JƐRƖMAAYA 2 - WƖA TENIŊ

Iziral tɩŋŋaa vɩa Wɩa

¹ La TƖƖNA fa bʋl wɩaa pɩmɛ. Ʋ sɩ,

² “Mʋ heele bʋla pɩ Jerusalɛm nɩaa kala, mɩ liise yi ŋɩɩ ma fa sɩɩ to mɩ nɛ ma hambiriŋ lɛ. Ma fa chomi nɛ woruŋ a nagɛ nɩa sɩ cho ʋ ha-falɩŋ ŋɩɩ, a to mɩ harɩŋ tintee-hɩlɩŋ lɛ, gɩrɩpɩrɩŋ tʋɔŋ.

³ Iziral tɩmma, ma fa bɩ disiniŋ kɛnɛ mɩ-na ma TƖƖNA teeŋ. Ma nɛ mɩ laa sɩpaaŋ lɩɩsɛ, a nagɛ paara sɩ ŋaa ʋ kʋdii falaa. Mɩ fa joŋ cheeriŋ pɩ nɩalɩŋ kala sɩɩ dɔgɩsɛma nɛ a leŋ wʋlɔrʋŋ faasa jʋʋba. Mɩ-na ma TƖƖNA nɛ bʋla.”

⁴ Iziral tɩmma, Jekɔb doho nɩaa, ma Iziral doho nyɩŋ-nɩaa kala, má jegile nɩɩ wɩɩ-la La TƖƖNA sɩɩ chɛ ʋ bʋl.

⁵ Wɩɩ-la La TƖƖNA sɩ bʋla nɛ ŋ-la, “Wʋbɛɛ nɛ mɩ ŋaa chei ma naabalɩmaba, ba vɩamɛ a leŋ la pɛgɛ bol? Ba to vʋɩyaa sɩ ŋaa kʋpɛɩba harɩŋ nɛ a ma kʋ ŋaa nɩpɛɩba.

⁶ Ba bɩ pɩɛsa chɛmɛ a bʋl, ‘Nɩɩ nɛ La TƖƖNA hɛ?’ Nɩɩ-la sɩ laala ta Ijipiti tɩŋŋaa nɩsɩŋ lɛ a kɛnla lɩɩ, a vɛŋ tintee-hɩlɩŋ tʋɔŋ. Tintee-la fa ŋaa tintee-hɩlɩɩ nɛ, a kɛŋ buotuonuŋ sɩ luŋie. Duonuŋ bɩ nɩmɛ ka nɩɩ, lee-la sɩ bire, nʋʋkala bɩ nɩmɛ ka vɛŋ. Nʋʋkala ma bɩ lee-la hɔnɔ.

⁷ Mɩ kɛmma kaa kʋ jʋʋ tinteeŋ sɩ sɩma nɛ, dɩ ma dii ʋ kɩaa arɩ kʋzɔŋ na-kala sɩ hɛ ʋ lɛ a nɩɩ sɩma. Ama ma kʋ jʋʋ nɛ a ŋaa disiniŋ hɛ mɩ tintee-la mɩ sɩ joŋo pɩma lɛ, a leŋ mɩ dɩ-tɩɩlɩŋ nagɛ kʋŋ mɩ sɩɩ kɩsʋ.

⁸ Wɩɩsʋllɩ sɩpaalaaraa bɩ pɩɛsaa chɛmɛ, a bʋl, ‘Nɩɩ nɛ La TƖƖNA hɛ?’ Nɩalɩŋ sɩ maga dɩ ba dagɛ nɩaa wombii-la mɩ sɩ bile dɩ ba tuto, bɩ mɩ jɩŋ. Sɩpaalaaraa ma vɩa mɩ niiŋ nɛ. Mɩ wʋlaabʋllaa ma mɩɩra bʋbʋl wɩaa vene-la ba sɩɩ yɩrɛ Baal yɩrɩŋ lɛ, aa to vʋɩyaa sɩ ŋaa kʋpɛɩba.

⁹ Ŋɩɩ wɩaa, mɩ jaŋ dagɛ wɩalɩŋ mɩ sɩ kɛnɛ dɩ mɩ bʋl ma teeŋ, a dagɛ wɩalɩŋ mɩ sɩ kɛnɛ dɩ mɩ bʋl ma doho nɩaa arɩ ba biiriŋ ma teeŋ. Mɩ-na ma TƖƖNA nɛ bʋla.

¹⁰ Má mʋ tintee-la ba sɩɩ yɩrɛ Saapʋrɔs sɩ hɛ wɩɩpɔsʋŋ dɩɩrɩŋ lɩɩŋ gollo chu, koo ma tɩŋ nʋʋ dɩ ʋ mʋ wɩɩpɔsʋŋ dɩɩrɩŋ tintee-la ba sɩɩ yɩrɛ Kɛda a bee na dɩ ba ha ŋaa wʋdosunuŋ deemba kʋŋ nɩmɛ.

¹¹ Tintee-kala nɩaa tuo a vɩa ba vesiŋ aŋ mɩɩra tuto veŋ-wogo. (Ba vesi-la ŋaa kʋpɛɩ ma nɛ.) Ama mɩ nɩaa-na joŋ yɩrɩ-zɔŋ-la mɩ sɩ laa pɩba, a mɩɩra pɩ vʋɩyaa sɩ ŋaa kʋpɛɩba nɛ.

¹² Wɩa-nyuŋ kɩaa, má leŋ dɩ ma niiree maa wɩɩŋ deeŋ lɛ, má digili arɩ tʋɔ-chei-balɩŋ. Mɩ-na ma TƖƖNA nɛ bʋla.

¹³ Wʋbɔŋŋɔɔ balɩa nɛ mɩ nɩaa ŋaa. Mɩ nɩɩ pɩba mɩɩsɩŋ a nagɛ lɩɩ-bulo, ka ba vɩamɛ, aŋ lu ba tɩtɩa vilee, vil-kpaarɩŋ lɩɩŋ sɩ bɩ ba tʋɔŋ wuo chɩŋ.

¹⁴ Iziral tɩŋŋaa bɩ nɩa kala tɩntɩnna ŋaa, ba bɩ yoŋ-biiriŋ ma ŋaa. Bɛɛ nɛ saa tɩɩ ba dʋndɔŋŋɔɔ yuo kɛsɛba viiri?

¹⁵ Ma dʋndɔŋŋɔɔ ŋaa goŋ nɛ ma nyuŋ a nagɛ naachigee sɩ yele, ba chei ma tinteeŋ nɛ. Ma tasɩŋ kala nɛ nyiniŋ dii, ba lɩɩ vɩa ta.

¹⁶ Memfis arɩ Tapanhɛs baalaa fʋŋ ma nyu-gbansɩŋ nɛ a hɛ ma hɩɩsɩŋ.

¹⁷ Ma nɛ lɛrɛ wɩɩŋ deeŋ kʋ hɛ ma tɩtɩa lɛ, ma sɩ vɩa mɩ-na ma TƖƖNA Wɩa, mɩ nɛ fa kɛmma vɩvɛŋ.

¹⁸ Lɛɛlɛ, wʋbɛɛ nɛ ma bɩɩnɛ ma jaŋ na dɩ ma nɛ mʋ Ijipiti tinteeŋ a nyʋa fuo-la ba sɩɩ yɩrɛ Naayɩl lɩɩŋ? Koo dɩ ma nɛ mʋ Asiiria tinteeŋ a nyʋa fuo-la ba sɩɩ yɩrɛ Yufireti lɩɩŋ?

¹⁹ Ma tɩtɩa wʋbɔŋŋɔɔ nɛ jaŋ gʋra diima. Ma sɩ mɩɩrɛ mɩ harɩŋ, ŋɩɩ jaŋ leŋ dɩ ma laa cheeriŋ. Lɛɛlɛ nɛ ma jaŋ jɩŋ arɩ ʋ ŋaa wʋbɔŋ nɛ, a ŋaa wʋtɔɔ, ma sɩ vɩamɛ a bɩ mɩ-na ma TƖƖNA Wɩa ka fá. Mɩ-na ma TƖƖNA doluŋ kala Tɩɩna nɛ bʋla.

²⁰ Faafaa kala nɛ ma vɩamɛ a bɩ mɩɩ to. Ma fa sɩ, ‘La bɩ jaŋ tɩma pɩŋ.’ Dundolo kala nyuŋ arɩ tɩɩ-lugu kala bʋbʋɔŋ nɛ ma kpʋkpaarɛ vesiŋ.

²¹ Mɩ fa leŋe ma chɩŋ nɛ a nagɛ girep tɩa naakeliŋ sɩ chaasa zɔŋ ba kere chɔnsɛ. Bɛɛ nɛ saa tɩɩ ma mɩɩra chɩŋ mɩ lɛ a nagɛ girep tɩa sɩ yalɩba a bɩ bʋbʋɔ kɛnɛ?

²² Dɩ ma nɛ paala kɛŋ sɛhɩyɛ arɩ chɛnfɛnnɛɛ yʋgɛ a fo ma tɩtɩa ma, mɩ haa na ma cheeriŋ sɩ hɛ ma lɛ nɛ. Mɩ-na ma TƖƖNA Wɩɩjarɩbakɔ nɛ bʋla.

²³ Ɛɛ nɛ saa ma jaŋ wuo bʋl, ‘La bɩ disiniŋ ŋaa chei la tɩtɩa, la bɩ vene-la ba sɩɩ yɩrɛ Baal kpaara?’ Má beŋ wɩalɩŋ ma sɩ ŋaa fuonaaŋ lɛ. Má kɛŋ wɩalɩŋ ma sɩ ŋaa bɩɩna na. Ma nagɛ bʋntaŋŋɩ-nɩɩŋ sɩ gɔllɔ fá a chɩchɛ belliŋ dɩ ba jɩlʋ nɛ.

²⁴ Ma nagɛ kaku-nɩɩŋ sɩ werige a hɛ tintee-hɩlɩŋ lɛ nɛ a gɔllɔ fá ŋmoo mɩɩsɩŋ chɩchɛ belliŋ. Dɩ ʋ nɩɩ chɛ dɩ bele jɩlʋ, nʋʋkala bɩ ʋ wuo kɛrɛ. Dɩ bele kala nɩɩ chɛʋ, ʋ yie bɩ hɛɛŋ na aŋ jɩjɩlʋ.

²⁵ Má sɩ́ fá dɩ ma naasɩŋ dii dɛrɛ, dɩ ma yikorusuŋ ma hɩl. Ama, ma fa sɩ, ‘La bɩ jaŋ wuo mɩɩrɛ harɩŋ, la cho tintee-wogusuŋ vesiŋ nɛ. La jaŋ to ba harɩŋ.’

²⁶ A nagɛ ba sɩ yie kɛŋ gaara hɩɩsɩŋ kɛnʋ ŋɩɩ, ŋɩɩ nɛ hɩɩsɩŋ jaŋ kɛŋ Iziral tɩŋŋaa, ba kuoru-balaa, ba tɩntɩnnɩ-hɩasɩŋ, ba Wɩɩsʋllɩ sɩpaalaaraa arɩ ba Wɩa wʋlaabʋllaa kala.

²⁷ Ba yie bʋla pɩ tɩa, ‘Ŋ nɛ ŋaa la nyɩmma,’ a bʋla pɩ tabɩɩŋ ma, ‘Ŋ nɛ ŋaa la naaŋ.’ Ba joŋ ba harɩŋ yɩamɛ nɛ, ba sɩpaaŋ tuo mɩ lɛ. Ama dɩ wɩaa nɛ jʋʋba, ba yie bʋla pɩmɛ, ‘Kʋ laala ta.’

²⁸ Nɩɩ nɛ vesi-la ma sɩ ŋaa pɩ ma tɩtɩa hɛ? Má leŋ dɩ ba kʋ laama ta dɩ wɩaa nɛ jʋʋma, bɛɛ wɩaa ma kɛŋ vesiŋ yʋgɛ nɛ woruŋ a nagɛ Juda tasɩŋ sɩ yʋga ŋɩɩ.

²⁹ Wʋbɛɛ nɛ ma kɛŋ dɩ ma bʋl mɩ teeŋ? Ma kala vɩamɛ nɛ. Mɩ-na ma TƖƖNA nɛ bʋla.

³⁰ Mɩ fa dɔgɩsɛ ma nɩaa nɛ a chɩchɛ dɩ mɩ kɛmba tʋra kɩɩ nɛ, ama ŋɩɩ ŋaa pɛɩ nɛ. Ba fa bɩ mɩ teeŋ jegile nɩɩ, aŋ kpʋ ma Wɩa wʋlaabʋllaa a nagɛ naachigiŋ sɩ hoso a kpʋ nɩaa.

³¹ Iziral tɩmma, má jegile nɩɩ wɩɩ-la mɩ sɩɩ pɩɛsɛma: Mɩ wɩaa hɛyɛ ma teeŋ a nagɛ tintee-hɩlɩŋ wɩaa sɩ hɛyɛ ŋɩɩ nɛ, koo mɩ wɩaa lɔrɛ ma teeŋ a nagɛ birimiŋ wɩaa sɩ lɔrɔ ŋɩɩ nɛ? Bɛɛ nɛ saa tɩɩ ma bʋl: La laa la tɩtɩa nɛ ŋ nɩsɩŋ lɛ dɩ la gɔllɔ ta jɩa, a bɩra bɩ jaŋ mɩɩra kɔ ŋ teeŋ?

³² Hatolo jaŋ wuo yʋ ʋ yaraa kpɩɛraa lɛɛ, koo ha-falɩŋ jaŋ wuo yʋ ʋ ha-fal-gɛrɩŋ laalɩŋ? Ama mɩ nɩaa paala yʋ mɩ wɩaa nɛ a dieni.

³³ Ma chaasa jɩŋ baalaa chɛnɩŋ nɛ woruŋ. Hachɔrʋŋ wajɩa ma tɩtɩa jaŋ wuo gʋnnɛ wɩaa ma teeŋ.

³⁴ Ma gɛnnɩŋ kala nɛ suo arɩ summo-la sɩ bɩ wɩɩkala cheye chalɩŋ, ka ma bɩ ba na dɩ ba bori ma dɩɩsɩŋ jʋjʋʋ.

³⁵ Wɩaa deemba kala lɛ ma ha yie bʋl, ‘La bɩ wɩɩkala cheye, La TƖƖNA bɩ baanɩŋ na la nyuŋ.’ Mɩ ha jaŋ dii ma sarɩya a dɔgɩsɛma, a tɩŋ ma sɩ sɩ, ‘La bɩ wʋbɔŋ kala ŋaa.’

³⁶ Bɛɛ nɛ tɩɩ ma bɩ dɩ-bala chɩna aŋ kɛŋ ma wʋŋaalaa bɩbɩrɩmɛ ŋɩɩ? Asiiria tɩŋŋaa fa sɩ leŋe ma dii hɩɩsɩŋ ŋɩɩ, ŋɩɩ tɩtɩa nɛ Ijipiti tɩŋŋaa ma jaŋ leŋ dɩ ma dii hɩɩsɩŋ.

³⁷ Ma jaŋ paa ma nɩsaa chʋŋ ma nyuŋ lɛ a lɩɩ tinteeŋ lɛ, bɛɛ wɩaa mɩ-na ma TƖƖNA vɩa nɩalɩŋ lɛ ma sɩ joŋ ma yɩɛlaa hɛ nɛ. Ba bɩ jaŋ pɛ ma lɛ.”