JOSUA 23 - WƖA TENIŊWɩalɩŋ Josua sɩ bʋla ta Iziral sɩpaalaaraa 1 Wɩaa deemba kala sɩ ŋaa bal harɩŋ, La TƖƖNA laa Iziral tɩŋŋaa ta ba dʋndɔmɔ-la sɩ golliba nɩsɩŋ lɛ ba wiesi. Bʋa-la lɛ dɩ Josua fa hɩɛsa nɛ woruŋ. 2 Ŋɩɩ nɛ ʋ yɩrɛ Iziral tɩŋŋaa nɩhɩasɩŋ, ba sɩpaalaaraa, ba sarɩya diiree arɩ ba tɩntɩnnɩ-hɩasɩŋ a hilimi a bʋla pɩba: “Mɩ hɩɛsa nɛ woruŋ lɛɛlɛ. 3 Ma tɩtɩa saa na wɩalɩŋ kala La TƖƖNA ma Wɩa sɩ ŋaa tinteye-la lɛ nɛ, a tɩŋ ma wɩaa. Ma Tɩɩna Wɩa nɛ yuoba a pɩma. 4 Má liise yi ŋɩɩ mɩ sɩ kɛŋ tinteye-la la ha sɩ bɩ yuo dii arɩ tinteye-la la sɩ yuo dii tinteeŋ kpaa pɩ ma doho doho-la a chɩŋ Jɔdaŋ fuo-la wɩɩpɔsʋŋ dɩɩrɩŋ a kaa mʋ Mediterenia mʋgʋ-bal-la sɩ hɛ wɩɩjʋʋlʋŋ dɩɩrɩŋ. 5 Ma Tɩɩna Wɩa nɛ jaŋ kiriba ta ma wombiiŋ lɛ. Ʋ jaŋ yigiba ta ma sɩpaaŋ, ka dɩ ma laa ba tintee-la dɩ ʋ ŋaa ma kʋŋ arɩ ma TƖƖNA Wɩa fa sɩ hɛ niiŋ ŋɩɩ a pɩma. 6 Má chɩŋ kpaŋkpaŋ, a fɩɛlɛ ma sɩaa a to wombie-la kala Mosis sɩ ŋmʋnsa bil teniŋ tʋɔŋ, a sɩ́ begile mʋ nadiiŋ koo nagʋa. 7 Má sɩ́ ma tɩtɩa kaa mɛrɛ tinteye-la nɩaa ha sɩ hɛ ma tʋɔŋ. Má sɩ́ ba vesiŋ ma yɩrɩŋ yɩrʋ koo a ŋmɩɛsɛba. Má pɔ ma sɩ́ ba kpaarʋ koo a kpirimi ba sɩpaaŋ. 8 Ʋ maga dɩ ma mɛrɛ ma TƖƖNA Wɩa lɛ nɛ, arɩ ma sɩ ŋaa ŋɩɩ a kaa kɔ arɩ jɩnɩŋ. 9 La TƖƖNA kiri tintee-balaa sɩ kɛŋ doluŋ nɛ ma sɩpaaŋ. A kaa kɔ arɩ jɩnɩŋ nʋʋkala ha bɩ ma sɩpaaŋ wuo chɩŋ. 10 Ma nɩbala jaŋ wuo kiri nɩaa bʋɩ, bɛɛ wɩaa ma TƖƖNA Wɩa nɛ jaŋ yuo pɩma arɩ ʋ fa sɩ bʋl ŋɩɩ. 11 Ŋɩɩ wɩaa má fɩɛlɛ ma sɩaa a cho ma TƖƖNA Wɩa. 12 Ama dɩ ma nɛ mɩɩra joŋ ma tɩtɩa a hɛ tinteye-la nɩaa sɩ hɛ ma tʋɔŋ wɩaa lɛ, a jɩjaa dɔŋɔ ba toloo a mɛrɛ ba lɛ, 13 ma jɩŋ woruŋ arɩ ma TƖƖNA Wɩa bɩra bɩ jaŋ kiri tinteye-la nɩaa sɩ hɛ ma sɩpaaŋ ta. Ba jaŋ nagɛ bɛrɛ ma lɛ, koo a nagɛ chɩba a vɩvɩɩrɛ ma harɩŋ lɛ, a nagɛ sɔɔŋ ma sɩaa lɛ deeŋ deeŋ dɩ ma kʋŋkala sʋʋ tintee-zɔŋ-la ma TƖƖNA Wɩa sɩ joŋo pɩma lɛ. 14 Lɛɛlɛ, bʋa-la mɩ sɩ jaŋ sʋʋ yie nɛ. Ma kʋŋkala jɩma ma tʋɔŋ lɛ arɩ wʋzɔmɔ-la kala, Ma TƖƖNA Wɩa fa sɩ hɛ niiŋ arɩ ʋ jaŋ ŋaa pɩma, ba kala nɛ ʋ ŋaa. Ʋ bɩ ba kʋŋkala kere ta. 15 Má jɩŋ arɩ wʋzɔmɔ-la ma TƖƖNA Wɩa fa sɩ hɛ niiŋ arɩ ʋ jaŋ ŋaa pɩ ma kala sɩ kʋ ŋaa wʋtɩtɩɩ ŋɩɩ, ŋɩɩ tɩtɩa nɛ ʋ jaŋ joŋ wʋlɔrʋnʋ-la ʋ sɩ sɩ ʋ jaŋ joŋo ŋaa ma lɛ, a ŋaa ŋɩɩ deeŋ deeŋ a lɩɩsɛma tintee-zɔŋ-la ʋ sɩ joŋo pɩma lɛ. 16 Dɩ ma nɛ vɩa dɩ ma to nii-la sɩ hɛ ma dɩ ma TƖƖNA Wɩa pɛgɛ, kʋ-la ʋ sɩ dagɛma, aŋ kpʋkpaarɛ vesiŋ a kpikpirimi ba sɩpaaŋ, La TƖƖNA jaŋ na baanɩŋ ma nyuŋ a leŋ dɩ ma kala guu nyɩɩgɛ tintee-zɔŋ-la ʋ sɩ joŋo pɩma lɛ.” |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.