arɩ la naabalɩmaba lɩɩ Ijipiti tinteeŋ lɛ, tintee-la lɛ la fa sɩ hɛ a ŋaa yosi. Ʋ ŋaa wʋmagɩlaa la sɩɩŋ lɛ nɛ, a pɔla wombii-la kala lɛ la sɩ vɛnɛ arɩ tinteye-la tʋɔŋ la sɩ to lɩɩ. 18 La TƖƖNA nɛ kiri tinteye-la kala fa sɩ hɛ la sɩpaaŋ a ta, a pɛ Amɔrɩ tɩmma-la lɛ, nɩalɩŋ fa sɩ hɛ tintee-la lɛ. Ŋɩɩ wɩaa la ma jaŋ to La TƖƖNA, bɛɛ wɩaa ʋ nɛ la Wɩa.” 19 Josua bɩra bʋla pɩ nɩalɩŋ, “Má bɩ jaŋ wuo to La TƖƖNA, ʋ bɩ mɔlɩɩ ŋaa, bɛɛ wɩaa Wɩa bɩ disiniŋ kɛnɛ, ʋ bɩ hadɔrʋŋ ka chɛ. Ʋ bɩ jaŋ joŋ ma wʋbɔŋŋɔɔ chɛma dɩ ma nɛ vɩa ʋ niiŋ. 20 Dɩ ma nɛ vɩa La TƖƖNA aŋ to vesiŋ, ʋ jaŋ mɩɩra joŋ wʋlɔrʋnʋŋ a ŋaa ma lɛ dɩ ma kala sʋʋ a dɛrɛ, arɩ ʋ sɩ ŋaa wʋzɔŋŋɔɔ a pɩma ma kala.” 21 Ŋɩɩ nɛ nɩalɩŋ bʋla pɩ Josua, “Aɩ, la jaŋ to La TƖƖNA.” 22 Ŋɩɩ nɛ Josua bʋl, “Ma sɛyɛ arɩ ma lɩɩsɛ La TƖƖNA nɛ dɩ ma tutou?” Ŋɩɩ nɛ ba bʋl, “Oo, la sɛyɛ nɛ.” 23 Ŋɩɩ nɛ Josua bɩra bʋl, “Ŋɩɩ-na lɛɛlɛ, má paa vʋɩya-la kala sɩ hɛ ma teeŋ a yuo ta, aŋ joŋ ma tʋɔŋ pɩ La TƖƖNA sɩ ŋaa Iziral tɩŋŋaa Wɩa.” 24 Nɩalɩŋ bʋla pɩ Josua, “La jaŋ to La TƖƖNA Wɩa niiŋ a to ʋ dʋndʋŋa.” 25 Tapʋlɩɩ-la Josua fa sɩ leŋe Iziral tɩŋŋaa hɛ nii-la ba dɩ Wɩa pɛgɛ Sɛkɛm lɛ ŋɩɩ, ʋ joŋ wombie-la arɩ wɩalɩŋ ba sɩ jaŋ tuto a dagɛba. 26 Josua fa ŋmʋnsɛ wɩalɩŋ a hɛ Wɩa wombiiŋ teniŋ lɛ nɛ. Ŋɩɩ nɛ aŋ ka ʋ joŋ tabɩɩ-jalɩɩ kʋbala a pɛ piine kʋbala bʋbʋɔŋ ʋ chɩŋ. Tɩa-la kpagɛ lee-la La TƖƖNA sɩ yie kɔ Iziral tɩŋŋaa teeŋ nɛ. 27 Josua bɩra bʋla pɩ nɩalɩŋ kala, “Má bee na, tabɩɩŋ deeŋ nɛ ŋaa la magɩlɩŋ. Ʋ nɩɩ wɩalɩŋ kala La TƖƖNA sɩ bʋla pɩla nɛ. Ʋ nɛ jaŋ ŋaa ma magɩlɩŋ dɩ ma nɛ bɩ wʋtɩtɩɩ kɛnɛ ma Wɩa teeŋ.” 28 Ŋɩɩ nɛ Josua ta nɩalɩŋ ba viiri, ba kʋŋkala mʋ taŋ-la ʋ sɩ lɩa. Ba hugi Josua tintee-la La TƖƖNA sɩ hɛ niiŋ a joŋo pɩba lɛ 29 Wɩaa deemba kala harɩŋ lɛ nɛ Nuŋ nanʋala Josua, La TƖƖNA tɩntɩnnʋ-la sʋʋ, dɩ ʋ fa ŋaa jɩsɩŋ zɔlɔ arɩ fii. 30 Ba joŋu hugi ʋ tɩtɩa sɩ tɩɩ tintee-la Tɩmɩnaf Sɛra lɛ, a hɛ Efirem tintee-la peelee sɩ yʋga a hɛ peel-la ba sɩɩ yɩrɛ Gaas wɩɩpɔsʋŋ nagʋa dɩɩrɩŋ. 31 Josua mɩɩsɩŋ kala lɛ, Iziral tɩŋŋaa fa to La TƖƖNA nɛ woruŋ. Ʋ sʋʋŋ harɩŋ ma, nɩhɩasɩ-la kala sɩ hɛ ba mɩɩsɩŋ lɛ a na wɩalɩŋ La TƖƖNA sɩ ŋaa pɩ Iziral tɩŋŋaa, ba mɩɩsɩŋ kala lɛ Iziral tɩŋŋaa fa ha to Wɩa nɛ. 32 Josɛf haŋgbele-la Iziral tɩŋŋaa sɩ paa a lɩɩ Ijipiti tinteeŋ kɔ, ba fa joŋo hugi Sɛkɛm lɛ nɛ, tintee-la Jekɔb sɩ yɔbɔ Hamɔ biiriŋ teeŋ, warɩpʋla zɔlɔ. Hamɔ nɛ suomo bil Sɛkɛm gentine. Tintee-la ŋaa Josɛf doho nɩaa kʋŋ nɛ. 33 Arɔŋ nanʋala Elieza ma sʋʋ ba joŋu hugi Gɩbɩa lɛ, tintee-la ba sɩ joŋo pɩ ʋ nanʋala Finihas, ʋ hɛ Efirem tintee-la peelee sɩ yʋga lɛ nɛ. |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.