JƐRƖMAAYA 44 - WƖA TENIŊ

Wʋlɔrʋŋ jaŋ jʋʋ Juda nɩaa a tɩŋ ba sɩɩ kpaarɛ vʋɩyaa

¹ La TƖƖNA bʋl wɩaa a pɩ Jɛrɩmaaya a mʋ tɩgɛ Juu tɩmma-la kala sɩ hɛ Ijipiti tinteeŋ leree deemba lɛ, Ijipiti sɛmɛ-la sɩ hɛ bʋbʋɔŋ dɩɩrɩŋ, Mɩgɩdɔl, Tapanhɛs arɩ Memfis a pɛ Ijipiti sɛmɛ-la ma sɩ hɛ nyuŋ dɩɩrɩŋ.

² Wɩɩ-la La TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: “Ma na wʋlɔrʋ-la sɩ bɩ bana kɛnɛ mɩ sɩ kaa kʋ hɛ Jerusalɛm arɩ Juda tasɩŋ kala lɛ nɛ. Jɩnɩŋ tasɩ-la kala cheye nɛ a pɩŋ hoi

³ a tɩŋ wʋbɔmɔ-la ba sɩ ŋaa wɩaa. Ba leŋe mɩ baanɩŋ sii ba nyuŋ nɛ ba sɩ nyɩgɛ kʋsʋɔrʋsʋŋ a kpʋkpaarɛ vesiŋ, ba-na koo ma-na koo ma naabalɩmaba sɩ bɩ jɩŋ.

⁴ Mɩ tɩŋ mɩ wʋlaabʋllaa nɛ ba teeŋ bʋlɩa bʋlɩa, ba bʋla pɩba, ‘Má sɩ́ wʋkɩsɩa-la mɩ sɩ bɛrɛ ŋaa.’

⁵ Ama ba bɩ jegile nɩɩ, aŋ vɩa dɩ ba tomi. Ba bɩ bɩrɩma lɩɩ ba wʋbɔŋŋɔɔ lɛ koo a leŋ kʋsʋɔrʋsʋŋ nyɩga pɩ vesiŋ.

⁶ Ŋɩɩ wɩaa, mɩ chaasa na baanɩŋ ba nyuŋ, a chei Juda tasɩŋ arɩ Jerusalɛm womporunuŋ, a leŋ ba cheye pɩŋ hoi arɩ ŋɩɩ ba sɩ naga jɩnɩmba.

⁷ Lɛɛlɛ, wɩɩ-la mɩ-na ma TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: Bɛɛ nɛ tɩɩ ma lɛrɛ wʋlɔrʋŋ deeŋ sɩ bɩ bana kɛnɛ hɛ ma tɩtɩa lɛ? Maa chɛ dɩ ma chei baalaa arɩ haalaa, hambiisiŋ arɩ bii-mulluŋ dɩ ma doho nʋʋ bɩra sɩ́ ka nɛɛ?

⁸ Bɛɛ nɛ tɩɩ ma kɛŋ kɩalɩŋ ma tɩtɩa sɩ ŋaa a leŋ mɩ baanɩŋ sii, ma sɩ nyɩgɛ kʋsʋɔrʋsʋŋ a pɩpɩ Ijipiti vesiŋ lee-la ma sɩ kʋ hɔŋ? Ma jaŋ chei ma tɩtɩa, dɩ dʋnɩa tinteyee kala nɩaa sisieri ma lɛ, a kɛŋ ma yɩrɩŋ ŋmɩɛsa hɩhɛ nɩaa lɛ.

⁹ Ma yʋ wʋbɔmɔ-la kala ma naabalɩmaba sɩ ŋaa nɛɛ? Wʋbɔmɔ-la ma Juda kuoroo arɩ ba haalaa, ma tɩtɩa arɩ ma haalaa sɩ ŋaa Juda arɩ Jerusalɛm womporunuŋ lɛ nɛɛ?

¹⁰ Arɩ jɩnɩŋ kala ba ha bɩ ba tɩtɩa kaa muuri koo a zilmi, koo a to wombii-la mɩ sɩ bile dɩ ba tuto, arɩ mɩ wʋdagaa mɩ sɩ bile pɩ ma dɩ ma naabalɩmaba.

¹¹ Ŋɩɩ wɩaa, wɩɩ-la mɩ-na ma TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: Mɩ chaasa kɛŋ mɩ tʋɔŋ nɛ dɩ mɩ kɛŋ wʋlɔrʋŋ kʋ hɛ ma lɛ a chei Juda kala.

¹² Mɩ jaŋ kpʋ Juda nɩkaana-la kala sɩ ŋaa siri a kɔ Ijipiti tinteeŋ a hɔŋ nɩmɛ. Ba kala jaŋ sʋʋ Ijipiti tinteeŋ lɛ. Ba jaŋ sʋʋ laalɩŋ lɛ koo losuŋ kpʋba. A chɩŋ ba nɩbiisiŋ lɛ a kaa jɩl ba nɩbalaa, ba jaŋ sʋʋ laalɩŋ lɛ koo losuŋ lɛ. Ba jaŋ kɛŋ nyɛsɩŋ nɩaa sɩaa lɛ. Nɩaa jaŋ sisieri ba lɛ, a kɛŋ ba yɩrɩŋ ŋmɩɛsa hɩhɛ nɩaa lɛ, a joŋ cheeriŋ pɩpɩba.

¹³ Mɩ jaŋ kɛŋ laalɩŋ, losuŋ arɩ nyanyal-bɔmʋŋ a dɔgɩsɛ nɩalɩŋ sɩ hɛ Ijipiti lɛ, a nagɛ mɩ sɩ dɔgɩsɛ Jerusalɛm nɩaa ŋɩɩ.

¹⁴ Juda nɩkaana-la sɩ kɔ dɩ ba hɔŋ Ijipiti lɛ, ba kʋŋkala bɩ jaŋ fori koo a kɛŋ mɩɩsɩŋ a mɩɩra mʋ Juda tinteeŋ, lee-la ba sɩɩ hɩɛnʋ dɩ ba mʋ. Ba kala bɩ jaŋ mɩɩra mʋ, see nɩaa baŋmɛnɛ.”

¹⁵ Ŋɩɩ nɛ baala-la kala sɩ jɩma dɩ ba haalaa ka nyɩgɛ kʋsʋɔrʋsʋŋ pɩpɩ vesiŋ arɩ haala-la kala sɩ hɛ nɩmɛ, ba fa yʋga nɛ woruŋ, arɩ nɩalɩŋ kala sɩ hɛ Ijipiti sɛmɛ-la sɩ hɛ bʋbʋɔŋ arɩ sɛmɛ-la sɩ hɛ nyuŋ bʋla pɩ Jɛrɩmaaya,

¹⁶ “La bɩ jaŋ jegile nɩɩ tɩndaarɩ-la ŋ sɩ bʋla pɩla La TƖƖNA yɩrɩŋ lɛ.

¹⁷ La jaŋ sɛnɛ ŋaa wɩalɩŋ kala la sɩ sɩ la jaŋ ŋaa. La jaŋ nyɩgɛ kʋsʋɔrʋsʋŋ a pɩ wɩa-nyuŋ veŋ ha-kuoru-la aŋ wansɛ kʋnyʋalaa ma a pʋ, a nagɛ la dɩ la naabalɩmaba, la kuoroo arɩ la tɩntɩnnɩ-hɩasɩŋ fa sɩ ŋaa ŋɩɩ Juda tasɩŋ arɩ Jerusalɛm womporunuŋ lɛ. Bʋa-la lɛ, la fa kɛŋ kʋdiilee nɛ woruŋ a kɛŋ kɩaa, wɩɩkala bɩ laa walɩmɛ.

¹⁸ Ama la sɩ kʋ leŋ kʋsʋɔrʋsʋŋ nyɩga pɩ wɩa-nyuŋ veŋ ha-kuoru-la, a bɩ kʋnyʋalaa wansa pʋpʋ, la bɩ kʋŋkala kɛnɛ, ka laalɩŋ arɩ losuŋ kpʋkpʋla.”

¹⁹ Haala-la bɩra bʋl, “La sɩ nyɩgɛ kʋsʋɔrʋsʋŋ a pɩ wɩa-nyuŋ veŋ ha-kuoru-la, a ŋaa kʋnyʋalaa ma aa pʋ, ŋ bɩɩna la balaba bɩ jɩŋ arɩ la yie ŋaa kɩŋkɛsɩmɛɛ sɩ nagʋ a wansɛ kʋnyʋalaa ma pʋpʋ nɛɛ?”

²⁰ Ŋɩɩ nɛ Jɛrɩmaaya bʋla pɩ nɩalɩŋ kala, baalaa arɩ haala-la kala sɩɩ bʋl wɩaa ʋ teeŋ:

²¹ “Kʋsʋɔrʋsʋ-la ma sɩ nyɩga Juda tasɩŋ arɩ Jerusalɛm womporunuŋ lɛ, ma dɩ ma naabalɩmaba, ma kuoroo, ma tɩntɩnnɩ-hɩasɩŋ arɩ nɩalɩŋ kala sɩ hɛ tintee-la lɛ, ma bɩɩna La TƖƖNA yʋ ba wɩaa nɛ koo?

²² La TƖƖNA sɩ kʋ magɛ ŋɩɩ a bɩra bɩ ma wʋbɔŋŋɔɔ arɩ ma wʋkɩsɩa-la lɛ wuo nyalɩmɛ, ʋ leŋe ma tinteeŋ pɩŋ hoi nɛ, nʋʋkala tuo nɩmɛ arɩ ʋ sɩ nagɛ ŋɩɩ jɩnɩmba, nɩaa kɛŋ ʋ yɩrɩŋ ŋmɩɛsa hɩhɛ nɩaa lɛ.

²³ A tɩŋ ma sɩ nyɩgɛ kʋsʋɔrʋsʋŋ a ŋaa wʋbɔmʋŋ La TƖƖNA teeŋ, a bɩ ʋ niiŋ to koo wombii-la ʋ sɩ bile dɩ la tuto arɩ ʋ wʋdagaa, ŋɩɩ nɛ tɩɩ wʋlɔrʋŋ deeŋ ŋaa ma lɛ, ʋ nɛ ma nɩna ŋɩɩ lɛɛlɛ.”

²⁴ Ŋɩɩ nɛ Jɛrɩmaaya bɩra bʋla pɩ nɩalɩŋ kala, a pɛ haalaa lɛ, “Má jegile nɩɩ La TƖƖNA niiŋ wɩaa, ma Juda tɩmma-la kala sɩ hɛ Ijipiti lɛ.

²⁵ Wɩɩ-la La TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: Ma dɩ ma haalaa wʋŋaalaa sɛnɛ dagɛ nii-la ma sɩ hɛ nɛ a bʋl, ‘La jaŋ sɛnɛ to niiri-la la sɩ hɛ arɩ la jaŋ nyɩgɛ kʋsʋɔrʋsʋŋ, a wansɛ kʋnyʋalaa ma a pɩ wɩa-nyuŋ veŋ ha-kuoru-la. Má ŋaa wɩalɩŋ kala ma sɩ hɛ niiŋ arɩ ma jaŋ ŋaa. Má lɩɩsɛ niiri-la kala ma sɩ ta.’ ”

²⁶ Ama ma Juu tɩmma-la kala sɩ hɛ Ijipiti lɛ, má jegile nɩɩ La TƖƖNA wɩaa. La TƖƖNA sɩ, “Mɩ ŋmɩɛsɛ mɩ yɩrɩ-balɩŋ, nʋʋkala sɩ lɩɩ Juda a hɛ Ijipiti lee na-kala bɩra bɩ jaŋ yɩrɛ mɩ yɩrɩŋ koo a ŋmɩɛsɛ a bʋl, ‘Mɩ ŋmɩɛsɛ La TƖƖNA Wɩɩjarɩbakɔ sɩ weye.’

²⁷ Mɩ bene a chɩchɛ wombiiŋ nɛ dɩ mɩ ŋaaba wʋbɔŋ, wʋzɔŋ dee. Juu tɩmma-la sɩ hɛ Ijipiti lɛ jaŋ sʋʋ laalɩŋ lɛ, koo losuŋ kpʋba, dɩ ba kala dɛrɛ.

²⁸ Nɩalɩŋ sɩ foro laalɩŋ lɛ a mɩɩra lɩɩ Ijipiti tinteeŋ a mʋ Juda bɩ jaŋ yʋgɛ. Ŋɩɩ nɛ nɩkaana-la sɩ kʋ hɔŋ Ijipiti lɛ jaŋ jɩŋ nɩɩ-la wɩɩŋ sɩ jaŋ chɩŋ, dɩ mɩ nɛ koo ba nɛ.

²⁹ Wɩɩŋ deeŋ nɛ jaŋ ŋaa magɩlɩŋ a pɩma arɩ mɩ jaŋ dɔgɩsɛma leriŋ deeŋ, dɩ ma jɩŋ arɩ mɩ sɩ sɩ mɩ jaŋ dɔgɩsɛma ŋɩɩ jaŋ sɛnɛ ŋaa. Mɩ-na ma TƖƖNA nɛ bʋla.”

³⁰ Wɩɩ-la La TƖƖNA sɩ bʋla nɛ ŋ-la: “Mɩ jaŋ joŋ Ijipiti kuoro Hɔfɩra a hɛ ʋ dʋndɔmɔ-la sɩɩ chɛ ba lɩɩsɛ ʋ mɩɩsɩŋ nɩsɩŋ lɛ, a nagɛ ŋɩɩ mɩ sɩ joŋ Juda kuoro Zedikaaya hɛ Babɩlɔŋ kuoro Nebukadineza nɩsɩŋ lɛ, ʋ dʋndɔŋ-la fa sɩɩ chɛ ʋ lɩɩsɛ ʋ mɩɩsɩŋ.”