Jɔɔŋ 12 - WƖA TENIŊ

Mɛɛrɩ ŋaa nʋʋŋ tɩsɛ Yesu naasɩŋ

¹ Lɛɛlɛ ʋ ka tapʋlaa balɩdʋ nɛ, ka dɩ Juu tɩŋŋaa dɩɩsɩŋ kiele bal gbiele-la-na yi. Ŋɩɩ nɛ Yesu sii mʋ Bɛtanɩ, lee-la Lazarɔs sɩ hɛ, baal-la ʋ fa sɩ chɩsa sʋʋŋ lɛ.

² Ʋ jʋʋ Lazarɔs dɩa. Ba ŋaa kʋdiilee dɩ ba hʋɔrʋ. Ŋɩɩ nɛ Lazarɔs arɩ nɩaa dɔnsʋŋ pɛ Yesu lɛ dɩ ba dii kʋdiile-la. Maata nɛ fa kɛŋ kʋdiile-la gɔllɔɔ kpaa.

³ Ŋɩɩ nɛ Mɛɛrɩ joŋ nʋʋŋ loŋ sɩɩ, ʋ sʋɔra sɩma, ʋ yalɩŋ ma hɛyɛ. Ʋ joŋo bɩsa hɛ Yesu naasɩŋ lɛ, a kɛŋ ʋ nyu-pʋnaa kaa tɩɩgɛ. Nʋʋ-la sʋɔra su dɩa-la kala.

⁴ Dɩ Yesu harɩ-tooroo dɔŋɔ baa yɩrɛ Judas Ɩsɩkarɔt, dɩ ʋ fa hɛ nɩmɛ, nɩɩ-la fa sɩ jaŋ joŋ Yesu yallɛ. Ŋɩɩ nɛ ʋ bʋl,

⁵ “Bɛɛ nɛ tɩɩ ba bɩ nʋʋŋ deeŋ joŋo yallɛ warɩpʋla zɔɔ-batori, a joŋ moribie-la pɩ summoo?”

⁶ Ʋ sɩ bʋl ŋɩɩ, ʋ bɩ naga dɩ ʋ cho summo-la nɛ tɩɩ, ama ʋ fa ŋaa gaarʋ nɛ. Ʋ nɛ faa kori ba moribiee a yie lɩlɩɩsɛ moribie-la a kaa ŋaa ʋ tɩtɩa wɩaa.

⁷ Ŋɩɩ nɛ Yesu bʋla pɩba, “Má leŋ haal-la. Má leŋ dɩ ʋ ŋaa ŋɩɩ a gbɛrɛ tapʋlɩɩ-la ba sɩ jaŋ hugimi.

⁸ Ma dɩ summoo jaŋ hɛ nɩmɛ bʋa na-kala lɛ. Ama la dɩ ma bɩ jaŋ hɛ nɩmɛ deeŋ deeŋ.”

⁹ Nɩaa yʋga Juu tɩmma-la tʋɔŋ a nɩɩ dɩ Yesu hɛ Bɛtanɩ lɛ, a sii mʋ nɩmɛ. Yesu dʋndʋŋa wɩaa dee ba mʋ nɩmɛ. Ba mʋa ka dɩ ba pɛ na Lazarɔs, nɩɩ-la ʋ fa sɩ chɩsa sʋʋŋ lɛ nɛ.

¹⁰ Ŋɩɩ nɛ Wɩɩsʋllɩ sɩpaalaaraa kʋhɩasɩŋ vʋʋrɛ dɩ ba kpʋ Lazarɔs ma.

¹¹ A tɩŋ Yesu sɩ chɩsɛ Lazarɔs sʋʋŋ lɛ wɩaa Juu tɩŋŋaa yʋga a vɩa ba nɩhɩasɩŋ niiŋ, aŋ laa Yesu wɩaa dii.

Ba zil Yesu kaa jʋʋ Jerusalɛm

¹² Taŋ sɩ pʋla, nɩ-daŋ-la sɩ kɔ dɩɩsɩŋ kiele bal gbiele-la nɩɩ arɩ Yesu ka kɔ Jerusalɛm nɛ.

¹³ Ŋɩɩ nɛ ba kala kaarɛ abɛ pɩpaarɩŋ a kaa mʋ dɩ ba chemu, a faasa ŋaa goŋ a bʋbʋl, “Tabarɩkala. Wɩa jaŋ pɛ nɩɩ-la sɩɩ kɔ La Tɩɩna Wɩa doluŋ lɛ. Ʋ nɛ ŋaa la Iziral tɩŋŋaa kuoro.”

¹⁴ Ŋɩɩ nɛ Yesu na kaku-bie a hɔŋ ʋ nyuŋ. Ba fa ŋmʋnsɛ ŋɩɩ nɛ Wɩa teniŋ tʋɔŋ a bʋl,

¹⁵ “Ma nɩalɩŋ sɩ́ hɛ Zaayɔŋ lɛ, má sɩ́ fawʋllʋŋ fá. Ma kuoro nɩɩ kɔ ma teeŋ a jɩl kaku-pɔrʋŋ.”

¹⁶ Yesu harɩ-tooroo fa bɩ wɩɩ-la bʋbʋɔŋ jɩŋ, ama Yesu sɩ sʋba aŋ sii sʋʋŋ lɛ a laa yɩrɩŋ ŋɩɩ, bʋa-la lɛ nɛ ba liisi arɩ wɩalɩŋ ba sɩ ŋmʋnsa a tɩgɛ ʋ lɛ nɛ, ba sɛnɛ ŋaa ʋ lɛ ŋɩɩ.

¹⁷ Nɩ-daŋ-la fa sɩ hɛ nɩmɛ a na Yesu dɩ ʋ yɩrɛ Lazarɔs ʋ sii kʋ lɩɩ sʋʋŋ bʋa lɛ, ŋɩɩ nɛ ba ha bʋbʋl wɩɩ-la.

¹⁸ Nɩ-daŋ ma sɩ nɩa arɩ Yesu ŋaa wʋmagɩlɩŋ deeŋ, ba kala lɩɩ dɩ ba chemu.

¹⁹ Ŋɩɩ nɛ Farisii tɩmma-la bʋla pɩ dɔŋɔ, “La bɩ wɩɩkala wuo ŋɩŋaa. Má bee na, dʋnɩa nɩaa kala nɩɩ to ʋ harɩŋ ŋɩɩ.”

Yesu bʋl ʋ sʋʋŋ wɩaa

²⁰ Nɩalɩŋ sɩ lɩɩ Giriisi tinteeŋ dɔnsʋŋ ma fa hɛ nɩalɩŋ sɩ mʋ Jerusalɛm dɩ ba chʋɔlɛ Wɩa gbiele-la lɛ tʋɔŋ nɛ.

²¹ Ŋɩɩ nɛ nɩaa deemba mʋ Fɩlɩp teeŋ. Fɩlɩp fa lɩɩ Bɛtɩsaada nɛ, Galilii tinteeŋ. Ba bʋla pɩ Fɩlɩp arɩ baa chɛ dɩ ba na Yesu nɛ.

²² Fɩlɩp ma mʋ bʋla pɩ Anduru. Ŋɩɩ nɛ ba balɩa-la mʋ bʋla pɩ Yesu.

²³ Yesu bʋla pɩba, “Bʋa-la lɛɛlɛ kpaga nɛ dɩ mɩ-na Nuhuobiine Bie laa yɩrɩŋ.

²⁴ Wʋtɩtɩɩ nɛ mɩ bʋlaa pɩma, dɩ ŋ nɛ joŋ mɩɩ-biiŋ duu, ʋ yie pʋa nɛ tinteeŋ, aŋ nyʋ, a hɛ biee yʋgɛ. Dɩ ŋ nɛ bɩ joŋo duu tinteeŋ dɩ ʋ pʋa, ʋ bɩ jaŋ kɛŋ biee.

²⁵ Nɩɩ-la kala sɩɩ chɛ dɩ ʋ laa ʋ mɩɩsɩŋ, ʋ jaŋ vɩa ʋ mɩɩsɩŋ ta, ama nɩɩ-la kala sɩ vɩa ʋ mɩɩsɩŋ ta dʋnɩa deeŋ lɛ, ʋ tɩɩna jaŋ kɛŋ mɩɩsɩ-la sɩ bɩ dɛrɛ.

²⁶ Nɩɩ-la kala sɩ cho dɩ ʋ tɩma pɩpɩmɛ, maga ʋ to mɩ harɩŋ. Lee-la kala mɩ sɩ hɛ, ʋ tɩɩna ma jaŋ hɛ nɩmɛ. Dɩ nʋʋkala nɛ tɩma pɩpɩmɛ, mɩ Nyɩmma jaŋ zil ʋ tɩɩna.

²⁷ Lɛɛlɛ mɩ tʋɔŋ bɩ dɩ-bala pɩna. Bɛɛ nɛ saa mɩ jaŋ bʋl? Mɩ saa bʋl dɩ mɩ Nyɩmma sɩ́ leŋe dɩ wɩalɩŋ kala sɩ jaŋ ŋaa mɩ lɛ ŋaa koo? Aɩ, mɩ bɩ jaŋ wuo bʋl ŋɩɩ. Wɩaa deemba sɩ jaŋ ŋaa mɩ lɛ wɩaa nɛ tɩɩ mɩ kɔ dʋnɩa.

²⁸ Mɩ Nyɩmma, leŋ dɩ nɩaa yɩrɛ ŋ yɩrɩŋ.” Ŋɩɩ nɛ nʋʋ yikoro lɩɩ wɩa-nyuŋ a bʋl, “Mɩ paala laa yɩrɩŋ nɛ. Mɩ saa jaŋ bɩra leŋ dɩ nɩaa yɩrɛ mɩ yɩrɩŋ.”

²⁹ Nɩ-daŋ-la sɩ chɩŋ nɩmɛ a nɩɩ nɩɩ-la yikoro, dɔnsʋŋ sɩ dɩ taŋ nɛ dɔmɔ. Dɔnsʋŋ ma sɩ dɩ Wɩa tɩndaarʋ nɛ bʋl wɩaa pʋ.

³⁰ Ŋɩɩ nɛ Yesu bʋla pɩba, “Ma wɩaa nɛ tɩɩ yikoro deeŋ bʋl ŋɩɩ, mɩ wɩaa dee.

³¹ Bʋa-la lɛ Wɩa sɩ jaŋ dii dʋnɩa nɩaa sarɩya yie nɛ. Bʋa deeŋ lɛ nɛ ʋ ma jaŋ kiri Sɩtaanɩ ta, dʋnɩa nɩaa kuoro.

³² Ama dɩ ba nɛ kpaasɛmɛ daagɛsɛ nyuŋ, mɩ jaŋ ŋaa dɩ nɩaa kala kɔ mɩ teeŋ.”

³³ Ʋ sɩ bʋl wɩɩŋ deeŋ, ʋ bʋla dagɛ sʋʋ-la doho ʋ sɩ jaŋ sʋʋ nɛ.

³⁴ Ŋɩɩ nɛ nɩalɩŋ bʋl, “Ba dagɛla arɩ ba ŋmʋnsɛ Wɩa teniŋ tʋɔŋ a bʋl dɩ Kirisito, Nɩɩ-la Wɩa sɩ lɩɩsa bɩ jaŋ sʋʋ, dɩ ʋ jaŋ hɛ nɩmɛ deeŋ deeŋ. Ɛɛ nɛ saa ŋ bʋl dɩ ba jaŋ kɛŋ Nuhuobiine Bie a kpaasɛ daagɛsɛ nyuŋ? Kʋbɛɛ nɛ saa Nuhuobiine Bie deeŋ wɩaa ŋ sɩɩ bʋl?”

³⁵ Ŋɩɩ nɛ Yesu bʋla pɩ nɩalɩŋ, “Pʋlʋŋ-la sɩ hɛ ma teeŋ, ʋ bɩ jaŋ dieni. Pʋlʋŋ-la ha sɩ hɛ nɩmɛ ŋɩɩ, má vɛŋ pʋlʋŋ-la lɛ, dɩ birimiŋ sí ma tɔ. Nɩɩ-la sɩɩ vɛŋ birimiŋ tʋɔŋ bɩ jɩŋ lee-la ʋ sɩɩ mʋ.

³⁶ Pʋlʋŋ-la sɩ hɛ ma teeŋ ŋɩɩ, má laa ʋ wɩaa dii. Dɩ ma nɛ ŋaa ŋɩɩ, ma ma jaŋ kɛŋ pʋlʋmʋŋ a ma chaanɛ.” Yesu sɩ bʋl wɩaa deemba dɛrɛ, ʋ lɩɩ a kɛŋ ʋ tɩtɩa faa dɩ ba sɩ́ ʋ na.

³⁷ Ʋ sɩ ŋaa wʋmagɩla-la kala ba na, arɩ ŋɩɩ kala, ba ha bɩ ʋ wɩaa laa dii.

³⁸ Ba sɩ bɩ ʋ wɩaa laa dii ŋɩɩ, ŋɩɩ leŋe wɩalɩŋ Wɩa wʋlaabʋlla Azaaya fa sɩ bʋla kʋ ŋaa wʋtɩtɩɩ nɛ. Ʋ fa bʋla, “Kʋbɛɛ nɛ hɛ nɩmɛ a laa wɩalɩŋ la sɩ bʋla a dii? Kʋbɛɛ nɛ La Tɩɩna kɛŋ ʋ doluŋ dagɛ?”

³⁹ Ba sɛnɛ bɩ Wɩa wɩaa wuo laa dii. Ŋ-la nɛ Azaaya fa bɩra bʋl a tɩgɛ ba lɛ:

⁴⁰ Ʋ sɩ, “Wɩa tɔ ba sɩaa nɛ aŋ nyɩrɛ ba tʋɔŋ, dɩ ba sɩaa sɩ́ kʋŋkala wuo na, dɩ ba sɩ́ wɩaa bʋbʋɔŋ ma wuo jɩŋ. Dɩ ŋɩɩ dee, ba fa jaŋ kɔ Wɩa teeŋ dɩ ʋ pʋllɛ ba tʋɔŋ, dɩ mɩ laaba ta.”

⁴¹ Azaaya fa na ŋɩɩ Yesu fa sɩ jaŋ kɛŋ doluŋ nɛ, ŋɩɩ nɛ tɩɩ ʋ bʋl ŋɩɩ.

⁴² Arɩ ŋɩɩ ma kala Juu tɩŋŋaa kʋhɩasɩŋ yʋga a laa Yesu wɩaa dii, ama a tɩŋ Farisii tɩŋŋaa wɩaa fawʋllʋŋ fa kɛmba. Ba bɩ wuo chaasa bʋl arɩ ba laa ʋ wɩaa dii, dɩ ŋɩɩ dee, ba fa jaŋ kiriba Wɩɩchʋɔlɛ dɩa lɛ.

⁴³ Ba fa cho dɩ nɩaa nɛ bɩbɛsɛ ba lɛ a kɩɩ Wɩa sɩ bɛsɛ ba lɛ.

⁴⁴ Ŋɩɩ nɛ Yesu faasa bʋl, “Nɩɩ-la kala sɩ laa mɩ wɩaa dii, ʋ laa nɩɩ-la ma sɩ tɩmmɛ wɩaa dii nɛ. Mɩ dʋndʋŋa wɩaa dee ʋ laa dii.

⁴⁵ Nɩɩ-la kala sɩ namɛ, ʋ na nɩɩ-la ma sɩ tɩmmɛ nɛ.

⁴⁶ Mɩ kʋ tuu dʋnɩa dɩ mɩ ŋaa dʋnɩa pʋlʋmʋŋ nɛ a chaanɛ. Nɩɩ-la kala sɩ laa mɩ wɩaa dii bɩra bɩ jaŋ hɛ birimiŋ tʋɔŋ.

⁴⁷ Nɩɩ-la kala sɩ nɩɩ mɩ wʋbʋlaa aŋ bɩ baa to, mɩ bɩ ʋ tɩɩna sarɩya ka dii, bɛɛ wɩaa mɩ bɩ kɔ dɩ mɩ dii dʋnɩa nɩaa sarɩya. Mɩ kɔ dɩ mɩ laa dʋnɩa nɩaa ta nɛ.

⁴⁸ Wɩalɩŋ mɩ sɩ bʋla pɩma nɛ jaŋ dii tɩɩna sɩ bɩ mɩ wɩaa laa dii sarɩya chɛɛ-la dʋnɩa sɩ jaŋ dɛrɛ.

⁴⁹ Wɩalɩŋ mɩ sɩ bʋla, mɩ tɩtɩa doluŋ lɛ dee mɩ bʋl. Mɩ Nyɩmma sɩ tɩmmɛ, ʋ tɩtɩa nɛ dagɛmɛ wɩalɩŋ mɩ sɩ jaŋ bʋl, arɩ ŋɩɩ mɩ sɩ jaŋ bʋlba.

⁵⁰ Mɩ jɩma arɩ wɩalɩŋ ʋ sɩɩ dagʋ jaŋ pɩ nɩalɩŋ sɩɩ toba mɩɩsɩ-la sɩ bɩ dɛrɛ. Ŋɩɩ wɩaa, wɩalɩŋ kala mɩ sɩɩ bʋl, mɩ Nyɩmma nɛ dagɛmɛ.”