JƐRƖMAAYA 40 - WƖA TENIŊ

Ba joŋ Jɛrɩmaaya ta

¹ Nebuzaradaŋ sɩ ŋaa laalɩyuoro-la sɩɩ pɔ kuoro kʋhɩaŋ sɩ lɩɩsɛ Jɛrɩmaaya ta Rama lɛ ŋɩɩ harɩŋ, La TƖƖNA bʋl wɩaa a pɩ Jɛrɩmaaya. Ʋ na Jɛrɩmaaya dɩ ba kɛŋ chɔrʋmɔɔ nɛ a vɔbʋ a pɛ Jerusalɛm arɩ Juda nɩalɩŋ ba sɩ yuo kɛsɛ tʋɔŋ a kaa mʋ yoŋ-baga Babɩlɔŋ lɛ.

² Laalɩyuoro-la sɩɩ pɔ kuoro kʋhɩaŋ-la sɩ na Jɛrɩmaaya, ʋ bʋla pʋ, “Ŋ TƖƖNA Wɩa nɛ sɩ ʋ jaŋ joŋ wʋlɔrʋŋ deeŋ hɛ leriŋ deeŋ lɛ.

³ Lɛɛlɛ La TƖƖNA leŋe wɩɩ-la ŋaa nɛ. Ʋ ŋaa ŋɩɩ tɩtɩa ʋ sɩ bʋla nɛ. Wɩaa deemba kala ŋaa a tɩŋ ma sɩ ŋaa wʋbɔŋŋɔɔ La TƖƖNA teeŋ a bɩ ʋ niiŋ to nɛ.

⁴ Ama jɩnɩŋ mɩɩ lɩɩsɛ chɔrʋmɔ-la sɩ vɔɔ ŋ nɩsaa nɛ. Kɔ dɩ la mʋ Babɩlɔŋ dɩ ŋ nɛ cho, mɩ jaŋ beŋ ŋ nyuŋ. Ama dɩ ŋ nɛ bɩ chɛ ŋ mʋ, ŋɩɩ-na leŋ. Bee na, tintee-la kala ŋaa ŋ kʋŋ nɛ, mʋ lee-la kala ŋ sɩɩ chɛ.”

⁵ Ama Jɛrɩmaaya sɩ bɩrɩma dɩ ʋ mʋ, Nebuzaradaŋ bɩra bʋl, “Mʋ Ahɩkam nanʋala Gedalia sɩ ŋaa Safaŋ nihiŋ teeŋ, ʋ nɛ Babɩlɔŋ kuoro lɩɩsɛ dɩ ʋ bibeŋ Juda tasɩŋ a hɛ ʋ teeŋ ŋ nɩaa tʋɔŋ, koo ŋ mʋ lee-kala ŋ sɩ cho.” Ŋɩɩ nɛ laalɩyuoro-la sɩɩ pɔ kuoro nɩhɩaŋ-la pʋ kʋdiilee arɩ kɩaa dɔnsʋŋ aŋ leŋ ʋ mʋ.

⁶ Ŋɩɩ nɛ Jɛrɩmaaya mʋ Ahɩkam nanʋala Gedalia teeŋ Mɩzɩpa lɛ a hɛ ʋ teeŋ a guoli ʋ nɩalɩŋ sɩ ka tʋɔŋ.

⁷ Juda laalɩyuori-hɩasɩ-la kala arɩ ba nɩaa sɩ hɛ gɩrɩŋ lɛ sɩ nɩa dɩ Babɩlɔŋ kuoro lɩɩsɛ Ahɩkam nanʋala Gedalia ʋ ŋaa tintee-la kʋhɩaŋ a bibeŋ baala-la arɩ haala-la arɩ hambiisi-la sɩ ŋaa summoo tintee-la lɛ, nɩalɩŋ ba sɩ bɩ kɛsɛ mʋ yoŋ-baga Babɩlɔŋ lɛ,

⁸ ba sii kɔ Gedalia teeŋ Mɩzɩpa lɛ. Nɩalɩŋ sɩ kɔ yɩraa nɛ ŋ-la: Nɛtanɩa nanʋala Ɩsɩmɛl, Johanaŋ arɩ Jonataŋ sɩ ŋaa Karɩa hambolibiisiŋ, Tanhʋmɛf nanʋala Sɛraaya, Ɛfaɩ sɩ ŋaa Netofa tɩɩna hambolibiisiŋ, arɩ Jazanɩa sɩ ŋaa Maka tɩɩna nanʋala arɩ ba nɩaa.

⁹ Ŋɩɩ nɛ Ahɩkam nanʋala Gedalia sɩ ŋaa Safaŋ nihiŋ, ŋmɩɛsa pɩ ba dɩ ba nɩaa a bʋl, “Má sɩ́ leŋe dɩ fawʋllʋŋ kɛmma ma sɩ jaŋ tɩma pɩ Babɩlɔŋ nɩaa. Má hɔŋ tintee-la lɛ a to Babɩlɔŋ kuoro niiŋ, wɩaa jaŋ vɛŋ woruŋ pɩma.

¹⁰ Mɩ-na tɩtɩa jaŋ hɔŋ Mɩzɩpa lɛ a chɩŋ ma naasɩŋ lɛ Babɩlɔŋ tɩmma-la sɩɩ kɔ la teeŋ. Ama ma maga ma ŋaa girep nɛnɛɛ sɩnɩŋ, yibiiniŋ tɩɩnɛnɛɛ arɩ olif nʋʋŋ, a joŋo hɛ puposu-la ma sɩ kaa tʋtʋɔlɛ kɩaa lɛ, a hɔŋ tasɩ-la ma sɩ laa lɛ.”

¹¹ Juu tɩmma-la kala sɩ hɛ Mʋab lɛ, Amɔŋ lɛ, Ɛdɔm lɛ arɩ tinteye-la dɔnsʋŋ sɩ nɩa dɩ Babɩlɔŋ kuoro leŋe ba dɔnsʋŋ ka nɛ Juda lɛ aŋ lɩɩsɛ Ahɩkam nanʋala Gedalia sɩ ŋaa Safaŋ nihiŋ, ʋ chɩŋ ʋ naasɩŋ lɛ a bibeŋ nɩalɩŋ,

¹² ba kala mɩɩra kɔ Juda tinteeŋ, Gedalia teeŋ Mɩzɩpa lɛ. Ba lɩɩ tinteye-la kala lɛ ba sɩ pɩsa hɛ nɛ a kɔ. Ba chaasa chagɛ girep nɛnɛɛ sɩnɩŋ a yʋgɛ woruŋ, a tɔrɛ yibiiniŋ tɩɩnɛnɛɛ ma yʋgɛ.

¹³ Ŋɩɩ nɛ Karɩa nanʋala Johanaŋ arɩ Juda laalɩyuori-hɩasɩ-la kala sɩ hɛ gɩrɩŋ lɛ kɔ Gedalia teeŋ Mɩzɩpa lɛ,

¹⁴ a bʋla pʋ, “Ŋ bɩ jɩŋ dɩ Amɔŋ tɩŋŋaa kuoro Baalɩs tɩŋ Nɛtanɩa nanʋala Ɩsɩmɛl nɛ dɩ ʋ kʋ kpʋŋ?” Ama Ahɩkam nanʋala Gedalia bɩ laa dii.

¹⁵ Ŋɩɩ nɛ Karɩa nanʋala Johanaŋ lʋara bʋla pɩ Gedalia Mɩzɩpa lɛ, “Leŋ dɩ mɩ mʋ kpʋ Nɛtanɩa nanʋala Ɩsɩmɛl, nʋʋkala bɩ jaŋ jɩŋ. Bɛɛ nɛ tɩɩ ʋ jaŋ kpʋŋ a leŋ dɩ Juu tɩmma-la kala sɩ hɛ ŋ teeŋ pɩsɛ, dɩ Juda tɩŋŋaa nɩkaanaa sʋʋ?”

¹⁶ Ama Ahɩkam nanʋala Gedalia bʋla pɩ Karɩa nanʋala Johanaŋ, “Sɩ́ wʋdoho-la ŋaa. Wɩɩ-la ŋ sɩ bʋla tɩgɛ Ɩsɩmɛl lɛ bɩ wʋtɩtɩɩ ŋaa.”