JOSUA 2 - WƖA TENIŊ

Nɩalɩŋ Josua sɩ tɩma dɩ ba mʋ lʋara beŋ taŋ-la ba sɩɩ yɩrɛ Jeriko

¹ Ŋɩɩ nɛ Josua tɩŋ baalaa balɩa ba lɩɩ lee kʋbala baa yɩrɛ Sɩtɩm, dɩ ba mʋ lʋara beŋ Kɛnaŋ tinteeŋ a na ŋɩɩ ʋ sɩ naga, a wasa nyaŋ taŋ-la ba sɩɩ yɩrɛ Jeriko. Ŋɩɩ nɛ nɩalɩŋ mʋ, a jʋʋ chʋa hachɔrʋŋ kʋbala ba sɩɩ yɩrɛ Rahab dɩa lɛ.

² Jeriko kuoro nɩɩ arɩ Iziral tɩŋŋaa dɔnsʋŋ nɛ kɔ ba tinteeŋ tɩtaŋɩŋ dɩ ba lʋara bee na wɩɩ-la ba sɩ kaa hɔŋ ba tinteeŋ lɛ.

³ Ŋɩɩ nɛ ʋ tɩŋ tɩndaarɩŋ pɩ Rahab a bʋl, “Kɛŋ baala-la sɩ hɛ ŋ dɩa lɛ kaa kʋ lɩɩ, bɛɛ wɩaa ba kɔ dɩ ba beŋ a na wɩɩ-la la sɩ kaa hɔŋ la tinteeŋ kala lɛ nɛ.”

⁴ Ama kuoru-la ka bʋl ŋɩɩ, dɩ haal-la kɛŋ baala-la balɩa a faa aŋ tɩŋ dɩ ba mʋ bʋla pɩ kuoru-la, “Wʋtɩtɩɩ baalaa balɩa fa kɔ mɩ teeŋ nɛ, ama mɩ bɩ jɩŋ lee-la ba sɩ lɩa.

⁵ Ba viire nɛ, ka ba-na tɔ la taŋ boi-baalɩŋ wɩɩ-mul-jʋʋlʋŋ. Mɩ bɩ jɩŋ wombii-la ba sɩ to. Ma jaŋ wuo kiri ba libe, ŋ bɩ pɔ ma jaŋ puuba.”

⁶ (Ama ʋ fa kɛŋ nɩalɩŋ jɩla faa lusuŋ nyuŋ dɩa lɛ nɛ sekelee bʋbʋɔŋ.)

⁷ Ŋɩɩ nɛ kuoru-la nɩaa lɩɩ a kiri Iziral tɩmma-la balɩa sɩ mʋa dɩ ba lʋara beŋ ba tinteeŋ harɩŋ, ka ba kɛŋ ba taŋ-la boi-baalɩŋ tɔ. Ba kiri ba harɩŋ a mʋ yi wombii-la sɩɩ chol Jɔdaŋ fuo-la nɛ.

⁸ Ka dɩ baala-la-na pɩŋ doŋ tɩtaŋɩŋ, Rahab sii jɩl ba teeŋ lusu-la nyuŋ,

⁹ a bʋla pɩba, “Mɩ jɩma arɩ La TƖƖNA joŋ tinteeŋ deeŋ a pɩma nɛ, ma wɩaa paala leŋ fawʋllʋŋ chaasa jʋʋla nɛ. Nʋʋkala sɩ hɛ tinteeŋ deeŋ lɛ kpaŋa nɛ a tɩŋ ma wɩaa.

¹⁰ La nɩɩ ŋɩɩ La TƖƖNA sɩ leŋe Mʋgʋ-fɩaŋ lɩɩŋ hʋ nɛ bʋa-la lɛ ma fa sɩ lɩɩ Ijipiti tinteeŋ, arɩ ŋɩɩ ma sɩ kpʋ Amɔrɩ tɩŋŋaa sɩ hɛ Jɔdaŋ fuo-la wɩɩpɔsʋŋ dɩɩrɩŋ kuoroo balɩa-la ba sɩɩ yɩrɛ Sɩhɔŋ arɩ Ɔgɩ.

¹¹ La sɩ nɩɩ wɩalɩŋ fawʋllʋŋ jʋʋla nɛ, nʋʋkala nandaasɩŋ yʋɔrɛ a tɩŋ ma wɩaa. Ma TƖƖNA Wɩa nɛ tɩɩ tinteeŋ arɩ wɩa-nyuŋ kala.

¹² Lɛɛlɛ má hɛ niiŋ a pɩmɛ La TƖƖNA yɩrɩŋ lɛ, arɩ ma jaŋ ŋaa mɩ dɩ mɩ dɩa nɩaa woruŋ a nagɛ mɩ sɩ ŋaa woruŋ ma lɛ ŋɩɩ. Má pɩmɛ nii-la magɩlɩŋ

¹³ sɩ jaŋ dagɛ arɩ ma jaŋ laa mɩ nyɩmma, mɩ naaŋ, mɩ naambiiriŋ arɩ ba dɩa nɩaa kala ta, ma bɩ jaŋ kpʋla.”

¹⁴ Ŋɩɩ nɛ baala-la bʋl, “A leŋ dɩ Wɩa kpʋla dɩ la nɛ chei nii-la sɩ hɛ la pɛgɛ. Dɩ ŋ nɛ bɩ wɩɩ-la la sɩ kɔ dɩ la ŋaa daha bʋla pɩ nɩaa, la jaŋ kɛnɩŋ woruŋ arɩ wʋtɩtɩɩ bʋa-la lɛ La TƖƖNA sɩ jaŋ joŋ tinteeŋ deeŋ a hɛ la nɩsɩŋ lɛ.”

¹⁵ Haal-la dɩa mɛrɛ jebii-la ba sɩ saa golli ba taŋ nɛ, ŋɩɩ nɛ ʋ joŋ ŋmɛnɩŋ a ta ʋ to tokoro lɩɩ ba to ŋmɛŋ-la lɛ a lɩɩ.

¹⁶ Ʋ fa bʋla pɩba, “Má to peelee tʋɔŋ mʋ dɩ nɩalɩŋ sɩɩ kiri ma libe sɩ́ ma na. Má mʋ faa nɩmɛ tapʋlaa batori, dɩ nɩalɩŋ sɩɩ chɛma mɩɩra kɔ dɩa, ka dɩ ma-na lɩɩ joŋ ma wombiiŋ a viiri.”

¹⁷ Baala-la ma fa bʋla pʋ, “Niiŋ deeŋ ŋ sɩ leŋe la hɛ a pɩŋ, la bɩ jaŋ gire ta.

¹⁸ Wɩɩ-la sɩ maga dɩ ŋ ŋaa nɛ: Dɩ la nɛ kʋ jʋʋ tinteeŋ deeŋ, joŋ ŋmɛŋ-fɩaŋ a vɔɔ tokoro-la lɛ ŋ sɩ jaŋ leŋ dɩ la to a lɩɩ. Leŋ dɩ ŋ nyɩmma arɩ ŋ naaŋ arɩ ŋ naambiiriŋ arɩ ŋ dɩa nɩaa kala hɛ ŋ dɩa tʋɔŋ.

¹⁹ Dɩ ba kʋŋkala nɛ lɩɩ dɩ-jalɩŋ dɩ wɩɩ ŋaaʋ, ʋ tɩtɩa nɛ chɛ ʋ sʋʋŋ. La wɩɩ dee. Dɩ ŋ dɩ nɩalɩŋ sɩ hɛ ŋ dɩa tʋɔŋ kʋŋ lɛ nɛ la ŋaa wɩɩ, la ma nɛ jaŋ laa cheeriŋ.

²⁰ Ama dɩ ŋ nɛ joŋ la bʋbʋɔŋ ta dɩ nɩaa jɩŋ wɩɩ-la la sɩ kɔ daha dɩ la ŋaa, nii-la sɩ hɛ la pɛgɛ bɩra bɩ tɩŋ.”

²¹ Haal-la bʋl, “Mɩ sɛyɛ nɛ, mɩ jaŋ ŋaa ŋɩɩ ma sɩ bʋla.” Ʋ taba ba viiri, ka ʋ joŋ ŋmɛŋ-fɩaŋ a vɔɔ tokoro-la lɛ.

²² Ba sɩ lɩa, ba jʋʋ peelee tʋɔŋ a faa nɩmɛ tapʋlaa batori, ka nɩalɩŋ fa sɩ kiri ba libe joŋ wombiiŋ kala a beŋ a bɩ ba na aŋ mɩɩrɛ.

²³ Ŋɩɩ nɛ baala-la balɩa sɩ mʋa dɩ ba lʋara beŋ tintee-la lɩɩ peele-la tʋɔŋ kʋ tuu a chol fuo-la a mʋ Nuŋ nanʋala Josua teeŋ, a bʋl wɩalɩŋ kala sɩ ŋaa ba lɛ a pʋ.

²⁴ Ba bʋla pɩ Josua, “La TƖƖNA chaasa joŋ tintee-la kala a hɛ la nɩsɩŋ lɛ nɛ. Fawʋllʋŋ chaasa jʋʋ nɩalɩŋ sɩ hɛ tintee-la lɛ nɛ a tɩŋ la wɩaa.”