JƐRƖMAAYA 4 - WƖA TENIŊ

La Tɩɩna sɩ Iziral tɩŋŋaa mɩɩra kɔ ʋ teeŋ

¹ La TƖƖNA sɩ, “Iziral tɩmma, dɩ ma nɛ jaŋ mɩɩra kɔ mɩ teeŋ, má mɩɩra kɔ. Dɩ ma nɛ joŋ ma vʋɩya-la mɩ sɩɩ kɩsʋ ta a bɩra bɩ wɩalɩŋ sɩ leŋe ma yeŋŋi ka to,

² aŋ kɛŋ wʋtɩtɩɩ, a ŋɩŋaa wɩaa ba bʋa lɛ arɩ tʋɔpʋla a ŋmɩɛsɛ mɩ-na ma TƖƖNA sɩ weye, ŋɩɩ na, tinteyee nɩaa jaŋ chɩchɛ dɩ mɩ pɛ ba ma lɛ, dɩ nɩaa kala jʋjʋɔsɛ mɩ teeŋ.”

³ Wɩɩ-la La TƖƖNA bɩra sɩ bʋla a pɩ Juda arɩ Jerusalɛm nɩaa nɛ ŋ-la: “Má pɛrɛ ma tinteye-la ma ha sɩ bɩ pɛrɛ, aŋ pʋpɔ má sɩ́ ma kʋdoho joŋo duu hɛ sɔsʋŋ tʋɔŋ.

⁴ Má joŋ ma tɩtɩa hɛ mɩ-na ma TƖƖNA nɩsɩŋ lɛ. Má Juda arɩ Jerusalɛm nɩaa, má pʋllɛ ma tʋɔŋ, dɩ ŋɩɩ dee, mɩ baanɩŋ jaŋ sii ma nyuŋ a nagɛ nyiniŋ a diima a tɩŋ wʋbɔmɔ-la ma sɩ ŋaa wɩaa. Dɩ nyiŋ-la nɩɩ diima, nʋʋkala bɩ jaŋ wuo dɩsʋ.

Wʋlɔrʋnʋŋ jaŋ lɩɩ wɩɩpɔsʋŋ nagʋa dɩɩrɩŋ kɔ

⁵ Má heele bʋla pɩ Juda arɩ Jerusalɛm nɩaa, má ŋmʋʋ banyile tintee-la kala lɛ. Má faasa kpɩa a bʋl, ‘Má kʋ hɛ dɔŋɔ. Má leŋ la fá mʋ tabala-la ba sɩ saa kɛrɩsɩŋ golli.’

⁶ Má hɛ duoso pɩ nɩaa dɩ ba fá mʋ Jerusalɛm. Má fá a laa ma tɩtɩa, má sɩ́ dienu. Mɩ kɛŋ wʋlɔrʋŋ nɛ lɩɩ wɩɩpɔsʋŋ nagʋa dɩɩrɩŋ kʋkɔ, ʋ ŋaa wʋlɔrʋ sɩ bɩ bana kɛnɛ.”

⁷ Naachigiŋ sii ʋ dɩpɩnɩŋ nɛ a kʋ lɩɩ. Kʋ-la sɩɩ chei tinteyee sie nɛ. Ʋ lɩɩ ʋ leriŋ nɛ a kɔ dɩ ʋ chei ma tinteeŋ. Ma tasɩŋ jaŋ pɩŋ jikpeeniŋ, nɩaa jaŋ tuo ba lɛ.

⁸ Ŋɩɩ wɩaa, má laalɛ tʋɔ-chei gɛnnɩŋ a ta jembiee yel woruŋ, bɛɛ wɩaa La TƖƖNA baaŋ-la sɩ faasa sii la nyuŋ ha bɩ fɩɛla.

⁹ La TƖƖNA sɩ, “Tapʋlɩɩ-la, kuoru-balɩŋ arɩ ʋ tɩntɩnnɩ-hɩasɩŋ nandaasɩŋ jaŋ yʋɔrɛ. Wɩɩsʋllɩ sɩpaalaaraa tʋɔŋ jaŋ vɩɩŋɛ. Mɩ wʋlaabʋllaa ma niiree jaŋ maa.”

¹⁰ Ŋɩɩ nɛ mɩ bʋl, “Aa, La TƖƖNA Wɩɩjarɩbakɔ, ŋ chaasa nyɩsɛ nɩaa deemba arɩ Jerusalɛm nɩaa kala nɛ ŋ fa sɩ sɩ, ‘Má jaŋ hɔŋ arɩ fɩɛlɩŋ,’ ka tokobiiŋ pɛsɛ ba yikorusuŋ lɛ.”

¹¹ Bʋa-la lɛ La TƖƖNA jaŋ bʋla pɩ nɩaa deemba arɩ Jerusalɛm nɩaa, “Pel-lɩmɩŋ lɩɩ dundollu-la sɩ hɛ tintee-hɩlɩŋ lɛ nyuŋ a du hɩhɛ mɩ nɩaa lɛ nɛ. Ama nʋʋ bɩ pel-la wuo kaa chaara lɩlɩɩsɛ mɩɩ-jɔrʋŋ koo kʋŋkɔlʋŋ tɩta.

¹² Pel-duoŋ deeŋ lɩɩ mɩ teeŋ nɛ. Lɛɛlɛ mɩ dii ma sarɩya nɛ.”

¹³ Má bee na, dʋndɔmɔ ka kɔ nɛ a nagɛ duoŋ-bɩlɩmbaanaa, ʋ janɩŋ torukoba ka kɔ nɛ a nagɛ pel-vinvilimiŋ, ka ʋ janɩŋ naasɩŋ lɩma kɩɩ kachuunuŋ sɩɩ fil. Wɩɩŋ puula, la dɩdɛrɩŋ nɛ ŋɩɩ.

¹⁴ Jerusalɛm nɩaa, má chɛsɛ wʋbɔmɔ-la sɩ hɛ ma tʋɔŋ lɛ ta, ka dɩ La TƖƖNA laama ta. Ɛɛ nɛ maa chɛ dɩ ma laa wʋbɔŋŋɔɔ hɛ ma tʋɔŋ lɛ a diene magɛ?

¹⁵ Nʋʋ nɛ heelee bʋl wɩaa Daŋ tinteeŋ lɛ, wʋlɔrʋnʋŋ sɩ jaŋ kɔ wɩaa nɛ ʋ heele bʋbʋl Efirem tinteeŋ dundolluŋ nyuŋ ŋɩɩ.

¹⁶ Má bʋl wɩɩŋ deeŋ pɩ tinteyee nɩaa, má heele bʋla pɩ Jerusalɛm nɩaa. Laalɩyuoroo sɩ golli tasɩŋ chu a yuyuo nɛ lɩɩ tintee bolii a kʋkɔ, a ŋɩŋaa laalɩyuori goŋ dɩ ba yuo Juda tabalaa.

¹⁷ Ba kʋ golli Jerusalɛm ma chu a nagɛ nɩaa sɩ chɩna pɔ baga nɛ, bɛɛ wɩaa ʋ nɩaa vɩa La TƖƖNA nɛ. La Tɩɩna nɛ bʋla.

¹⁸ Ma tɩtɩa mɛlɛ arɩ ma wʋŋaalaa nɛ lɛrɛ wɩɩŋ deeŋ kʋ hɛ ma lɛ. Ŋɩɩ ba sɩ jaŋ dɔgɩsɛma nɛ ŋɩɩ. Ʋ faasa hɛɩ nɛ. Ʋ wɩɩ jʋʋ kɛŋ ma chʋbagɩlɩŋ-buguluŋ nɛ woruŋ.

¹⁹ Mɩɩ na hɛɛŋ nɛ, hɛɛŋ kɛmmɛ nɛ mɩ mɩmɩlɩmɛ. Mɩ tʋɔŋ kala nɛ cheye. Mɩ bɔyɛ ka joŋ nɛ, mɩ bɩ mɩ niiŋ wuo tɔrɛ. Mɩ nɩɩ banyile ba sɩ ŋmʋa nɛ. Mɩ nɩɩ laalɩyuori goŋ-la ma ba sɩ ŋaa nɛ.

²⁰ Wʋlɔrʋnʋ-la lɩa aŋ ka pɩpɩ dɔŋɔ nɛ. Tintee-la kala pɩŋ jikpeeniŋ nɛ. Ba guu chei mɩ lɛŋŋɛɛ nɛ, a kɩɛsɛ ba patɩɩsamba kala muno muno.

²¹ Ɛɛ nɛ mɩɩ chɛ dɩ mɩ na laalɩŋ sɩ hoso, aŋ pɛ nɩɩ ba sɩɩ ŋmʋʋ banyile ma a diene magɛ?

²² La TƖƖNA sɩ, “Mɩ nɩaa yaara nɛ, ba bɩ mɩ jɩŋ. Ba ŋaa hambii chʋʋlʋ nɛ, ba bɩ wɩaa bʋbʋɔŋ jɩŋ. Ba kaasɛ wʋbɔŋŋɔɔ ŋaanɩŋ lɛ nɛ woruŋ, ama ba bɩ wʋzɔmʋŋ ŋaanɩŋ jɩŋ.”

²³ Ŋɩɩ nɛ mɩ beŋ dʋnɩa, ʋ fa bɩ kʋŋkala naga, ʋ fa pɩŋ hoi nɛ. Mɩ sɩ beŋ wɩa-nyuŋ ma, ʋ pʋlʋmʋŋ kala nɛ lɛlɛ.

²⁴ Mɩ sɩ beŋ peelee, ba kala jigise nɛ. Dundolluŋ ma kala bibiegi.

²⁵ Mɩ sɩ bene, mɩ bɩ nʋʋkala na. Diibiisiŋ ma kala sɩ hɛ wɩa-nyuŋ fa file viiri nɛ.

²⁶ Mɩ sɩ bene, tintee-la fa sɩ sɩma mɩɩra bɩrɩmɛ tintee-hɩlɩɩ nɛ. Ʋ tasɩŋ kala pɩŋ jikpeeniŋ nɛ, a tɩŋ la TƖƖNA sɩ na baanɩŋ kɩŋkɛŋ wɩaa.

²⁷ Wɩɩ-la mɩ-na ma TƖƖNA sɩ bʋla nɛ ŋ-la: “Tintee-la kala jaŋ pɩŋ jikpeeŋ, ama, mɩ ta bɩ jaŋ chei ʋ kala gbelem gbelem.

²⁸ Dʋnɩa nɩaa jaŋ yel, dɩ wɩa-nyuŋ ma biri lim, bɛɛ wɩaa, wɩɩ-la mɩ sɩ bʋla, mɩ bɩ jaŋ kɛŋ mɩ tʋɔbɩɩnaa bɩrɩmɛ. Mɩ kɛŋ tʋɔŋ dɩ mɩ ŋaa nɛ, mɩ bɩ jaŋ mɩɩrɛ harɩŋ.”

²⁹ Dɩ ja-jɩllaa arɩ to-yuoroo nɛ kpɩa, taŋ kala nɩaa yie giŋ nɛ a fá lɩlɛl. Dɔnsʋŋ jʋʋ tɩɩ-lugunuŋ tʋɔŋ, ka dɔnsʋŋ ma fá jɩla jʋʋ bʋ-gɩraa tʋɔŋ. Ba yie fá vɩa tasɩ-la kala nɛ, nʋʋkala tuo ba lɛ.

³⁰ Ŋ-na Jerusalɛm, ŋ nagɛ nʋʋ ba sɩ chei ʋ kala nɛ, bɛɛ kʋŋ nɛ ŋ ŋɩŋaa? Bɛɛ nɛ tɩɩ ŋ laalɛ gɛrɩ-fɩɛsɩŋ, a hɛ sɛlɩmɛ kpɩɛraa? Bɛɛ nɛ tɩɩ ŋ tuuri ŋ sɩaa ŋŋgbensi? Ŋ magɩla kpɩɛrɛ ŋ tɩtɩa pɛɩ nɛ. Ŋ hɩɩlaba mɩɩsɩŋ fɩɩŋ nɛ. Baa chɛ ba lɩɩsɛ ŋ mɩɩsɩŋ nɛ.

³¹ Mɩ nɩa dɩ baa ŋmoo niiŋ a nagɛ haala sɩɩ chɛ dɩ ʋ lʋl ʋ luoruŋ wʋwɩɩ nɛ, a huunoo nagɛ haala sɩɩ chɛ dɩ ʋ lʋl ʋ ha-toli bie. Zaayɔŋ nɩaa nɛ ŋmoo niiŋ ŋɩɩ a wiesee puri, a tɩɛnɛ nɩsaa a bʋl, “Ou, mɩ sʋba. Ba jommi hɛ nɩkpʋʋraa nɩsɩŋ lɛ nɛ.”