Jɔɔŋ 13 - WƖA TENIŊ

Yesu sɔŋ ʋ harɩ-tooroo naasɩŋ

¹ Ʋ fa ka tapʋl-bala nɛ, ka dɩ Juu tɩŋŋaa dɩɩsɩŋ kiele bal gbiele-la yi. Yesu jɩma arɩ bʋa-la lɛ sɩ maga dɩ ʋ lɩɩ dʋnɩa deeŋ lɛ a mʋ ʋ Nyɩmma teeŋ yie nɛ. Ʋ cho nɩalɩŋ sɩɩ to ʋ harɩŋ nɛ dʋnɩa deeŋ lɛ. Bʋa deeŋ lɛ nɛ ʋ chaasa dagɛ chono-la kɩŋkɛŋ ʋ sɩ kɛnɛ arɩ ʋ harɩ-tooroo.

² Tapʋlɩɩ-la dɩdaanɩŋ Yesu arɩ ʋ harɩ-tooroo hɔŋ dɩ ba dii kʋdiilee. Bʋa deeŋ lɛ dɩ Sɩtaanɩ kʋ jʋʋ Saamɔŋ bie Judas Ɩsɩkarɔt dɩ ʋ joŋ Yesu yallɛ.

³ Yesu fa jɩma arɩ ʋ Nyɩmma joŋ kʋŋkala doluŋ hɛ ʋ nɩsɩŋ lɛ nɛ. Ʋ jɩma ʋ lɩɩ Wɩa teeŋ nɛ, a bɩra jɩŋ arɩ ʋ jaŋ mɩɩra mʋ Wɩa teeŋ.

⁴ Ŋɩɩ nɛ Yesu sii kʋdiile-la nyuŋ, a wuri ʋ gɛrɩ-balɩŋ bil, aŋ joŋ pɔpɔ vɔɔ ʋ tɩŋa,

⁵ a ŋaa lɩɩŋ hɛ taasɩ-gbaŋa lɛ, a suomo sʋsɔŋ ʋ harɩ-tooro-la naasɩŋ a kɛŋ pɔpɔ-la sɩ vɔɔ ʋ tɩŋa tɩtɩɩgɛ.

⁶ Ʋ sɩ kʋ yi Saamɔŋ Pɩɩta lɛ, ŋɩɩ nɛ Pɩɩta pɩɛsʋ, “Mɩ Tɩɩna, ŋŋ chɛ dɩ ŋ sɔŋ mɩ naasɩŋ nɛɛ?”

⁷ Ŋɩɩ nɛ Yesu bʋla pʋ, “Bʋa deeŋ lɛ ŋ bɩ jɩŋ wɩɩ-la mɩ sɩɩ ŋaa, ama ʋ harɩŋ lɛ ŋ jaŋ jɩŋ ʋ bʋbʋɔŋ.”

⁸ Ŋɩɩ nɛ Pɩɩta bʋla pʋ, “Ŋ bɩ jaŋ sɔŋ mɩ-na naasɩŋ da.” Yesu ma bʋl, “Dɩ mɩ nɛ bɩ ŋ naasɩŋ sɔmɔ, ŋ bɩra bɩ mɩ harɩ-tooru ŋaa.”

⁹ Ŋɩɩ nɛ Pɩɩta bɩra bʋl, “Mɩ Tɩɩna, dɩ ŋɩɩ-na nɛ, sɩ́ mɩ naasɩŋ dʋndʋŋa sɔŋ, sɔŋ mɩ nyuŋ arɩ mɩ nɩsaa ma.”

¹⁰ Ŋɩɩ nɛ Yesu bʋl, “Nɩɩ-la kala sɩ fo lɩɩŋ, ʋ yaraa kala zɔmɔ nɛ, ʋ saa bɩra bɩ maga dɩ ʋ fo lɩɩŋ [see dɩ ʋ sɔŋ ʋ naasɩŋ dʋndʋŋa]. Ma kala saa bɩ disiniŋ kɛnɛ, ama nɩbala dʋndʋŋa nɛ kɛŋ disiniŋ ma tʋɔŋ.”

¹¹ Yesu paala jɩŋ nɩɩ-la sɩɩ chɛ dɩ ʋ joŋu yallɛ nɛ. Ŋɩɩ nɛ tɩɩ ʋ bʋl dɩ ba kala tʋɔŋ dee bɩ pʋlla ŋɩɩ.

¹² Yesu sɩ sɔŋ ʋ harɩ-tooro-la naasɩŋ dɛrɛ, ʋ bɩra joŋ ʋ gɛrɩŋ laalɛ a bɩra mʋ hɔŋ ʋ dɩhɔnʋŋ, ŋɩɩ nɛ aŋ pɩɛsɛba, “Ma jɩŋ wɩɩ-la mɩ sɩ ŋaa ma lɛ bʋbʋɔŋ nɛɛ?

¹³ Ma kɛmmɛ kaa yɩrɛ ma Kʋhɩaŋ arɩ ma Tɩɩna. Ʋ saa kɛŋ wombiiŋ nɛ dɩ ma yɩrɛmɛ ŋɩɩ, bɛɛ wɩaa mɩ nɛ sɛnɛ ŋɩɩ.

¹⁴ Mɩ sɩ ŋaa ma Tɩɩna arɩ ma Kʋhɩaŋ aŋ sɔŋ ma naasɩŋ ŋɩɩ, ʋ maga dɩ ma ma sɔŋ dɔŋɔba naasɩŋ nɛ.

¹⁵ Mɩ laa sɩpaaŋ ŋaa ma na nɛ, dɩ ma ma ŋɩŋaa ŋɩɩ dɔŋɔ lɛ.

¹⁶ Wʋtɩtɩɩ nɛ mɩ bʋlaa pɩma, tɩntɩnnʋ kala bɩ ʋ kʋhɩaŋ kɩɩ, nɩɩ-la ma ba sɩ tɩma, ʋ ma bɩ nɩɩ-la sɩ tɩmʋ kɩɩ.

¹⁷ Ma lɛɛlɛ sɩ jɩŋ wɩaa deemba ŋɩɩ, dɩ ma nɩɩ ŋaaba, ma jaŋ kɛŋ tʋɔtɔrʋŋ.

¹⁸ Ma kala dee mɩ bʋl arɩ ma jaŋ kɛŋ tʋɔtɔrʋŋ. Mɩ jɩŋ nɩalɩŋ mɩ sɩ lɩɩsa nɛ. Wɩɩ-la ba sɩ ŋmʋnsa Wɩa teniŋ tʋɔŋ sɛnɛ jaŋ ŋaa wʋtɩtɩɩ. Ba bʋla arɩ la dɩ nɩɩ-la kala sɩ pɛ dɔŋɔ lɛ dii kʋdiilee nɛ jaŋ mɩɩra sii chɩŋ mɩ lɛ.

¹⁹ Mɩ bʋl wɩɩŋ deeŋ pɩpɩma nɛ, ka dɩ ʋ-na ŋaa, dɩ ŋɩɩ nɛ sɛnɛ kʋ ŋaa, ma jaŋ laa mɩ wɩaa dii arɩ mɩ nɛ ŋaa nɩɩ-la mɩ sɩ sɩ mɩ ŋaa.

²⁰ Wʋtɩtɩɩ nɛ mɩ bʋlaa pɩma, nɩɩ-la kala sɩ kɛŋ nɩɩ-la mɩ sɩ tɩma woruŋ, ʋ tɩɩna kɛŋ mɩ ma woruŋ nɛ. Nɩɩ-la ma kala sɩ kɛmmɛ woruŋ, ʋ kɛŋ nɩɩ-la sɩ tɩmmɛ ma woruŋ nɛ.”

Yesu bʋla arɩ ba jaŋ joŋu yallɛ

²¹ Yesu sɩ bʋl wɩaa deemba dɛrɛ, ʋ tʋɔŋ bɩ dɩ-bala pɩna. Ŋɩɩ nɛ ʋ chaasa bʋl, “Wʋtɩtɩɩ nɛ mɩ bʋlaa pɩma, ma dɔŋɔ nɛ jaŋ jommi yallɛ.”

²² Ŋɩɩ nɛ ʋ harɩ-tooroo mɩɩra dɩdaasɛ dɔŋɔ. Ba bɩ jɩŋ tɩɩna ʋ sɩɩ dagʋ.

²³ Yesu harɩ-tooro-la tʋɔŋ nɩɩ-la ʋ fa sɩ cho nɛ fa hɔnɔ kpagʋ.

²⁴ Ŋɩɩ nɛ Saamɔŋ Pɩɩta lɔgɛ ʋ harɩ-tooro-la dɔŋɔ dɩ ʋ pɩɛsɛ Yesu-na dɩ kʋbɛɛ nɛ ʋ dɩdagɛ?

²⁵ Ŋɩɩ nɛ harɩ-tooru-la fa sɩ kpagɛ Yesu wasa sʋʋsa mʋ yi Yesu a pɩɛsʋ, “Mɩ Tɩɩna, kʋbɛɛ nɛ?”

²⁶ Yesu bʋl, “Mɩ sɩ jaŋ joŋ boroboro yuu dɩsɩŋ a pɩ nɩɩ-la, ʋ nɛ ŋɩɩ.” Ŋɩɩ nɛ ʋ joŋ boroboro-la a yuu dɩsɩŋ a joŋo pɩ Judas, nɩɩ-la sɩ ŋaa Saamɔŋ Ɩsɩkarɔt bie.

²⁷ Judas sɩ yɩa laa boroboro-la dɛrɛ, Sɩtaanɩ kʋ jʋʋ-ʋ. Ŋɩɩ nɛ Yesu bʋla pʋ, “Wɩɩ-la ŋ sɩɩ chɛ dɩ ŋ ŋaa, ŋaaʋ lɩma lɩma.”

²⁸ Nɩalɩŋ dɔnsʋŋ kala fa sɩɩ dii kʋdiile-la, ba bɩ jɩŋ wɩɩ-la kala ʋ fa sɩ bʋla bʋbʋɔŋ.

²⁹ Judas fa sɩɩ kori ba moribiee ŋɩɩ, Yesu harɩ-tooro-la dɔnsʋŋ fa bɩɩna arɩ Yesu faa chɛ dɩ ʋ mʋ yɔɔ kɩalɩŋ ba sɩɩ chɛ dɩ ba dii nɛ gbiele-la lɛ, koo dɩ ʋ joŋ kʋŋ nɛ a pɩ summoo.

³⁰ Judas sɩ laa boroboro-la dɛrɛ, ʋ guu sii a lɩɩ lɩma lɩma. Bʋa-la lɛ dɩ tɩtaŋ nɛ.

Yesu bil nii-falɩɩ nɛ a pɩ nɩaa

³¹ Judas sɩ lɩa, ŋɩɩ nɛ Yesu bʋl, “Lɛɛlɛ nɩaa jaŋ na mɩ-na Nuhuobiine Bie doluŋ sɩ magɛ ŋɩɩ. Nɩaa jaŋ to mɩ lɛ a na ŋɩɩ Wɩa sɩ kɛŋ doluŋ.

³² Mɩ sɩ jaŋ dagɛ Wɩa doluŋ sɩ magɛ ŋɩɩ, ŋɩɩ nɛ Wɩa ma jaŋ dagɛ mɩ-na Nuhuobiine Bie doluŋ sɩ maga. Ʋ jaŋ ŋaa ŋɩɩ lɩma.

³³ Mɩ biiriŋ, mɩ bɩra bɩ jaŋ hɛ ma teeŋ dieni. Ma jaŋ bee chɛmɛ, ama mɩ sɩ bʋl ŋɩɩ a pɩ Juu tɩŋŋaa, mɩ jaŋ bʋl ŋɩɩ a pɩ ma ma. Lee-la mɩ sɩ jaŋ mʋ, ma bɩ jaŋ wuo mʋ nɩmɛ.

³⁴ Nii-falɩɩ nɛ mɩ bilee pɩma. Ʋ nɛ ŋ-la: Má cho dɔŋɔ arɩ mɩ sɩ choma ŋɩɩ.

³⁵ Dɩ ma nɛ cho dɔŋɔ, ŋɩɩ lɛ nɛ nɩaa kala jaŋ to jɩŋ arɩ ma sɛnɛ ŋaa mɩ harɩ-tooroo nɛ.”

Yesu bʋla pɩ Pɩɩta arɩ ʋ jaŋ bʋl ʋ bɩ ʋ jɩŋ

³⁶ Ŋɩɩ nɛ Saamɔŋ Pɩɩta pɩɛsɛ Yesu, “Mɩ Tɩɩna, nɩɩ nɛ ŋ mʋmʋ?” Ŋɩɩ nɛ Yesu ma bʋla pʋ, “Lee-la mɩ sɩ jaŋ mʋ, ŋ bɩ jaŋ wuo to mʋ, ama ʋ harɩŋ nɛ ŋ jaŋ wuo to.”

³⁷ Pɩɩta bɩra pɩɛsʋ, “Mɩ Tɩɩna, bɛɛ nɛ tɩɩ mɩ bɩ jaŋ wuo to ŋ harɩŋ lɛɛlɛ? Mɩ paala kɛŋ mɩ tɩtɩa hɛ dɔŋɔ nɛ dɩ mɩ joŋ mɩ mɩɩsɩŋ yɔɔ sʋʋŋ nɛ ŋ wɩaa.”

³⁸ Ŋɩɩ nɛ Yesu pɩɛsʋ, “Ŋ sɛnɛ kɛŋ ŋ tɩtɩa hɛ dɔŋɔ nɛ dɩ ŋ joŋ ŋ mɩɩsɩŋ yɔɔ sʋʋŋ nɛ mɩ wɩaa? Wʋtɩtɩɩ nɛ mɩ bʋlaa pɩŋ, ka dɩ ji-bele-na yel, ŋ jaŋ bʋl naansɩɩŋ butori arɩ ŋ bɩ mɩ jɩŋ.”