JOSUA 13 - WƖA TENIŊ

Tintee-la Iziral tɩŋŋaa ha sɩ maga ba yuo laa

¹ Josua fa hɩɛsa nɛ woruŋ, ka La TƖƖNA bʋla pʋ, “Ŋ hɩɛsa ma nɛ, ama tinteeŋ ha yʋga ŋ sɩ maga ŋ yuo a laa.

² Tintee-la ha sɩ ka nɛ ŋ-la: Fɩlɩsɩtɩa tɩŋŋaa arɩ Gesu tɩŋŋaa tinteeŋ kala,

³ a chɩŋ Sɩhɔ fuoŋ sɩ hɛ Ijipiti wɩɩpɔsʋŋ a kɛŋ ŋɩɩ a mʋ yi Ɛkʋrɔŋ tinteeŋ sɩ hɛ wɩɩpɔsʋŋ nagʋa dɩɩrɩŋ, lee-la kala sɩ ŋaa Kɛnaŋ tɩŋŋaa tinteeŋ (Fɩlɩsɩtɩa tɩŋŋaa kuoroo banɔŋ sɩɩ beŋ tintee-la kala. Ba hɔŋ Gaza, Asɩdɔd, Asɩkɛlɔŋ, Gaf arɩ Ɛkʋrɔŋ a kɛŋ Ava tɩŋŋaa tinteeŋ pɛ),

⁴ a bɩra chɩŋ Kɛnaŋ tinteeŋ wɩɩpɔsʋŋ nadiiŋ dɩɩrɩŋ kala, a kaa mʋ yi Ara sɩ hɛ Sidonia tinteeŋ, a joŋ ŋɩɩ a mʋ Afɛk sɩ hɛ Amɔrɩ tɩŋŋaa tinteeŋ bʋa,

⁵ Gɛbal tɩŋŋaa tinteeŋ arɩ Lɛbanɔŋ tinteeŋ kala ŋɩɩ a kaa mʋ wɩɩpɔsʋŋ dɩɩrɩŋ, a chɩŋ Baal Gad sɩ hɛ Hɛmɔŋ peel-la wɩɩpɔsʋŋ nadiiŋ, a mʋʋ yi Lebo Hamaf.

⁶ Nɩalɩŋ kala sɩ hɔŋ peelee nyuŋ, a chɩŋ Lɛbanɔŋ tinteeŋ a kaa mʋ yi Mɩsɩrɛfɔf Meem, ba kala ŋaa Sidonia tɩmma nɛ. Mɩ-na tɩtɩa nɛ jaŋ kiriba ta Iziral tɩŋŋaa sɩpaaŋ. Tinteeŋ deeŋ nɛ, ŋ jaŋ kaa kpaa Iziral tɩŋŋaa arɩ mɩ sɩ dagɩŋ ŋɩɩ, dɩ ʋ ŋaa ba kʋŋ.

⁷ Kɛnʋ a kpaa pɩ Iziral do-kaana-la nibi arɩ Manasɛ doho kpaa magɛ dɔŋɔ-la, dɩ ʋ ŋaa ba kʋŋ.”

Ba kɛŋ Jɔdaŋ fuo-la wɩɩpɔsʋŋ dɩɩrɩŋ tinteeŋ kpaa

⁸ Rubiŋ doho nɩaa, Gad doho nɩaa arɩ Manasɛ doho nɩaa kpaa magɛ dɔŋɔ-la kʋkaanaa, La TƖƖNA tɩntɩnna Mosis fa laa sɩpaaŋ a joŋ Jɔdaŋ fuo-la wɩɩpɔsʋŋ dɩɩrɩŋ tintee-la nɛ pɩba, ʋ ŋaa ba kʋŋ.

⁹ Ba tinteeŋ bʋa nɛ, a chɩŋ Arʋa sɩ hɛ Anɔf fuonaa-la niiŋ, a kɛŋ taŋ-la sɩ hɛ fuonaa-la tʋtʋɔbaanɩŋ, a pɛ Mediba tintee-taalɩsɩ-la kala lɛ a mʋ yi Dɩbɔŋ,

¹⁰ arɩ tasɩ-la kala Amɔrɩ tɩŋŋaa kuoro Sɩhɔŋ fa sɩ hɛ Hɛsɩbɔŋ lɛ sɩɩ beŋ, a kɛŋ ŋɩɩ kaa mʋ yi ʋ dɩ Amɔŋ tɩŋŋaa tinteeŋ bʋa,

¹¹ a bɩra kɛŋ Gɩlɩad tinteeŋ ŋɩɩ a kaa mʋ yi Gesu arɩ Maaka tɩŋŋaa tinteeŋ, a chɩŋ peel-la ba sɩɩ yɩrɛ Hɛmɔŋ leriŋ kala arɩ Basaŋ tinteeŋ kala a kɛŋ ŋɩɩ a mʋ yi taŋ-la ba sɩɩ yɩrɛ Salɛka,

¹² a kɛŋ Basaŋ kuoro Ɔgɩ fa sɩɩ beŋ tintee-la pɛ. Ɔgɩ nɛ fa ŋaa Refem tɩmma-la dɔŋɔ sɩ ka. Ʋ fa hɔŋ tasɩ-la ba sɩɩ yɩrɛ Asɩtarɔf arɩ Ɛdɩrɛ lɛ nɛ. Mosis nɛ fa yuo dii nɩalɩŋ, aŋ laa ba tintee-la.

¹³ Ama Iziral tɩŋŋaa fa bɩ Gesu arɩ Maaka tɩŋŋaa-na kire, arɩ jɩnɩŋ kala ba-na ha hɛ Iziral tɩŋŋaa tʋɔŋ.

¹⁴ Mosis fa bɩ tintee kala kpaa pɩ Levi doho nɩaa-na, bɛɛ wɩaa ba kpaalɩŋ nɛ Wɩɩsʋlʋŋ kɩalɩŋ Iziral tɩŋŋaa sɩ yie nyɩgɛ a pɩpɩ La TƖƖNA, Iziral tɩŋŋaa Wɩa, arɩ ʋ sɩ hɛ niiŋ ŋɩɩ a pɩba.

¹⁵ Tintee-la Mosis fa sɩ joŋo pɩ Rubiŋ doho nɩaa nyɩŋ-nɩa nyɩŋ-nɩa, ʋ ŋaa ba kʋŋ nɛ ŋ-la:

¹⁶ Ba tinteeŋ bʋa nɛ, a chɩŋ Arʋa sɩ hɛ Anɔŋ fuonaa-la niiŋ, a bɩra chɩŋ taŋ-la sɩ hɛ fuonaa-la tʋtʋɔbaanɩŋ, arɩ tintee-taalɩsɩ-la kala ŋɩɩ a kaa mʋ yi taŋ-la ba sɩɩ yɩrɛ Mediba,

¹⁷ a to ŋɩɩ mʋ Hɛsɩbɔŋ tasɩ-la kala sɩ hɛ tintee-taalɩsɩ-la lɛ a kɛŋ Dɩbɔŋ, Bamɔf Baal, Bɛf Baal Mioŋ,

¹⁸ Jahas, Kɛdɛmɔf, Mɛfaaf,

¹⁹ Kɩrɩatam, Sɩbɩma, a pɛ Zɛrɛf Sahaa sɩ chɩŋ dundolo-la sɩ hɛ fuonaa-la lɛ,

²⁰ a kɛŋ Bɛf Pio arɩ Pɩsɩga peel-la lere-la sɩ chulloo tuu, arɩ Bɛf Jasɩmɔf,

²¹ a pɛ tasɩ-la kala sɩ hɛ tintee-taalɩsɩ-la lɛ, arɩ Amɔrɩ tɩŋŋaa kuoro Sɩhɔŋ sɩ hɔŋ Hɛsɩbɔŋ lɛ tinteeŋ kala. Mosis nɛ fa yuo dii ʋ dɩ Midiaŋ tɩŋŋaa sɩpaalaaraa deemba kala: Ɛvɩ, Rɛkɛm, Zuu, Huu arɩ Reba. Ba kala fa ŋaa sɩpaalaaraa nɛ a pɛ kuoro Sɩhɔŋ lɛ a bibeŋ tintee-la.

²² Nɩalɩŋ Iziral tɩŋŋaa sɩ kpʋa laalɩŋ lɛ, ba kpʋ Bioo nanʋala Balam ma nɛ, ʋ fa ŋaa vʋgʋrʋ nɛ.

²³ Rubiŋ doho nɩaa tinteeŋ wɩɩjʋʋlʋŋ dɩɩrɩŋ bʋa nɛ Jɔdaŋ fuo-la niiŋ. Tabalaa arɩ tabiisiŋ deemba kala nɛ ba joŋo pɩ Rubiŋ doho nɩaa nyɩŋ-nɩa nyɩŋ-nɩa, ʋ ŋaa ba kʋŋ.

²⁴ Tintee-la sɛmɛ dɔŋɔ ma Mosis fa sɩ joŋo pɩ Gad doho nɩaa nyɩŋ-nɩa nyɩŋ-nɩa, ʋ ŋaa ba kʋŋ nɛ ŋ-la:

²⁵ Ba tintee-la bʋa nɛ a chɩŋ Jaza tinteeŋ arɩ tasɩ-la sɩ hɛ Gɩlɩad lɛ arɩ Amɔŋ tinteeŋ kpaa magɛ dɔŋɔ lɛ, a kɛŋ ŋɩɩ mʋ yi Arʋa sɩ hɛ Raba wɩɩpɔsʋŋ dɩɩrɩŋ,

²⁶ a bɩra chɩŋ Hɛsɩbɔŋ lɛ a kaa mʋ Ramaf-Mɩzɩpa arɩ Bɛtɔnɩŋ, a bɩra lɩɩ Mahanem lɛ a kaa mʋ yi Dɛbɩ tinteeŋ,

²⁷ a bɩra chɩŋ Jɔdaŋ fuonaa-la lɛ, a kɛŋ Bɛf Haram, Bɛf Nɩmɩra, Sʋkɔf arɩ Zafɔŋ, a pɛ Hɛsɩbɔŋ kuoro Sɩhɔŋ tintee-kaanɩŋ lɛ. Ba tintee-la bʋa pɩŋ Jɔdaŋ fuo-la wɩɩpɔsʋŋ nɛ, a kɛŋ ŋɩɩ mʋ yi Galilii mʋgʋ-bal-la sɩ hɛ wɩɩpɔsʋŋ nagʋa dɩɩrɩŋ.

²⁸ Tabala-la arɩ tabiisiŋ deemba kala nɛ ba joŋo pɩ Gad doho nɩaa nyɩŋ-nɩa nyɩŋ-nɩa, ʋ ŋaa ba kʋŋ.

²⁹ Tintee-la sɛmɛ dɔŋɔ ma Mosis ha sɩ joŋo pɩ Manasɛ doho nɩaa kpaa magɛ dɔŋɔ-la nyɩŋ-nɩa nyɩŋ-nɩa, ʋ ŋaa ba kʋŋ nɛ ŋ-la:

³⁰ Ba tinteeŋ bʋa nɛ, a chɩŋ Mahanem a kɛŋ Basaŋ tinteeŋ lere-la kala kuoro Ɔgɩ fa sɩɩ beŋ, arɩ lere-la kala Jaa doho nɩaa fa sɩ hɔnɔ Basaŋ tinteeŋ lɛ, tasɩ-la ŋaa mahɩŋ batori nɛ,

³¹ a kɛŋ Gɩlɩad tinteeŋ kpaa magɛ dɔŋɔ-la, arɩ Asɩtarɔf arɩ Ɛdɩrɛ (fa sɩ ŋaa kuoro Ɔgɩ tinteeŋ tabalaa Basaŋ lɛ). Lee-la ba sɩ joŋo pɩ Manasɛ nanʋala Makɩɩ doho nɩaa kpaa magɛ dɔŋɔ nyɩŋ-nɩa nyɩŋ-nɩa nɛ ŋɩɩ.

³² Ŋɩɩ Mosis sɩ kɛŋ Jeriko arɩ Jɔdaŋ fuo-la wɩɩpɔsʋŋ tinteeŋ kpaa nɛ ŋɩɩ. Bʋa-la lɛ dɩ ʋ hɛ Mʋab tintee-taala-la lɛ.

³³ Mosis bɩ tintee kala kpaa a pɩ Levi doho nɩaa ʋ ŋaa ba kʋŋ. Levi doho nɩaa kpaalɩŋ nɛ ŋaa kɩalɩŋ Iziral tɩŋŋaa sɩ kaa kʋ ŋaa Wɩɩsʋlʋŋ a pɩ ba TƖƖNA Wɩa arɩ ʋ sɩ hɛ niiŋ ŋɩɩ a pɩba.