JƐRƖMAAYA 26 - WƖA TENIŊ

Ba sɩ ba jaŋ kpʋ Jɛrɩmaaya

¹ Josaaya nanʋala Jehoyakim sɩ dii Juda tinteeŋ kuoruŋ, ʋ bɩ diene ka La TƖƖNA bʋl wɩɩŋ deeŋ a pɩ mɩ-na Jɛrɩmaaya:

² Wɩɩ-la La TƖƖNA sɩ bʋla nɛ ŋ-la: “Mʋ chɩŋ mɩ dɩɩ-bal-la kaala lɛ a bʋl wɩaa pɩ nɩalɩŋ kala sɩ hɛ Juda tasɩŋ lɛ a yie kɔ mɩ dɩɩ-bal-la a dɩdɛnnɛmɛ. Bʋl wɩalɩŋ kala mɩ sɩ bʋla pɩŋ a pɩba, sɩ́ wɩɩkala gɛllɛ ta.

³ Kapo ba jaŋ jegile nɩɩ, dɩ ba kʋŋkala bɩrɩma lɩɩ ba wʋbɔŋŋɔɔ ŋaanɩŋ lɛ. Dɩ ba nɛ ŋaa ŋɩɩ, mɩ jaŋ kɛŋ mɩ tʋɔbɩɩnaa bɩrɩmɛ. Mɩ bɩra bɩ jaŋ kɛŋ wʋlɔrʋŋ kʋ hɛ ba lɛ, wʋlɔrʋ-la mɩ fa sɩ bɩɩna dɩ mɩ kaa kʋ hɛ ba lɛ a tɩŋ wʋbɔmɔ-la ba sɩ ŋaa wɩaa.

⁴ Bʋla pɩba, ‘Wɩɩ-la mɩ-na ma TƖƖNA sɩ bʋla nɛ ŋ-la: Dɩ ma nɛ bɩ jegile nɩɩ mɩ teeŋ a to wombii-la mɩ sɩ bile dɩ ma tuto, wombii-la mɩ sɩ joŋo bil ma sɩpaaŋ,

⁵ dɩ ma nɛ bɩ mɩ wʋlaabʋllaa sɩ ŋaa mɩ tɩntɩnnaa wɩaa jegile nɩɩ, nɩalɩŋ mɩ sɩ tɩma ba kɔ ma teeŋ bʋlɩa bʋlɩa (ma sɩ́ bɩ jegile nɩɩ ba teeŋ ŋɩɩ),

⁶ ŋɩɩ-na mɩ jaŋ leŋ dɩ mɩ dɩɩ-balɩŋ deeŋ ma nagɛ taŋ-la ba sɩɩ yɩrɛ Sɩlɔ, dɩ dʋnɩa tinteyee nɩaa kala kɛŋ tabalɩŋ deeŋ yɩrɩŋ ŋmɩɛsa hɩhɛ nɩaa lɛ.’ ”

⁷ Wɩɩsʋllɩ sɩpaalaaraa, Wɩa wʋlaabʋllaa arɩ nɩalɩŋ kala nɩɩ wɩalɩŋ Jɛrɩmaaya sɩ bʋla La TƖƖNA dɩɩ-balɩŋ lɛ.

⁸ Ama Jɛrɩmaaya fa sɩ bʋl wɩalɩŋ La TƖƖNA sɩ bʋla pʋ a pɩ nɩalɩŋ a dɛrɛ, ŋɩɩ nɛ Wɩɩsʋllɩ sɩpaalaaraa, Wɩa wʋlaabʋllaa arɩ nɩalɩŋ kala guu sii kɛnʋ aŋ bʋl, “Ʋ maga ŋ sʋʋ nɛ.

⁹ Bɛɛ nɛ tɩɩ ŋ bʋl wɩaa La TƖƖNA yɩrɩŋ lɛ, arɩ Wɩa dɩɩ-balɩŋ deeŋ jaŋ nagɛ Sɩlɔ, dɩ ba vɩa tabalɩŋ deeŋ ma ta dɩ ʋ pɩŋ hoi?” Ŋɩɩ nɛ nɩalɩŋ kala kʋ golli Jɛrɩmaaya La TƖƖNA dɩɩ-bal-la lɛ.

¹⁰ Juda tinteeŋ tɩntɩnnɩ-hɩasɩŋ sɩ nɩɩ wɩaa deemba, ba lɩɩ kuoru dɩa lɛ a mʋ La TƖƖNA dɩɩ-balɩŋ, a hɔŋ ba dɩ-hɔnɔɔ La TƖƖNA dɩɩ-bal-la boi-baal falɩɩ-la niiŋ.

¹¹ Ŋɩɩ nɛ Wɩɩsʋllɩ sɩpaalaaraa arɩ Wɩa wʋlaabʋlla-la bʋla pɩ tɩntɩnnɩ-hɩasɩ-la arɩ nɩalɩŋ kala, “Baala deeŋ maga dɩ la kpʋʋ nɛ, bɛɛ wɩaa ʋ bʋl wɩalɩŋ sɩ bɩ zɔŋ nɛ a tɩgɛ tabalɩŋ deeŋ lɛ. Ma tɩtɩa dɩgɩlaa nɩɩ wɩalɩŋ nɛ.”

¹² Ŋɩɩ nɛ Jɛrɩmaaya ma bʋla pɩ tɩntɩnnɩ-hɩasɩ-la arɩ nɩalɩŋ kala: “La TƖƖNA nɛ tɩmmɛ dɩ mɩ kʋ bʋl wɩalɩŋ kala ma sɩ nɩa a tɩgɛ dɩa deeŋ arɩ tabalɩŋ deeŋ kala lɛ.

¹³ Lɛɛlɛ, má bɩrɩmɛ ma mɛlɛ arɩ ma wʋŋaalaa aŋ to ma TƖƖNA Wɩa niiŋ. Dɩ ma nɛ ŋaa ŋɩɩ, La TƖƖNA jaŋ kɛŋ ʋ tʋɔbɩɩnaa bɩrɩmɛ, ʋ bɩra bɩ jaŋ kɛŋ wʋlɔrʋ-la wɩaa ʋ sɩ bʋla kʋ hɛ ma lɛ.

¹⁴ Ama mɩ-na hɛ ma nɩsɩŋ lɛ nɛ, ma ŋaamɛ wɩɩ-la kala ma sɩ bene dɩ ʋ zɔmɔ aŋ ŋaa ʋ bʋa lɛ.

¹⁵ Ma ta jɩŋ, dɩ ma nɛ kpʋmɛ, nʋʋ sɩ bɩ wɩɩ cheye chalɩŋ nɛ jaasɛ ŋɩɩ, a lɔgɛ wɩaa hɛ ma tɩtɩa arɩ tabalɩŋ deeŋ arɩ nʋʋkala sɩ hɛ ʋ lɛ. Wʋtɩtɩɩ, La TƖƖNA nɛ tɩmmɛ dɩ mɩ kʋ bʋl wɩaa deemba kala dɩ ma nɩɩ.”

¹⁶ Ŋɩɩ nɛ tɩntɩnnɩ-hɩasɩ-la arɩ nɩalɩŋ kala bʋla pɩ Wɩɩsʋllɩ sɩpaalaaraa arɩ Wɩa wʋlaabʋlla-la, “Ma bɩ maga dɩ ma kpʋ baala deeŋ. Ʋ bʋl wɩaa La TƖƖNA Wɩa yɩrɩŋ lɛ nɛ a pɩla.”

¹⁷ Ŋɩɩ nɛ tintee-la nɩhɩasɩŋ dɔnsʋŋ kʋ lɩɩ chɩŋ sɩpaaŋ a bʋla pɩ nɩalɩŋ sɩ hilime,

¹⁸ “Mɩka sɩ lɩɩ taŋ-la ba sɩɩ yɩrɛ Mɔrɛsɛf fa bʋl wɩaa Wɩa doluŋ lɛ nɛ bʋa-la lɛ Hezikaaya sɩ ŋaa Juda tinteeŋ kuoro. Ʋ fa bʋla pɩ Juda nɩaa kala: Wɩɩ-la La TƖƖNA doluŋ kala Tɩɩna sɩ bʋla nɛ ŋ-la, ‘Ba jaŋ pɛrɛ Zaayɔŋ a nagɛ baga. Jerusalɛm jaŋ pɩŋ jikpeeŋ a nagɛ pupuluŋ. Wɩa dɩɩ-bal-la sɩ chɩŋ dundolo-la nyuŋ jaŋ lugi a nagɛ duuŋ.’

¹⁹ Juda tinteeŋ kuoro Hezikaaya koo Juda nʋʋ dɔŋ fa kpʋʋ nɛɛ? Hezikaaya fá La TƖƖNA nɛ, a sʋlʋ dɩ ʋ pɛ ʋ lɛ. Ʋ sɩ ŋaa ŋɩɩ, La TƖƖNA leŋ wʋlɔrʋnʋ-la ʋ fa sɩ sɩ ʋ jaŋ ŋaa ba lɛ nɛ. Laa chɛ dɩ la lɛrɛ wɩɩ sɩ chaasa lɔrɛ nɛ a kʋ hɛ la tɩtɩa lɛ.”

²⁰ (Baal kʋbala ma nɛ fa hɛ nɩmɛ baa yɩrɛ Yuria, ʋ fa ŋaa Sɛmaaya nanʋala nɛ a lɩɩ Kɩrɩaf Jɩarɩm. Ʋ ma fa bʋl wɩaa La TƖƖNA doluŋ lɛ nɛ. Ʋ bʋl wɩaa deemba tɩtɩa nɛ a tɩgɛ tabalɩŋ deeŋ arɩ tinteeŋ deeŋ lɛ, arɩ Jɛrɩmaaya sɩ bʋl ŋɩɩ.

²¹ Kuoro Jehoyakim arɩ ʋ laalɩyuori-hɩasɩŋ arɩ ʋ tɩntɩnnɩ-hɩasɩŋ fa sɩ nɩɩ wɩaa deemba, kuoro faa chɛ ʋ kpʋʋ. Ama Yuria nɩɩ, ŋɩɩ nɛ fawʋllʋŋ kɛnʋ, ʋ lɩɩ fá mʋ Ijipiti tinteeŋ.

²² Kuoro Jehoyakim ha tɩŋ Ɛlɩnataŋ sɩ ŋaa Akɩbɔ nanʋala ʋ dɩ nɩaa dɔnsʋŋ ba mʋ Ijipiti tinteeŋ.

²³ Ba mʋ kɛŋ Yuria Ijipiti tinteeŋ lɛ, a kaa kʋ pɩ kuoro Jehoyakim. Ʋ laaʋ a kpʋʋ arɩ tokobiiŋ ba joŋu hugi lee-la ba sɩɩ hugi nɩalɩŋ sɩ bɩ nɩ-yuŋŋie ŋaa.)

²⁴ Safaŋ nanʋala Ahɩkam ma nɛ fa sii chɩŋ Jɛrɩmaaya harɩŋ, ŋɩɩ nɛ ba bɩ ʋ joŋo hɛ nɩalɩŋ nɩsɩŋ lɛ dɩ ba kpʋʋ.