JƐRƖMAAYA 41 - WƖA TENIŊ

Ba kpʋ Gedalia

¹ Chɛŋ-pɛɩ lɛ nɛ Nɛtanɩa nanʋala Ɩsɩmɛl sɩ ŋaa Ɛlɩsama ma nihiŋ a ŋaa kuoro doho nʋʋ, aŋ ŋaa kuoro tɩntɩnnɩ-hɩasɩŋ dɔŋɔ ma sii kɛsɛ baalaa fii ba kɔ Ahɩkam nanʋala Gedalia teeŋ Mɩzɩpa lɛ. Ba kala hɔŋ a didii kɩaa.

² Ŋɩɩ nɛ Nɛtanɩa nanʋala Ɩsɩmɛl arɩ baala-la fii sii a kpʋ Gedalia arɩ tokobiiŋ, nɩɩ-la Babɩlɔŋ kuoro sɩ lɩɩsa ʋ chɩŋ ʋ naasɩŋ lɛ a bibeŋ tintee-la.

³ Ŋɩɩ nɛ Ɩsɩmɛl kpʋ Juu tɩmma-la ma kala fa sɩ hɛ Gedalia teeŋ Mɩzɩpa lɛ, a pɛ Babɩlɔŋ nɩaa laalɩyuoro-la ma sɩ hɛ nɩmɛ lɛ.

⁴ Ba sɩ kpʋ Gedalia taŋ sii pʋl, ka dɩ nʋʋkala-na nɩɩ wɩɩ-la,

⁵ baalaa mahɩŋ banɛsɛ fʋŋ ba tɔŋŋɔɔ nɛ a kɛŋ ba gɛnnɩŋ kɩɛsɛ aŋ kpɛrɛ kpɛrɛ ba tɩtɩa, a lɩɩ Sɛkɛm, Sɩlɔ arɩ Samarɩa a kɛŋ mɩaa Wɩɩsʋlʋŋ kɩaa arɩ kʋsʋɔrʋsʋŋ a kaa kɔ La TƖƖNA dɩa.

⁶ Ŋɩɩ nɛ Nɛtanɩa nanʋala Ɩsɩmɛl lɩɩ Mɩzɩpa lɛ dɩ ʋ chemba aŋ yiyel. Ʋ sɩ chemba, ʋ bʋl, “Má kʋ jʋʋ na Ahɩkam nanʋala Gedalia.”

⁷ Ba sɩ kʋ jʋʋ tabal-la tʋɔŋ, ŋɩɩ nɛ Nɛtanɩa nanʋala Ɩsɩmɛl arɩ ʋ baala-la sii a kpʋba a paaba lo hɛ viliŋ lɛ.

⁸ Ama nɩalɩŋ tʋɔŋ nɩaa fii bʋla pɩ Ɩsɩmɛl, “Sɩ́ la kpʋ! La kɛŋ mɩaa, nyonso, nʋʋŋ arɩ tʋʋŋ nɛ, la joŋo faa baga lɛ.” Ŋɩɩ nɛ ʋ lemba, ʋ bɩ ba-na kpʋa.

⁹ Vil-la lɛ ʋ sɩ joŋ nɩalɩŋ ʋ sɩ kpʋa a pɛ Gedalia lɛ a yuo hɛ fa ŋaa kuoro Asa kʋa nɛ. Ʋ nɛ luo bʋa-la lɛ Iziral kuoro Baasa sɩɩ yuou dɩ ʋ kaa pɔ laa ʋ tɩtɩa. Ŋɩɩ nɛ Nɛtanɩa nanʋala Ɩsɩmɛl paa nɩsʋʋnʋŋ a su ʋ kala.

¹⁰ Ŋɩɩ nɛ Ɩsɩmɛl kɛsɛ nɩkaana-la kala sɩ hɛ Mɩzɩpa lɛ ba ŋaa yosi, kuoro toloo arɩ nɩalɩŋ kala sɩ ka lee-la, nɩalɩŋ Nebuzaradaŋ sɩ ŋaa laalɩyuoro-la sɩɩ pɔ kuoro nɩhɩaŋ sɩ lɩɩsɛ Ahɩkam nanʋala Gedalia ʋ bibeŋ. Ŋɩɩ nɛ Nɛtanɩa nanʋala Ɩsɩmɛl kɛsɛba ba ŋaa yosi dɩ ba cholo mʋ Amɔŋ tinteeŋ.

¹¹ Karɩa nanʋala Johanaŋ arɩ laalɩyuori-hɩasɩ-la kala sɩ nɩɩ wʋbɔmɔ-la kala Nɛtanɩa nanʋala Ɩsɩmɛl sɩ ŋaa,

¹² ba kɛsɛ ba nɩaa kala dɩ ba mʋ yuo Nɛtanɩa nanʋala Ɩsɩmɛl. Ŋɩɩ nɛ ba kire mʋ kɛnʋ dɩ ʋ kpagɛ buotuo bal-la sɩ hɛ Gibioŋ lɛ a kɛŋ lɩɩŋ.

¹³ Nɩalɩŋ fa sɩɩ to Ɩsɩmɛl harɩŋ sɩ na Karɩa nanʋala Johanaŋ arɩ laalɩyuori-hɩasɩ-la, ba tʋɔŋ tɔrɛ.

¹⁴ Ŋɩɩ nɛ nɩalɩŋ kala Ɩsɩmɛl sɩ kɛsɛ ba ŋaa yosi Mɩzɩpa lɛ sii mʋ Karɩa nanʋala Johanaŋ teeŋ.

¹⁵ Ama Nɛtanɩa nanʋala Ɩsɩmɛl arɩ ʋ baala-la chori fori Johanaŋ nɩsɩŋ lɛ a fá mʋ Amɔŋ tinteeŋ.

Ba fá mʋ Ijipiti tinteeŋ

¹⁶ Ŋɩɩ nɛ Karɩa nanʋala Johanaŋ arɩ laalɩyuori-hɩasɩ-la sɩ hɛ ʋ teeŋ kɛŋ nɩalɩŋ sɩ ka Mɩzɩpa lɛ, nɩalɩŋ Ɩsɩmɛl sɩ kpʋ Gedalia aŋ laa: Laalɩyuoroo, haalaa, hambiisiŋ arɩ kuori dɩa tɩntɩnnaa ʋ sɩ kaa lɩɩ Gibioŋ kɔ.

¹⁷ Ŋɩɩ nɛ baa mʋ Ijipiti tinteeŋ, a mʋ chɩŋ Geruf Kɩmɩham lɛ a kpagɛ Bɛtɩlɛhɛm,

¹⁸ dɩ ba fori Babɩlɔŋ nɩaa nɩsɩŋ lɛ. Fawʋllʋŋ fa kɛmba nɛ a tɩŋ ba wɩaa, bɛɛ wɩaa Nɛtanɩa nanʋala Ɩsɩmɛl fa kpʋ Ahɩkam nanʋala Gedalia nɛ, nɩɩ-la Babɩlɔŋ kuoro sɩ lɩɩsa ʋ chɩŋ ʋ naasɩŋ lɛ a bibeŋ tintee-la.