Jɔɔŋ 5 - WƖA TENIŊ

Yesu vaarɛ baal kʋbala fuoŋ lɛ

¹ Ŋɩɩ harɩŋ lɛ nɛ Juu tɩŋŋaa gbiele kʋbala bɩra yi Jerusalɛm lɛ. Yesu sii mʋ lee-la.

² Jerusalɛm lɛ, fuo-bie kʋbala nɛ fa hɛ nɩmɛ. Ʋ fa kpagɛ boi-baala-la dɔŋɔ ba fa sɩ to jʋjʋʋ taŋ-la tʋɔŋ nɛ. Ʋ yɩrɩŋ nɛ fa Piesee Boi-baalɩŋ. Hiburu yikoro lɛ ba kɛŋ fuo-la kaa yɩrɛ Bɛtɩzata nɛ. Ba hɛ palaa banɔŋ nɛ a kɛrɛ fuo-la.

³ Nyanyal tɩŋŋaa fa yʋga a hɛ pala-la tʋɔŋ. Dɔnsʋŋ nyʋlɩmɛ, dɔnsʋŋ fa ŋaa naasʋʋnʋŋ arɩ nasʋʋnʋŋ tɩŋŋaa, dɔnsʋŋ ma gbɛrɩgɛ. [

⁴ Bʋa dɔŋɔ Wɩa tɩndaarʋ nɛ fa yie kʋ tuu fuo-la a kɛŋ lɩɩ-la kaa vuugi. Dɩ Wɩa tɩndaarʋ-la nɛ kɛŋ lɩɩ-la vuugi, nyanyal tɩɩna-la sɩ laa sɩpaaŋ tuu lɩɩ-la, ʋ nyanyalɩŋ cho dɩ ʋ nagɛ ŋɩɩ ma kala, ʋ yie duori nɛ.]

⁵ Baal kʋbala ma nɛ fa hɛ nyanyal tɩmma-la tʋɔŋ. Ʋ fa wɩɩla nɛ a yi jɩsɩŋ mara arɩ fii arɩ chori.

⁶ Yesu sɩ na baal-la dɩ ʋ pɩŋ nɩmɛ, ʋ jɩŋ arɩ baal-la wɩɩla dieni nɛ. Ŋɩɩ nɛ ʋ pɩɛsʋ, “Ŋŋ chɛ dɩ ŋ duori nɛɛ?”

⁷ Ŋɩɩ nɛ baal-la bʋl, “Mɩ kʋhɩaŋ, mɩ bɩ nʋʋ kɛnɛ daha sɩ jaŋ wuo jommi kaa tuu hɛ fuo-la lɛ dɩ ba nɛ kɛŋ lɩɩ-la vuugi. Ba yie kɛŋ lɩɩ-la vuugi, mɩɩ nɛrɩgɛ dɩ mɩ tuu, dɩ nʋʋ laa sɩpaaŋ tuu mɩ lɛ.”

⁸ Ŋɩɩ nɛ Yesu bʋla pɩ baal-la, “Sii a chuoli ŋ bɔsɔ a viiri.”

⁹ Baal-la guu duori a sii chuoli ʋ bɔsɔ chʋŋ a vɩvɛŋ. Tapʋlʋŋ deeŋ fa ŋaa chɛ-wiesii-la chɛɛŋ nɛ.

¹⁰ Ŋɩɩ nɛ Juu tɩŋŋaa bʋla pɩ baal-la Yesu sɩ vaara, “Jɩnɩŋ ŋaa chɛ-wiesii-la chɛɛŋ nɛ. Ʋʋ kɩsɛ nɛ dɩ ŋ chʋŋ bɔsɔ jɩnɩŋ chɛɛŋ.”

¹¹ Ŋɩɩ nɛ baal-la ma bʋl, “Nɩɩ-la sɩ vaarɛmɛ nɛ bʋla pɩmɛ dɩ mɩ chuoli mɩ bɔsɔ a viiri.”

¹² Ŋɩɩ nɛ ba pɩɛsʋ, “Kʋbɛɛ nɛ baal-la sɩ bʋla pɩŋ dɩ ŋ chuoli ŋ bɔsɔ a viiri?”

¹³ Ama baal-la bɩ nɩɩ-la sɩ vaarʋ jɩŋ. Bʋa-la lɛ dɩ nɩaa yʋga, Yesu lʋara jʋʋ ba tʋɔŋ.

¹⁴ Ʋ ŋɩɩ harɩŋ nɛ Yesu na baal-la Wɩa dɩɩ-balɩŋ lɛ a bʋla pʋ, “Na, lɛɛlɛ ŋ duoro nɛ, bɩra sɩ́ wʋbɔŋŋɔɔ ŋaa. Dɩ ŋɩɩ dee, wɩɩ dɔŋ sɩ lɔrɔ kɩɩ ŋɩɩ jaŋ ŋaa ŋ lɛ.”

¹⁵ Ŋɩɩ nɛ baal-la sii a mʋ bʋla pɩ Juu tɩmma-la arɩ Yesu nɛ fa vaarʋ ŋɩɩ.

¹⁶ Yesu sɩ ŋaa ŋɩɩ chɛ-wiesii-la chɛɛŋ, ŋɩɩ nɛ tɩɩ Juu tɩŋŋaa suomo to Yesu naasɩŋ dɩ ba dɔgɩsʋ.

¹⁷ Ŋɩɩ nɛ Yesu bʋla pɩba, “Mɩ Nyɩmma ka tɩŋ nɛ, ŋɩɩ nɛ tɩɩ mɩ maa tɩŋ.”

¹⁸ Yesu sɩ bʋl ŋɩɩ ŋaa Juu tɩmma-la wasa chɩchɛ wombii-la ba sɩ jaŋ to a kpʋʋ. Wɩaa balɩa nɛ ba sɩ dɩ ʋ cheye: Ʋ chei ba chɛ-wiesii-la kɩsɩŋ, aŋ pɛ bʋl dɩ Wɩa nɛ ŋaa ʋ Nyɩmma, a bʋl ŋɩɩ arɩ ʋ dɩ Wɩa magɛ dɔŋɔ nɛ.

Dol-la Wɩa Bie sɩ kɛnɛ

¹⁹ Ŋɩɩ nɛ Yesu bʋla pɩba, “Mɩ bʋl wʋtɩtɩɩ nɛ a pɩpɩma, mɩ-na Wɩa Bie bɩ wɩɩkala wuo ŋaa mɩ tɩtɩa doluŋ lɛ. Mɩ yie ŋɩŋaa wɩalɩŋ mɩ sɩ na dɩ mɩ Nyɩmma ŋaa nɛ. Wɩɩ na-kala ʋ sɩɩ ŋaa nɛ mɩ ma ʋ Bie ŋɩŋaa,

²⁰ bɛɛ wɩaa mɩ Nyɩmma cho mɩ-na ʋ Bie nɛ, a dɩdagɛmɛ wɩalɩŋ kala ʋ tɩtɩa sɩɩ ŋaa. Ʋ jaŋ dagɛmɛ wɩaa a kɩɩ ŋ-la dɩ mɩ ŋaa, dɩ ba ŋaama wʋkpuŋkpere.

²¹ Mɩ Nyɩmma sɩ chɩsɛ nɩalɩŋ sɩ sʋba ba bɩra kɛŋ mɩɩsɩŋ ŋɩɩ, ŋɩɩ tɩtɩa nɛ mɩ ma ʋ Bie joŋ mɩɩsɩŋ a pɩpɩ nɩalɩŋ mɩ sɩ cho.

²² Mɩ Nyɩmma-na bɩ nʋʋkala sarɩya ka dii, ama ʋ joŋ ba kala hɛ mɩ-na ʋ Bie nɩsɩŋ lɛ nɛ.

²³ Ʋ ŋaa ŋɩɩ dɩ nʋʋkala zizil mɩ-na ʋ Bie nɛ, arɩ ba sɩɩ zil mɩ Nyɩmma ŋɩɩ. Nɩɩ-la kala sɩ bɩ mɩ-na Wɩa Bie ka zil, ʋ tɩɩna bɩ mɩ Nyɩmma Wɩa sɩ tɩmmɛ ka zil.

²⁴ Wʋtɩtɩɩ nɛ mɩ bʋla pɩpɩma, nɩɩ-la kala sɩ jegile nɩɩ mɩ niiŋ wɩaa a laa nɩɩ-la ma sɩ tɩmmɛ wɩaa dii, ʋ jaŋ kɛŋ mɩɩsɩ-la sɩ bɩ dɛrɛ. Sarɩya bɩ jaŋ dii tɩɩna, ʋ lɩɩ sʋʋŋ bʋa lɛ nɛ a kɛŋ mɩɩsɩŋ.

²⁵ Wʋtɩtɩɩ nɛ mɩ bʋla pɩpɩma, bʋa-la jaŋ yi, ʋ saa yie ma nɛ, nɩalɩŋ sɩ sʋba jaŋ nɩɩ mɩ-na Wɩa Bie yikoro. Nɩalɩŋ saa sɩ nɩɩ mɩ yikoro, ba jaŋ kɛŋ mɩɩsɩŋ.

²⁶ Mɩ Nyɩmma sɩ kɛŋ doluŋ dɩ ʋ pɩ nɩaa mɩɩsɩŋ ŋɩɩ, ŋɩɩ nɛ ʋ ŋaa mɩ ma ʋ Bie kɛŋ doluŋ dɩ mɩ pɩ nɩaa mɩɩsɩŋ.

²⁷ Ʋ saa pɩ mɩ-na ʋ Bie doluŋ nɛ dɩ mɩ dii nɩaa sarɩya, bɛɛ wɩaa mɩ nɛ ŋaa Nuhuobiine Bie.

²⁸ Má sɩ́ leŋe dɩ wɩɩŋ deeŋ ŋaama wʋkpuŋkpere. Bʋa kʋbala jaŋ yi dɩ nɩalɩŋ kala sɩ sʋba a hɛ bʋɔsʋŋ lɛ nɩɩ mɩ yikoro,

²⁹ a sii ba bʋɔsʋŋ lɛ a kʋ lɩɩ. Nɩalɩŋ sɩ ŋaa wʋzɔŋŋɔɔ jaŋ sii a kɛŋ mɩɩsɩŋ, nɩalɩŋ ma sɩ ŋaa wʋbɔŋŋɔɔ jaŋ sii, dɩ Wɩa dii ba sarɩya a joŋ cheeriŋ pɩba.”

³⁰ Ŋɩɩ nɛ Yesu bɩra bʋl, “Mɩ-na bɩ wɩɩkala wuo ŋaa mɩ tɩtɩa doluŋ lɛ. Mɩ yie dii sarɩya arɩ Wɩa sɩ sɩ mɩ dii ŋɩɩ nɛ. Ŋɩɩ wɩaa mɩ sɩ yie dii sarɩya-la ŋɩɩ, ʋ ŋaa wʋtɩtɩɩ nɛ, bɛɛ wɩaa mɩ bɩ chɛ dɩ mɩ ŋaa wɩɩ-la mɩ sɩɩ chɛ, ama wɩɩ-la nɩɩ-la sɩ tɩmmɛ sɩɩ chɛ.

³¹ Dɩ mɩ dʋndʋŋa nɛ bʋl mɩ wɩaa, ʋ bɩ yuŋuŋ jaŋ kɛŋ.

³² Ama nʋʋ ma nɛ hɛ nɩmɛ a jɩŋ mɩ wɩaa a bʋbʋlba. Mɩ saa jɩma wɩalɩŋ ʋ sɩɩ bʋl a tɩgɛ mɩ lɛ, ba ŋaa wʋtɩtɩɩba nɛ.

³³ Ma tɩŋ ma tɩndaaraa nɛ ba mʋ Jɔɔŋ teeŋ a pɩɛsɛ mɩ wɩaa. Jɔɔŋ bʋl wʋtɩtɩɩ nɛ pɩba a tɩgɛ mɩ lɛ.

³⁴ Ʋ saa bɩ naga wɩalɩŋ nuhuobiinee sɩ bʋla a tɩgɛ mɩ lɛ wɩaa nɛ mɩ chɩl, ama mɩɩ bʋl wɩɩŋ deeŋ dɩ ma kɛŋ ma tɩtɩa hɛ dɔŋɔ dɩ Wɩa wuo laama ta nɛ.

³⁵ Jɔɔŋ fa nagɛ chaanɩŋ nɛ a chaanɛ, ma fa cho dɩ ma nɩɩ ʋ chaaŋ-la sɩma mʋapɩlɩɩ.

³⁶ Ama wɩɩŋ dɔŋɔ hɛ nɩmɛ a laa mɩ nyuŋ a bʋbʋl wɩaa, ʋ nɛ kɩɩ Jɔɔŋ. Tɩntɩmɩɩ-la mɩ sɩɩ tɩŋ nɛ ŋɩɩ, tɩntɩmɩɩ-la mɩ Nyɩmma sɩ joŋo pɩmɛ dɩ mɩ tɩŋ. Ŋɩɩ daga arɩ mɩ Nyɩmma nɛ tɩmmɛ.

³⁷ Mɩ Nyɩmma-la sɩ tɩmmɛ, ʋ maa bʋl mɩ wɩaa nɛ. Ma ha bɩ ʋ yikoro nɩa, ma ha bɩ ʋ na arɩ ma sɩaa ma.

³⁸ Ʋ niiŋ wɩaa bɩ ma lɛ hɛ, bɛɛ wɩaa ma bɩ mɩ-na nɩɩ-la ʋ sɩ tɩma wɩaa laa dii.

³⁹ Ma yie fɩɛsɛ sɩɩŋ a kɩkarɩmɛ Wɩa teniŋ. Ma bɩɩna arɩ ma nɩɩ ŋaa ŋɩɩ, ma jaŋ wuo kɛŋ mɩɩsɩ-la sɩ bɩ dɛrɛ. Wɩa teŋ-la ma sɩɩ karɩmʋ ma paala bʋl mɩ wɩaa nɛ.

⁴⁰ Ka ma vɩa dɩ ma kɔ mɩ teeŋ a wuo kɛŋ mɩɩsɩŋ.

⁴¹ Mɩ bɩ chɛ dɩ nuhuobiinee bɛsɛ mɩ lɛ.

⁴² Mɩ jɩma arɩ ma tʋɔŋ lɛ ma bɩ Wɩa cho.

⁴³ Mɩ kɔ mɩ Nyɩmma doluŋ lɛ nɛ, ka ma bɩ mɩ kɛnɛ woruŋ. Dɩ nʋʋ dɔŋ nɛ fa kɔ ʋ tɩtɩa doluŋ lɛ, ʋ nɛ ma fa jaŋ kɛŋ woruŋ.

⁴⁴ Ma cho dɩ nɩaa bɛsɛ ma lɛ nɛ, ama ma bɩ chɛ dɩ Wɩa nɛ bɛsɛ ma lɛ. Ɛɛ nɛ saa ma jaŋ wuo laa mɩ wɩaa dii?

⁴⁵ Má sɩ́ bɩɩna arɩ mɩ jaŋ joŋ cheeriŋ pɩma mɩ Nyɩmma sɩpaaŋ. Mosis nɛ jaŋ joŋ cheeriŋ pɩma. Ma yɩɛlaa kala hɛ ʋ lɛ nɛ.

⁴⁶ Dɩ ma nɛ sɛnɛ fa laa Mosis wɩaa dii, ma fa jaŋ laa mɩ ma wɩaa dii, bɛɛ wɩaa mɩ wɩaa nɛ Mosis fa ŋmʋnsɛ ŋɩɩ.

⁴⁷ Ama dɩ ma bɩ wɩalɩŋ ʋ sɩ ŋmʋnsa laa dii, ɛɛ nɛ ma jaŋ wuo laa wɩalɩŋ mɩ sɩɩ bʋl dii?”