JOSUA 22 - WƖA TENIŊ

Iziral tɩŋŋaa doho doho-la sɩ lɩɩ Jɔdaŋ fuo-la wɩɩpɔsʋŋ dɩɩrɩŋ a mɩɩra mʋ ba tinteeŋ

¹ Ŋɩɩ nɛ Josua yɩrɛ Rubiŋ doho nɩaa arɩ Gad doho nɩaa arɩ Manasɛ doho nɩaa kpaa magɛ dɔŋɔ-la a kʋ hilimi,

² a bʋla pɩba, “Ma ŋaa wɩalɩŋ kala La TƖƖNA tɩntɩnna Mosis fa sɩ daga nɛ, a sɛɩ wɩɩ na-kala mɩ ma sɩ daga.

³ Faafaa kala a kaa kɔ jɩnɩŋ ma bɩ ma naambiiriŋ vɩa ta, ma chaasa tɩŋ tɩntɩmɩɩ-la kala ma TƖƖNA Wɩa sɩ joŋo pɩma nɛ.

⁴ Lɛɛlɛ, ma TƖƖNA Wɩa pɩ ma naambiiriŋ dɩ-hɔnɔ wiesiŋ nɛ arɩ ʋ fa sɩ hɛ niiŋ ŋɩɩ. Má mɩɩra mʋ ma dɩɩsɩŋ tintee-la lɛ La TƖƖNA tɩntɩnna Mosis sɩ joŋo pɩma Jɔdaŋ fuo-la wɩɩpɔsʋŋ sɛmɛ dɔŋɔ.

⁵ Má ta fɩɛlɛ ma sɩaa a to niiri-la arɩ wombie-la La TƖƖNA tɩntɩnna Mosis sɩ joŋo pɩma. Má cho ma TƖƖNA Wɩa, a tuto ʋ wombiee kala, arɩ niiri-la ʋ sɩ daga, a mɛrɛ ʋ lɛ a tɩma pʋpʋ arɩ ma tʋɔŋ arɩ ma wɩɩ-wɩɩkala.”

⁶ Ŋɩɩ nɛ Josua sʋl Wɩa pɩba, aŋ taba ba mʋ ba dɩɩsɩŋ.

⁷ (Manasɛ doho nɩaa kpaa magɛ dɔŋɔ-la, Mosis fa pɩba tinteeŋ Basaŋ lɛ nɛ. Ka doho-la kpaa magɛ dɔŋɔ kʋkaana-la ma Josua fa joŋ Jɔdaŋ fuo-la sɛmɛ wɩɩjʋʋlʋŋ dɩɩrɩŋ tinteeŋ nɛ a pɩba ba naambiiriŋ tʋɔŋ.) Bʋa-la lɛ Josua sɩɩ ta doho doho-la balɩa arɩ kpaa magɛ dɔŋɔ dɩ ba mʋ dɩa, ʋ sʋl Wɩa ŋ-la nɛ a pɩba:

⁸ Ʋ sɩ, “Má mɩɩra mʋ ma dɩɩsɩŋ arɩ ma dʋa daŋ-la: Nɛsɩŋ, piesee, warɩpʋla, sɛlɩmɛ, kɔlɩɩŋ, hɔɔŋ arɩ gɛnnɩŋ, a kɛŋ kɩaa deemba ma sɩ yuo laa ma dʋndɔŋŋɔɔ teeŋ a kpaa pɩ ma naambiiriŋ.”

⁹ Rubiŋ doho nɩaa arɩ Gad doho nɩaa arɩ Manasɛ doho nɩaa kpaa magɛ dɔŋɔ-la fa leŋ Iziral tɩŋŋaa Sɩlɔ lɛ Kɛnaŋ tinteeŋ aŋ mɩɩra mʋ Gɩlɩad, ba tinteeŋ, kʋ-la ba sɩ laa arɩ La TƖƖNA sɩ to Mosis lɛ a dagɛ.

¹⁰ Bʋa-la lɛ Rubiŋ doho nɩaa, Gad doho nɩaa arɩ Manasɛ doho nɩaa kpaa magɛ dɔŋɔ-la sɩ kɔ Gɛlɩlɔf sɩ hɛ Kɛnaŋ tinteeŋ lɛ a kpagɛ Jɔdaŋ fuo-la niiŋ wɩɩjʋʋlʋŋ dɩɩrɩŋ, ba saa Wɩɩsʋlʋŋ koru-bal kʋbala nɩmɛ fuo-la sɛmɛ.

¹¹ Iziral tɩmma-la dɔnsʋŋ sɩ nɩa arɩ ba saa Wɩɩsʋllɩ koruŋ nɛ Gɛlɩlɔf sɩ hɛ Kɛnaŋ lɛ a kpagɛ Jɔdaŋ fuo-la sɛmɛ Iziral tɩŋŋaa sɩ hɛ,

¹² ba kala sii hɛ dɔŋɔ lɛ Sɩlɔ lɛ dɩ ba mʋ yuoba.

¹³ Ŋɩɩ nɛ Iziral tɩŋŋaa tɩŋ Elieza sɩ ŋaa Wɩɩsʋllɩ sɩpaalaara nanʋala Finihas dɩ ʋ mʋ Gɩlɩad tinteeŋ, Rubiŋ doho nɩaa arɩ Gad doho nɩaa arɩ Manasɛ doho nɩaa kpaa magɛ dɔŋɔ-la teeŋ.

¹⁴ Ʋ sɩɩ mʋ, ba lɩɩsɛ sɩpaalaaraa fii nɛ Iziral tɩŋŋaa tʋɔŋ, doho kala dɩa nɩhɩaŋ, ba to ʋ harɩŋ.

¹⁵ Ba kɔ Gɩlɩad tinteeŋ, Rubiŋ doho nɩaa, Gad doho nɩaa arɩ Manasɛ doho nɩaa kpaa magɛ dɔŋɔ-la teeŋ, a bʋla pɩba:

¹⁶ “La TƖƖNA nɩaa kala sɩ: Bɛɛ nɛ tɩɩ ma bɩra bɩ Iziral Wɩa laa dii? Bɛɛ nɛ tɩɩ ma mɩɩrɛ La TƖƖNA harɩŋ a saa Wɩɩsʋllɩ koruŋ pɩ ma tɩtɩa aŋ vɩaʋ?

¹⁷ Wʋbɔŋ-la la sɩ ŋaa Pio lɛ bɩ magaa? Wʋlɔrʋnʋŋ magɩla ŋaa La TƖƖNA nɩaa ma lɛ nɛ, ama, a chɩŋ tapʋlɩɩ-la a kaa kɔ jɩnɩŋ laa na hɛɛŋ nɛ.

¹⁸ Lɛɛlɛ ma joŋ ma harɩŋ a yɩyɩa La TƖƖNA nɛ koo? Dɩ ma nɛ vɩa La TƖƖNA jɩnɩŋ, chie ʋ jaŋ na baanɩŋ Iziral tɩŋŋaa kala nyuŋ.

¹⁹ Dɩ ma tinteeŋ nɛ kɛŋ disiniŋ, má kɔ La TƖƖNA tinteeŋ, lee-la ʋ lɛbɩ-la lɛ ʋ sɩ yie kɔ Iziral tɩŋŋaa teeŋ sɩ hɛ, a kʋ pɛ hɔŋ la tinteeŋ lɛ. Ama má sɩ́ La TƖƖNA koo la-na vɩa aŋ saa koruŋ pɩ ma tɩtɩa a pɛ La TƖƖNA Wɩa Wɩɩsʋllɩ koruŋ lɛ.

²⁰ Bʋa-la lɛ Ekaŋ, Zɛra nanʋala sɩ bɩ La TƖƖNA niiŋ to aŋ paa kɩalɩŋ ʋ sɩ sɩ ba chei, La TƖƖNA fa tɩŋ ŋɩɩ wɩaa a dɔgɩsɛ Iziral tɩŋŋaa kala nɛ. Ekaŋ dʋndʋŋa dee fa bɩ sʋba a tɩŋ wʋbɔŋ-la ʋ sɩ ŋaa wɩaa.”

²¹ Ŋɩɩ nɛ Rubiŋ doho nɩaa, Gad doho nɩaa arɩ Manasɛ doho nɩaa kpaa magɛ dɔŋɔ-la ma bʋla pɩ Iziral doho doho-la nɩhɩasɩ-la:

²² “Wɩa nɛ ŋaa doluŋ kala Tɩɩna, ʋ nɛ kɛŋ doluŋ, ʋ-na jɩŋ wɩɩ-la sɩ tɩɩ la ŋaa ŋɩɩ nɛ, la saa chɛ dɩ ma ma jɩŋ nɛ. Dɩ la nɛ vɩa La TƖƖNA niiŋ, ŋɩɩ-na ʋ sɩ́ leŋe dɩ la kɛŋ mɩɩsɩŋ.

²³ Dɩ la vɩa La TƖƖNA niiŋ nɛ aŋ saa Wɩɩsʋllɩ koruŋ pɩ la tɩtɩa, a ŋɩŋaa kʋnyɩgaa Wɩɩsʋlʋŋ arɩ mɩaa Wɩɩsʋlʋŋ koo a kpʋ pʋsʋŋ a ŋɩŋaa nii-magɛ dɔŋɔ Wɩɩsʋlʋŋ, leŋ dɩ La TƖƖNA tɩtɩa dɔgɩsɛla a tɩŋ ŋɩɩ wɩaa.

²⁴ Fawʋllʋŋ nɛ kɛnla la ŋaa wɩɩŋ deeŋ, la bɩɩna maachie ma doho nɩaa jaŋ bʋla pɩ la doho nɩaa, ‘Ma bɩ La TƖƖNA Iziral tɩŋŋaa Wɩa nɩaa ŋaa.

²⁵ La TƖƖNA leŋe Jɔdaŋ fuo-la sɩ hɛ la dɩ ma pɛgɛ nɛ ŋaa la dɩ ma-na Rubiŋ doho nɩaa arɩ Gad doho nɩaa bʋa. Ma bɩ kpaal kala kɛnɛ La TƖƖNA teeŋ.’ Ma doho nɩaa jaŋ ŋaa ŋɩɩ, a leŋ dɩ la doho nɩaa sɩ́ La TƖƖNA fá.

²⁶ Wɩɩ-la sɩ tɩɩ la saa Wɩɩsʋllɩ koruŋ nɛ ŋɩɩ, ʋ bɩ naga kʋnyɩgaa Wɩɩsʋlʋŋ koo la sɩ jaŋ kpʋ pʋsʋŋ a ŋaa Wɩɩsʋlʋŋ wɩaa nɛ,

²⁷ ama laa chɛ dɩ koru-la ŋaa magɩl nɛ a pɩŋ la dɩ ma arɩ nɩalɩŋ sɩ jaŋ to harɩŋ kɔ pɛgɛ, arɩ la dɩ ma kala ka dɛnnɛ La TƖƖNA nɛ lɛbɩ-la lɛ ʋ sɩ yie kɔ Iziral tɩŋŋaa teeŋ, a sʋsʋl la kʋnyɩgaa Wɩɩsʋlʋŋ, a kpʋ pʋsʋŋ a sʋsʋl Wɩɩsʋlʋŋ aŋ pɛ ŋɩŋaa nii-magɛ dɔŋɔ Wɩɩsʋlʋŋ nɩmɛ. La ŋaa ŋɩɩ dɩ ma doho nɩaa maachie sɩ́ bʋla pɩ la doho nɩaa, arɩ la-na bɩ kpaal kala kɛnɛ La TƖƖNA teeŋ.

²⁸ La tʋɔŋ lɛ, dɩ ba nɛ paala bʋl ŋɩɩ la lɛ koo dɩ la doho nɩaa lɛ nɛ, la ma jaŋ wuo bʋl: ‘Má bee na La TƖƖNA koru-la dɔŋɔ tɩtɩa nɛ chɩŋ ŋɩɩ, la naabalɩmaba nɛ saa, ba bɩ ba saa kʋnyɩgaa Wɩɩsʋlʋŋ wɩaa koo dɩ ba kpʋ pʋsʋŋ a sʋsʋl Wɩɩsʋlʋŋ, ama ʋ ŋaa magɩl nɛ la dɩ ma pɛgɛ.’

²⁹ La bɩ jaŋ kɔ dɩ la vɩa La TƖƖNA a joŋ harɩŋ yɩaʋ, a saa Wɩɩsʋllɩ koruŋ a ŋɩŋaa kʋnyɩgaa Wɩɩsʋlʋŋ, mɩaa Wɩɩsʋlʋŋ, koo a kpʋ pʋsʋŋ a ŋaa Wɩɩsʋlʋŋ ʋ lɛ, see La TƖƖNA Wɩa koru-la sɩ chɩŋ ʋ sɩpaaŋ ʋ dɩ-zɔŋ-la lɛ.”

³⁰ Finihas, Wɩɩsʋllɩ sɩpaalaarʋ-la arɩ Iziral tɩŋŋaa sɩpaalaara-la sɩ ŋaa ba dɩa dɩa nɩhɩasɩŋ sɩ nɩɩ wɩalɩŋ Rubiŋ arɩ Gad arɩ Manasɛ doho nɩaa sɩ bʋla, ba tʋɔŋ tɔrɛ.

³¹ Ŋɩɩ nɛ Elieza nanʋala Finihas sɩ ŋaa Wɩɩsʋllɩ sɩpaalaara bʋla pɩ Rubiŋ, Gad arɩ Manasɛ doho nɩalɩŋ, “Jɩnɩŋ la jɩma arɩ La TƖƖNA hɛ la teeŋ nɛ, bɛɛ wɩaa ma bɩ wɩɩkala ŋaa a chei La TƖƖNA. Lɛɛlɛ ma laa Iziral tɩŋŋaa ta nɛ La TƖƖNA nɩsɩŋ lɛ.”

³² Ŋɩɩ nɛ Elieza nanʋala Finihas, Wɩɩsʋllɩ sɩpaalaarʋ-la arɩ sɩpaalaara-la sɩ mʋ Rubiŋ doho nɩaa arɩ Gad doho nɩaa sɩ hɛ Gɩlɩad lɛ ba kɛŋ vʋʋra-la, ba mɩɩra mʋ Kɛnaŋ a hɛ duoso pɩ Iziral tɩŋŋaa.

³³ Ba sɩ nɩɩ wɩalɩŋ, ba tʋɔŋ kala tɔrɛ, ba dɛnnɛ Wɩa. Ba bɩra bɩ wɩɩ bʋla a mʋ tɩgɛ ba fa sɩ sɩ ba jaŋ mʋ a yuo Rubiŋ doho nɩaa arɩ Gad doho nɩaa aŋ chei tintee-la lɛ ba sɩ hɔnɔ.

³⁴ Ŋɩɩ nɛ Rubiŋ doho nɩaa arɩ Gad doho nɩaa hɛ koru-la yɩrɩŋ: Magɩl-la sɩ hɛ la dɩ ma pɛgɛ a dagɛ arɩ La TƖƖNA nɛ ŋaa Wɩa.