Jɔɔŋ 20 - WƖA TENIŊ

Yesu lɩɩ ʋ bʋa lɛ

¹ Lahadi chɛɛŋ sɩɩpʋʋraa dɩ leriŋ kala ha bire, Mɛɛrɩ Magɩdalɩŋ mʋ bʋa-la leriŋ a na tabɩɩ-la ba sɩ joŋo tɔ bʋa-la niiŋ, dɩ ʋ suro.

² Ŋɩɩ nɛ ʋ fá mʋ Saamɔŋ Pɩɩta arɩ Yesu harɩ-tooro-la dɔŋɔ teeŋ, nɩɩ-la Yesu fa sɩ cho woruŋ, a bʋla pɩba, “Ba lɩɩsɛ La Tɩɩna Yesu bʋa-la tʋɔŋ nɛ. La bɩ jɩŋ lee-la kala ba sɩ joŋu bil.”

³ Ŋɩɩ nɛ Pɩɩta arɩ Yesu harɩ-tooru-la dɔŋɔ sii mʋmʋ bʋa-la leriŋ.

⁴ Ba kala balɩa faa fá nɛ. Ŋɩɩ nɛ dɔŋɔ-la tɩɩna fá kieli Pɩɩta, a laa sɩpaaŋ mʋ bʋa-la leriŋ.

⁵ Ʋ sɩ yi bʋa-la leriŋ, ʋ bɩ bʋa-la tʋɔŋ jʋa. Ʋ tuu tiŋ nɛ a nyilimi a na gɛnnɩ-la ba fa sɩ joŋo bɛ Yesu, dɩ ba pɩna.

⁶ Pɩɩta to harɩŋ kɔ a kʋ jʋʋ bʋa-la tʋɔŋ, a na gɛnnɩ-la ba fa sɩ joŋo bɛ Yesu, dɩ ba pɩna,

⁷ a pɛ gɛrɩ-la ba fa sɩ joŋo bɛ Yesu nyuŋ, dɩ ʋ chuolo pɩŋ ʋ dʋndʋŋa.

⁸ Ŋɩɩ nɛ nɩɩ-la sɩ laa sɩpaaŋ mʋ bʋa-la leriŋ ma jʋʋ bʋa-la tʋɔŋ a na wɩɩ-la sɩ ŋaa, a laa dii.

⁹ Ama ba bɩ wɩɩ-la ba fa sɩ ŋmʋnsa Wɩa teniŋ tʋɔŋ bʋbʋɔŋ jɩŋ arɩ ʋ maga dɩ Yesu sii sʋʋŋ lɛ nɛ.

¹⁰ Ŋɩɩ nɛ Yesu harɩ-tooro-la mɩɩra mʋ ba dɩɩsɩŋ.

Yesu kɛŋ ʋ tɩtɩa kʋ dagɛ Mɛɛrɩ Magɩdalɩŋ

¹¹ Mɛɛrɩ-na fa chɩŋ bʋa-la leriŋ nɛ aa yel. Ʋʋ yel ŋɩɩ nɛ aŋ pɛ nyinyilimi bʋa-la tʋɔŋ,

¹² a na Wɩa tɩndaaraa balɩa bʋa-la tʋɔŋ dɩ ba laalɛ gɛrɩ-pʋllʋŋ. Dɔŋɔ hɔŋ Yesu nyuŋ fa sɩ mʋ lee-la, dɔŋɔ ma hɔŋ ʋ naasɩŋ fa sɩ mʋ lee-la.

¹³ Ŋɩɩ nɛ ba pɩɛsʋ, “Haal, bɛɛ nɛ tɩɩ ŋ yiyel?” Ŋɩɩ nɛ ʋ bʋl, “Ba joŋ mɩ Tɩɩna Yesu kaa lɛl nɛ. Mɩ bɩ jɩŋ ba sɩ joŋu kaa mʋ bil lee-la.”

¹⁴ Ʋ sɩ bʋl ŋɩɩ dɛrɛ aŋ ŋaa dɩ ʋ bɩrɩmɛ, dɩ ʋ na baal dɩ ʋ chɩŋ nɩmɛ. Yesu nɛ fa ŋɩɩ. Ama Mɛɛrɩ fa bɩ jɩŋ arɩ Yesu nɛ.

¹⁵ Ŋɩɩ nɛ Yesu ma pɩɛsɛ Mɛɛrɩ, “Bɛɛ nɛ tɩɩ ŋ yiyel? Kʋbɛɛ nɛ ŋ chɩchɛ?” Mɛɛrɩ fa bɩɩna baal-la sɩɩ beŋ ŋmaŋkaa-la nɛ. Ŋɩɩ nɛ ʋ pɩɛsʋ, “Kʋhɩaŋ, dɩ ŋ nɛ joŋo, dagɛmɛ lee-la ŋ sɩ kaa mʋ bil, dɩ mɩ mʋ joŋ.”

¹⁶ Ŋɩɩ nɛ Yesu yɩrʋ a bʋl, “Mɛɛrɩ.” Ŋɩɩ nɛ ʋ mɩɩra daasɛ aŋ bʋl arɩ Hiburu yikoro, “Raboni!” (Raboni bʋbʋɔŋ nɛ kʋhɩaŋ.)

¹⁷ Ŋɩɩ nɛ Yesu bʋla pʋ, “Sɩ́ mɩ kɛŋ. Mɩ ha bɩ mɩ Nyɩmma teeŋ jɩla. Ama mʋ bʋla pɩ mɩ naambiiriŋ arɩ mɩ jaŋ jɩl mɩ Nyɩmma teeŋ. Ʋ ŋaa ma ma Nyɩmma nɛ a ŋaa mɩ Wɩa, a ŋaa ma ma Wɩa.”

¹⁸ Ŋɩɩ nɛ Mɛɛrɩ Magɩdalɩŋ mʋ Yesu harɩ-tooro-la teeŋ, a bʋla pɩba dɩ ʋ na La Tɩɩna Yesu nɛ, a bʋl wɩalɩŋ ma kala ʋ sɩ bʋla pʋ a pɩba.

Yesu kɛŋ ʋ tɩtɩa kʋ dagɛ ʋ harɩ-tooroo

¹⁹ Lahadi chɛɛŋ tɩtaŋɩŋ ʋ harɩ-tooroo hilimi dɩa tʋɔŋ aŋ kɛŋ boiŋ yagɛ. Baa fá Juu tɩmma-la nɛ. Ŋɩɩ nɛ tɩɩ ba kɛŋ borusuŋ tɔ a yagɛ. Ŋɩɩ nɛ Yesu kʋ chɩŋ ba tʋɔŋ aŋ bʋl, “Ma jaŋ hɔŋ arɩ fɩɛlɩŋ.”

²⁰ Ʋ sɩ bʋl ŋɩɩ dɛrɛ, ʋ kɛŋ ʋ nɩsaa arɩ ʋ sɛmɛ dagɛba. Ʋ harɩ-tooroo kala tʋɔŋ tɔrɛ ba sɩ na ba Tɩɩna.

²¹ Ŋɩɩ nɛ Yesu bɩra bʋla pɩba, “Ma jaŋ hɔŋ arɩ fɩɛlɩŋ. Mɩ Nyɩmma sɩ tɩmmɛ ŋɩɩ, ŋɩɩ tɩtɩa nɛ mɩ maa timma.”

²² Ʋ sɩ bʋl ŋɩɩ dɛrɛ, ʋ wiese hɛ ba lɛ aŋ bʋl, “Má laa Wɩa Dɩŋ-zɔmʋŋ dɩ ʋ hɛ ma lɛ.

²³ Dɩ ma nɛ joŋ nʋʋ wʋbɔŋŋɔɔ a chɛʋ, ʋ bɩra bɩ wʋbɔŋ kɛnɛ. Dɩ ma nɛ bɩra bɩ nʋʋ wʋbɔŋŋɔɔ joŋo chɛʋ, ʋ ha kɛŋ ʋ wʋbɔŋŋɔɔ nɛ.”

Yesu kɛŋ ʋ tɩtɩa kʋ dagɛ Tɔmas

²⁴ Bʋa-la lɛ Yesu sɩ kɛŋ ʋ tɩtɩa kʋ dagɛ ʋ harɩ-tooroo, ʋ harɩ-tooro-la dɔŋɔ ba sɩɩ yɩrɛ Tɔmas fa tuo. Ʋ yɩrɩŋ dɔŋɔ nɛ fa daalɩarɩŋ.

²⁵ Ŋɩɩ nɛ harɩ-tooro-la dɔnsʋŋ bʋla pʋ, “La na La Tɩɩna.” Ŋɩɩ nɛ Tɔmas bʋla pɩba, “See dɩ mɩ na hɛmɛ-la bʋɔsʋŋ ʋ nɩsaa lɛ, a joŋ mɩ neniiŋ hɛ bʋa-la lɛ, a joŋ mɩ neniiŋ hɛ ʋ sɛmɛ bʋa-la ma lɛ, mɩ bɩ jaŋ laa dii.”

²⁶ Tapʋlaa chori pɛgɛ Yesu harɩ-tooro-la bɩra jʋʋ dɩa a kɛŋ boiŋ yagɛ. Bʋa-la-na lɛ dɩ Tɔmas hɛ ba tʋɔŋ. Yesu kʋ jʋʋ chɩŋ ba tʋɔŋ aŋ bʋl, “Ma jaŋ hɔŋ arɩ fɩɛlɩŋ.”

²⁷ Ŋɩɩ nɛ ʋ bʋla pɩ Tɔmas, “Joŋ ŋ neniiŋ a hɛ mɩ nɩsɩŋ bʋa-la lɛ aŋ beŋ mɩ nɩsaa, aŋ kɛŋ ŋ nɩsɩŋ hɛ mɩ sɛmɛ bʋa-la ma lɛ a na, aŋ laa mɩ wɩaa dii, aŋ sɩ́ kaa lɛrɛ.”

²⁸ Ŋɩɩ nɛ Tɔmas yɩrʋ a bʋl, “Mɩ Tɩɩna, ŋ nɛ mɩ Wɩa.”

²⁹ Ŋɩɩ nɛ Yesu pɩɛsʋ, “Ŋ sɩ namɛ nɛ tɩɩ ŋ laa mɩ wɩaa dii koo? Nɩalɩŋ sɩ bɩ mɩ na aŋ laa mɩ wɩaa dii, ba tʋɔŋ jaŋ tɔrɛ.”

³⁰ Yesu ŋaa wʋmagɩlaa dɔnsʋŋ yʋgɛ ʋ harɩ-tooroo na, mɩ sɩ bɩ ŋmʋnsa hɛ teniŋ deeŋ tʋɔŋ.

³¹ Ama mɩ ŋmʋnsɛ wɩaa deemba dɩ ma wuo laa dii arɩ Yesu nɛ ŋaa Kirisito, Nɩɩ-la Wɩa sɩ lɩɩsa aŋ pɛ ŋaa Wɩa Bie ma. Dɩ ma nɛ laa wɩaa deemba dii, ma jaŋ kɛŋ mɩɩsɩŋ ʋ yɩrɩŋ lɛ.