JƐRƖMAAYA 5 - WƖA TENIŊ

Nɩbala ma tuo a kɛŋ wʋtɩtɩɩ

¹ La Tɩna sɩ, “Joŋ Jerusalɛm womporunuŋ kala gɔllɛ, beŋ ba kala lɛ fii a gollo bala na, nyilimi ba dɩ-hɔnɔɔ kala. Dɩ ŋ nɛ na nɩbala ma sɩɩ ŋaa wɩaa ba bʋa lɛ a chɩchɛ wʋtɩtɩɩ, mɩ jaŋ joŋo chɛ tabal-la nɩaa.

² Ba yie bʋl, ‘La ŋmɩɛsɛ La TƖƖNA sɩ weye,’ aŋ ha nyɩɛ wɩaa a ŋmɩŋmɩɛsɛ.”

³ La TƖƖNA, wʋtɩtɩɩ dee ŋ chɩchɛ dɩ ŋ naa? Ŋ ŋmooba nɛ, ama ʋ bɩ ba lɛ wɩa. Ŋ wʋrɩgɛba nɛ, ama ba bɩ ŋ dagɩŋ sɛyɛ. Ba leŋe ba nyuŋ dol nɛ a kɩɩ tabɩɩŋ, aŋ vɩa dɩ ba bɩrɩma lɩɩ ba wʋbɔŋŋɔɔ ŋaanɩŋ lɛ.

⁴ Mɩ fa bʋl mɩ tʋɔŋ lɛ: Nɩaa deemba ŋaa summo nɛ, ba ŋaa nɩyaara nɛ. Ba bɩ La Tɩɩna wombiiŋ jɩŋ. Ba bɩ wɩalɩŋ ba Wɩa sɩɩ chɛ jɩŋ.

⁵ Mɩ jaŋ mʋ ba sɩpaalaaraa teeŋ, a bʋl wɩaa pɩba. Ba-na chaasa jɩŋ La TƖƖNA wombiiŋ nɛ. Ba jɩŋ wɩalɩŋ ba Wɩa sɩɩ chɛ nɛ. Ama ba ma kala pɛ niiŋ nɛ a vɩamɛ a bɩ mɩɩ to.

⁶ Ŋɩɩ wɩaa, naachigiŋ jaŋ lɩɩ duuŋ tʋɔŋ a kʋ kpʋba. Guŋguro jaŋ lɩɩ tintee-hɩlɩŋ a kʋ kɛmba pʋɔsɛ. Kpeye jaŋ faa kpagɛ ba tasɩŋ a gbɛrɛba, dɩ nʋʋkala nɛ kʋ lɩɩ, ʋ jaŋ kɛnʋ pʋɔsɛ. Ba chaasa vɩa La TƖƖNA nɛ, wɩalɩŋ ba sɩ ŋaa chei yʋga nɛ.

⁷ LA TƖƖNA sɩ, “Bɛɛ nɛ tɩɩ mɩ jaŋ joŋo chɛma? Ma biiriŋ vɩamɛ nɛ aŋ ŋmɩŋmɩɛsɛ vesiŋ sɩ ŋaa kʋpɛɩba. Mɩ pɩba kɩalɩŋ kala ba sɩɩ chɛ nɛ, ka ba ha ŋɩŋaa bachɔrʋŋ wɩaa, a yie pʋɔla mʋmʋ hachɔrʋmɔɔ dɩɩsɩŋ.

⁸ Ba nagɛ ja-bele ba sɩ dɩɛsa ʋ nɛrɛ nɛ, a cho haalaa, ba kʋŋkala yie hɩhɩɛnɛ dɩ ʋ kɛŋ ʋ dɔŋɔ haala pɩŋ nɛ.

⁹ Bɛɛ nɛ tɩɩ mɩ bɩ jaŋ dɔgɩsɛba a tɩŋ wɩɩŋ deeŋ wɩaa? Mɩ-na ma TƖƖNA nɛ pɩɛsa. Bɛɛ nɛ jaŋ tɩɩ mɩ bɩ jaŋ joŋ mɩ baanɩŋ fɩɩsɛ tintee doho deeŋ nɩaa lɛ?

¹⁰ Má gɔllɛ ʋ girep tɩɩsɩŋ bagɩsɩŋ a cheiba, ama má sɩ́ ba kala chei gbelem gbelem. Má keri ba naakelee ta, bɛɛ wɩaa nɩaa deemba bɩ mɩ-na ma TƖƖNA nɩaa ŋaa.

¹¹ Iziral tɩŋŋaa arɩ Juda nɩaa chaasa bɩ wʋtɩtɩɩ mʋa ma kɛnɛ mɩ teeŋ. Mɩ-na ma TƖƖNA nɛ bʋla.”

¹² Ba nyɩɛ wɩaa a tɩgɛ La TƖƖNA lɛ nɛ. Ba sɩ, “Ʋ bɩ jaŋ ŋaala wɩɩkala. Wʋbɔŋ kala bɩ jaŋ ŋaa la lɛ. Laalɩŋ koo losuŋ bɩ jaŋ jʋʋla.

¹³ Wɩa wʋlaabʋlla-la wʋbʋlaa kala ŋaa peliŋ nɛ, ba bɩ wɩɩkala kɛnɛ. Ba wʋbʋlɩa-la jaŋ gʋra diiba.”

¹⁴ Ŋɩɩ wɩaa wɩɩ-la La TƖƖNA Wɩa doluŋ kala Tɩɩna sɩ bʋla nɛ ŋ-la: “A tɩŋ nɩalɩŋ sɩ bʋl wɩaa deemba, mɩ jaŋ leŋ dɩ mɩ wɩalɩŋ ŋ sɩɩ bʋl nagɛ nyiniŋ, dɩ nɩalɩŋ ma nagɛ daasɩŋ, dɩ wɩalɩŋ jomba dii.”

¹⁵ La TƖƖNA bɩra sɩ, “Ou, Iziral tɩmma, Mɩ kɛŋ tintee dɔŋ nɩaa nɛ a lɩɩ dɩ-bolii a kʋkɔ dɩ mɩ hɛ ma lɛ. Tintee-la nɩaa hɛ nɩmɛ faafaa kala nɛ a kɛŋ doluŋ woruŋ. Ma bɩ ba yikoro jɩŋ. Ma bɩ ba wʋbʋlʋŋ ma ka nɩɩ.

¹⁶ Ba bayuori kɩaa kɛŋ huoŋ nɛ woruŋ, ba kala ŋaa laalɩyuori wajɩaba nɛ a kɛŋ doluŋ.

¹⁷ Ba jaŋ chei ma kʋpɛrɛɛ arɩ ma kʋdiilee. Ba jaŋ kpʋ ma hambolibiisiŋ arɩ ma hantolibiisiŋ. Ba jaŋ kpʋ ma piesee arɩ ma nɛsɩŋ kala. Ba jaŋ keri ma girep tɩɩsɩŋ arɩ ma tutogusuŋ ta. Ba jaŋ kɛŋ ba tokobiee a chei ma tabala-la ma sɩ saa kɛrɩsɩŋ golli a joŋ ma yɩɛlaa hɛ.”

¹⁸ La TƖƖNA sɩ, “Tapʋlɩa-la lɛ, mɩ bɩ jaŋ kpʋ ma kala.

¹⁹ Dɩ ŋ nɩaa nɛ pɩɛsa, ‘Bɛɛ nɛ tɩɩ La TƖƖNA Wɩa ŋaa wɩaa deemba la lɛ?’ Ŋ jaŋ bʋla pɩba, ‘Ma sɩ vɩamɛ aŋ to vʋɩyaa ma tinteeŋ lɛ nɛ tɩɩ. Ŋɩɩ wɩaa, ma jaŋ tɩma pɩ nɩwogusuŋ tintee-la sɩ bɩ ma kʋŋ ŋaa lɛ.’

²⁰ Heele bʋl wɩɩŋ deeŋ a pɩ Iziral tɩŋŋaa, a bʋla pɩ Juda nɩaa ma kala:

²¹ Ma ŋaa nɩyaara nɛ a chʋʋlɛ, má nɩɩ wɩɩŋ deeŋ, ma kɛŋ sɩaa nɛ aŋ bɩ na, a kɛŋ dɩgɩlaa ma aŋ bɩ nɩɩ.”

²² La TƖƖNA pɩɛsa, “Ma bɩ mɩ ka fáa? Ma bɩ maga dɩ ma chichel mɩ sɩpaaŋ? Mɩ-na nɛ bil hagɩlɩ-bumbugulo ʋ ŋaa mʋgʋ-balɩŋ bʋa, bʋa-la hɛ nɩmɛ nɛ a kaa mʋmʋ wuu, ʋ bɩ jaŋ wuo cholu. Lɩɩ-peliŋ jaŋ wuo sii, ama ʋ bɩ jaŋ wuo cholu. Ba jaŋ wuo huuri woruŋ, ama ba bɩ jaŋ wuo cholu.

²³ Ama nɩaa deemba kɛŋ nyuduoŋ nɛ, a bɩ dagɩŋ ka nɩɩ. Ba fa vɩamɛ nɛ a joŋ harɩŋ yɩamɛ.

²⁴ Ba vɩa dɩ ba bʋl, ‘Má leŋ dɩ la zil La TƖƖNA Wɩa, ʋ nɛ leŋe duonuŋ nɩɩ pɩpɩla ʋ bʋa lɛ. Ʋ nɛ yie leŋ la kɩaa wasɛ woruŋ la ŋaa.’

²⁵ Ma wʋbɔŋŋɔɔ ŋaanɩŋ kiri wɩaa deemba kala ta nɛ. Ma wʋcheelee kiri wʋzɔmɔ-la ma fa sɩ jaŋ na ta nɛ.

²⁶ Nɩbɔŋŋɔɔ hɛ mɩ nɩaa tʋɔŋ nɛ, a faa gbɛrɛ dɩ ba kɛsɛ nɩaa a nagɛ nɩaa sɩ yie bɛrɛ kɛsɛ diibiisiŋ ŋɩɩ. Ba nagɛ nɩaa sɩ bɛrɛ bɛrɩsɩŋ dɩ ba kɛsɛ nɩaa nɛ.

²⁷ Ba nyɩsa laa nɩaa kɩaa a su dɩɩsɩŋ a nagɛ jibiisiŋ sɩ su ji-kɔrʋŋ nɛ, ba bɩrɩmɛ kɩa tɩmma nɛ a kɛŋ doluŋ woruŋ,

²⁸ a nɛrɛ pɩla pɩla, ba yaraa kala magɛ dɔŋɔ. Ba wʋbɔŋŋɔɔ ŋaanɩŋ bɩ dɛrɛ. Ba bɩ biisinsiŋ wɩaa chɩla, ba bɩ chɩna gbɛrɛ summoo ba nɩna wɩalɩŋ sɩ maga dɩ ba na.”

²⁹ La TƖƖNA pɩɛsa, “Bɛɛ nɛ tɩɩ mɩ bɩ jaŋ dɔgɩsɛba a tɩŋ wɩɩŋ deeŋ wɩaa? Bɛɛ nɛ jaŋ tɩɩ mɩ bɩ jaŋ joŋ mɩ baanɩŋ fɩɩsɛ tintee doho deeŋ nɩaa lɛ?

³⁰ Wʋlɔrʋ arɩ wʋberige nɛ ŋaa tintee-la lɛ:

³¹ Mɩ wʋlaabʋllaa sɩ nyɩɛ wɩaa arɩ baa bʋl wɩaa Wɩa doluŋ lɛ nɛ. Ka Wɩɩsʋllɩ sɩpaalaaraa ma mɩɩra ŋɩŋaa wɩaa ba tɩtɩaba doluŋ lɛ. Mɩ nɩaa ma cho ŋɩɩ ba sɩɩ ŋaa. Ama wʋbɛɛ nɛ ma jaŋ ŋaa wɩaa deemba dɩdɛrɩŋ?”