JƐRƖMAAYA 42 - WƖA TENIŊ1 Ŋɩɩ nɛ laalɩyuori-hɩasɩ-la kala a pɛ Karɩa nanʋala Johanaŋ lɛ arɩ Hosaaya nanʋala Jezania arɩ nɩalɩŋ kala a chɩŋ ba nɩbiisiŋ lɛ a kaa jɩl ba nɩbalaa 2 kala mʋ Wɩa wʋlaabʋlla Jɛrɩmaaya teeŋ a bʋla pʋ, “Laa sʋlʋŋ, jegile nɩɩ wɩɩ-la la sɩ kɛnɛ, a sʋl ŋ TƖƖNA Wɩa a pɩ la nɩkaanaa deemba. Ŋ tɩtɩa sɩɩŋ na la nɛ lɛɛlɛ, la fa yʋga nɛ woruŋ, ama lɛɛlɛ la baŋmɛnɛ nɛ ka. 3 Sʋl ŋ TƖƖNA Wɩa dɩ ʋ dagɛla lee-la la sɩ jaŋ mʋ arɩ wɩɩ-la la sɩ jaŋ ŋaa.” 4 Ŋɩɩ nɛ Wɩa wʋlaabʋlla Jɛrɩmaaya bʋl, “Mɩ nɩa nɛ. Mɩ jaŋ sʋl ma TƖƖNA Wɩa arɩ ma sɩ bʋl ŋɩɩ. Mɩ jaŋ bʋl wɩɩ-la kala La TƖƖNA sɩ bʋla a pɩma, mɩ bɩ jaŋ joŋ wɩɩkala faama.” 5 Ŋɩɩ nɛ ba bʋla pɩ Jɛrɩmaaya, “La TƖƖNA nɛ kɛŋ wʋtɩtɩɩ, ʋ nɛ jaŋ ŋaa nʋʋ sɩ pɛ na wɩɩ-la a dɔgɩsɛla dɩ la nɛ bɩ wɩalɩŋ ʋ sɩ tɩmɩŋ dɩ ŋ kʋ bʋla pɩla to. 6 Dɩ wɩɩ-la zɔmɔ koo ʋ bɩ zɔŋ, la jaŋ to La TƖƖNA Wɩa niiŋ, Nɩɩ-la teeŋ la sɩɩ tɩmɩŋ, dɩ ŋɩɩ leŋ wɩaa vɛŋ woruŋ a pɩla a tɩŋ la sɩ jaŋ to La TƖƖNA Wɩa niiŋ wɩaa.” 7 Tapʋlaa fii harɩŋ, La TƖƖNA bʋl wɩaa a pɩ Jɛrɩmaaya. 8 Ŋɩɩ nɛ ʋ yɩrɛ Karɩa nanʋala Johanaŋ arɩ laalɩyuori-hɩasɩ-la fa sɩ hɛ ʋ teeŋ arɩ nɩalɩŋ kala a chɩŋ ba nɩbiisiŋ lɛ a kaa jɩl ba nɩbalaa. 9 Ŋɩɩ nɛ ʋ bʋla pɩba, “Wɩɩ-la La TƖƖNA, Iziral tɩŋŋaa Wɩa, Nɩɩ-la teeŋ ma sɩ tɩmmɛ dɩ mɩ kɛŋ ma wɩɩŋ mʋ sɩ bʋla nɛ ŋ-la: 10 ‘Dɩ ma nɛ hɔŋ tinteeŋ deeŋ lɛ, mɩ jaŋ leŋ dɩ ma waa, mɩ bɩ jaŋ yigima lo. Mɩ jaŋ leŋ dɩ ma chɩŋ, mɩ bɩ jaŋ churima. Mɩ tʋɔŋ chaasa chei nɛ wʋlɔrʋnʋ-la mɩ sɩ joŋo hɛ ma lɛ. 11 Má sɩ́ Babɩlɔŋ kuoro fá, nɩɩ-la ma sɩɩ fá lɛɛlɛ. Má sɩ́ ʋ fá, mɩ-na ma TƖƖNA nɛ bʋla, bɛɛ wɩaa mɩ hɛ ma teeŋ nɛ, mɩ jaŋ laama ta ʋ nɩsɩŋ lɛ. 12 Mɩ jaŋ fá ma nenige a leŋ dɩ ʋ ma fá ma nenige a leŋ dɩ ma bɩra tɩɩ ma tinteeŋ.’ 13 Ama dɩ ma nɛ sɩ, ‘La bɩ jaŋ hɔŋ tinteeŋ deeŋ lɛ,’ a bɩ ma TƖƖNA Wɩa niiŋ to, 14 aŋ bʋl, ‘Aɩ, la jaŋ mʋ hɔŋ Ijipiti tinteeŋ lɛ, lee-la la sɩ bɩ jaŋ na laalɩŋ koo a nɩɩ laalɩyuori goŋ koo dɩ losuŋ kɛnla.’ 15 Ŋɩɩ-na ma Juda nɩkaanaa, má jegile nɩɩ La TƖƖNA niiŋ wɩaa. Wɩɩ-la La TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: ‘Dɩ ma nɛ ŋaa siri arɩ ma jaŋ mʋ Ijipiti tinteeŋ, a sɛnɛ mʋ hɔŋ nɩmɛ, 16 ŋɩɩ-na laal-la ma sɩɩ fá jaŋ paa puuma, dɩ losu-la ma ma sɩɩ fá to ma harɩŋ dɩ ma sʋʋ nɩmɛ. 17 Wʋtɩtɩɩ, nɩalɩŋ kala sɩ ŋaa siri dɩ ba mʋ Ijipiti tinteeŋ a hɔŋ nɩmɛ, laalɩŋ, losuŋ arɩ nyanyalɩɩ jaŋ kpʋba. Ba kʋŋkala bɩ jaŋ kɛŋ mɩɩsɩŋ koo a fori wʋlɔrʋ-la mɩ sɩ jaŋ kaa kʋ hɛ ba lɛ.’ 18 Wɩɩ-la La TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: ‘A nagɛ mɩ sɩ na baanɩŋ a dɔgɩsɛ nɩalɩŋ sɩ hɛ Jerusalɛm lɛ ŋɩɩ, ŋɩɩ tɩtɩa nɛ mɩ jaŋ na baanɩŋ a ŋaa ma lɛ, dɩ ma nɛ mʋ Ijipiti tinteeŋ. Mɩ jaŋ leŋ dɩ ma kɛŋ nyɛsɩŋ nɩaa sɩaa lɛ. Nɩaa jaŋ sisieri ma lɛ, a kɛŋ ma yɩrɩŋ ŋmɩɛsa hɩhɛ nɩaa lɛ, a joŋ cheeriŋ pɩpɩma. Ma bɩra bɩ jaŋ kɔ dɩ ma na leriŋ deeŋ.’ 19 Ma-na Juda nɩkaanaa, La TƖƖNA bʋla pɩma, ‘Má sɩ́ Ijipiti mʋ.’ Ma jɩŋ wɩɩŋ deeŋ lɛ: Mɩ kpʋrɩsɛ ma dɩgɩlaa nɛ jɩnɩŋ 20 arɩ ma chaasa chei wɩɩ nɛ ma sɩ tɩmmɛ La TƖƖNA Wɩa teeŋ a bʋl, ‘Sʋl La TƖƖNA Wɩa a pɩla, aŋ bʋl wɩɩ-la kala ʋ sɩ bʋla a pɩla, la jaŋ ŋaa.’ 21 Mɩ bʋl wɩalɩŋ pɩma nɛ jɩnɩŋ, ama ma ha bɩ La TƖƖNA Wɩa niiŋ to wɩalɩŋ kala ʋ sɩ tɩmmɛ mɩ bʋla pɩma lɛ. 22 Ŋɩɩ wɩaa lɛɛlɛ, ma jɩŋ wɩɩŋ deeŋ lɛ: Ma dɔnsʋŋ jaŋ sʋʋ laalɩŋ lɛ, losuŋ arɩ nyanyalɩŋ ma jaŋ kpʋ dɔnsʋŋ, tintee-la ma sɩɩ chɛ ma mʋ hɔŋ lɛ.” |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.