JƐRƖMAAYA 7 - WƖA TENIŊ

Wʋnyɩɛrɩ Wɩɩ-chʋɔlʋŋ ŋaa pɛɩ nɛ

¹ Wɩɩ-la La TƖƖNA sɩ bʋla pɩ Jɛrɩmaaya nɛ ŋ-la:

² “Chɩŋ mɩ-na ma TƖƖNA dɩɩ-balɩŋ boi-baalɩŋ niiŋ aŋ heele bʋl wɩɩŋ deeŋ. Ma-na Juda tɩmma-la kala sɩ to boi-baalaa deemba a kʋ chʋchʋɔlɛ La TƖƖNA, má jegile nɩɩ wɩɩ-la La Tɩɩna sɩ bʋla.

³ Wɩɩ-la La TƖƖNA doluŋ kala Tɩɩna, Iziral tɩŋŋaa Wɩa bɩra sɩ bʋla nɛ ŋ-la: Má bɩrɩma lɩɩ ŋɩɩ ma sɩ naga lɛ a joŋ wɩalɩŋ ma sɩɩ ŋaa ta, ka dɩ mɩ leŋ dɩ ma hɔŋ daha.

⁴ Má sɩ́ ba laa dii ŋɩɩ ba sɩ yie nyɩsɛma a bʋl, ‘La TƖƖNA dɩɩ-bal-la nɛ ŋ-la, La TƖƖNA dɩɩ-bal-la nɛ ŋ-la, La TƖƖNA dɩɩ-bal-la nɛ ŋ-la.’

⁵ Dɩ ma nɛ chaasa bɩrɩma lɩɩ ŋɩɩ ma sɩ naga lɛ, a joŋ wɩalɩŋ ma sɩɩ ŋaa ta, aŋ ŋɩŋaa wɩaa ba bʋɔsʋŋ lɛ dɔŋɔba teeŋ,

⁶ dɩ ma nɛ bɩ nʋhʋɔraa, biisinsiŋ arɩ yo-haalaa ka wʋrʋgɛ, a bɩ nɩaa sɩ bɩ wɩɩ cheye maa kpʋ tinteeŋ deeŋ lɛ, a bɩ vesiŋ sɩ jaŋ ŋaama wʋbɔŋ harɩŋ ka to,

⁷ ŋɩɩ-na, mɩ jaŋ leŋ dɩ ma hɔŋ tinteeŋ deeŋ lɛ a kaa mʋmʋ wuu, lee-la mɩ sɩ joŋo pɩ ma naabalɩmaba.

⁸ Ama, ma bee na, ma mɩɩra joŋ ma yɩɛlaa hɛ ŋɩɩ ba sɩɩ nyɩsɛma lɛ nɛ, ʋ bɩ jaŋ pɛ ma lɛ.

⁹ Ma yie gɩgaa nɩaa kɩaa nɛ, a kpʋkpʋ nɩaa, a chɩchɛ dɔŋɔba haalaa, a nyɩɛ wɩaa aŋ ŋmɩŋmɩɛsɛ, a nyɩgɛ kʋsʋɔrʋsʋŋ pɩpɩ vene-la ba sɩɩ yɩrɛ Baal a tuto vesiŋ dɔnsʋŋ ma sɩ bɩ jɩŋ,

¹⁰ aŋ kʋ chɩŋ mɩ sɩpaaŋ mɩ dɩɩ-balɩŋ deeŋ mɩ sɩ joŋ mɩ yɩrɩŋ hɛ lɛ a bʋl, ‘La-na hɔnɔ nɛ, wɩɩ bɩ la ka walɩmɛ.’ Ma jaŋ wuo ŋaa wʋkɩsaa deemba kala, ka dɩ wɩɩ sɩ́ ma walɩmʋʋ?

¹¹ Ma bɩɩna dɩɩ-balɩŋ deeŋ mɩ sɩ joŋ mɩ yɩrɩŋ hɛ pa jaŋ mɩɩra bɩrɩmɛ gaarɩ dɩa a pɩmaa? Mɩɩ na wɩalɩŋ kala ma sɩɩ ŋaa nɛ. Mɩ-na ma TƖƖNA nɛ bʋla.

¹² Má mʋ taŋ-la ba sɩɩ yɩrɛ Sɩlɔ, lee-la mɩ fa sɩ laa sɩpaaŋ lɩɩsɛ dɩ nɩaa dɩdɛnnɛmɛ, a na wɩɩ-la mɩ sɩ ŋaa ʋ lɛ a tɩŋ wʋbɔmɔ-la mɩ nɩaa Iziral tɩŋŋaa sɩ ŋaa wɩaa.”

¹³ La TƖƖNA bɩra sɩ, “Ma fa sɩɩ ŋaa wɩaa deemba kala, mɩ fa chagɩlɛma nɛ bʋlɩa bʋlɩa, ka ma bɩ nɩa. Mɩ fa yɩrɛma nɛ, ka ma vɩa dɩ ma sɛɩ.

¹⁴ Ŋɩɩ wɩaa, wɩɩ-la mɩ sɩ joŋo ŋaa Sɩlɔ lɛ, ʋ tɩtɩa nɛ mɩ jaŋ joŋo ŋaa dɩɩ-balɩŋ deeŋ mɩ yɩrɩŋ sɩ hɛ lɛ, mɩ-na Wɩa dɩɩ-bal-la ma sɩ joŋ ma yɩɛlaa hɛ, lee-la mɩ sɩ joŋo pɩ ma dɩ ma naabalɩmaba.

¹⁵ Mɩ jaŋ kirima mɩ sɩpaaŋ, arɩ mɩ sɩ ŋaa ŋɩɩ ma naambiiriŋ Efirem doho nɩaa lɛ.

¹⁶ Jɛrɩmaaya, sɩ́ mɩ sʋla pɩ nɩaa deemba. Sɩ́ ba naasɩŋ lɛ chɩna sʋl Wɩɩsʋlɩɩ kala, dɩ ŋ nɛ sʋla ma, mɩ bɩ jaŋ jegile nɩɩ ŋ teeŋ.

¹⁷ Ŋ bɩ wɩalɩŋ ba sɩɩ ŋaa Juda tasɩŋ arɩ Jerusalɛm womporunuŋ lɛ naa?

¹⁸ Biiriŋ jaa daasɩŋ hɩhɛ dɔŋɔ nɛ, nyɩmmaba ma hɩhɛ nyiniŋ, haalaa ma bubuu munuŋ dɩ ba wasɛ boroboro pɩ vene-la ba sɩɩ yɩrɛ wɩa-nyuŋ ha-kuoro. Ba wansɛ kʋnyʋalaa ma aa pɩ vesiŋ nɛ. Ba ŋaa wɩaa deemba kala a chɩchɛ dɩ mɩ baanɩŋ sii nɛ.

¹⁹ Mɩ-na baanɩŋ lɛ dee ba didii. Ba tɩtɩa nɛ ba dʋdɔgɩsɛ, a hɩhɩɩsɛ ba tɩtɩa ma. Mɩ-na ma TƖƖNA nɛ bʋla.

²⁰ Ŋɩɩ wɩaa, wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ na baanɩŋ ba nyuŋ kɩŋkɛŋ nɛ, mɩ jaŋ joŋ mɩ baaŋ-la sɩ faasa sii fɩɩsɛ Juda nɩaa lɛ, ba pʋsʋŋ arɩ ba tɩɩsɩŋ arɩ ba kʋpɛrɛɛ lɛ. Mɩ baaŋ-la jaŋ nagɛ nyiŋ-la sɩ bɩ dɩsɛ a diiba.

²¹ Wɩɩ-la mɩ-na ma TƖƖNA doluŋ kala Tɩɩna, Iziral tɩŋŋaa Wɩa bɩra sɩ bʋla nɛ ŋ-la: Má joŋ ma kʋnyɩgaa Wɩɩsʋlʋŋ kɩaa arɩ Wɩɩsʋlʋŋ pʋsʋ-la dɔnsʋŋ ma sɩ kpʋa nammɩa pɛ dɔŋɔ a tɩtɩa chɩchaŋ.

²² Mɩ fa sɩ kɛŋ ma naabalɩmaba kʋ lɩɩ Ijipiti tinteeŋ lɛ a bʋl wɩaa pɩba, mɩ bɩ kʋnyɩgaa Wɩɩsʋlʋŋ arɩ pʋsʋŋ kpʋ ŋaa Wɩɩsʋlʋŋ dʋndʋŋa wɩaa nɛ joŋo dagɛba.

²³ Ama mɩ fa joŋ wɩɩŋ deeŋ ma a dagɛba nɛ: Má sɛɩ mɩ niiŋ, dɩ mɩ ŋaa ma Wɩa, dɩ ma ma ŋaa mɩ nɩaa. Má to wɩalɩŋ kala mɩ sɩ dagɛma, dɩ wɩaa wuo vɛŋ woruŋ a pɩma.

²⁴ Ama ba fa bɩ jegile nɩɩ koo a kaa tɩŋ. Ba fa mɩɩra to ba nyuduoŋ arɩ ba tʋɔbɩɩŋ bɔŋŋɔɔ harɩŋ nɛ. Ba fa mɩɩra mʋ harɩŋ nɛ, ba bɩ sɩpaaŋ mʋa.

²⁵ A chɩŋ bʋa-la lɛ ma naabalɩmaba fa sɩ lɩɩ Ijipiti tinteeŋ lɛ a kaa kɔ jɩnɩŋ, mɩ yie tɩŋ mɩ tɩntɩnnaa sɩ ŋaa mɩ wʋlaabʋllaa ba kʋkɔ ma teeŋ nɛ bʋlɩa bʋlɩa.

²⁶ Ama ba fa bɩ mɩ teeŋ jegile nɩɩ, a vɩa dɩ ba tomi. Ba fa kɛŋ nyuduoŋ nɛ a wasa ŋaa wʋbɔŋŋɔɔ a kɩɩ ba naabalɩmaba.

²⁷ Jɛrɩmaaya, dɩ ŋ nɛ bʋl wɩaa deemba kala pɩba, ba bɩ jaŋ jegile nɩɩ ŋ teeŋ. Dɩ ŋ nɛ yɩrɛba ma, ba bɩ jaŋ sɛɩ.

²⁸ Ŋɩɩ wɩaa bʋla pɩba, ‘Tintee-la nɩaa sɩ vɩa dɩ ba to mɩ-na ba TƖƖNA Wɩa niiŋ, a bɩ sɛyɛ dɩ mɩ kɛmba tʋra kɩɩ nɛ ŋɩɩ. Wʋtɩtɩɩ lɛlɛ nɛ, ʋ lɛl ba niiree lɛ nɛ.’ ”

²⁹ Jerusalɛm tɩmma, má kɛ ma nyu-pʋnaa a yuo ta, aŋ jɩl dundol kpʋlaa nyuŋ a ta jembiee a yiyel, bɛɛ wɩaa mɩ-na ma TƖƖNA baanɩŋ sii doho deeŋ nɩaa nyuŋ nɛ, mɩ vɩaba ta.

Fuonaa-la lɛ ba sɩɩ kpʋ nɩaa

³⁰ La TƖƖNA bʋla, “Juda nɩaa ŋaa wʋbɔŋŋɔɔ nɛ mɩ sɩɩŋ lɛ. Ba joŋ ba vʋɩyaa mɩ sɩɩ kɩsʋ nɛ a bil mɩ dɩɩ-bal-la mɩ yɩrɩŋ sɩ hɛ lɛ, a ŋaa ʋ kɛŋ disiniŋ.

³¹ Ba bil vene-la ba sɩɩ yɩrɛ Tɔfɛf dɩ-kpaarɩŋ nɛ Bɛŋ Hɩnɔm fuonaaŋ lɛ, dɩ ba kɛsɛ ba hambolibiisiŋ arɩ ba hantolibiisiŋ a nyɩnyɩgɛ. Wɩɩ mɩ sɩ bɩ ba daga, ŋɩɩ paala bɩ mɩ tʋɔbɩɩnaa kɔ.”

³² La TƖƖNA bɩra sɩ, “Ma jɩŋ wɩɩŋ deeŋ lɛ: Tapʋlaa ka kɔ nɛ, nɩaa bɩra bɩ jaŋ yɩrɛ lee-la Tɔfɛf koo Bɛŋ Hɩnɔm fuonaaŋ. Ama ba jaŋ kɛnʋ yɩrɛ fuonaa-la lɛ ba sɩɩ kpʋ nɩaa. Ba jaŋ huhugi nɩaa Tɔfɛf lɛ ŋɩɩ dɩ ʋ tinteeŋ kala mʋ dɛrɛ.

³³ Juda nɩaa kʋsʋʋnʋŋ jaŋ bɩrɩmɛ zaaraa arɩ baga kɩaa kʋdiilee. Nʋʋkala jaŋ tuo dɩ ʋ kiriba ta.

³⁴ Mɩ jaŋ leŋ dɩ tʋɔtɔrɛ goŋ-la ha-falaa arɩ ba balaba sɩɩ ŋaa dɛrɛ Juda tasɩŋ arɩ Jerusalɛm womporunuŋ lɛ, bɛɛ wɩaa ba tinteeŋ jaŋ pɩŋ hoi.”