JOSUA 16 - WƖA TENIŊ

Tinteeŋ kpaal-la Efirem arɩ Manasɛ doho nɩaa sɩ laa

¹ Tintee-la ba fa sɩ joŋo pɩ Josɛf doho nɩaa nɛ: a chɩŋ Jɔdaŋ fuo-la sɩ kpagɛ Jeriko, a kɛŋ Jeriko lɩɩ-bulo-la wɩɩpɔsʋŋ dɩɩrɩŋ, a joŋ ŋɩɩ jɩla to tintee-hɩlɩɩ-la a mʋ peelee sɩ yʋga tintee-la a mʋ yi taŋ-la ba sɩɩ yɩrɛ Bɛtɛl.

² Ʋ bɩra chɩŋ Bɛtɛl lɛ nɛ (ʋ nɛ ha Lus), a kiele mʋ Atarɔf Ada, lee-la Akɩ tɩŋŋaa sɩ hɛ,

³ a bɩra joŋo tuu wɩɩjʋʋlʋŋ Jafɩlɛt tɩmma-la tinteeŋ a kaa mʋ Bɛf Hɔrɔŋ bʋbʋɔŋ dɩɩrɩŋ, a joŋ ŋɩɩ a mʋ yi taŋ-la ba sɩɩ yɩrɛ Gɛza, a mʋ dɛrɛ Mediterenia mʋgʋ-bal-la lɛ.

⁴ Josɛf doho nɩaa, Manasɛ arɩ Efirem sɩ laa tintee-la ʋ ŋaa ba kʋŋ nɛ ŋɩɩ.

⁵ Efirem doho nɩaa nyɩŋ-nɩa nyɩŋ-nɩa fa sɩ laa tinteeŋ nɛ ŋ-la: Ba tinteeŋ bʋa nɛ a chɩŋ Atarɔf Ada wɩɩpɔsʋŋ dɩɩrɩŋ a kaa jɩl Bɛf Hɔrɔŋ sɛmɛ-la sɩ hɛ nyuŋ,

⁶ a joŋ ŋɩɩ a mʋ yi Mediterenia mʋgʋ-bal-la, a bɩra chɩŋ Mɩkɩmɛtaf sɩ hɛ wɩɩpɔsʋŋ nagʋa dɩɩrɩŋ a golibo mʋ wɩɩpɔsʋŋ dɩɩrɩŋ a mʋ to Taanaf Sɩlɔ, a mʋ wɩɩpɔsʋŋ dɩɩrɩŋ a mʋ yi Janʋa.

⁷ Bʋa-la bɩra lɩɩ Janʋa lɛ a tuu Atarɔf arɩ Naara, a mʋ yi Jeriko a to ŋɩɩ lɩɩ a mʋ dɛrɛ Jɔdaŋ fuo-la lɛ.

⁸ A lɩɩ Tapʋa lɛ, bʋa-la mʋ to wɩɩjʋʋlʋŋ dɩɩrɩŋ nɛ a mʋ yi Kana fuo-bie-la a mʋ dɛrɛ Mediterenia mʋga-la lɛ. Tintee-la Efirem doho nɩaa nyɩŋ-nɩa nyɩŋ-nɩa sɩ laa ʋ ŋaa ba kʋŋ bʋa nɛ ŋɩɩ.

⁹ Tabala-la arɩ tabiisi-la ba fa sɩ lɩɩsa Manasɛ tinteeŋ lɛ a pɩ Efirem doho nɩaa ma pɛ nɛ.

¹⁰ Ama ba bɩ Kɛnaŋ tɩmma-la sɩ hɛ Gɛza lɛ kire, a kaa kɔ arɩ jɩnɩŋ kala Kɛnaŋ tɩŋŋaa ha hɛ Efirem nɩaa tʋɔŋ nɛ. Ama ba fʋgɛba hɛ nɛ ba tɩtɩŋ tɩntɩŋŋaa pɩba.