Jɔɔŋ 16 - WƖA TENIŊ

¹ Mɩ bʋl wɩaa deemba kala pɩpɩma dɩ ma sɩ́ wɩalɩŋ ma sɩ laa dii joŋo ta.

² Ba jaŋ kirima ta Wɩɩchʋɔlɛ dɩɩsɩŋ lɛ. Bʋa dɔŋ jaŋ yi dɩ nɩaa kpʋma aŋ bɩɩnɛ baa to Wɩa wombiiŋ nɛ ŋɩɩ.

³ Ba jaŋ ŋaa wɩaa deemba kala a tɩŋ ba sɩ́ bɩ mɩ Nyɩmma jɩŋ, a bɩ mɩ ma jɩŋ.

⁴ Mɩ bʋl wɩaa deemba kala pɩpɩma dɩ bʋa-la nɛ kʋ yi dɩ wɩaa deemba ŋɩŋaa, ma jaŋ liisi arɩ mɩ bʋla pɩma. Mɩ dɩ ma kala fa sɩɩ to dɔŋɔ, ŋɩɩ nɛ tɩɩ mɩ bɩ wɩaa deemba bʋla pɩma.

Wɩa Dɩŋ-zɔmʋŋ tɩntɩŋŋaa

⁵ Ama lɛɛlɛ mɩɩ mʋ Nɩɩ-la sɩ tɩmmɛ teeŋ nɛ, aŋ ka ma kʋŋkala bɩ mɩ pɩɛsa arɩ nɩɩ nɛ mɩɩ mʋ.

⁶ Mɩ sɩ bʋl wɩaa deemba pɩma lɛɛlɛ ŋ-la, ma tʋɔŋ chaasa chei nɛ.

⁷ Ama wʋtɩtɩɩ nɛ mɩ bʋlaa pɩma ŋ-la: Mɩ sɩɩ mʋ ŋɩɩ, ʋ jaŋ zɔmɔ pɩma. Dɩ mɩ nɛ bɩ mʋa, Wɩa Dɩŋ-zɔmʋŋ sɩ jaŋ kɔ a pɛ ma lɛ bɩ jaŋ kɔ. Ama dɩ mɩ nɛ mʋa, mɩ jaŋ leŋ dɩ ʋ kɔ.

⁸ Dɩ ʋ nɛ saa kɔ, ʋ jaŋ leŋ dɩ dʋnɩa nɩaa jɩŋ arɩ ba ŋaa wʋbɔŋŋɔɔ nɛ. Ʋ jaŋ bɩra dagɛba ŋɩɩ ba sɩ jaŋ to a kɛŋ tʋɔpʋla Wɩa sɩpaaŋ, a bɩra dagɛba arɩ Wɩa jaŋ dii ba sarɩya.

⁹ Ba jaŋ jɩŋ arɩ ba sɩ bɩ mɩ wɩaa laa dii, ʋ ŋɩɩ ŋaa wʋbɔŋ nɛ.

¹⁰ Mɩ sɩ mɩɩraa mʋ mɩ Nyɩmma teeŋ ŋɩɩ, ma bɩra bɩ jaŋ namɛ. Ʋ ŋɩɩ ma jaŋ dagɛ arɩ mɩ kɛŋ tʋɔpʋla nɛ Wɩa sɩpaaŋ.

¹¹ Wɩa sɩ folo dii dʋnɩa kuoro Sɩtaanɩ sarɩya ŋɩɩ, ba jaŋ jɩŋ arɩ Wɩa jaŋ dii ba ma sarɩya.

¹² Wɩaa yʋga nɛ mɩ ha kɛŋ dɩ mɩ bʋla pɩma, ama ma bɩ ba wuo nyalɩmɛ.

¹³ Ama dɩ Wɩa Dɩŋ-zɔŋ-la nɛ kɔ, ʋ jaŋ dagɛma wʋtɩtɩɩ kala. Ʋ bɩ jaŋ bʋbʋl wɩaa ʋ tɩtɩa doluŋ lɛ, ama wɩalɩŋ kala ʋ sɩ nɩa mɩ Nyɩmma niiŋ lɛ nɛ ʋ jaŋ bʋl. Ʋ jaŋ dagɛma wɩalɩŋ kala sɩ jaŋ ŋaa.

¹⁴ Ʋ jaŋ leŋ dɩ nɩaa yɩrɛ mɩ yɩrɩŋ, bɛɛ wɩaa wɩalɩŋ kala mɩ sɩ kɛnɛ mɩ bʋl, ʋ jaŋ kaa kʋ bʋla pɩma.

¹⁵ Kʋŋkala mɩ Nyɩmma sɩ kɛnɛ ŋaa mɩ kʋŋ nɛ. Ŋɩɩ nɛ tɩɩ mɩ bʋla pɩma arɩ wɩalɩŋ kala mɩ sɩ kɛnɛ, Wɩa Dɩŋ-zɔŋ-la jaŋ kaa kʋ bʋla pɩma.”

Yesu bʋla pɩ ʋ harɩ-tooroo arɩ ba tʋɔŋ jaŋ tɔrɛ

¹⁶ Ŋɩɩ nɛ Yesu bɩra bʋla pɩba, “Ʋ bɩ jaŋ dieni ma bɩra bɩ jaŋ namɛ. Tapʋlaa baŋmɛnɛ harɩŋ ma jaŋ bɩra namɛ.”

¹⁷ Ŋɩɩ nɛ ʋ harɩ-tooroo dɔnsʋŋ pɩpɩɛsɛ dɔŋɔ, “Wɩɩŋ deeŋ bʋbʋɔŋ nɛ bɛɛ? Ʋ bʋla pɩla arɩ tapʋlaa baŋmɛnɛ la bɩ jaŋ naʋ, dɩ tapʋlaa baŋmɛnɛ harɩŋ la bɩra jaŋ naʋ. Ʋ bɩra bʋla arɩ ʋ sɩ jaŋ mʋ ʋ Nyɩmma teeŋ nɛ tɩɩ la bɩra bɩ jaŋ naʋ.

¹⁸ Ʋ sɩ sɩ tapʋlaa baŋmɛnɛ deeŋ, ʋ bʋbʋɔŋ nɛ bɛɛ? La bɩ ʋ bʋbʋɔŋ jɩŋ.”

¹⁹ Yesu jɩma arɩ baa chɛ dɩ ba pɩɛsʋ nɛ. Ŋɩɩ nɛ ʋ bʋla pɩba, “Mɩ sɩ sɩ tapʋlaa baŋmɛnɛ ma bɩ jaŋ namɛ, tapʋlaa baŋmɛnɛ harɩŋ ma jaŋ bɩra namɛ, ŋɩɩ wɩaa nɛ ma pɩpɩɛsɛ dɔŋɔɔ?

²⁰ Wʋtɩtɩɩ nɛ mɩ bʋlaa pɩma, ma jaŋ ŋmuŋmoo niiŋ ka dɩ dʋnɩa nɩaa tʋɔŋ tɔrɛ, ma tʋɔŋ jaŋ chei, ama ma tʋɔ-chei-la jaŋ mɩɩra bɩrɩmɛ tʋɔtɔrʋŋ.

²¹ Dɩ haala luoruŋ nɩɩ wɩɩ dɩ ʋ chɩchɛ ʋ lʋl, ʋ yie tʋʋnɛ niiŋ nɛ, bɛɛ wɩaa ʋ hɛɛŋ bʋa yie nɛ. Ama dɩ ʋ nɛ kʋ lʋl bile dɛrɛ, ʋ yʋ ʋ hɛɛ-la kala lɛ, ka ʋ tʋɔŋ tɔrɛ a tɩŋ ʋ sɩ lʋl bii-falɩŋ hɛ dʋnɩa lɛ.

²² Ŋɩɩ nɛ saa ʋ jaŋ nagɛ ma ma lɛ. Lɛɛlɛ ma tʋɔŋ cheye nɛ, ama mɩ jaŋ bɩra nama dɩ ma tʋɔŋ kala tɔrɛ. Bʋa-la lɛ nʋʋkala bɩ jaŋ wuo ŋaa dɩ ma tʋɔŋ bɩra chei.

²³ Dɩ tapʋlɩɩ-la nɛ yie, ma bɩ jaŋ pɩɛsɛmɛ chɩchɛ kʋŋkala. Wʋtɩtɩɩ nɛ mɩ bʋlaa pɩma, mɩ Nyɩmma jaŋ pɩma kʋŋkala ma sɩ pɩɛsʋ chɩchɛ mɩ yɩrɩŋ lɛ.

²⁴ Lɛɛlɛ ŋ-la, ma ha bɩ kʋŋkala pɩɛsa chɩchɛ mɩ yɩrɩŋ lɛ. Ŋɩɩ wɩaa má saa pɩɛsʋ, ʋ jaŋ joŋo pɩma, dɩ ma tʋɔŋ faasa tɔrɛ a mʋ dɛrɛ.

²⁵ Wɩaa deemba kala mɩ sɩɩ bʋl, namagaba nɛ mɩɩ magɛ. Ama bʋa kʋbala jaŋ yi, mɩ bɩra bɩ jaŋ magɛ namagaba, mɩ jaŋ chaasa bʋl wɩaa pɩma a mʋ tɩgɛ mɩ Nyɩmma lɛ, dɩ ma jɩŋ ba bʋbʋɔŋ woruŋ.

²⁶ Dɩ tapʋlɩɩ-la nɛ yie, ma nɛ jaŋ pɩɛsʋ chɩchɛ kɩaa mɩ yɩrɩŋ lɛ. Mɩ bɩ sɩ mɩ nɛ jaŋ sʋla pɩma,

²⁷ bɛɛ wɩaa mɩ Nyɩmma tɩtɩa ma choma nɛ. Ma chomi nɛ a laa mɩ wɩaa dii arɩ mɩ lɩɩ ʋ teeŋ nɛ. Ŋɩɩ nɛ tɩɩ ʋ ma choma.

²⁸ Mɩ lɩɩ mɩ Nyɩmma teeŋ nɛ a kʋ tuu dʋnɩa. Lɛɛlɛ mɩ saa jaŋ leŋ dʋnɩa aŋ mɩɩra mʋ mɩ Nyɩmma teeŋ.”

²⁹ Ŋɩɩ nɛ ʋ harɩ-tooro-la bʋla pʋ, “Lɛɛlɛ ŋ chaasaa bʋl wɩaa nɛ. Ŋ bɩra bɩ namagaba ka magɛ.

³⁰ Lɛɛlɛ la jɩma dɩ ŋ jɩŋ wɩɩ-wɩɩkala nɛ, ŋ bɩ chɛ dɩ nʋʋkala pɩɛsɩŋ wɩɩkala. Wɩɩŋ deeŋ nɛ leŋe la jɩŋ arɩ ŋ lɩɩ Wɩa teeŋ nɛ.”

³¹ Ŋɩɩ nɛ Yesu pɩɛsɛba, “Lɛɛlɛ saa ma laa mɩ wɩaa dii nɛɛ?

³² Bʋa kʋbala jaŋ yi, ʋ saa paala yi nɛ, ma kala jaŋ pɩsɛ a mʋ ma dɩɩsɩŋ, aŋ ka mɩ dʋndʋŋa. Ama saa, mɩ bɩ jaŋ ŋaa mɩ dʋndʋŋ. Mɩ Nyɩmma hɛ mɩ lɛ nɛ.

³³ Mɩ bʋl wɩaa deemba pɩma dɩ ma wuo hɔŋ arɩ fɩɛlɩŋ nɛ. Dʋnɩa deeŋ tʋɔŋ ma jaŋ na hɛɛŋ. Ama má leŋ dɩ ma nyuŋ nyaasɛ. Mɩ yuo dii dʋnɩa nɛ.”