Jɔɔŋ 2 - WƖA TENIŊ

Ba gbieli hajaarɩ gbiele Kena lɛ

¹ Tapʋlaa balɩa sɩ bala, baa chɛ dɩ ba gbieli hajaarɩ gbiele taŋ kʋbala lɛ baa yɩrɛ Kena, a hɛ Galilii tinteeŋ lɛ. Yesu naaŋ ma fa hɛ nɩmɛ.

² Ba fa yɩrɛ Yesu arɩ ʋ harɩ-tooroo ma hajaarɩ gbiele-la leriŋ nɛ.

³ Ba sɩɩ gbieli gbiele-la ŋɩɩ, ba nyʋnyʋa tɩɩnɛnɛɛ sɩnɩŋ. Sɩŋ-la sɩ dɛrɛ, Yesu naaŋ bʋla pʋ dɩ sɩŋ-la dɛrɛ nɛ.

⁴ Ŋɩɩ nɛ Yesu bʋla pʋ, “Ʋ bɩ maga dɩ ŋ dagɛmɛ wɩɩ-la mɩ sɩ jaŋ ŋaa. Bʋa-la lɛ mɩ sɩ jaŋ tɩŋ tɩntɩŋŋaa ha bɩ yie.”

⁵ Yesu naaŋ bʋla pɩ dɩa-la tɩntɩnnaa, “Má ŋaa wɩɩ-la kala ʋ sɩ bʋla pɩma.”

⁶ Juu tɩŋŋaa fa kɛŋ ba Wɩɩchʋɔlɛ wombiiŋ nɛ aa sɔŋ lɩɩŋ. Ŋɩɩ wɩaa pupoi-balaa balɩdʋ nɛ fa hɛ nɩmɛ arɩ lɩɩŋ. Kʋŋkala tʋɔŋ lɩɩŋ yi galaŋ mara a kaa mʋ galaŋ mara arɩ fii.

⁷ Ŋɩɩ nɛ Yesu bʋla pɩ dɩa-la tɩntɩnnaa, “Má ŋaa lɩɩŋ a su puposu-la.” Ba ŋaa lɩɩŋ su puposu-la pɩlɩm pɩlɩm.

⁸ Ŋɩɩ nɛ Yesu bɩra bʋla pɩba, “Ma ŋaa lɩɩ-la pupoi-la tʋɔŋ a kaa mʋ pɩ nɩɩ-la sɩɩ beŋ gbiele-la.” Ba ŋaa mʋ pʋ.

⁹ Ʋ laa lɩɩ-la nyʋa dɩ ʋ bɩrɩmɛ sɩnɩŋ. Ʋ bɩ jɩŋ lee-la ba sɩ na sɩŋ-la. Ama dɩa-la tɩntɩnnaa-na jɩŋ. Ŋɩɩ nɛ ʋ yɩrɛ haal-la tɩɩna

¹⁰ a bʋla pʋ, “Gbiele-na kala lɛ ba yie laa sɩpaaŋ kɛŋ sɩ-zɔmʋŋ nɛ kʋ lɩɩ ba nyʋa. Nʋʋkala sɩ nyʋa vɔgɛ, ŋ saa-na kɛŋ sɩŋ-la sɩ bɩ sɩŋ a kaa to harɩŋ kɔ. Ka ŋ-na joŋ sɩ-zɔmʋŋ bil harɩŋ a kʋ yi bʋa deeŋ kala lɛ.”

¹¹ Yesu sɩ ŋaa lɩɩŋ bɩrɩmɛ sɩnɩŋ Kena lɛ Galilii tinteeŋ nɛ ŋaa ʋ wʋmagɩl bumbuŋ ʋ sɩ ŋaa. Nɩmɛ nɛ ʋ dagɛ ŋɩɩ Wɩa doluŋ sɩ hɛ ʋ lɛ. Ʋ harɩ-tooroo sɩ na ŋɩɩ, ba laa ʋ wɩaa dii.

¹² A lɩɩ gbiele-la harɩŋ, Yesu arɩ ʋ naaŋ arɩ ʋ ŋaanaa arɩ ʋ harɩ-tooroo sii mʋ Kapɛnam tinteeŋ a hɛ nɩmɛ tapʋlaa baŋmɛnɛ.

Yesu jʋʋ Wɩa dɩɩ-balɩŋ

¹³ Ʋ fa ka mʋa, ka dɩ Juu tɩŋŋaa dɩɩsɩŋ kiele bal gbiele-la yi. Ŋɩɩ nɛ Yesu sii mʋ Jerusalɛm a jʋʋ Wɩa dɩɩ-balɩŋ.

¹⁴ Ʋ sɩ jʋʋ nɩmɛ, ʋ na nɩaa dɩ baa yallɛ nɛsɩŋ, piesee arɩ kokosuŋ. Nɩalɩŋ sɩɩ yɛrɛ moribiee ma hɔŋ ba teebʋlba sɛsɩŋ.

¹⁵ Ŋɩɩ nɛ Yesu kɛŋ ŋmɛnɩŋ a bɩrɩmɛ chɩba a kiri nɩalɩŋ arɩ ba piesee arɩ ba nɛsɩŋ kala ta ba lɩɩ Wɩa dɩɩ-bal-la lɛ, aŋ kɛŋ moribii-yɛrɩrɛ-la ma teebʋlba-la kaa bɩrɩma chu, aŋ kɛŋ ba moribii-biiŋ ma jaasɛ tinteeŋ.

¹⁶ Ŋɩɩ nɛ ka ʋ bʋla pɩ nɩalɩŋ ma sɩɩ yallɛ kokosuŋ, “Má kaa lɩɩ dɩa-la tʋɔŋ. Má sɩ́ mɩ Nyɩmma dɩa kaa bɩrɩmɛ yɔbɔ.”

¹⁷ Ʋ harɩ-tooroo liisi wɩɩ-la ba sɩ ŋmʋnsa Wɩa teniŋ tʋɔŋ a bʋl, “Wɩa dɩa wɩaa ka diimi nɛ woruŋ a nagɛ nyiniŋ.”

¹⁸ Ŋɩɩ nɛ Juu tɩŋŋaa mɩɩra kɔ ʋ teeŋ a pɩɛsʋ, “Bɛɛ kʋŋ wʋmagɩl nɛ ŋ jaŋ wuo joŋo dagɛla arɩ ŋ kɛŋ doluŋ dɩ ŋ wuo ŋaa wɩɩŋ deeŋ?”

¹⁹ Ŋɩɩ nɛ Yesu bʋla pɩba, “Má ŋmoo Wɩa dɩɩ-balɩŋ deeŋ lo, mɩ jaŋ joŋ tapʋlaa batori a bɩra saaʋ.”

²⁰ Ŋɩɩ nɛ ba bʋla pʋ, “Jɩsɩŋ mahɩŋ balɩa arɩ balɩdʋ nɛ ba joŋo saa Wɩa dɩɩ-balɩŋ deeŋ, ka ŋ-na bʋl dɩ ŋ jaŋ kɛŋ tapʋlaa batori saaʋ koo?”

²¹ Ama Yesu sɩ bʋl Wɩa dɩɩ-bal-la wɩaa ŋɩɩ, ʋ tɩtɩa yaraa wɩaa nɛ ʋ bʋbʋl ŋɩɩ.

²² Bʋa-la lɛ ʋ sɩ sii sʋʋŋ lɛ nɛ ʋ harɩ-tooroo liise yi wɩɩ-la ʋ fa sɩ bʋla lɛ. Ŋɩɩ nɛ ba laa wɩalɩŋ ba fa sɩ ŋmʋnsa Wɩa teniŋ tʋɔŋ dii, a laa wɩalɩŋ ma Yesu sɩ bʋla dii.

²³ Yesu fa sɩ hɛ Jerusalɛm lɛ, dɩɩsɩŋ kiele bal gbiele-la lɛ, nɩaa yʋga a laa ʋ wɩaa dii a tɩŋ ba sɩ na wʋmagɩla-la ʋ sɩɩ ŋaa.

²⁴ Ama Yesu bɩ ʋ tɩtɩa kaa pʋllɛ ba teeŋ, bɛɛ wɩaa ʋ jɩŋ nuhuobiinee kala nɛ woruŋ.

²⁵ Ʋ fa bɩ maga dɩ nʋʋkala bɩra bʋl nuhuobiinee wɩaa pʋ, bɛɛ wɩaa ʋ jɩŋ nuhuobiinee tʋɔŋ wʋkɛnɩŋ kala nɛ.