Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

JƐRƖMAAYA 50 - WƖA TENIŊ


Wɩɩ-la La TƖƖNA sɩ bʋla tɩgɛ Babɩlɔŋ lɛ

1 Wɩɩ-la La TƖƖNA sɩ to ʋ wʋlaabʋlla Jɛrɩmaaya lɛ a bʋla tɩgɛ Babɩlɔŋ nɩaa arɩ ba tinteeŋ lɛ nɛ ŋ-la:

2 “Heele bʋl tinteyee tʋɔŋ, kɛŋ jɔnjɔŋ je a heele bʋlʋ, sɩ́ wɩɩkala joŋo faa, ama bʋl, ‘Ba jaŋ yuo dii Babɩlɔŋ. Ba jaŋ hɛ vene-la ba sɩɩ yɩrɛ Bɛl hɩɩsɩŋ, fawʋllʋŋ jaŋ faasa jʋʋ vene-la ba sɩɩ yɩrɛ Maduk. Ʋ kɩalɩŋ ba sɩ mɛ kala jaŋ dii hɩɩsɩŋ dɩ fawʋllʋŋ faasa kɛŋ ba tɔŋŋɔɔ.’

3 Tinteeŋ nɩaa jaŋ lɩɩ wɩɩpɔsʋŋ nagʋa dɩɩrɩŋ a kʋ yuou, a leŋ dɩ ʋ tinteeŋ pɩŋ hoi. Nʋʋkala bɩ jaŋ hɛ nɩmɛ. Nuhuobiinee arɩ pʋsʋŋ jaŋ fá viiri.”

4 La TƖƖNA sɩ, “Tapʋlɩa-la lɛ, Iziral tɩŋŋaa arɩ Juda nɩaa kala jaŋ yele mʋ a chɛ ba TƖƖNA Wɩa.

5 Ba jaŋ pɩɛsa chɛ Zaayɔŋ wombiiŋ, a bɩrɩma joŋ ba sɩaa chaasɛ nɩmɛ. Ba jaŋ joŋ ba tɩtɩa mɛrɛ La TƖƖNA lɛ, a hɛ niiŋ sɩ bɩ dɩdɛrɩŋ kɛnɛ ba sɩ bɩ jaŋ yʋ ʋ wɩaa.

6 Mɩ nɩaa nagɛ piesee sɩ lɛlɛ nɛ. Ba sɩpaalaaraa leŋe ba yeŋŋi nɛ, a leŋ ba gʋgɔllɛ peelee nyuŋ. Baa baarɛ peelee arɩ dundolluŋ nyuŋ nɛ, a yʋ ba tɩtɩa dɩ-pɩna wiesiŋ wɩaa.

7 Nʋʋ na-kala sɩ naba yie kpʋba nɛ. Ba dʋndɔŋŋɔɔ sɩ, ‘La bɩ cheeriŋ kɛnɛ, bɛɛ wɩaa ba ŋaa wʋbɔŋ nɛ ba TƖƖNA teeŋ, Nɩɩ-la sɩɩ pɩba kʋdiilee. La TƖƖNA lɛ nɛ ba nyɩmmaba fa joŋ ba yɩɛlaa hɛ.’

8 Má fá lɩɩ Babɩlɔŋ lɛ. Má lɩɩ Babɩlɔŋ nɩaa tinteeŋ lɛ, a nagɛ bʋʋna sɩ laa piesee sɩpaaŋ.

9 Mɩ jaŋ yigi tintee duoruŋ sɩ kʋ hɛ dɔŋɔ a hɛ Babɩlɔŋ lɛ, a lɩɩ wɩɩpɔsʋŋ nagʋa dɩɩrɩŋ. Ba jaŋ chɩŋ ba dɩchɩnaa a yuo dii tintee-la. Ba nagɛ bayuori wajɩaba nɛ, ba to-hɛŋŋɛɛ bɩ tinteeŋ ka tuu.

10 Ba jaŋ yuo dii Babɩlɔŋ a paa ʋ kɩaa. Nɩalɩŋ kala sɩ yuo diiu jaŋ paa kɩaa a vɔgɛ.” La TƖƖNA nɛ bʋla.

11 La TƖƖNA sɩ, “Babɩlɔŋ nɩaa, má yuo paa mɩ tinteeŋ kɩaa nɛ. Ma tʋɔŋ tɔrɔ nɛ ma jʋjʋɔsɛ a nagɛ nɛŋ sɩɩ nʋɔsɛ mɩaa koo a nagɛ jaaba sɩɩ yel.

12 Ama, hɩɩsɩŋ jaŋ chaasa kɛŋ ŋ naaŋ, nɩɩ-la sɩ lʋlʋŋ jaŋ dii hɩɩsɩŋ. Ʋ nɛ jaŋ ŋaa tinteyee tʋɔŋ kʋbie, a ŋaa gɩrɩ-pɩrɩŋ, a ŋaa tintee-hɩlɩɩ.

13 A tɩŋ mɩ-na ma TƖƖNA sɩ na baanɩŋ wɩaa, nʋʋkala bɩ jaŋ hɛ ʋ lɛ. Ama ʋ kala jaŋ pɩŋ jikpeeŋ. Nɩalɩŋ kala sɩ to Babɩlɔŋ bɩbal, ʋ wɩaa jaŋ kperiba a tɩŋ ŋɩɩ ba sɩ cheyu.

14 Má chɩŋ ma dɩchɩnaa a golli Babɩlɔŋ, ma nɩalɩŋ kala sɩɩ yuo toŋ. Má yuou, má sɩ́ leŋe dɩ to-hɛŋ kala ka, bɛɛ wɩaa ʋ ŋaa wʋbɔŋ nɛ mɩ-na ma TƖƖNA teeŋ.

15 Má ŋaa goŋ hɛ ʋ lɛ sɛmɛ kala. Ʋ joŋ ʋ tɩtɩa pa nɛ. Ʋ dɩɩ-leŋee tele nɛ, ba yigi ʋ jebiee ma lo. Mɩ-na ma TƖƖNA joŋ mɩ baanɩŋ tiŋ Babɩlɔŋ lɛ nɛ, mɩ joŋo timu nɛ. Ŋɩɩ ʋ sɩ ŋaa nɩaa lɛ, ŋɩɩ nɛ mɩ ma joŋo ŋaa ʋ lɛ.

16 Kpʋ kʋduuroo Babɩlɔŋ lɛ arɩ nɩalɩŋ sɩ kɛŋ sɩɩkɔrɔ kʋkʋŋ kɩaa. A tɩŋ nɩalɩŋ sɩɩ yuo Babɩlɔŋ wɩaa leŋ dɩ nɩwogusu-la kala mɩɩra mʋ ba nɩaa teeŋ. Leŋ dɩ nʋʋkala fá mʋ ʋ tinteeŋ.

17 Iziral tɩŋŋaa nagɛ naachigiŋ sɩ kiri piesee ba pɩsɛ nɛ. Nɩɩ-la sɩ laa sɩpaaŋ yuo diiba nɛ ŋaa Asiiria kuoro. Nɩɩ-la ma sɩ to harɩŋ yɛrɛ ʋ haŋgbelee nɛ Babɩlɔŋ kuoro Nebukadineza.”

18 Ŋɩɩ wɩaa, wɩɩ-la La TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: “Mɩ jaŋ dɔgɩsɛ Babɩlɔŋ kuoro arɩ ʋ tinteeŋ nɩaa a nagɛ mɩ sɩ dɔgɩsɛ Asiiria kuoro ŋɩɩ.

19 Ama mɩ jaŋ mɩɩra kɛŋ Iziral tɩŋŋaa kaa kɔ ba tinteeŋ, ba jaŋ dii kɩaa Kamɛl peel-la nyuŋ arɩ Basaŋ fuonaaŋ lɛ. Ba jaŋ dii kɩaa a vɔgɛ Efirem arɩ Gɩlɩad dundolluŋ nyuŋ.

20 Bʋa-la lɛ ba jaŋ chɛ dɩ ba na Iziral tɩŋŋaa wʋcheeliŋ. Mɩ-na ma TƖƖNA nɛ bʋla, ama ba bɩ jaŋ na wʋcheeli kala. Ba jaŋ chɛ dɩ ba na Juda nɩaa ma wʋbɔŋŋɔɔ, ama ba bɩ jaŋ na wʋbɔŋ kala, bɛɛ wɩaa mɩ jaŋ joŋ nɩalɩŋ sɩ ka wʋbɔŋŋɔɔ chɛba.

21 Má mʋ yuo Meratem tinteeŋ nɩaa arɩ nɩalɩŋ sɩ hɛ Pɛkɔd lɛ. Má kire to ba harɩŋ a kpʋba a chei ba kala, Ma ŋaa wɩalɩŋ kala mɩ sɩ dagɛma. Mɩ-na ma TƖƖNA nɛ bʋla.

22 Laalɩyuori goŋ nɛ hɛ tinteeŋ lɛ, leriŋ nɛ ba chei a faasa ŋɩŋaa goŋ.

23 Babɩlɔŋ fa nagɛ hama nɛ a yɩyɛrɛ dʋnɩa tinteyee. Ama lɛɛlɛ ʋ pɩŋ jikpeeŋ nɛ tinteyee kala tʋɔŋ.

24 Babɩlɔŋ, mɩ hɛ bɛrɛ nɛ a bil ŋ lɛ, ŋ jaŋ jɩjɩŋ dɩ ʋ kɛnɩŋ. Ba naŋ nɛ a yuo kɛnɩŋ, bɛɛ wɩaa ŋ lɩɩ mɩ-na ma TƖƖNA harɩŋ nɛ.

25 Mɩ suri mɩ bayuori kɩaa dɩa nɛ, a chaarɛ mɩ baanɩŋ bayuori kɩaa, bɛɛ wɩaa mɩ-na ma TƖƖNA Wɩɩjarɩbakɔ doluŋ kala Tɩɩna kɛŋ tɩntɩŋŋaa nɛ dɩ mɩ tɩŋ Babɩlɔŋ nɩaa tinteeŋ lɛ.

26 Má yuo Babɩlɔŋ sɛmɛ kala. Má yɛrɛ ʋ virisiŋ, a paaba chʋɔrɛ a nagɛ mɩaa. Má chei ʋ kala gbelem gbelem a sɩ́ leŋe dɩ nʋʋkala ka.

27 Má kpʋ ʋ laalɩyuoroo kala, má kpʋ ba kala. Wɩɩŋ puuba, ba tapʋlʋŋ yie nɛ, bʋa-la sɩ maga dɩ ba dɔgɩsɛba.

28 Má jegile nɩɩ nɩalɩŋ sɩ foro lɩɩ Babɩlɔŋ kɔ sɩɩ bʋl wɩalɩŋ Zaayɔŋ lɛ, ŋɩɩ mɩ-na ma TƖƖNA Wɩa sɩ joŋ mɩ baanɩŋ tiŋ Babɩlɔŋ nɩaa lɛ a tɩŋ ʋ dɩɩ-bal-la wɩaa.

29 Má yɩrɛ to-yuoroo hɛ Babɩlɔŋ lɛ, nɩalɩŋ kala sɩɩ yuo tosuŋ. Má ŋmoo buguŋ a gollu. Má sɩ́ leŋe dɩ nʋʋkala fori. Má joŋ ʋ wʋŋaalaa chɩmɩŋ tiŋ ʋ lɛ. Má joŋ ŋɩɩ ʋ sɩ ŋaa nɩaa lɛ a ŋaa ʋ ma lɛ. Ʋ chei mɩ-na ma TƖƖNA yɩrɩŋ nɛ, Iziral tɩŋŋaa Wɩa sɩ bɩ disiniŋ kɛnɛ.

30 Ŋɩɩ wɩaa, ʋ bapʋɔsaa jaŋ sʋʋ womporunuŋ lɛ. Ba jaŋ kpʋ ʋ laalɩyuoroo kala tapʋlɩɩ-la. Mɩ-na ma TƖƖNA nɛ bʋla.

31 Bee na, sɩɩ-duo tɩɩna mɩ chɩŋ ŋ lɛ nɛ. Mɩ-na ma TƖƖNA doluŋ kala Tɩɩna nɛ bʋla. Ŋ tapʋlʋŋ kɔ nɛ, bʋa-la lɛ sɩ maga ba dɔgʋsʋŋ.

32 Sɩɩ-duo tɩɩna-la jaŋ gɛrɛ tel, nʋʋkala bɩ jaŋ pɛ ʋ lɛ dɩ ʋ sii. Mɩ jaŋ chol nyiniŋ hɛ ʋ tasɩŋ lɛ dɩ ʋ dii nɩalɩŋ sɩ gollu.”

33 Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Ma nyagɛ Iziral tɩŋŋaa bil nɛ, a pɛ Juda nɩaa ma lɛ. Nɩalɩŋ kala sɩ yuo kɛsɛba mɩlba kpɛrɛ nɛ, a vɩa dɩ ba leŋ dɩ ba mʋ.

34 Ama ba Laataara kɛŋ doluŋ nɛ, ʋ yɩrɩŋ nɛ La TƖƖNA doluŋ kala Tɩɩna. Ʋ jaŋ faasa chɩna gbɛrɛba a leŋ dɩ ba na wiese ba tinteeŋ lɛ. Ama Babɩlɔŋ nɩaa-na bɩ jaŋ na wiese.

35 Laalɩŋ jaŋ jʋʋ Babɩlɔŋ nɩaa, Laal-la jaŋ kpʋ nɩalɩŋ sɩ hɛ Babɩlɔŋ lɛ, ba tɩntɩnnɩ-hɩasɩŋ arɩ ba wʋjɩnnaa.

36 Laalɩŋ jaŋ jʋʋ ba nɩalɩŋ sɩ nyɩɛ wɩaa arɩ ba ŋaa mɩ wʋlaabʋllaa nɛ. Ba jaŋ bɩrɩmɛ nɩyaaraa. Laalɩŋ jaŋ jʋʋ ba bayuoroo. Fawʋllʋŋ jaŋ faasa jʋʋba.

37 Laalɩŋ jaŋ kpʋ ba janɩŋ aŋ chei ba laalɩŋ janɩŋ torukoba, a kpʋ nɩwogusu-la ma sɩ hɛ ba laalɩyuoroo tʋɔŋ. Ba jaŋ mɩɩra nagɛ haalaa. Ba jaŋ yuo paa ba dʋa. Ba jaŋ paa ba kɩaa kala.

38 Mɩ jaŋ kɛŋ hɩlɩŋ kʋ hɛ ba fuonuŋ lɛ. Ba lɩɩŋ jaŋ hʋ, bɛɛ wɩaa, tɔŋŋɔɔ nɛ su ba tinteeŋ kala, nɩalɩŋ chaasa joŋ ba nyuŋ kala hɛ tɔmɔ-la lɛ. Mɩ-na ma TƖƖNA nɛ bʋla.

39 Ŋɩɩ wɩaa, tintee-hɩlɩŋ bagɩlaa arɩ baga vasɩŋ nɛ jaŋ hɛ nɩmɛ. Hajaaŋkuŋkumba ma jaŋ jʋjʋʋ nɩmɛ. Nɩaa bɩra bɩ jaŋ kɔ dɩ ba hɔŋ nɩmɛ a kaa mʋ wuu.

40 A nagɛ Wɩa sɩ chei Sodom arɩ Gomora ŋɩɩ, a pɛ tasɩ-la sɩ kpagɛ ba lɛ, ŋɩɩ nɛ jaŋ ŋaa Babɩlɔŋ lɛ, La TƖƖNA nɛ bʋla, dɩ nʋʋkala sɩ́ nɩmɛ hɛ. Nʋʋkala bɩ jaŋ hɔŋ nɩmɛ.

41 Bee na, laalɩyuoroo nɛ lɩɩ wɩɩpɔsʋŋ nagʋa dɩɩrɩŋ kʋkɔ. Tintee-duo nɩaa arɩ kuori daŋ nɛ ba lɔgɔ hɛ ŋ lɛ, ba lɩɩ dɩ-bolii kʋkɔ.

42 Ba nyɩgɩla nɛ a kori tosuŋ arɩ tiŋŋee. Ba tʋɔŋ hɛyɛ nɛ woruŋ, ba bɩ nɩaa nenige ka fá. Ba jɩl ba janɩŋ nɛ, ba huhuuri a nagɛ mʋgʋ-balɩŋ. Baa kɔ nɛ a nagɛ baalaa sɩɩ mʋ ba yuo laalɩŋ, dɩ ba yuo Babɩlɔŋ tabal-la.

43 Babɩlɔŋ kuoro nɩɩ ba wɩaa nɛ, ʋ nɩsaa sʋʋ mɛrɛ. Hɛɛŋ jʋʋ-ʋ nɛ ʋ nɩna hɛɛŋ a nagɛ haala sɩɩ chɛ ʋ lʋl ʋ luoruŋ wʋwɩɩ.

44 A nagɛ naachigiŋ sɩ lɩɩ Jɔdaŋ duuŋ tʋɔŋ a kʋkɔ a mʋmʋ pʋsʋŋ dɩ-diiliŋ sɩ kɛŋ ya-zɔmʋŋ, mɩ jaŋ kɔ a guu kiri Babɩlɔŋ tɩŋŋaa ba tinteeŋ lɛ. Kʋbɛɛ nɛ mɩ jaŋ lɩɩsɛ dɩ ʋ ŋaa wɩɩŋ deeŋ? Kʋbɛɛ nɛ nagɛmɛ a jaŋ wuo magɩsɛmɛ? Sɩpaalaarɩ bɛɛ nɛ jaŋ wuo kɛŋ ʋ tɩtɩa magɩsɛmɛ?”

45 Ŋɩɩ wɩaa, má jegile nɩɩ wɩɩ-la La TƖƖNA sɩ bɩɩna tɩgɛ Babɩlɔŋ lɛ, wɩɩ-la ʋ sɩ bɩɩna dɩ ʋ ŋaa Babɩlɔŋ nɩaa tinteeŋ lɛ nɛ ŋ-la: Ba jaŋ kɛsɛ ba biiriŋ a lɛrɛ viiri. Ʋ jaŋ chei ba pʋsʋŋ dɩ-diiliŋ gbelem gbelem a tɩŋ ba wɩaa.

46 Dɩ Babɩlɔŋ nɛ tele, dʋnɩa jaŋ jigisi. Tinteyee nɩaa jaŋ nɩɩ ba nii-ŋmobo.

©Ghana Institute of Linguistics Literacy and Bible Translation 1984, 2014

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ