Jɔɔŋ 6 - WƖA TENIŊ

Yesu pɩ nɩaa bʋɩ banɔŋ kʋdiilee

¹ Ʋ ŋɩɩ harɩŋ nɛ Yesu mɩɩra chol mʋgʋ-bal kʋbala baa yɩrɛ Galilii mʋgʋ-balɩŋ, ʋ yɩrɩŋ dɔŋɔ ma nɛ Tabiiras.

² Nɩaa yʋga a tuto ʋ harɩŋ, bɛɛ wɩaa ba fa na ʋ sɩ ŋaa wʋmagɩla-la a vaarɛ nyanyal tɩŋŋaa nɛ.

³ Ŋɩɩ nɛ Yesu arɩ ʋ harɩ-tooroo mʋ jɩl peeliŋ nyuŋ a hɔŋ nɩmɛ.

⁴ Dɩ Juu tɩŋŋaa dɩɩsɩŋ kiele bal gbiele-la ma kpaga.

⁵ Ba sɩ hɔŋ nɩmɛ nɛ, Yesu na dɩ nɩ-daŋ nɩɩ kɔ ʋ teeŋ ŋɩɩ. Ʋ pɩɛsɛ Fɩlɩp, “Nɩɩ nɛ la jaŋ na kʋdiilee a yɔɔ pɩ nɩaa deemba kala dɩ ba dii?”

⁶ Yesu tɩtɩa fa jɩŋ wɩɩ-la ʋ sɩ jaŋ ŋaa nɛ, ama ʋ ta bʋl ŋɩɩ dɩ ʋ magɩsɛ Fɩlɩp nɛ.

⁷ Ŋɩɩ nɛ Fɩlɩp bʋla pʋ, “Dɩ la nɛ yɔɔ boroboro a yi warɩpʋla zɔɔ-balɩa ma, ʋ bɩ nɩaa deemba wɩɩkala wuo ŋaa, mʋa mʋa nɛ ba kʋŋkala jaŋ na.”

⁸ Ŋɩɩ nɛ ʋ harɩ-tooroo dɔŋɔ ba sɩɩ yɩrɛ Anduru, ʋ fa ŋaa Saamɔŋ Pɩɩta naambie nɛ, ʋ bʋla pɩ Yesu,

⁹ “Bii-bie kʋbala nɛ hɛ la tʋɔŋ a kɛŋ boroboroba banɔŋ arɩ chenfilee balɩa. Ɛɛ nɛ saa kɩaa deemba jaŋ wuo ŋaa nɩ-daŋ deeŋ?”

¹⁰ Ŋɩɩ nɛ Yesu bʋl, “Má leŋ dɩ nɩalɩŋ hɔŋ.” Dɩ yaŋ hɛ lee-la, ŋɩɩ nɛ nɩalɩŋ hɔŋ. Ba tʋɔŋ baalaa fa ŋaa bʋɩ banɔŋ nɛ.

¹¹ Ŋɩɩ nɛ Yesu laa boroboroba-la a lɔllɛ Wɩa, aŋ kaa chɔgɔ kpaa nɩalɩŋ sɩ hɔnɔ. Ŋɩɩ nɛ ʋ kɛŋ chenfile-la ma kpaaba. Ba kʋŋkala dii a vɔgɛ.

¹² Ba sɩ dii a vɔgɛ ŋɩɩ, ʋ bʋla pɩ ʋ harɩ-tooroo, “Má mʋ paa boroboroba-la sɩ ka dɩ kʋŋkala sɩ́ pɩna ta.”

¹³ Ŋɩɩ nɛ ba paa kʋkaana-la nɩalɩŋ sɩ die aŋ ka, a su sinsiŋ fii arɩ balɩa.

¹⁴ Nɩalɩŋ sɩ hɛ nɩmɛ a na Yesu sɩ ŋaa wʋmagɩlɩŋ deeŋ, ba bʋl, “Wʋtɩtɩɩ, baala deeŋ nɛ sɛnɛ ŋaa Wɩa wʋlaabʋllʋ-la ba sɩ sɩ ʋ jaŋ kɔ dʋnɩa.”

¹⁵ Ŋɩɩ nɛ Yesu jɩŋ arɩ ba kɛŋ ba tɩtɩa hɛ dɔŋɔ nɛ dɩ ba kʋ fʋgʋ dɩ ʋ dii ba kuoruŋ. Ŋɩɩ nɛ ʋ mʋ faa peeliŋ nyuŋ.

Yesu vɛŋ lɩɩŋ nyuŋ

¹⁶ Dɩdaanɩŋ, Yesu harɩ-tooroo tuu mʋga

¹⁷ a jʋʋ lɩɩŋ daboro, a bɩra duoroo chol mʋga a mʋmʋ Kapɛnam. Taŋ bire dɩ Yesu ha bɩ ba teeŋ kɔ.

¹⁸ Bʋa-la lɛ dɩ pel-duo kʋbala maa lu a kɛŋ lɩɩ-la kala vuvuugi.

¹⁹ Dɩ ʋ harɩ-tooro-la ma duoro a mʋ yi meel-daasɩŋ batori koo banɛsɛ, aŋ na Yesu dɩ ʋ vɛŋ lɩɩŋ nyuŋ a kʋkɔ daboro-la teeŋ. Ba sɩ naʋ ŋɩɩ, fawʋllʋŋ kɛmba.

²⁰ Ŋɩɩ nɛ Yesu bʋla pɩba, “Má sɩ́ leŋe dɩ fawʋllʋŋ kɛmma, mɩ-na nɛ.”

²¹ Ŋɩɩ nɛ ba tʋɔŋ tɔrɛ, ba joŋu hɛ lɩɩŋ daboro-la tʋɔŋ, lɩɩŋ daboro-la guu yi lɩɩŋ niiŋ lee-la ba fa sɩɩ mʋ.

Nɩaa yʋga aa chɛ Yesu

²² Taŋ sɩ pʋla, nɩ-daŋ-la fa sɩ chɩŋ mʋga-la cholo sɛmɛ dɔŋɔ jɩma arɩ lɩɩŋ daboro kʋbala nɛ fa chɩŋ nɩmɛ. Ba jɩma arɩ Yesu harɩ-tooroo dʋndʋŋa nɛ jʋʋ lɩɩŋ daboro-la. Yesu tuo ba tʋɔŋ.

²³ Ba sɩ chɩŋ nɩmɛ ŋɩɩ, lɩɩŋ daborusuŋ dɔnsʋŋ lɩɩ Tabiiras kɔ lee-la, a kpagɛ lee-la Yesu fa sɩ lɔllɛ Wɩa aŋ joŋ boroboro pɩba ba dii.

²⁴ Nɩalɩŋ sɩ na dɩ Yesu tuo, ʋ harɩ-tooroo ma tuo, ba sii jʋʋ lɩɩŋ daborusu-la a mʋ Kapɛnam aa chɛʋ.

Yesu sɩ ʋ nɛ boroboro-la sɩɩ pɩ nɩaa mɩɩsɩŋ

²⁵ Nɩalɩŋ sɩ na Yesu mʋga-la cholo dɔŋɔ, ba pɩɛsʋ, “La kʋhɩaŋ, bʋa bɛɛ lɛ nɛ ŋ kɔ daha?”

²⁶ Ŋɩɩ nɛ Yesu bʋla pɩba, “Wʋtɩtɩɩ nɛ mɩ bʋlaa pɩma, maa chɛmɛ a tɩŋ boroboro-la ma sɩ dii vɔgɛ wɩaa nɛ, ama wʋmagɩla-la ma sɩ na dɩ mɩ ŋaa wɩaa dee.

²⁷ Má sɩ́ ma doluŋ kala hɛ a chɛ kʋdiile-la sɩ jaŋ chei, ama má tɩma chɩchɛ kʋdiile-la sɩ jaŋ pɩma mɩɩsɩ-la sɩ bɩ dɛrɛ. Kʋdiilee deemba mɩ-na Nuhuobiine Bie nɛ jaŋ pɩma, bɛɛ wɩaa mɩ Nyɩmma Wɩa joŋ doluŋ hɛ mɩ lɛ nɛ dɩ mɩɩ ŋaa ŋɩɩ.”

²⁸ Ŋɩɩ nɛ ba pɩɛsʋ, “Wʋbɛɛ nɛ Wɩa chɛ dɩ la ŋaa?”

²⁹ Ʋ bʋl, “Tɩntɩmɩɩ-la Wɩa sɩ cho dɩ maa tɩŋ nɛ ŋ-la: Má laa mɩ-na nɩɩ-la ʋ sɩ tɩma wɩaa dii.”

³⁰ Ŋɩɩ nɛ ba pɩɛsʋ, “Wʋmagɩl bɛɛ nɛ ŋ jaŋ ŋaa dɩ la na a laa ŋ wɩaa dii? Wʋbɛɛ nɛ ŋ jaŋ ŋaa?

³¹ La naabalɩmaba dii kʋdiilee nɛ tintee-hɩlɩŋ lɛ baa yɩrɛ Mana. Wɩalɩŋ ba sɩ ŋmʋnsa Wɩa teniŋ tʋɔŋ nɛ ŋ-la: ‘Ʋ joŋ boroboro-la sɩ lɩɩ Wɩa-jaŋ nɛ a pɩba dɩ ba dii.’ ”

³² Ŋɩɩ nɛ Yesu bʋl, “Mɩ bʋl wʋtɩtɩɩ nɛ a pɩpɩma, kɩalɩŋ Mosis sɩ pɩma, ʋ dee bɩ ma pa, Wɩa nɛ pɩma. Kʋdiile-la bɩ ma mɩɩsɩ-la sɩ bɩ dɛrɛ ka pa. Mɩ Nyɩmma nɩɩ pɩ nɩaa boroboro tɩtɩɩ-la sɩ lɩɩ Wɩa-jaŋ.

³³ Boroboro-la Wɩa sɩ ta, ʋ lɩɩ Wɩa-jaŋ nɛ a kʋ tuu. Ʋ nɛ pɩ dʋnɩa nɩaa mɩɩsɩŋ.”

³⁴ Ŋɩɩ nɛ ba bʋl, “La Tɩɩna, ŋɩɩ-na vɛnɛ joŋ boroboro deeŋ pɩpɩla.”

³⁵ Ŋɩɩ nɛ Yesu bʋla pɩba, “Mɩ nɛ ŋaa kʋdiile-la sɩɩ pɩ nɩaa mɩɩsɩŋ. Nɩɩ-la kala sɩ kɔ mɩ teeŋ, losuŋ bɩra bɩ jaŋ kɛnʋ. Nɩɩ-la ma sɩ laa mɩ wɩaa dii, lɩɩnyʋasʋŋ bɩra bɩ jaŋ kɛnʋ.

³⁶ Mɩ bʋla pɩma arɩ ma namɛ nɛ, ama ma ha bɩ mɩ wɩaa laa dii.

³⁷ Nʋʋkala mɩ Nyɩmma sɩ joŋo pɩmɛ, ʋ jaŋ kɔ mɩ teeŋ. Nɩaa deemba kala sɩ kɔ mɩ teeŋ, mɩ bɩ jaŋ kɔ dɩ mɩ kiriba ta,

³⁸ bɛɛ wɩaa mɩ lɩɩ Wɩa-jaŋ kʋ tuu dɩ mɩ ŋaa wɩalɩŋ nɩɩ-la sɩ tɩmmɛ sɩɩ chɛ nɛ, mɩ tɩtɩa tʋɔtɔrɛ wɩaa dee.

³⁹ Ŋ-la nɛ nɩɩ-la sɩ tɩmmɛ chɩchɛ dɩ mɩɩ ŋaa: Dɩ mɩ sɩ́ leŋe dɩ nɩalɩŋ ʋ sɩ joŋo pɩmɛ kʋŋkala lɛl, ama dɩ mɩ chɩsɛ ba kala dʋnɩa dɩdɛrɩŋ dɩ ba kɛŋ mɩɩsɩŋ.

⁴⁰ Wɩalɩŋ mɩ Nyɩmma sɩɩ chɛ nɛ ŋ-la: Dɩ nʋʋ na-kala sɩ na mɩ-na ʋ Bie a laa mɩ wɩaa dii, dɩ ʋ kɛŋ mɩɩsɩ-la sɩ bɩ dɛrɛ. Dʋnɩa dɩdɛrɩŋ ma, mɩ jaŋ chɩsʋ sʋʋŋ lɛ dɩ ʋ kɛŋ mɩɩsɩŋ.”

⁴¹ Ŋɩɩ nɛ Juu tɩŋŋaa suomo gʋgʋrɩmɛ wɩaa, a tɩŋ ʋ sɩ sɩ, “Mɩ-na nɛ ŋaa kʋdiile-la sɩ lɩɩ Wɩa-jaŋ kʋ tuu.”

⁴² Ŋɩɩ nɛ ba pɩɛsɛ: “Baala deeŋ dee Josɛf bie Yesu? La jɩŋ ʋ nyɩmma arɩ ʋ naaŋ kala nɛ. Ɛɛ nɛ saa lɛɛlɛ ʋ sɩ dɩ ʋ lɩɩ Wɩa-jaŋ nɛ a kʋ tuu?”

⁴³ Yesu bɩra bʋla pɩba, “Má leŋ ma wɩalɩŋ gʋrʋmʋŋ.

⁴⁴ Nʋʋkala bɩ jaŋ wuo kɔ mɩ teeŋ, see dɩ mɩ Nyɩmma-la sɩ tɩmmɛ nɛ kɛŋ ʋ tɩɩna kaa kɔ mɩ teeŋ, dɩ mɩ chɩsʋ sʋʋŋ lɛ dʋnɩa dɩdɛrɩŋ.

⁴⁵ Ba ŋmʋnsɛ ŋ-la nɛ Wɩa wʋlaabʋllaa teniŋ tʋɔŋ. Ba sɩ, ‘Wɩa jaŋ dagɛ nɩaa kala.’ Nʋʋkala sɩ kɛŋ ʋ tɩtɩa hɛ dɔŋɔ dɩ ʋ jegile nɩɩ wɩalɩŋ mɩ Nyɩmma sɩɩ dagʋ a gʋnnɛ ʋ teeŋ, ʋ nɛ jaŋ kɔ mɩ teeŋ.

⁴⁶ Ʋ ŋɩɩ ma saa bɩ nagɛ arɩ nʋʋkala na mɩ Nyɩmma Wɩa nɛ, see mɩ-na Nɩɩ-la sɩ lɩɩ Wɩa teeŋ. Mɩ dʋndʋŋa nɛ naʋ.

⁴⁷ Wʋtɩtɩɩ nɛ mɩ bʋlaa pɩma, nɩɩ-la kala sɩ laa mɩ wɩaa dii, ʋ jaŋ kɛŋ mɩɩsɩ-la sɩ bɩ dɛrɛ.

⁴⁸ Mɩ nɛ ŋaa kʋdiile-la sɩɩ pɩ nɩaa mɩɩsɩŋ.

⁴⁹ Ma naabalɩmaba dii kʋdiile-la ba sɩɩ yɩrɛ ‘Mana’ nɛ tintee-hɩlɩŋ lɛ, arɩ ŋɩɩ kala ba-na ha sʋba nɛ.

⁵⁰ Ama kʋdiile-la sɩ lɩɩ Wɩa-jaŋ kʋ tuu, dɩ nʋʋ nɛ diiba, ʋ bɩ jaŋ sʋʋ.

⁵¹ Mɩ-na nɛ ŋaa kʋdiile-la sɩ kɛŋ mɩɩsɩŋ a lɩɩ Wɩa-jaŋ kʋ tuu. Dɩ nʋʋ nɛ dii kʋdiilee deemba, ʋ jaŋ kɛŋ mɩɩsɩ-la sɩ bɩ dɛrɛ. Mɩ yaraa nammɩa nɛ ŋaa kʋdiile-la mɩ sɩ jaŋ joŋo pɩ dʋnɩa nɩaa dɩ ba kɛŋ mɩɩsɩŋ.”

⁵² Yesu sɩ bʋl ŋɩɩ, Juu tɩŋŋaa suomo kɛŋ wɩɩ-la lɩlɛrɛ a bʋl, “Ɛɛ nɛ baala deeŋ jaŋ wuo ŋaa a joŋ ʋ yaraa nammɩa pɩla dɩ la chaŋ?”

⁵³ Ŋɩɩ nɛ Yesu bʋla pɩba, “Wʋtɩtɩɩ nɛ mɩ bʋlaa pɩma, dɩ ma nɛ bɩ mɩ-na Nuhuobiine Bie yaraa nammɩa chaŋa, a nyʋa mɩ chalɩŋ ma, ma bɩ jaŋ kɛŋ mɩɩsɩŋ.

⁵⁴ Nɩɩ-la kala sɩ chaŋ mɩ yaraa nammɩa, a nyʋa mɩ chalɩŋ ma, ʋ jaŋ kɛŋ mɩɩsɩ-la sɩ bɩ dɛrɛ. Dɩ dʋnɩa nɛ dɛrɛ, mɩ jaŋ chɩsɛ ʋ tɩɩna sʋʋŋ lɛ dɩ ʋ kɛŋ mɩɩsɩŋ,

⁵⁵ bɛɛ wɩaa mɩ yaraa nammɩa sɛnɛ ŋaa kʋdiilee nɛ, mɩ chalɩŋ ma sɛnɛ ŋaa lɩɩ-nyʋalʋŋ.

⁵⁶ Nɩɩ-la kala sɩ chaŋ mɩ yaraa nammɩa-la a nyʋa mɩ chal-la, ʋ jaŋ hɛ mɩ lɛ, dɩ mɩ ma hɛ ʋ lɛ.

⁵⁷ Mɩ Nyɩmma-la sɩ kɛŋ mɩɩsɩŋ a tɩmmɛ ŋɩɩ, ʋ nɛ leŋe mɩ kɛŋ mɩɩsɩŋ. Ŋɩɩ tɩtɩa nɛ nɩɩ-la ma sɩ chaŋ mɩ yaraa nammɩa ma jaŋ kɛŋ mɩɩsɩŋ a tɩŋ mɩ wɩaa.

⁵⁸ Kʋdiile-la sɩ lɩɩ Wɩa-jaŋ kʋ tuu nɛ ŋɩɩ. Ʋ bɩ naga kʋdiile-la ma naabalɩmaba sɩ die aŋ ha sʋʋ nɛ. Nɩɩ-la kala sɩ dii kʋdiilee deemba, ʋ jaŋ kɛŋ mɩɩsɩ-la sɩ bɩ dɛrɛ.”

⁵⁹ Yesu bʋl wɩaa deemba dɩ ʋ hɛ Kapɛnam tinteeŋ lɛ nɛ a dɩdagɛ nɩaa Wɩɩchʋɔlɛ dɩa lɛ.

Wɩalɩŋ sɩ jaŋ pɩ nɩaa mɩɩsɩ-la sɩ bɩ dɛrɛ

⁶⁰ Nɩaa yʋga a faa to Yesu harɩŋ, a nɩɩ wɩalɩŋ ʋ sɩ bʋla. Ba sɩ, “Wɩaa deemba ʋ sɩɩ dagʋ, ba hɛyɛ kɩŋkɛŋ nɛ. Kʋbɛɛ nɛ jaŋ wuo sɛɩba?”

⁶¹ Ba bɩ wɩɩkala bʋla, ka Yesu jɩŋ arɩ ʋ harɩ-tooro-la ka gʋrɩmɛ wɩaa nɛ a tɩŋ wɩalɩŋ ʋ sɩ bʋla. Ŋɩɩ nɛ ʋ pɩɛsɛba, “Wɩɩŋ deeŋ leŋe ma na baanɩŋ nɛɛ?

⁶² Ka dɩ ma nɛ saa fa na mɩ-na Nuhuobiine Bie dɩ mɩ mɩɩraa mʋ lee-la mɩ sɩ lɩa?

⁶³ Wɩa Dɩŋ-zɔmʋŋ nɩɩ pɩla mɩɩsɩŋ. Nuhuobiine yaraa doluŋ-na ŋaa pɛɩ nɛ, ʋ bɩ mɩɩsɩ-la sɩ bɩ dɛrɛ wuo pa. Wɩa Dɩŋ-zɔmʋŋ wɩaa nɛ mɩ bʋla pɩma. Ba jaŋ pɩma mɩɩsɩŋ.

⁶⁴ Ama ma dɔnsʋŋ bɩ mɩ wɩaa laa dii.” Bumbuŋ kala Yesu fa jɩŋ nɩalɩŋ sɩ bɩ ʋ wɩaa laa dii nɛ arɩ nɩɩ-la sɩ jaŋ joŋu yallɛ.

⁶⁵ Ŋɩɩ nɛ Yesu bɩra bʋl, “Wɩɩŋ deeŋ wɩaa nɛ tɩɩ mɩ bʋla pɩma arɩ nʋʋkala bɩ jaŋ wuo kɔ mɩ teeŋ, see dɩ mɩ Nyɩmma pɩ ʋ tɩɩna wombiiŋ.”

⁶⁶ A tɩŋ ŋɩɩ wɩaa nɩ-daŋ-la fa sɩɩ to ʋ harɩŋ, ba mɩɩrɛ.

⁶⁷ Ŋɩɩ nɛ Yesu pɩɛsɛ ʋ harɩ-tooroo fii arɩ balɩa-la, “Ma ma cho dɩ ma mɩɩrɛ mɩ harɩŋ nɛɛ?”

⁶⁸ Saamɔŋ Pɩɩta bʋl, “La Tɩɩna, kʋbɛɛ teeŋ nɛ saa la ma jaŋ mʋ? Wɩalɩŋ ŋ sɩɩ bʋl nɩɩ pɩ nɩaa mɩɩsɩ-la sɩ bɩ dɛrɛ.

⁶⁹ Lɛɛlɛ la laa dii a jɩŋ arɩ ŋ nɛ ŋaa Wɩa tʋɔpʋl Tɩɩna.”

⁷⁰ Ŋɩɩ nɛ Yesu pɩɛsɛba, “Ma nɩaa fii arɩ balɩa dee mɩ lɩɩsɛɛ? Ama ma dɔŋɔ ŋaa dʋndɔŋ nɛ a ŋaa Sɩtaanɩ nʋʋ.”

⁷¹ Judas sɩ ŋaa Saamɔŋ Ɩsɩkarɔt nanʋala wɩaa nɛ ʋ faa bʋl ŋɩɩ. Ʋ fa hɛ ʋ harɩ-tooro-la fii arɩ balɩa tʋɔŋ nɛ, ama ʋ nɛ fa jaŋ joŋ Yesu yallɛ.