JOSUA 11 - WƖA TENIŊ

Iziral tɩŋŋaa yuo dii Kɛnaŋ tinteeŋ wɩɩpɔsʋŋ nagʋa kuoroo

¹ Hazɔ kuoro Jabɩŋ fa sɩ nɩa dɩ Iziral tɩŋŋaa yuo didii tasɩŋ ŋɩɩ, ʋ tɩma pɩ Madɔŋ kuoro Jobab, a tɩma pɩ Sɩmɩrɔŋ kuoro arɩ Akɩsaf kuoro,

² arɩ kuorie-la kala sɩ hɛ wɩɩpɔsʋŋ nagʋa dɩɩrɩŋ tasɩ-la peelee sɩ yʋga lɛ, a hɛ lee-la ba sɩɩ yɩrɛ Araba, Galilii mʋgʋ-bal-la wɩɩpɔsʋŋ nadiiŋ, arɩ wɩɩjʋʋlʋŋ dundollu-la sɩ hɛ peelee bʋbʋɔŋ a kpagɛ taŋ-la ba sɩɩ yɩrɛ Nafɔf Dɔɔ a hɛ mʋgʋ-balɩŋ niiŋ.

³ Ʋ fa bɩra bʋla pɩ Kɛnaŋ tɩŋŋaa sɩ hɛ wɩɩpɔsʋŋ arɩ wɩɩjʋʋlʋŋ arɩ Amɔrɩ tɩŋŋaa, Hiti tɩŋŋaa, Pɛrɛs tɩŋŋaa arɩ Jebus tɩŋŋaa sɩ hɛ tintee-la peelee sɩ yʋga lɛ, arɩ Hivi tɩmma-la sɩ hɔŋ peel-la ba sɩɩ yɩrɛ Hɛmɔŋ bʋbʋɔŋ, a hɛ Mɩzɩpa tinteeŋ lɛ.

⁴ Ba kʋ lɩɩ arɩ ba laalɩyuoroo kala arɩ janɩŋ arɩ ba janɩŋ torukoba, a yʋgɛ woruŋ a nagɛ hagɩlɩ-biee sɩ pɩŋ fuoŋ niiŋ.

⁵ Kuoroo deemba kala fa kʋ hɛ dɔŋɔ lɛ nɛ a ŋmoo buguŋ Mɛrɔm fuo-bie-la leriŋ, dɩ ba yuo Iziral tɩŋŋaa.

⁶ Ŋɩɩ nɛ La TƖƖNA fa bʋla pɩ Josua, “Sɩ́ leŋe dɩ fawʋllʋŋ kɛnɩŋ a tɩŋ nɩalɩŋ wɩaa, bɛɛ wɩaa chie bʋa deeŋ lɛ mɩ jaŋ jomba hɛ Iziral laalɩyuoroo nɩsɩŋ lɛ dɩ ma kpʋba. Ŋ jaŋ gbɛrɩgɛ ba janɩŋ kala aŋ nyɩgɛ ba janɩŋ torukoba.”

⁷ Ŋɩɩ nɛ Josua arɩ ʋ laalɩyuoroo kala guu mʋ a yuoba Mɛrɔm fuo-bie-la leriŋ,

⁸ La TƖƖNA fa jomba a hɛ Iziral tɩŋŋaa laalɩyuoroo nɩsɩŋ lɛ. Ba kire kpʋba ŋɩɩ a mʋ yi tabal-la ba sɩɩ yɩrɛ Sɩdɔŋ, a joŋo mʋ Mɩsɩrɛfɔf Meem, a to ŋɩɩ mʋ Mɩzɩpa fuonaa-la sɩ hɛ wɩɩpɔsʋŋ, a kpʋ ba kala, nɩbala ma bɩ ka.

⁹ Josua fa ŋaaba ŋɩɩ La TƖƖNA sɩ dagʋ nɛ. Ʋ fa gbɛrɩgɛ ba janɩŋ kala nɛ aŋ nyɩgɛ ba janɩŋ torukoba ma.

¹⁰ Josua fa mɩɩrɛ bʋa-la tɩtɩa lɛ nɛ a mʋ taŋ-la ba sɩɩ yɩrɛ Hazɔ a yuo dii ʋ dɩ ʋ kuoro kala. (Bʋa-la lɛ Hazɔ nɛ fa ŋaa tasɩ-la kala tʋɔŋ kʋbalɩŋ.)

¹¹ Nʋʋ na-kala sɩ hɛ taŋ-la lɛ, ba kala nɛ ba fa kpʋ. Ba kʋŋkala bɩ ka, aŋ nyɩgɛ Hazɔ kala.

¹² Josua fa yuo dii tabalaa deemba kala nɛ a kpʋ ba kuoroo arɩ ba nɩaa kala arɩ La TƖƖNA tɩntɩnna Mosis fa sɩ dagɛ ŋɩɩ.

¹³ Ama tasɩ-la ba sɩ saa dundol-biisiŋ nyuŋ, Iziral laalɩyuoroo bɩ ba-na nyɩga. Hazɔ dʋndʋŋa nɛ Josua nyɩgɛ.

¹⁴ Kɩalɩŋ kala fa sɩ hɛ tasɩŋ deemba lɛ nɛ Iziral laalɩyuoroo paa, a kɛsɛ ba pʋsʋŋ ma pɛ. Ama ba kpʋ nʋʋkala sɩ hɛ tasɩ-la lɛ nɛ, ba bɩ kʋŋ ka.

¹⁵ La TƖƖNA fa sɩ dagɛ ʋ tɩntɩnna Mosis ŋɩɩ, ŋɩɩ tɩtɩa nɛ Mosis ma dagɛ Josua ʋ ŋaa. Wɩalɩŋ kala La TƖƖNA fa sɩ dagɛ Mosis, ba kala nɛ Josua fa ŋaa, ʋ bɩ ba kʋŋkala kere ta.

¹⁶ Josua fa yuo a laa tinteeŋ deeŋ kala nɛ, tintee-la peelee sɩ yʋga, Nɛgɛf, Goseŋ tinteeŋ kala, dundollu-la sɩ hɛ peelee bʋbʋɔŋ wɩɩjʋʋlʋŋ dɩɩrɩŋ, Araba arɩ Iziral peelee arɩ ba dundolluŋ kala,

¹⁷ a chɩŋ peel-la ba sɩɩ yɩrɛ Halak, sɩ hɛ Sɛɛ dɩɩrɩŋ, a kaa mʋ Baal Gad sɩ hɛ Lɛbanɔŋ fuonaa-la sɩ kpagɛ peel-la ba sɩɩ yɩrɛ Hɛmɔŋ. Leree deemba kuoroo kala nɛ ʋ fa yuo kɛsɛ, a kpʋ ba kala.

¹⁸ Josua fa yuo kuoroo deemba a dieni nɛ woruŋ.

¹⁹ Hivi tɩmma-la sɩ hɛ Gibioŋ lɛ dʋndʋŋa nɛ fa leŋe ba dɩ Iziral tɩŋŋaa pɛ niiŋ. Ama Iziral tɩŋŋaa fa bɩ leŋe ba dɩ tasɩ-la kʋŋkala pɛ nii, ba kala nɛ ba yuo dii.

²⁰ La TƖƖNA nɛ fa ŋaa tasɩ-la kɛŋ nyuduoŋ a yuyuo Iziral tɩŋŋaa ŋɩɩ, dɩ ʋ to ŋɩɩ lɛ a chaasa cheiba, a kpʋ ba kala aŋ sɩ́ ba nenige fá, arɩ La TƖƖNA fa sɩ bʋl ŋɩɩ pɩ Mosis.

²¹ Bʋa-la lɛ nɛ Josua fa bɩra mʋ a chei Anakɩ tɩmma-la sɩ hɛ tintee-la peelee sɩ yʋga lɛ, a chɩŋ Hɛbʋrɔŋ, Dɛbɩ arɩ Anab, a kɛŋ ŋɩɩ mʋ Juda tintee-la peelee sɩ yʋga, arɩ Iziral tintee-la peelee sɩ yʋga. Josua fa chei lere-la arɩ tasɩ-la kala sɩ hɛ nɩmɛ nɛ.

²² Anakɩ doho nʋʋkala fa bɩra tuo tinteeŋ lɛ, see tasɩŋ deemba: Gaza, Gaf arɩ Asɩdɔd dʋndʋŋa lɛ nɛ Anakɩ nɩaa mʋa ka.

²³ Josua laa tintee-la kala nɛ, arɩ La TƖƖNA fa sɩ dagɛ Mosis ŋɩɩ, a kaa kpaa a pɩ Iziral tɩŋŋaa doho doho-la ʋ ŋaa ba kʋŋ. Ŋɩɩ nɛ tintee-la nɩaa saa wiesi laalɩŋ lɛ.