JOSUA 12 - WƖA TENIŊ

Kuorie-la Mosis arɩ Iziral tɩŋŋaa sɩ yuo dii

¹ Kuorie-la Mosis arɩ Iziral tɩŋŋaa laalɩyuoroo fa sɩ yuo a dii aŋ laa ba tinteeŋ Jɔdaŋ fuo-la wɩɩpɔsʋŋ, a chɩŋ Anɔŋ fuonaa-la lɛ a kaa mʋ peel-la ba sɩɩ yɩrɛ Hɛmɔŋ sɩ hɛ wɩɩpɔsʋŋ, a pɛ Araba wɩɩpɔsʋŋ kala nɛ ŋ-la:

² Amɔrɩ tɩŋŋaa kuoro Sɩhɔŋ sɩ hɛ Hɛsɩbɔŋ lɛ nɛ faa beŋ tintee-la kala sɩ chɩŋ Arʋa sɩ hɛ Anɔŋ fuonaa-la niiŋ, a kaa mʋ fuonaa-la tʋtʋɔbaanɩŋ a kɛŋ ŋɩɩ mʋ yi Jabɔk fuo-la. Ba dɩ Amɔŋ tɩŋŋaa bʋa nɛ ŋɩɩ a kɛŋ Gɩlɩad tinteeŋ kpaa magɛ dɔŋɔ pɛ.

³ Ʋ nɛ haa beŋ Araba wɩɩpɔsʋŋ dɩɩrɩŋ ma, a chɩŋ Galilii mʋga-la lɛ a kɛŋ ŋɩɩ mʋ yi Araba mʋga-la (Mʋgʋ-sʋʋŋ) a pɛ Bɛŋ Jɛsɩmɔf lɛ, arɩ ŋ sɩɩ mʋ wɩɩpɔsʋŋ nadiiŋ, Pɩsɩga dundolluŋ lere-la sɩ chulloo tuu.

⁴ Ba yuo dii Basaŋ kuoro Ɔgɩ ma nɛ, ʋ nɛ fa ŋaa Refem tɩmma-la dɔŋɔ sɩ ka, ʋ fa hɔŋ Asɩtarɔf arɩ Ɛdɩrɛ lɛ nɛ.

⁵ Ʋ nɛ faa beŋ Hɛmɔŋ peel-la, Salɛka arɩ Basaŋ tinteeŋ kala a kaa mʋ yi Gesu tɩŋŋaa arɩ Maaka tinteeŋ bʋa, a saa pɛ Gɩlɩad tinteeŋ kpaa magɛ dɔŋɔ lɛ a kaa mʋ yi Hɛsɩbɔŋ kuoro Sɩhɔŋ tinteeŋ bʋa.

⁶ Mosis, La TƖƖNA tɩntɩnnʋ-la, arɩ Iziral tɩŋŋaa laalɩyuoroo nɛ fa yuo dii kuoroo deemba balɩa. Ŋɩɩ nɛ Mosis, La TƖƖNA tɩntɩnna joŋ ba tinteeŋ a pɩ Rubiŋ doho nɩaa, Gad doho nɩaa arɩ Manasɛ doho nɩaa kpaa magɛ dɔŋɔ-la ʋ ŋaa ba kʋŋ.

⁷ Kuorie-la Josua arɩ Iziral tɩŋŋaa laalɩyuoroo sɩ yuo dii a laa ba tinteeŋ ma ba fa hɔŋ Jɔdaŋ fuo-la wɩɩjʋʋlʋŋ nɛ, a chɩŋ Baal Gad lɛ a kaa mʋ Lɛbanɔŋ fuonaaŋ, a kɛŋ ŋɩɩ mʋ yi Halak peeliŋ a kɛŋ ŋɩɩ a tutuu Sɛɛ. Tinteeŋ deeŋ kala nɛ Josua kaa kpaa pɩ Iziral doho doho-la. Doho kala kɛŋ ʋ lee:

⁸ Tintee-la peelee sɩ yʋga, wɩɩjʋʋlʋŋ dɩɩrɩŋ dundollu-la sɩ hɛ peelee bʋbʋɔŋ, Araba, peele-la lere-la sɩ chullo tutuu, tintee-hɩlɩŋ arɩ Nɛgɛf. Tinteyee deemba kala ŋaa Hiti tɩŋŋaa, Amɔrɩ tɩŋŋaa, Kɛnaŋ tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa tinteeŋ nɛ.

⁹ Kuorusu-la Iziral tɩŋŋaa laalɩyuoroo sɩ yuo dii nɛ ŋ-la: Jeriko kuoro, Aɩ sɩ kpagɛ Bɛtɛl, ʋ kuoro,

¹⁰ Jerusalɛm kuoro, Hɛbʋrɔŋ kuoro,

¹¹ Jamʋf kuoro, Lakɩs kuoro,

¹² Ɛgɩlɔŋ kuoro, Gɛza kuoro,

¹³ Dɛbɩ kuoro, Gɛda kuoro,

¹⁴ Hɔma kuoro, Arad kuoro,

¹⁵ Lɩbɩna kuoro, Adulam kuoro,

¹⁶ Makɛda kuoro, Bɛtɛl kuoro,

¹⁷ Tapʋa kuoro, Hefa kuoro,

¹⁸ Afɛk kuoro, Lasarɔŋ kuoro,

¹⁹ Madɔŋ kuoro, Hazɔ kuoro,

²⁰ Sɩmɩrɔŋ Mɩrɔŋ kuoro, Akɩsaf kuoro,

²¹ Taanak kuoro, Megido kuoro,

²² Kɛdɛs kuoro, Jokiniam sɩ hɛ Kamɛl tinteeŋ lɛ kuoro,

²³ Doo sɩ hɛ Nafɔf tinteeŋ lɛ kuoro arɩ Goyim sɩ hɛ Gɩlɩgal tinteeŋ lɛ kuoro,

²⁴ arɩ Tɩza kuoro. Kuoro-la kala ŋaa mara arɩ fɩɩ arɩ kʋbala nɛ.