JONA 2 - WƖA TENIŊ

Jona chʋɔlɛ Wɩa

¹ Jona hɛ chenfilii-la tʋɔŋ nɛ aŋ dɩdɛnnɛ ʋ TƖƖNA Wɩa.

² Ʋ sɩ, “Wɩaa sɩ jʋʋmɛ, mɩ bunso pɩ mɩ Tɩɩna nɛ, ʋ nɩɩ a lɩɩsɛmɛ sʋʋŋ bʋa lɛ.

³ Ŋ jommi yuo hɛ mʋgʋ-balɩŋ tʋɔŋ nɛ mɩ tuu bʋbʋɔŋ, lɩɩŋ tɔ mɩ kala, lɩɩ-pel-balaa ma to mɩ nyuŋ bɩbal.

⁴ Mɩ fa bɩɩna ŋ kirimi ta nɛ ŋ sɩpaaŋ, mɩ bɩra bɩ jaŋ na ŋ dɩɩ-balɩŋ sɩ bɩ disiniŋ kɛnɛ.

⁵ Lɩɩŋ tɔ mɩ kala nɛ a nagɛ ʋʋ chɛ ʋ kpʋmɛ, mɩ tuu bʋbʋɔŋ, fuo-chalba bɛ mɩ nyuŋ.

⁶ Mɩ tuu yi peele-la sɩ hɛ mʋgʋ-balɩŋ tʋɔŋ bʋbʋɔŋ nɛ, ba nyagɛmɛ kpɛrɛ, dɩ mɩ bɩra sɩ́ lɩɩ. Ama mɩ Tɩɩna Wɩa, ŋ ha laa mɩ mɩɩsɩŋ pɩmɛ nɛ sʋʋŋ-bʋa lɛ.

⁷ Mɩ mɩɩsɩŋ fa sɩɩ dɛrʋ, mɩ Tɩɩna, mɩ liise yi ŋ lɛ nɛ a sʋlʋŋ, mɩ sʋla-la mʋ yiŋ, ŋ dɩɩ-balɩŋ sɩ bɩ disiniŋ kɛnɛ lɛ.

⁸ Nɩalɩŋ sɩɩ to vʋɩyaa sɩ ŋaa kʋpɛɩba harɩŋ, bɩ Wɩa lahɔrɩmɔ jaŋ jʋʋ.

⁹ Mɩ jaŋ yɩɩ yɩɩlaa a dɛnnɩŋ, aŋ ŋaa Wɩɩsʋlʋŋ pɩŋ. Mɩ sɩ hɛ niire-la kala, mɩ jaŋ chaarɛba. La TƖƖNA nɛ ŋaa Laataara.”

¹⁰ Ŋɩɩ nɛ La TƖƖNA ŋaa chenfil-bal-la lusi Jona a bil dundolo nyuŋ.