JOSUA 14 - WƖA TENIŊ

Ba kpaa Jɔdaŋ fuo-la wɩɩjʋʋlʋŋ dɩɩrɩŋ tinteeŋ

¹ Kɛnaŋ tintee-la lɛ, leree deemba nɛ ba kaa kpaa a pɩ Iziral tɩŋŋaa ʋ ŋaa ba kɩaa. Elieza sɩ ŋaa Wɩɩsʋllɩ sɩpaalaara arɩ Nuŋ nanʋala Josua arɩ Iziral tɩŋŋaa doho doho-la sɩpaalaaraa nɛ fa kaa kpaa a pɩba.

² La TƖƖNA fa bʋla pɩ Mosis dɩ ba tɔnsɛ nɛ a kɛŋ Jɔdaŋ fuo-la wɩɩjʋʋlʋŋ dɩɩrɩŋ tintee-la a kpaa pɩ Iziral doho doho nibi arɩ kpaa magɛ dɔŋɔ-la.

³ Mosis fa laa sɩpaaŋ joŋ Jɔdaŋ fuo-la wɩɩpɔsʋŋ dɩɩrɩŋ tinteeŋ a pɩ ba doho doho balɩa arɩ kpaa magɛ dɔŋɔ nɛ, ʋ ŋaa ba kʋŋ. Ama ʋ bɩ tintee kala joŋo pɩ Levi doho nɩaa-na, ʋ ŋaa ba kʋŋ.

⁴ Josɛf biiriŋ kʋ ŋaa doho doho balɩa nɛ, ba nɛ Manasɛ arɩ Efirem. Levi doho nɩaa bɩ tintee kala laa ʋ ŋaa ba kʋŋ, tasɩ-la ba sɩ jaŋ jʋjʋʋ dʋndʋŋa nɛ Mosis fa joŋo pɩba arɩ lere-la ba pʋsʋŋ sɩ jaŋ didii.

⁵ Iziral tɩŋŋaa kpaa tintee-la arɩ La TƖƖNA fa sɩ dagɛ Mosis ŋɩɩ nɛ.

Ba joŋ Hɛbʋrɔŋ tinteeŋ pɩ Kalɩb

⁶ Tapʋlɩɩ kʋbala Juda doho nɩaa dɔnsʋŋ sii mʋ Josua teeŋ Gɩlɩgal lɛ. Ŋɩɩ nɛ Jefuni nanʋala Kalɩb, Keni tɩɩna-la pɩɛsɛ Josua, “Ŋ liise yi wɩɩ-la La TƖƖNA sɩ bʋla pɩ ʋ tɩntɩnna Mosis a mʋ tɩgɛ mɩ dɩ ŋ lɛ lee-la ba sɩɩ yɩrɛ Kadɛs Banɩa lɛɛ?

⁷ Mɩ fa ŋaa jɩsɩŋ mahɩŋ balɩa nɛ, ka Mosis La TƖƖNA tɩntɩnnʋ-la tɩmmɛ, mɩ lɩɩ Kadɛs Banɩa lɛ a mʋ lʋara beŋ tintee-la. Ŋɩɩ nɛ mɩ mɩɩra kʋ bʋl wʋtɩtɩɩ-la mɩ sɩ na a pʋ.

⁸ Ama mɩ dɩ mɩ naambiiri-la sɩ mʋa, ba mɩɩra kɔ a joŋ fawʋllʋŋ a hɛ nɩalɩŋ lɛ. Mɩ-na to mɩ Tɩɩna Wɩa arɩ mɩ tʋɔŋ kala nɛ.

⁹ Ŋɩɩ nɛ Mosis hɛ niiŋ a bʋl tapʋlɩɩ-la, arɩ tintee-la mɩ sɩ joŋ mɩ naaŋ a nʋɔsɛ jaŋ ŋaa mɩ dɩ mɩ biiriŋ kʋŋ a kaa mʋ wuu, bɛɛ wɩaa mɩ to mɩ Tɩɩna Wɩa arɩ mɩ tʋɔŋ kala nɛ.

¹⁰ La TƖƖNA fa sɩ bʋl ŋɩɩ a pɩ Mosis, a chɩŋ ŋɩɩ lɛ a kaa kɔ, ʋ ha leŋe mɩ hɛ nɩmɛ jɩsɩŋ mahɩŋ balɩa arɩ banɔŋ nɛ. Bʋa-la lɛ dɩ Iziral tɩŋŋaa ka baarɛ tintee-hɩlɩŋ tʋɔŋ. Lɛɛlɛ, mɩ jɩsɩŋ mahɩŋ banɛsɛ arɩ banɔŋ tʋɔŋ nɛ mɩ hɛ ŋ-la.

¹¹ Mɩ ha dolie nɛ a nagɛ bʋa-la lɛ Mosis fa sɩ tɩmmɛ. Mɩ ha kɛŋ doluŋ a nagɛ mɩ bumbuŋ-la nɛ, mɩ ha jaŋ wuo mʋ laalɩŋ.

¹² Lɛɛlɛ, joŋ tintee-la peelee sɩ yʋga a pɩmɛ arɩ La TƖƖNA fa sɩ bʋl ŋɩɩ pɩmɛ tapʋlɩɩ-la. Ŋ ma tɩtɩa nɩɩ ŋɩɩ Anakɩ tɩŋŋaa nɩwaayiile-la sɩ hɛ lee-la sɩ dolie nɛ. Ba tasɩ-la fa ŋaa tabalaa nɛ, ba saa kɛrɛ a golli ba kala. Ama dɩ La TƖƖNA nɛ pɛ mɩ lɛ, mɩ jaŋ yuo kiriba arɩ ʋ sɩ bʋl ŋɩɩ.”

¹³ Ŋɩɩ nɛ Josua sʋl Wɩa a pɩ Jefuni nanʋala Kalɩb, aŋ joŋ taŋ-la ba sɩɩ yɩrɛ Hɛbʋrɔŋ a pʋ, ʋ ŋaa ʋ kʋŋ.

¹⁴ Hɛbʋrɔŋ ha ŋaa Jefuni nanʋala Kalɩb sɩ ŋaa Keni tɩɩna-la kʋŋ nɛ, arɩ jɩnɩŋ kala, bɛɛ wɩaa ʋ to La TƖƖNA Iziral tɩŋŋaa Wɩa arɩ tʋɔŋ kala nɛ.

¹⁵ (Hɛbʋrɔŋ yɩrɩŋ nɛ fa Kɩrɩaf Aaba. Nɩwaayiile-la ba sɩɩ yɩrɛ Anakɩ baal kʋbala yɩrɩŋ nɛ ʋ fa joŋo hɛ pɩ taŋ-la, ʋ fa ŋaa nɩduo nɛ ba tʋɔŋ.) Ŋɩɩ harɩŋ lɛ nɛ tintee-la wiesi laalɩŋ lɛ.