JƐRƖMAAYA 3 - WƖA TENIŊ

¹ La TƖƖNA pɩɛsa, “Dɩ baal nɛ vɩa ʋ haala, dɩ haal-la lɩɩ mʋ jaa baal dɔŋ, baal-la sɩ laa sɩpaaŋ vɩaʋ maga dɩ ʋ bɩra mʋ chɩchɛ haal-la nɛɛ? Dɩ ʋ nɛ ŋaa ŋɩɩ, ba tinteeŋ bɩ jaŋ kɛŋ disiniŋ? Ama ma Iziral tɩŋŋaa ŋaa wɩaa a nagɛ hachɔrʋŋ nɛ, a kɛŋ hɩɩlaba yʋgɛ, aŋ lɛɛlɛ chɩchɛ dɩ ma mɩɩra kɔ mɩ teeŋ.

² Má beŋ dundol kpʋlaa nyuŋ na, lee hɛ nɩmɛ ma sɩ bɩ wʋchɔrʋmɔɔ ŋaa? Ma yie hɔŋ wombiiŋ sɛmɛ nɛ a gbɩgbɛrɛ ma hɩɩlaba. Ma nagɛ nɩaa sɩ gɔllɔɔ baarɛ tintee-hɩlɩŋ lɛ nɛ. Ma ŋaa wʋchɔrʋmɔɔ arɩ tʋɔhɛɩ wɩaa a leŋ tintee-la kɛŋ disiniŋ nɛ.

³ Ŋɩɩ nɛ tɩɩ mɩ kɛrɛ duonuŋ ŋɩɩ, a pɔ dɩ duoŋ-puso sɩ́ nɩɩ. Ama ma paala nagɛ hachɔrʋŋ nɛ, a bɩ hɩɩsɩŋ ka fá.

⁴ Lɛɛlɛ nɛ ma yɩrɛmɛ a bʋl, ‘Mɩ nyɩmma, ŋ nɛ mɩ nandɔŋɔ a chɩŋ mɩ hammiiriŋ kala lɛ a kaa kɔ.

⁵ Ŋ jaŋ na baanɩŋ la nyuŋ bʋa na-kalaa? Ŋ baanɩŋ jaŋ sii la nyuŋ a kaa mʋ wuu?’ Ŋ-la nɛ ma yie bʋl wɩaa, ama ma yie ŋaa wʋbɔŋ na-kala ma sɩ jaŋ wuo ŋaa nɛ.”

Iziral tɩŋŋaa bɩ wʋtɩtɩɩ kɛnɛ

⁶ Bʋa-la lɛ Josaaya sɩ dii kuoruŋ nɛ La Tɩɩna pɩɛsɛmɛ, “Ŋ na wɩɩ-la Iziral tɩŋŋaa sɩ bɩ wʋtɩtɩɩ kɛnɛ sɩ ŋaa nɛɛ? Ba mʋ dundolo kala sɩ leŋie nyuŋ nɛ, arɩ tɩɩ-lugu na-kala bʋbʋɔŋ a ŋaa wʋchɔrʋmɔɔ nɩmɛ.

⁷ Mɩ fa bɩɩna ba sɩ ŋaa wɩaa deemba kala, ba jaŋ mɩɩra kɔ mɩ teeŋ. Ama ba bɩ mɩɩra kɔ. Ba naambie Juda ma sɩ bɩ wʋtɩtɩɩ kɛnɛ na wɩalɩŋ kala nɛ.

⁸ Mɩ joŋ teŋ-la mɩ sɩ ŋmʋnsa a vɩvɩa Iziral mɩ sɩ jaa, ka ʋ bɩ wʋtɩtɩɩ kɛnɛ a pʋ nɛ aŋ kiru ta, a tɩŋ wʋchɔrʋmɔ-la kala ʋ sɩ ŋaa wɩaa. Ama ʋ naambie Juda ma fa sɩ bɩ wʋtɩtɩɩ kɛnɛ bɩ fawʋllʋŋ fá, aŋ ma mʋ ŋaa wʋchɔrʋmɔ-la tɩtɩa.

⁹ Iziral tɩŋŋaa fa sɩ bɩ wʋchɔrʋmɔɔ ŋaanɩŋ joŋo dɩ ʋ ŋaa wʋbɔŋ ŋɩɩ, ba kpʋkpaarɛ tabɩaa arɩ tɩɩsɩŋ a ŋaa disiniŋ a hɛ tintee-la lɛ.

¹⁰ Arɩ wɩaa deemba kala ba sɩ ŋaa ma, ama ba naambie Juda sɩ bɩ wʋtɩtɩɩ kɛnɛ bɩ mɩɩra kɔ mɩ teeŋ arɩ ʋ tʋɔŋ kala. Ama ʋ fa fugo nagɛ ʋ cheye nɛ. Mɩ-na ma TƖƖNA nɛ bʋla.”

¹¹ La TƖƖNA bɩra bʋla pɩmɛ, “Iziral tɩŋŋaa sɩ bɩ wʋtɩtɩɩ kɛnɛ nɛ ha kɛŋ tʋɔpʋla a kɩɩ Juda nɩaa ma sɩ bɩ wʋtɩtɩɩ kɛnɛ.

¹² Mʋ heele bʋl wɩɩŋ deeŋ mɩ sɩɩ bʋl, wɩɩpɔsʋŋ nagʋa dɩɩrɩŋ, ‘Ma Iziral tɩŋŋaa sɩ bɩ wʋtɩtɩɩ kɛnɛ, La TƖƖNA sɩ má mɩɩra kɔ. Mɩ bɩra bɩ jaŋ kɛŋ mɩ sɩaa chei ma nyuŋ, mɩɩ fá nɩaa nenige nɛ. Mɩ-na ma TƖƖNA nɛ bʋla. Mɩ bɩ jaŋ na baanɩŋ ma nyuŋ a kaa mʋ wuu.

¹³ Má-na sɛɩ arɩ ma cheye nɛ. Ma fa vɩa mɩ-na ma Tɩɩna Wɩa niiŋ nɛ. Ma joŋ ŋɩɩ ma sɩ chomi a pɩ vesiŋ nɛ tɩɩ-lugunuŋ bʋbʋɔŋ, aŋ vɩa dɩ ma to mɩ niiŋ. Mɩ-na ma TƖƖNA nɛ bʋla.’ ”

¹⁴ Mɩ-na ma TƖƖNA sɩ, “Ma ŋaa nɩaa sɩ bɩ wʋtɩtɩɩ kɛnɛ nɛ, má mɩɩra kɔ mɩ teeŋ. Mɩ nɛ ma bala. Mɩ jaŋ bagɩsa lɩɩsɛ nɩaa ma tʋɔŋ. Mɩ jaŋ lɩɩsɛ nɩbala taŋ kala lɛ, aŋ lɩɩsɛ nɩaa balɩa ma nyɩŋ-nɩaa tʋɔŋ a kɛmba kaa kɔ Zaayɔŋ.

¹⁵ Mɩ jaŋ pɩma sɩpaalaara-la mɩ tʋɔŋ sɩ tɔrɛ ba nyuŋ, ba jaŋ kɛŋ wʋjɩmɩŋ, a jɩŋ wɩaa bʋbʋɔsʋŋ a bibemma.

¹⁶ Mɩ-na ma TƖƖNA nɛ bɩraa bʋl: Dɩ ma nɛ faasa pʋŋa yʋgɛ tintee-la lɛ, nɩaa bɩra bɩ jaŋ bʋl mɩ niiriŋ daga-la wɩaa. Ba bɩra bɩ jaŋ bɩɩnɛ ʋ wɩaa koo a liisi ʋ wɩaa. Ba bɩra bɩ jaŋ chɛʋ ka koo a bɩra ŋaa ʋ dɔŋɔ.

¹⁷ Bʋa-la lɛ ba jaŋ yɩrɛ Jerusalɛm La Tɩɩna kuoru kpasa. Ŋɩɩ nɛ tinteyee nɩaa kala jaŋ kɔ Jerusalɛm a zil mɩ-na ma TƖƖNA. Ba bɩra bɩ jaŋ tuto ba nyuduoŋ arɩ ba tʋɔbɔmʋŋ harɩŋ.

¹⁸ Bʋa-la lɛ Juda nɩaa jaŋ mʋ pɛ Iziral nɩaa lɛ. Ba kala jaŋ to dɔŋɔ a lɩɩ wɩɩpɔsʋŋ nagʋa tintee-la a kɔ tintee-la mɩ sɩ joŋo pɩ ma naabalɩmaba ʋ ŋaa ba kʋŋ.”

¹⁹ Mɩ-na tɩtɩa nɛ fa sɩ, “Mɩ tʋɔŋ fa jaŋ tɔrɛ dɩ mɩ kɛmma a nagɛ mɩ biiriŋ, a joŋ tinteeŋ sɩ zɔmɔ woruŋ a pɩma. Tintee-la nɛ zɔmɔ kɩɩ tintee kala dʋnɩa lɛ. Mɩ fa bɩɩna ma jaŋ kɛmmɛ yɩrɛ ‘Ma Nyɩmma’, aŋ bɩra bɩ jaŋ mɩɩrɛ mɩ harɩŋ.

²⁰ Ama a nagɛ haala sɩ bɩ wʋtɩtɩɩ kɛnɛ ʋ bala teeŋ ŋɩɩ, ŋɩɩ tɩtɩa nɛ ma-na Iziral tɩŋŋaa ma bɩ wʋtɩtɩɩ kɛnɛ mɩ teeŋ. Mɩ-na ma TƖƖNA nɛ bʋla.

²¹ Nɩaa nɩɩ yel dundol kpʋlaa nyuŋ, Iziral tɩŋŋaa nɩɩ yel ŋɩɩ aŋ sʋsʋl dɩ mɩ joŋo chɛba, bɛɛ wɩaa ba yʋ mɩ-na ba TƖƖNA Wɩa wɩaa nɛ a vɩa mɩ wombiiŋ.

²² Ma ŋaa nɩa sɩ bɩ wʋtɩtɩɩ kɛnɛ nɛ, má mɩɩra kɔ mɩ teeŋ. Mɩ jaŋ vaarɛma a leŋ dɩ ma kɛŋ wʋtɩtɩɩ.” Nɩalɩŋ jaŋ bʋl, “La jaŋ kɔ ŋ teeŋ, ŋ nɛ La TƖƖNA Wɩa.

²³ Goŋ-la kala la sɩɩ ŋaa dundolluŋ nyuŋ arɩ peelee nyuŋ a kpʋkpaarɛ vʋɩyaa, laa nyɩsɛ la tɩtɩa nɛ. La TƖƖNA Wɩa dʋndʋŋa nɛ jaŋ wuo laa Iziral ta.

²⁴ A chɩŋ la hambiriŋ kala lɛ a kaa kɔ, vʋɩyaa sɩ ŋaa hɩɩsɩ kɩaa dii la naabalɩmaba lɔlʋŋ kala a ta nɛ: ba piesee, nɛsɩŋ, ba hambolibiisiŋ arɩ hantolibiisiŋ.

²⁵ Má leŋ la yaara kɛŋ la hɩɩsɩŋ pɩŋ, a leŋ la hɩɩsɩŋ diila. La ŋaa wʋbɔŋ nɛ La TƖƖNA Wɩa lɛ, la dɩ la naabalɩmaba kala. A chɩŋ la hambiiriŋ lɛ a kaa kɔ jɩnɩŋ, la bɩ La TƖƖNA Wɩa niiŋ to.”