JƐRƖMAAYA 38 - WƖA TENIŊ

Ba joŋ Jɛrɩmaaya lo hɛ viliŋ sɩ bɩ lɩɩŋ kɛnɛ lɛ

¹ Tapʋlɩɩ kʋbala Mataŋ nanʋala Sɛfatɩa, Pasɩhɔ nanʋala Gedalia, Sɛlɛmaaya nanʋala Jehukal arɩ Malɩkɩja nanʋala Pasɩhɔ nɩɩ dɩ Jɛrɩmaaya bʋl wɩaa a pɩpɩ nɩalɩŋ kala. Ʋ sɩ,

² “Wɩɩ-la La TƖƖNA sɩ bʋla nɛ ŋ-la: ‘Nʋʋ na-kala sɩ jaŋ hɔŋ tabalɩŋ deeŋ lɛ, laalɩŋ, losuŋ koo nyanyalɩɩ nɛ jaŋ kpʋʋ. Ama nɩɩ-la kala sɩ jaŋ kɛŋ ʋ tɩtɩa mʋ pɛ Babɩlɔŋ nɩaa tʋɔŋ, ʋ jaŋ kɛŋ mɩɩsɩŋ. Ʋ jaŋ laa ʋ mɩɩsɩŋ, ʋ bɩ jaŋ sʋʋ.’

³ Wɩɩ-la La TƖƖNA sɩ bʋla nɛ ŋ-la: ‘Mɩ jaŋ sɛnɛ joŋ tabalɩŋ deeŋ a hɛ Babɩlɔŋ kuoro laalɩyuoroo nɩsɩŋ lɛ, dɩ ba yuo diiu.’ ”

⁴ Ŋɩɩ nɛ tɩntɩnnɩ-hɩasɩ-la bʋla pɩ kuoro, “Baala deeŋ maga la kpʋʋ nɛ. Ʋ leŋe laalɩyuoro-la sɩ ka tabalɩŋ deeŋ lɛ nandaasɩŋ yʋyʋɔrɛ nɛ a pɛ nɩalɩŋ kala lɛ a tɩŋ wɩalɩŋ ʋ sɩ bʋla pɩpɩba. Baala deeŋ bɩ nɩaa deemba woruŋ ka chɛ, ʋʋ chɛ ʋ cheiba nɛ.”

⁵ Ŋɩɩ nɛ kuoro Zedikaaya bʋl, “Ʋ hɛ ma nɩsɩŋ lɛ nɛ, mɩ bɩ jaŋ wuo bʋl ma sɩ́ ʋ wɩɩkala ŋaa.”

⁶ Ŋɩɩ nɛ ba kɛŋ Jɛrɩmaaya, a joŋu hɛ kuoro nanʋala Malɩkɩja viliŋ lɛ. Vil-la fa hɛ nɩalɩŋ sɩɩ pɔ leriŋ kaala lɛ nɛ. Ba kɛŋ ŋmɛsɩŋ nɛ vɔɔ Jɛrɩmaaya a joŋu hɛ vil-la tʋɔŋ. Lɩɩŋ fa tuo vil-la lɛ, vʋchɔɔŋ dʋndʋŋa nɛ, ŋɩɩ nɛ Jɛrɩmaaya tuu mʋʋrɛ vʋchɔɔ-la lɛ.

⁷ Ama Kus tɩŋŋaa baal kʋbala baa yɩrɛ Ɛbɛd-Mɛlɛk sɩ ŋaa kuori dɩa tɩntɩnnʋ nɩɩ arɩ ba joŋ Jɛrɩmaaya hɛ viliŋ lɛ. Bʋa-la lɛ dɩ kuoro fa ha hɔŋ Bɛnjamɩŋ boi-baalɩŋ niiŋ,

⁸ Ɛbɛd-Mɛlɛk lɩɩ bʋla pʋ,

⁹ “Kuoro, mɩ nɩhɩaŋ, baalaa deemba ŋaa wʋbɔŋ nɛ ba sɩ ŋaa wɩalɩŋ kala Wɩa wʋlaabʋlla Jɛrɩmaaya lɛ. Ba joŋu yuo hɛ viliŋ lɛ nɛ. Ʋ jaŋ sʋʋ arɩ losuŋ nɩmɛ dɩ boroboro nɛ kʋ tuo tabal-la lɛ.”

¹⁰ Ŋɩɩ nɛ kuoro bʋla pɩ Ɛbɛd-Mɛlɛk sɩ ŋaa Kus tɩɩna, “Kɛŋ baalaa mara arɩ fii dɩ ma mʋ lɩɩsɛ Wɩa wʋlaabʋlla Jɛrɩmaaya vil-la tʋɔŋ dɩ ʋ sɩ́ sʋʋ.”

¹¹ Ŋɩɩ nɛ Ɛbɛd-Mɛlɛk kɛŋ baala-la ba mʋ jʋʋ dɩa kʋbala sɩ hɛ chʋgʋsʋŋ dɩa bʋbʋɔŋ kuoru dɩa lɛ. Ʋ paa gɛrɩ-kɔsʋ bɩnaa arɩ gɛrɩ-bɩnaa lee-la a joŋo vɔɔ ŋmɛnɩŋ lɛ a joŋo lo hɛ vil-la tʋɔŋ a pɩ Jɛrɩmaaya.

¹² Ŋɩɩ nɛ Ɛbɛd-Mɛlɛk bʋla pɩ Jɛrɩmaaya, “Joŋ gɛrɩ-kɔsʋmɔ-la arɩ gɛrɩ-bɩnɩa-la a bɛ ŋ nɩsaa dɩ ŋmɛŋ-la sɩ́ŋ keru.” Jɛrɩmaaya ŋaa ŋɩɩ,

¹³ ba kɛŋ ŋmɛŋ-la lɛ a lɛrɛ lɩɩsʋ vil-la tʋɔŋ. Ʋ kʋ lɩɩ a hɛ nɩalɩŋ sɩɩ pɔ leriŋ kaala-la tʋɔŋ.

Zedikaaya bɩra pɩɛsɛ Jɛrɩmaaya wɩaa

¹⁴ Kuoro Zedikaaya tɩŋ ba mʋ yɩrɛ Wɩa wʋlaabʋlla Jɛrɩmaaya kɔ La TƖƖNA dɩɩ-bal-la boi-nii-tori-la leriŋ. Kuoro bʋla pɩ Jɛrɩmaaya, “Mɩɩ chɛ mɩ pɩɛsɩŋ wɩɩ nɛ, pʋpɔ ŋ sɩ́ wɩɩkala joŋo faamɛ.”

¹⁵ Jɛrɩmaaya bʋla pɩ Zedikaaya, “Dɩ mɩ nɛ bʋl wʋtɩtɩɩ pɩŋ, ŋ jaŋ kpʋmɛ, dɩ mɩ nɛ chagɩlɩŋ ma, ŋ bɩ jaŋ jegile nɩɩ.”

¹⁶ Ŋɩɩ nɛ kuoro Zedikaaya lʋara ŋmɩɛsa pɩ Jɛrɩmaaya: “Mɩ ŋmɩɛsɛ La TƖƖNA sɩ weye, Nɩɩ-la sɩɩ pɩla wiese, mɩ bɩ jaŋ kpʋŋ koo a joŋuŋ hɛ nɩalɩŋ sɩɩ chɛ ba lɩɩsɛ ŋ mɩɩsɩŋ nɩsɩŋ lɛ.”

¹⁷ Ŋɩɩ nɛ Jɛrɩmaaya bʋla pɩ Zedikaaya, “Wɩɩ-la La TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: Dɩ ŋ nɛ joŋ ŋ tɩtɩa hɛ Babɩlɔŋ kuoro tɩntɩnna-la nɩsɩŋ lɛ, ŋ jaŋ laa ŋ mɩɩsɩŋ, ba bɩ jaŋ nyɩgɛ tabalɩŋ deeŋ ma, ŋ dɩ ŋ dɩa nɩaa jaŋ kɛŋ mɩɩsɩŋ.

¹⁸ Ama dɩ ŋ nɛ bɩ ŋ tɩtɩa joŋo hɛ ba nɩsɩŋ lɛ, La Tɩɩna jaŋ joŋ tabalɩŋ deeŋ hɛ Babɩlɔŋ nɩaa nɩsɩŋ lɛ dɩ ba nyɩgʋ dɩ ʋ dii tel. Ŋ ma tɩtɩa bɩ jaŋ fori ba nɩsɩŋ lɛ.”

¹⁹ Kuoro Zedikaaya bʋla pɩ Jɛrɩmaaya, “Fawʋllʋŋ kɛmmɛ nɛ a tɩŋ Juu tɩmma-la sɩ mʋ Babɩlɔŋ tɩmma-la teeŋ wɩaa. Babɩlɔŋ tɩmma-la jaŋ wuo jommi hɛ ba nɩsɩŋ lɛ dɩ ba chaasa dɔgɩsɛmɛ.”

²⁰ Ŋɩɩ nɛ Jɛrɩmaaya bʋl, “Ba bɩ jaŋ joŋuŋ hɛ ba nɩsɩŋ lɛ, sɛɩ La TƖƖNA niiŋ a ŋaa wɩɩ-la mɩ sɩ bʋla pɩŋ. Dɩ ŋ nɛ ŋaa ŋɩɩ, wɩaa jaŋ vɛŋ woruŋ a pɩŋ, dɩ ŋ laa ŋ mɩɩsɩŋ.

²¹ Ama dɩ ŋ nɛ vɩa dɩ ŋ joŋ ŋ tɩtɩa hɛ ba nɩsɩŋ lɛ, wɩɩ-la La TƖƖNA sɩ kaa dagɛmɛ nɛ ŋ-la:

²² Ba jaŋ kɛsɛ haala-la kala sɩ hɛ Juda kuoro dɩa lɛ a kaa kʋ lɩɩ pa Babɩlɔŋ kuoro tɩntɩnnɩ-hɩasɩŋ. Haala-la jaŋ bʋla pɩŋ: ‘Ba nyɩsɩŋ nɛ a yuo diiŋ, ŋ nandɔsʋ-la lɛ ŋ sɩ joŋ ŋ yɩɛlaa hɛ. Ŋ naasɩŋ mʋʋra tuu vʋchɔɔŋ nɛ. Ŋ nandɔsʋ-la vɩaŋ ta nɛ.’

²³ Ba jaŋ kɛsɛ ŋ haalaa arɩ ŋ biiriŋ kala a kaa kʋ lɩɩ pɩ Babɩlɔŋ tɩmma-la. Ŋ ma tɩtɩa bɩ jaŋ fori ba nɩsɩŋ lɛ. Ama Babɩlɔŋ kuoro jaŋ yuo kɛnɩŋ, ka dɩ ba nyɩgɛ tabalɩŋ deeŋ dɩ ʋ dii tel.”

²⁴ Ŋɩɩ nɛ Zedikaaya bʋla pɩ Jɛrɩmaaya, “Sɩ́ leŋe dɩ nʋʋkala nɩɩ wɩaa deemba la sɩ bʋla, dɩ ŋ nɛ ŋaa ŋɩɩ, ŋ jaŋ wuo sʋʋ.

²⁵ Dɩ tɩntɩnnɩ-hɩasɩ-la nɛ nɩa arɩ mɩ dɩ ŋ bʋl wɩaa nɛ, a kɔ ŋ teeŋ a bʋl, ‘Bʋl wɩalɩŋ ŋ sɩ bʋla pɩ kuoro a pɩla arɩ wɩalɩŋ kuoro ma sɩ bʋla pɩŋ. Pʋpɔ ŋ sɩ́ kaa faala, dɩ ŋɩɩ dee la jaŋ kpʋŋ,’

²⁶ bʋla pɩba, ‘Mɩ faa sʋl kuoro nɛ dɩ ʋ bɩra sɩ́ mɩ kaa mɩɩra mʋ Jonataŋ dɩa-la dɩ mɩ sʋʋ nɩmɛ.’ ”

²⁷ Ŋɩɩ nɛ tɩntɩnnɩ-hɩasɩ-la kala kɔ Jɛrɩmaaya teeŋ a pɩɛsʋ wɩaa, ʋ bʋl ŋɩɩ tɩtɩa kuoro sɩ dagʋ a pɩba. Ŋɩɩ nɛ ba bɩra bɩ wɩɩ dɔŋ bʋla pʋ, bɛɛ wɩaa nʋʋkala bɩ ʋ dɩ kuoro sɩ bʋl wɩalɩŋ nɩa.

²⁸ Ŋɩɩ nɛ Jɛrɩmaaya ha hɛ laalɩyuoro-la sɩɩ pɔ kuoro kaala-la tʋɔŋ, a mʋ yi bʋa-la lɛ ba sɩ yuo dii Jerusalɛm.